ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​លើក​បម្រាម​ធ្វើ​ដំណើរ​​ចំពោះ​ប្រទេស​ចំនួន​៦​រួម​ទាំង​សហរដ្ឋ​អាមេរិក


រូបឯកសារ៖ ទេសចរ​បរទេស​ឡើង​ជិះ​យន្ដហោះ​របស់​ក្រុមហ៊ុន Edelweiss Air ក្នុង​ដំណើរ​ទៅ​កាន់​ទីក្រុង Zurich ប្រទេស​ស្វ៊ីស នៅ​អាកាសយានដ្ឋាន​អន្តរជាតិ​ភ្នំពេញ ថ្ងៃ​សុក្រ​ ទី​២៣ ខែមេសា ឆ្នាំ​២០២០។

ប្រទេស​កម្ពុជា នៅ​ថ្ងៃ​ពុធ​នេះ បាន​សម្រេច​អនុញ្ញាត​ឲ្យ​អ្នក​ដំណើរ​មក​ពី​ប្រទេស​ចំនួន​៦​ អាច​ធ្វើ​ដំណើរ​ចូល​កម្ពុជា​វិញ​បាន​ បន្ទាប់​ពីបាន​ផ្អាកមិន​ឲ្យ​ជន​បរទេស​មក​ពី​ប្រទេស​ទាំង​នោះ ចូលដោយ សារការ​ព្រួយបារម្ភ​អំពី​ការ​ឆ្លង​រីករាល​ដាល​នៃ​ជំងឺ​កូវីដ​១៩​អស់​រយៈពេល​ជិត​២​ខែ​កន្លង​មក។ ​នេះ​បើ​យោង​តាម​សេចក្តី​ប្រកាស​ព័ត៌មាន​របស់​ក្រសួង​សុខាភិបាល​កម្ពុជា​ដែល​បាន​ចេញ​ផ្សាយ​នៅ​ថ្ងៃ​ទី​២០​ខែ​ឧសភា​នេះ។​

ប្រទេស​ទាំង​៦​នោះ​រួម​មាន សហរដ្ឋ​អាមេរិក បារាំង អាល្លឺម៉ង់ អ៊ីតាលី អេស្ប៉ាញ និង​អឺរ៉ង់ ដែល​សុទ្ធ​តែ​ជា​ប្រទេសមាន​ករណី​ឆ្លង​ជំងឺ​កូវីដ​១៩​នេះ​ច្រើន​ជាង​គេ​ក្នុង​ពិភពលោក​នា​ពេល​បច្ចុប្បន្ន។​

ការលើក​បម្រាម​ធ្វើ​ដំណើរទាំង​តាម​ផ្លូវ​អាកាស ផ្លូវ​គោក និង​ផ្លូវ​ទឹក​ចូល​កម្ពុជា​សម្រាប់​អ្នកធ្វើ​ដំណើរ​មក​ពី​ប្រទេស​ទាំង​៦​នេះ​ ធ្វើ​ឡើង​៣​ថ្ងៃ​ប៉ុណ្ណោះ ក្រោយ​ពី​កម្ពុជា​បាន​ប្រកាស​ថា អ្នក​ឆ្លង​ជំងឺ​នេះ​ទាំង​១២២​នាក់​នៅ​កម្ពុជា​បាន​ជះសះស្បើយ​អស់​ហើយ ហើយ​មិន​មាន​ករណី​ឆ្លង​ថ្មី​នៃ​ជំងឺ​នេះ​ក្នុង​ប្រទេសក្នុង​រយៈពេល​ជាង​១​ខែ​ចុង​ក្រោយ​នេះ។​

ប៉ុន្តែ​សេចក្តី​ប្រកាស​របស់​ក្រសួង​សុខា​ភិបាល​បញ្ជាក់​ថា​ ​គ្រប់​អ្នក​ដំណើរ​ទាំង​អស់​ដែល​ចូល​មក​ប្រទេស​កម្ពុជា ទាំង​ជនជាតិ​ខ្មែរ​ ទាំង​ជន​បរទេស​ត្រូវ​តែ​មាន​វិញ្ញា​បនបត្រ​បញ្ជាក់​សុខភាព​ដែល​បញ្ជាក់​ថា​ ​ពួកគេ​គ្មាន​មេរោគ​ ឬ​វីរុស​កូវីដ​១៩​ ​ចេញ​ដោយ​អាជ្ញាធរ​សុខាភិបាល​ដែល​ទទួល​ស្គាល់​ដោយ​រដ្ឋាភិបាល​នៃ​ប្រទេស​ទាំង​នោះ​ក្នុង​រយៈពេល​៧២​ម៉ោង។​

អ្នក​ដំណើរ​ដែល​ជា​ជន​បរទេសក៏​ត្រូវ​មាន​ឯកសារ​ធានា​រ៉ាប់រង​សុខភាព​មាន​ទឹក​ប្រាក់​យ៉ាង​តិច​៥​ម៉ឺន​ដុល្លារ​អាមេរិក​ផង​ដែរ ក្នុង​អំឡុង​ពេល​ស្នាក់​នៅ​កម្ពុជា ​លើក​លែង​តែ​មន្ត្រី​ការទូត​ និង​មន្ត្រី​អង្គការ​អន្តរជាតិ​ដែលកាន់​ទិដ្ឋាការ​ការ​ទូត​ប្រភេទ​ A ​និង​ទិដ្ឋាការ​ផ្លូវការ​ប្រភេទ​ B របស់​កម្ពុជា។

អ្នក​ដំណើរ​ទាំង​អស់ដែល​ធ្វើ​ដំណើរ​ចូលមក​ដល់​ប្រទេស​កម្ពុជា​នឹង​ត្រូវ​បញ្ជូន​ទៅ​មណ្ឌល​រង់​ចាំ​ដើម្បី​ធ្វើ​តេស្ត​បញ្ជាក់ថា ​មិន​មាន​វីរុស​កូវីដ១៩​ និង​ត្រូវ​រង់ចាំ​ទទួល​លទ្ធផល​ពី​មន្ទីរ​ពិសោធន៍​ប៉ាស្ទ័រ​របស់​កម្ពុជា។​

នេះ​បើ​ផ្អែក​តាម​សេចក្តី​ប្រកាស​ព័ត៌មាន​របស់​ក្រសួង​សុខាភិបាល​កម្ពុជា​ ​ក្រោយ​ពី​មាន​ចំណារ​យល់​ព្រម​ពី​លោក​នាយក​រដ្ឋមន្ត្រី​ហ៊ុន សែន​កាលពីថ្ងៃ​ទី១៩​ឧសភា៕

តួលេខនៃករណីឆ្លងជំងឺកូវីដ១៩

XS
SM
MD
LG