ភ្ជាប់​ទៅ​គេហទំព័រ​ទាក់ទង

ការព្យួរ​អភ័យ​ឯកសិទ្ធិ​តំណាងរាស្ដ្រ​ជា​ការ​ព្យាយាម​គាប​គណបក្ស​ប្រឆាំង


អ្នកគាំទ្រ​គណបក្ស​សម រង្ស៊ី​ ងើយ​មើល​អ្នក​មើល​ពី​លើ​ ក្នុងការ​ដើរ​ក្បួន​ដង្ហែរ​មួយ​នៅ​រាជធានី​ភ្នំពេញ។​

អ្នក​នាំពាក្យ​គណបក្សសម ​រង្ស៊ី​ ជា​គណបក្ស​ជំទាស់ ​និង​មន្ដ្រី​អង្គការ​ក្រៅ​រដ្ឋាភិបាល​បាន​និយាយ​ស្របគ្នា​នៅ​ថ្ងៃអង្គារ​នេះ​ថា ​ការព្យួរ​អភ័យ​ឯកសិទ្ធិ​តំណាងរាស្ដ្រ​លោក​ចាន់ ​ចេង​គឺ​ជា​ការ​ព្យាយាម​ហ៊ុំព័ទ្ធ​ប្រជាប្រិយភាព​គណបក្ស​គូ​ប្រជែង​ ពី​ខាង​គណបក្ស​កាន់​កាប់​រដ្ឋាភិបាល​គឺ​គណបក្ស​ប្រជាជន​កម្ពុជា។

លោក​ចាន់​ ចេង​ត្រូវ​រដ្ឋសភា​សម្រេច​ព្យួរ​អភ័យ​ឯកសិទ្ធិ​ក្នុង​កិច្ច​ប្រជុំ​វិសាមញ្ញ​មួយ​នៅ​ថ្ងៃ​នេះ​ តាម​សំណើ​របស់​តុលាការ​ខេត្ត​កណ្តាល​ ដើម្បី​អនុញ្ញាត​ឲ្យ​តុលាការ​បើក​នីតិ​វិធី​ច្បាប់​ ប្រឆាំង​ទៅ​នឹង​រូបលោក​ពាក់ព័ន្ធ​នឹង​ការ​រំដោះ​ជន​ជាប់​ឃុំ​ឈ្មោះ​មាស ​ប៉េង​ ខណៈ​ដែល​លោក​រង​ការ​ចោទ​ប្រកាន់​ទាក់ទង​នឹង​ទំនាស់​ដីធ្លី​ជាមួយ​នឹង​មន្ដ្រី​គណបក្ស​ប្រជាជន​កម្ពុជា​មួយ​រូប។

លោកយឹម ​សុវណ្ណ ​តំណាងរាស្ដ្រ​និង​ជា​អ្នក​នាំពាក្យ​គណបក្ស​សម ​រង្ស៊ី ​បាន​ហៅ​ការ​ព្យួរ​អភ័យ​ឯកសិទ្ធិ​តំណាងរាស្ដ្រ​នៅ​ក្នុង​គណបក្ស​ខ្លួន​នោះ​ថា​ គឺ​ជា​ការ​បង្ក​ការ​រំខាន​ទៅ​ដល់​បក្ស​ជំទាស់​ ហើយ​ជា​ការ​រុញ​ច្រាន​កម្ពុជា​ឲ្យ​ចូល​ក្នុង​ជ្រលង​នៃ​របប​ផ្ដាច់​ការ។

«គាត់​ប្រឹងប្រែង​ដើម្បី ​ទប់ស្កាត់​ប្រជាប្រិយភាព​គណបក្ស ​បង្ក​ការរំខាន​ទៅ​ដល់​គណបក្ស​សម ​រង្ស៊ី។ ​ធ្វើ​នេះ​មិន​ត្រឹម​តែ​បំបាក់​ស្មារតី​គណបក្ស​ប្រឆាំង​ទេ ​គឺ​បំបាក់​ស្មារតី​ប្រជារាស្ត្រ​ទូទាំង​ប្រទេស។ ​គណបក្ស​កាន់​អំណាច​កំពុង​តែ​ទាញ​ប្រទេស​ឲ្យ​ធ្លាក់​ចូល​ទៅ​ក្នុង​អន្លង់​នៃ​របប​ផ្តាច់ការ​ជា​ថ្មី»។

តំណាងរាស្ត្រ​មណ្ឌល​ក្រុងភ្នំពេញ​ដដែល​ចាត់​ទុក​ថា​ ការ​សម្រេច​របស់​រដ្ឋសភា​ខ្មែរ​នៅ​ថ្ងៃ​នេះ​ គឺ​ជា​ការ​ដើរ​បញ្ច្រាស់​នឹង​លទ្ធិ​ប្រជា​ធិបតេយ្យ។

ការ​ព្យួរ​អភ័យ​ឯកសិទ្ធិ​របស់​តំណាងរាស្ដ្រ​ខេត្ត​កណ្ដាល​នៅ​ថ្ងៃ​នេះ​ធ្វើ​ឲ្យ​គណបក្ស​ជំទាស់​ធំ​ជាង​គេ​នៅ​កម្ពុជា​មួយ​នេះ​មាន​តំណាងរាស្ដ្រ​សរុប​ចំនួន​បី​រូប​ ដែល​ត្រូវ​បាន​ព្យួរ​អភ័យ​ឯកសិទ្ធិ។​ នៅ​ក្នុង​នោះ​តំណាងរាស្ដ្រ​ពីរ​រូប​ទៀត​គឺ​លោក​សម ​រង្ស៊ី ​ពាក់ព័ន្ធ​នឹង​ការ​ចោទប្រកាន់​ពី​ការ​ដក​តម្រុយ​បង្គោល​ព្រំដែន​រួម​នៃ​ប្រទេស​កម្ពុជា-វៀតណាម។​ ​តំណាងរាស្រ្ដ​មួយ​រូប​ទៀត​គឺ​លោកស្រី ​មួ ​សុខហួរ ​តំណាងរាស្រ្ដ​មណ្ឌល​ខេត្តកំពត ​ដែល​ចាញ់​ក្ដី​លោក​នាយក​រដ្ឋមន្ដ្រី​ហ៊ុន ​សែន ​នៅ​ក្នុង​បទ​បរិហារ​កេរ្ដិ៍​ ហើយ​លោក​សម ​រង្ស៊ី ​ត្រូវ​រដ្ឋសភា​ដែល​មាន​សម្លេង​លើសលុប​បំផុត​រហូត​ដល់​៩០​សម្លេង​ពី​ខាង​គណបក្ស​ប្រជាជន​កម្ពុជា​សម្រេច​បណ្ដេញ​ចេញ​ពី​សមាជិក​សភា។

លោក​អ៊ូ​ វីរៈ ​នាយក​មជ្ឈមណ្ឌល​សិទ្ធិមនុស្ស​កម្ពុជា​ក៏​បាន​បកស្រាយ​ដែរ​ថា​ ការព្យួរ​អភ័យ​ឯកសិទ្ធិ​របស់​លោក​ចាន់ ​ចេង​កើត​ចេញ​ពី​ចេតនា​បង្ក​គំនាប​លើ​គណបក្ស​ជំទាស់​ដែរ។

«ការ​ដក​អភ័យ​ឯកសិទ្ធិ​លោក​ចាន់ ​ចេង​នេះ​គឺ​ជា​ការ​បង្ហាញ​សាច់ដុំ​បន្ដ​ទៀត​ថា​ គណបក្ស​កាន់​អំណាច​មាន​អំណាច​គ្រប់គ្រាន់​ក្នុង​ប្រទេស​កម្ពុជា​ ហើយ​គាបសង្កត់​លើ​សម្លេង​គណបក្ស​ប្រឆាំង»។

លោក​អ៊ូ ​វីរៈ​ចាត់​ទុក​ថា ​ការ​ធ្វើ​បែប​នេះ​នឹង​មិន​បាន​ជួយ​លើក​មុខ​លើក​មាត់​ប្រទេស​កម្ពុជា​នៅ​ក្នុង​ដំណើរ​ឆ្ពោះទៅ​រក​លទ្ធិ​ប្រជាធិបតេយ្យ​ល្អ​ប្រសើរ​នោះ​ទេ។

លោក​ជឿ​ថា ​នេះ​គឺ​ជា​ចេតនា​នយោបាយ​នៃ​គណបក្ស​កាន់​អំណាច។

«រឿង​នេះ​ជា​ទង្វើ​ស្របច្បាប់​ដើម្បី​ផលប្រយោជន៍​នយោបាយ​ផង ​និង​ជា​ទង្វើ​ផ្ដាច់ការ​ផង។​ តាម​ពិត ​ការ​ប្រើប្រាស់​ច្បាប់​បែប​នេះ​ផ្ទុយ​ទៅ​នឹង​ច្បាប់​រដ្ឋធម្មនុញ្ញ។ ​ខ្ញុំ​យល់​ថា ​ជា​រឿង​មួយ​គួរ​ឲ្យ​សោកស្ដាយ​ ហើយ​ប្រហែល​ជា​មិន​ជួយ​ឲ្យ​ប្រទេស​យើង​មាន​ការ​អភិវឌ្ឍ​ត្រឹមត្រូវ​ទេ»។

ខេត្ត​កណ្ដាល​មាន​អាសនៈ​តំណាងរាស្ដ្រ​សរុប​ចំនួន​១១​នាក់។ ​គណបក្ស​សម ​រង្ស៊ីបាន​ឈរ​នៅ​លំដាប់​ទី​២​ ដោយ​ប្រមូល​បាន​អសនៈ​ចំនួន​បី ​ពី​ការ​គាំទ្រ​របស់​អ្នក​បោះ​ឆ្នោត។ ​គណបក្ស​សិទ្ធិ​មនុស្ស​របស់​លោក​កឹម ​សុខា​បាន​ទទួល​អាសនៈ​ចំនួន​មួយ​ រី​ឯ​គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ដ្រី​ហ៊ុន ​សែន​ទទួល​បាន​៧​អាសនៈ។

នៅ​ក្នុង​ចន្លោះ​ពេល​នៃ​ការ​រង់ចាំ​ការ​បោះឆ្នោត​ថ្មី​គឺ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ ​សង្កាត់​ឆ្នាំ​ ២០១២ ​និង​ការ​បោះឆ្នោត​ជ្រើស​តាំង​តំណាងរាស្ដ្រ​ឆ្នាំ​២០១៣ ​គណបក្ស​សម ​រង្ស៊ី​ត្រូវ​គេ​មើល​ឃើញ​ថា ​បាន​រអិល​ចូល​នៅ​ក្នុង​ច្រក​ចង្អៀត​សម្រាប់​ការ​ប្រណាំង​ប្រជែង​ឆ្ពោះ​ទៅ​រក​ជ័យជំនះ។

យោង​តាម​របាយ​ការណ៍​របស់​អង្គការ​ការពារ​សិទ្ធិ​មនុស្ស​អាដហុក​ទំនាស់​ដី​ធ្លី​គឺ​ជា​រឿង​រសើប​មួយ​ក្នុង​ខេត្ត​កណ្ដាល​ ហើយ​លោក​ចាន់ ​ចេង​បាន​លូក​ដៃ​ធ្វើ​អន្ដរាគមន៍​ក្នុង​ទំនាស់​ដី​ធ្លី​ទាំង​នេះ​នៅ​ស្រុក​ពញាឮ ​ស្រុក​កណ្ដាលស្ទឹង ​និង​ស្រុក​កៀនស្វាយ ​ខេត្ត​កណ្ដាល។ ​ ប្រជាពលរដ្ឋ​ជាង​១០០០​គ្រួសារ​ក្នុង​ស្រុក​ទាំង​បី​កំពុង​ជាប់​ផុង​ក្នុង​ទំនាស់​ដីធ្លី​ជាមួយ​នឹង​មន្ដ្រី​និង​អ្នក​ជំនួញ​មាន​ឥទ្ធិពល។

លោក​ចាន់ ​សាវ៉េត ​ប្រធាន​ផ្នែក​ឃ្លាំមើល​ការ​រំលោភ​សិទ្ធិ​មនុស្ស​របស់​អង្គការ​ការពារ​សិទ្ធិ​មនុស្ស​អាដហុក ​មាន​ប្រសាសន៍​ថា ​ការ​ព្យួរ​អភ័យ​ឯក​សិទ្ធិ​តំណាងរាស្ដ្រ​បក្ស​ជំទាស់​ជា​បន្ដ​បន្ទាប់​បង្ហាញ​ថា​ អភ័យ​ឯកសិទ្ធិ​នោះ​មិន​មាន​តម្លៃ​ ឬ​ជា​អភ័យ​ឯកសិទ្ធិ​ស្ថិត​ក្នុង​គែម​នៃ​គ្រោះថា្នក់។

«បើ​សិន​ជា​អភ័យ​ឯកសិទ្ធិ​អ្នក​តំណាងរាស្ដ្រ​ផុយស្រួយ​យ៉ាង​នេះ ​ខ្ញុំ​គិត​ថា​អភ័យ​ឯកសិទ្ធិ​នោះ​មិន​មាន​តម្លៃ​អ្វី​ទេ។ ​កុំ​ថា​ឡើយ​ដក​អភ័យ​ឯកសិទ្ធិ​តំណាងរាស្ដ្រ​សម ​រង្ស៊ី ​នេះ ​បើ​ទោះ​បី​ជា​រដ្ឋសភា​ចង់​ដក​អ្នកណា​ក៏​បាន​ដែរ ​នៅ​ក្នុង​សង្គម​ប្រជាធិបតេយ្យ​ដែល​យើង​មើល​ឃើញ​តែខាង​ក្រៅ​នេះ»។

ថ្វីបើ​មាន​ការ​បកស្រាយ​យ៉ាង​នេះ ​លោក​ជាម ​យៀប ​តំណាងរាស្ដ្រ​ដែល​សំបូរ​វោហាស៍​របស់​គណបក្ស​ប្រជាជន​កម្ពុជា​ ប្រចាំ​មណ្ឌល​ខេត្ត​ព្រៃវែង​ បាន​ច្រានចោល​ការ​វាយ​តម្លៃ​ដែលចោទ​ថា​ ព្រឹត្តិការណ៍​ព្យួរ​អភ័យ​ឯកសិទ្ធិ​តំណាងរាស្ដ្រ​របស់​គណបក្ស​សម ​រង្ស៊ី​នេះ​គឺ​ជា​គោល​ការណ៍​នយោបាយ​របស់​គណបក្ស​ខ្លួន​នោះ។

«មិនមែន​ជា​ការ​គាប​សង្កត់ ​មិនមែន​នយោបាយ​អី​ទេ។ ​ជា​និច្ចកាល​ កម្ពុជា​គោរព​អនុវត្ត​ទៅ​តាម​ច្បាប់ ​ដែល​នៅ​មាន​ជា​ធរមាន។ ​មិនមែន​យក​រឿង​ហ្នឹង​ ជាង​រឿង​នយោបាយ​ទេ​ ពីព្រោះ​ថា​ គណបក្ស​សម​ រង្ស៊ី ​ខ្ញុំ​ទាយ​ថា ​បើ​ទោះ​បី​ធ្វើ​យ៉ាម៉េច​ ឲ្យ​ប្រកាច់ប្រកិន​លោក​សម ​រង្ស៊ី ​ឬ​នរណា​ក៏ដោយ​ ក៏​មិន​អាច​ឈ្នះ​គណបក្ស​ប្រជាជន​កម្ពុជា​បាន​ដែរ​ ព្រោះ​ខ្ញុំ​នៅ​មូលដ្ឋាន​ជា​រៀងរាល់​ថ្ងៃ»។

រដ្ឋធម្មនុញចែង​ថា ​តំណាងរាស្ដ្រ​នឹង​ត្រូវ​ដក​ហូត​ ឬព្យួរ​អភ័យ​ឯកសិទ្ធិ​បាន​ ល្គឹកណា​តំណាងរាស្ដ្រ​ដែល​ជាប់​ពាក់ព័ន្ធ​ ត្រូវ​គេ​រក​ឃើញ​ថា​ បាន​ប្រព្រឹត្តិ​បទល្មើស​ជាក់ស្ដែង។ ​លោក​ជាម ​យៀប​មិន​បាន​បកស្រាយ​ចំៗ​ត្រង់​ចំណុច​នេះ​ទេ​ ក៏ប៉ុន្ដែ​លោក​បក​ស្រាយ​ថា ​លោក​ចាន់ ​ចេង​បាន​ដឹក​ជញ្ជូន​«ទណ្ឌិត»​ក្នុង​រថយន្ត​របស់​ខ្លួន​គឺ​ទណ្ឌិត​ដែល​ត្រូវ​តុលាការចោទប្រកាន់​រួច​ទៅ​ហើយ​នោះ៕

XS
SM
MD
LG