ភ្នំពេញ៖ នៅមិនដល់មួយខែទៀតតែប៉ុណ្ណោះ ព្រះបរមរតនៈកោដិរបស់សម្តេចឪនរោត្តមសីហនុនឹងត្រូវដង្ហែចេញពីព្រះបរមរាជវាំងយកមកតម្កល់ទុកក្នុងវាលព្រះមេរុ រយៈពេលបីថ្ងៃមុននឹងធ្វើព្រះរាជពិធីបូជា។
ព្រះបរមរតនៈកោដិរបស់សម្តេចឪនរោត្តមសីហនុគ្រោងនឹងត្រូវដង្ហែចេញពីព្រះបរមរាជវាំងក្នុងអំឡុងថ្ងៃទី១ខែកុម្ភៈឆ្នាំ២០១៣ខាងមុខនេះ ហើយ នឹងត្រូវតម្កល់ទុកក្នុងវាលព្រះមេរុចំនួនបីថ្ងៃមុនពេលធ្វើព្រះរាជពិធីបូជានៅថ្ងៃទី៤ខែកុម្ភៈខាងមុខនេះ បើពុំមានអ្វីប្រែប្រួល។
ព្រះបរមរតនៈកោដិរបស់សម្តេចឪនរោត្តមសីហនុគ្រោងនឹងត្រូវដង្ហែចេញពីព្រះបរមរាជវាំងក្នុងអំឡុងថ្ងៃទី១ខែកុម្ភៈឆ្នាំ២០១៣ខាងមុខនេះ ហើយ នឹងត្រូវតម្កល់ទុកក្នុងវាលព្រះមេរុចំនួនបីថ្ងៃមុនពេលធ្វើព្រះរាជពិធីបូជានៅថ្ងៃទី៤ខែកុម្ភៈខាងមុខនេះ បើពុំមានអ្វីប្រែប្រួល។
មុនពេលដង្ហែព្រះបរមរតនៈកោដិ លោកនាយករដ្ឋមន្ត្រីហ៊ុន សែនបានចេញសារាចរណែនាំមួយដោយបានកំណត់ប្រកាសថ្ងៃកាន់មរណទុក្ខគោរពវិញ្ញាណក្ខន្ធជាផ្លូវការលើកទីពីររយៈពេល៧ថ្ងៃ ដោយចាប់ផ្តើមថ្ងៃទី០១ខែកុម្ភៈរហូតដល់ថ្ងៃទី៧ខែកុម្ភៈ។
ក្នុងរយៈពេលកាន់មរណទុក្ខនេះ គ្រប់ក្រសួងស្ថាប័នគ្រឹះស្ថានសារធារណៈនិងឯកជនព្រមទាំងប្រជាពលរដ្ឋទូទាំងប្រទេសត្រូវបង្ហូតទង់ជាតិត្រឹមមួយភាគបីនិងត្រូវតុបតែងសញ្ញាមរណទុក្ខលើព្រះឆាយាលក្ខណ ហើយប្រជាពលរដ្ឋគ្រប់រូបត្រូវពាក់សញ្ញាកាន់មរណទុក្ខក្នុងរយៈពេលនៃការកាន់ទុក្ខនេះ។
នៅក្នុងសារាចរណែនាំដែលមានហត្ថលេខារបស់លោកនាយករដ្ឋមន្ត្រីហ៊ុន សែន កាលពីថ្ងៃទី៨ម្សិលមិញនេះ ហើយដែលត្រូវបានចែកផ្សាយនៅថ្ងៃព្រហស្បតិ៍បានតម្រូវឲ្យគ្រប់ស្ថានីយទូរទស្សន៍រដ្ឋនិងឯកជន ព្រមទាំងកន្លែងកំសាន្តសប្បាយត្រូវផ្អាកការផ្សាយទស្សនីយភាព ការសម្តែងនិងការប្រគុំដន្ត្រីផ្សេងៗដែលមានលក្ខណះគគ្រឹកគគ្រេងក្នុងរយៈពេល៧ថ្ងៃ។
មន្ត្រីរាជការទាំងអស់ត្រូវបានឈប់សម្រាកពីការងារនៅថ្ងៃទី០១ខែកុម្ភៈដែលជាថ្ងៃព្រះរាជពិធីដង្ហែរព្រះបរមសព និងថ្ងៃទី០៤ខែកុម្ភៈដែលជាថ្ងៃថ្វាយព្រះភ្លើងព្រះបរមសព។
លោកគង់ សំអុល រដ្ឋមន្ត្រីព្រះបរមរាជវាំង ធ្លាប់បាននិយាយថា យ៉ាងតិចមានមនុស្សចំនួន៩០នាក់នឹងធ្វើពិធីកោរសក់ដើម្បីបួសថ្វាយមុខព្រះភ្លើងសម្តេចឪ។ អ្នកដែលត្រូវកោរសក់មានចំនួន៦៩រូប មកពីតាមបណ្តាខេត្តទាំង២៣ ក្នុងនោះ១១រូបមកពីទីក្រុងភ្នំពេញ និងសមាជិករាជវង្សានុវង្ស។
លោកបាននិយាយថា អ្នកដែលត្រូវបួសមុខព្រះភ្លើងគឺគ្រងសម្លៀកបំពាក់សំពត់សម្លុយអាវស និងពាក់ស្បែកជើងផ្ទាត់ធម្មតា ព្រមទាំងពាក់មួកលំផតដែលមានចុងស្រួចឡើងទៅលើ។
ព្រះអង្គម្ចាស់ស៊ីសុវត្ថិធម្មិកោ អតីតព្រះរាជលេខាផ្ទាល់សម្តេចឪនរោត្តមសីហនុ បានមានបន្ទូលថា មកដល់ពេលនេះមានសមាជិករាជវង្សានុវង្សប្រមាណជាង២០អង្គហើយបានសម្រេចកោព្រះកេសាដើម្បីបួសមុខព្រះភ្លើង។
ព្រះអង្គមានបន្ទូលថា សមាជិករាជវង្សានុវង្សដែលបានសម្រេចព្រះទ័យកោព្រះកេសា រួមមានព្រះអង្គម្ចាស់នរោត្តមរណឫទ្ធិ ព្រះអង្គម្ចាស់ច័ក្រពង្ស់ ព្រះអង្គម្ចាស់នរោត្តមសេរីវុធ ព្រះអង្គម្ចាស់នរោត្តមសេរីរ័ត្ន និងព្រះអង្គម្ចាស់ធម្មិកោផងដែរ។
«ចំពោះខ្ញុំផ្ទាល់គឺព្រះករុណាព្រះបីតាហ្នឹងខ្ញុំទុកព្រះអង្គជាព្រះបីតាខ្ញុំផ្ទាល់ទៅហើយ ដូច្នេះខ្ញុំត្រូវតែបួសដើម្បីសម្តែងនូវសេចក្តីកត្តញូរបស់ខ្ញុំចំពោះលោក»។
សម្តេចឪនរោត្តមសីហនុបានសោយទិវង្គត់កាលពីថ្ងៃទី១៥ខែតុលា នៅក្នុងមន្ទីរពេទ្យមួយនៃទីក្រុងប៉េកាំង ប្រទេសចិនប្រជាមានិត ដោយសារជំងឺគាំងបេះដូងក្នុងព្រះជន្ម៩០ព្រះវស្សា។
ព្រះបរមសពសម្តេចឪបានតម្កល់ទុកក្នុងព្រះបរមរាជវាំងចំនួនបីខែមុននឹងធ្វើព្រះរាជពិធីដង្ហែព្រះបរមរតនៈកោដិយកទៅបូជានៅវាលព្រះមេរុ៕
