លោកនាយករដ្ឋមន្រ្តី ហ៊ុន សែន នៅព្រឹកថ្ងៃពុធនេះ ប្រកាសថ្កោលទោសចំពោះការប្រើហិង្សាលើលោកសាស្រ្តាចារ្យ ស៊ុយ សារ៉េត កាលពីសប្តាហ៍កន្លងទៅ ហើយថា លោក«មានការឈឺចាប់» ដែលកម្ពុជាកើតមាននូវអំពើហិង្សាលើដងវិថីបែបនេះ។
ថ្លែងក្នុងពិធីជួបសំណេះសំណាលជាមួយកម្មករ-កម្មការិនី មកពីរោងចក្រសហគ្រាសចំនួន៥ក្នុងខណ្ឌពោធិ៍សែនជ័យ រាជធានីភ្នំពេញ លោកនាយករដ្ឋមន្រ្តីលើកឡើងថា ការប្រើហិង្សាលើអ្នកបើកបរក្នុងរឿងគ្រោះថ្នាក់ចរាចរណ៍ មិនមែនជារឿងត្រូវស្វាគមន៍នោះទេ តែលោកថា គឺជារឿងដែលត្រូវថ្កោលទោស។
លោកបញ្ជាក់ថា៖
«មិនគួរគប្បីប្រទេសកម្ពុជាយើងមានស្ថានភាពបែបនេះទេ ហើយបែបនេះមិនមែនជាសីលធម៌របស់មនុស្សទេ តែនេះគឺជាប្រភេទដែលយើងត្រូវតែបញ្ចៀស កុំឲ្យក្លាយទៅជាប្រទេសដែលមានអនាធិបតេយ្យ ហើយមានការសម្លាប់មនុស្សក្រៅប្រព័ន្ធបែបនេះឲ្យសោះ»។
លោកនាយករដ្ឋមន្រ្តីបន្ថែមថា លោកឈឺចាប់ដែលកម្ពុជាកើតមាននូវវប្បធម៌ហិង្សាបែបនេះ និងថា ការប្រើហិង្សាគឺជាសកម្មភាពមិនត្រឹមត្រូវ ដែលចាំបាច់ត្រូវមានការចាត់វិធានការផ្លូវច្បាប់លើជនដែលបង្កហិង្សាទាំងនោះ ដើម្បីបញ្ជៀសការប្រើហិង្សា ឬសម្លាប់ក្រៅប្រព័ន្ធតុលាការ។
លោកមានប្រសាសន៍ថា៖
«ចោរលួច ចោរប្លន់ក៏ដូចគ្នាដែរ។ យើងត្រឹមរួមចំណែកចាប់ ប៉ុន្តែយើងគ្មានសិទ្ធិដើម្បីនឹងវាយតប់ ឬក៏គ្មានសិទ្ធិនឹងធ្វើការសម្លាប់នោះទេ។ ខ្ញុំពិតជាមានការសោកស្តាយ និងបង្ហាញនូវការឈឺចាប់ ហេតុអ្វីទៅបានវាកើតនូវសីលធម៌បែបនេះចំពោះមនុស្សមួយចំនួនតូចណាមួយនោះ? ឥឡូវត្រូវបានចាប់ខ្លួនមួយចំនួនហើយ យើងនឹងបន្តតាមស្វែងរកចាប់ខ្លួនបន្តទៅទៀត ដែលមិនត្រូវឲ្យជនពាលបែបនេះ បង្កើតឡើងនូវស្ថានភាព ហើយដោយខ្វះការទទួលខុសត្រូវ ចំពោះផ្នែកព្រហ្មទណ្ឌនោះទេ»។
កាលពីថ្ងៃអាទិត្យសប្តាហ៍ កន្លងទៅ លោក ស៊ុយ សារ៉េត ព្រឹទ្ធបុរសនៃមហាវិទ្យាល័យសិល្បៈ មនុស្សសាស្រ្ត និងភាសា និងជាគ្រូបង្រៀនភាសាអង់គ្លេសនៃសាកលវិទ្យាល័យកម្ពុជា បានរងការវាយយ៉ាងដំណំទៅលើក្បាល និងមុខរបស់លោក បណ្តាលឲ្យឈាមស្រោចជោគជាំទៅលើខ្លួន បន្ទាប់ពីលោករងការចោទថា បានបង្កគ្រោះថ្នាក់ចរាចរណ៍ និងបើករត់។ ក្រោយកើតហេតុភ្លាមៗ លោក ស៊ុយ សារ៉េត ត្រូវបានក្រុមគ្រួសារបញ្ជូនទៅព្យាបាលក្នុងមន្ទីរពេទ្យមួយ នៅឯប្រទេសវៀតណាម។ ចំណែកសមត្ថកិច្ចបានប្រកាសតាមចាប់ជនបង្កយកទៅផ្តន្ទាទោសជាបន្តបន្ទាប់។
ការវាយប្រហារដោយក្រុមមនុស្សបានកើតឡើងច្រើននៅប្រទេសកម្ពុជាក្នុងករណីបង្កគ្រោះថ្នាក់ចរាចរណ៍រួចបើករត់ និងក្នុងករណីចាប់បានជនសង្ស័យ ឬជនដៃដល់ក្នុងករណីរំលោភសម្លាប់ និងចោរកម្មផ្សេងៗ។ ពលរដ្ឋបានបញ្ចេញកំហឹងរបស់ពួកគេទៅលើជនសង្ស័យដែលមានករណីខ្លះបណ្តាលឲ្យរងរបួសធ្ងន់ធ្ងររហូតដល់ស្លាប់។
ក្រុមអ្នកឃ្លាំមើលសិទ្ធិមនុស្ស និងការវិវត្តសង្គមលើកឡើងថា ការកើនឡើងនៃការវាយតប់របស់ក្រុមមនុស្សក្រៅប្រព័ន្ធតុលាការ ជាការបង្ហាញពីភាពផុយស្រួយនៃសន្តិភាពក្នុងសង្គមខ្មែរ និងការបាត់បង់ជំនឿលើប្រព័ន្ធយុត្តិធម៌ក្នុងប្រទេសកម្ពុជា។
បន្ទាប់ពីលោក ស៊ុយ សារ៉េត រងការប្រើហិង្សា លោក ប៉ា ចន្ទរឿន ប្រធានមជ្ឈមណ្ឌលទស្សនវិជ្ជាអនុវត្ដន៍ និងសីលធម៌កម្ពុជាលើកឡើងថា ទង្វើរបស់ប្រជាពលរដ្ឋ ដែលវាយតប់ទៅលើជនបង្កគ្រោះថ្នាក់ចរាចរណ៍ កំពុងបង្ហាញពីភាពផុយស្រួយនៃសន្តិភាពក្នុងសង្គម។ លោកបន្ថែមថា មូលហេតុដែលធ្វើឲ្យប្រជាពលរដ្ឋបញ្ចេញសកម្មភាពអសីលធម៌ និងជាវប្បធម៌អាក្រក់បែបនេះ គឺបណ្តាលមកពីការមិនទុកចិត្តលើប្រព័ន្ធយុត្តិធម៌ក្នុងសង្គម។
លោកបញ្ជាក់ថា៖
«ក្នុងទ្រឹស្តីវិទ្យាសាស្រ្តសង្គមគឺនៅពេលដែលប្រជាជនបាត់បង់ជំនឿទៅលើប្រព័ន្ធគ្រប់គ្រង ប្រព័ន្ធយុត្តិធម៌ ប្រព័ន្ធតុលាការ ការអនុវត្តច្បាប់ហ្នឹង ប្រជាជនលែងប្រើប្រាស់ច្បាប់ ហើយ លែងគោរពច្បាប់ហើយ ហើយមានតែប្រើប្រាស់វិធីសាស្រ្តផ្ទាល់ខ្លួនដែលគាត់អាចគិតឃើញហ្នឹងគឺព្រលែងកំហឹង ប្រព្រឹត្តអំពើហិង្សាជាក់ស្តែងទៅលើបុគ្គល ដល់ពេលខ្លះ ខ្វះការគិតគូរពិចារណា លែងគិតគូរថា បុគ្គលណាខុស បុគ្គលណាត្រូវ»។
លោក ប៉ា ចន្ទរឿន បន្ថែមថា ការប្រើអំពើហិង្សាដែលបណ្តាលមកពីការខ្វះការពិចារណាទាំងនោះ នឹងធ្វើឲ្យប៉ះពាល់យ៉ាងខ្លាំងដល់សង្គមជាតិទាំងមូល ហើយថា សមត្ថកិច្ចត្រូវពង្រឹងការអនុវត្តច្បាប់ឲ្យបានម៉ឺងម៉ាត់ ដោយស្មើភាព និងត្រូវផ្សព្វផ្សាយឲ្យបានទូលំទូលាយឲ្យប្រជាពលរដ្ឋបានដឹងពីទោសទណ្ឌ និងការទទួលខុសត្រូវផ្លូវច្បាប់ ដែលបណ្តាលមកពីទង្វើទាំងនោះ៕
