ភ្ជាប់​ទៅ​គេហទំព័រ​ទាក់ទង

ស្ថាបត្យករ​បារាំង​ត្រឡប់​មក​ខ្មែរ​វិញ​បន្ទាប់​ពី​ធ្វើ​សាក្ខីកម្ម​នៅ​ចិន

  • ហេង រស្មី

លំនៅដ្ឋាន​របស់​ស្ថាបត្យករ​បារាំង​នៅ​ទីក្រុង​ភ្នំពេញ
ភ្នំពេញ៖ សាក្សី​នានា​បាន​បញ្ជាក់​នៅ​ថ្ងៃ​ចន្ទ​នេះ​ថា ពួកគេ​បាន​ឃើញ​វត្តមាន​ជន​ជាតិ​បារាំង​មក​ស្នាក់​ផ្ទះ​ជួល​ក្នុង​ទី​ក្រុង​ភ្នំ​ពេញ​វិញ​ហើយ​បន្ទាប់​ពី​បាន​វិល​ត្រឡប់​មក​កម្ពុជា​វិញ​កាល​ពី​ពាក់​កណ្តាល​ខែ​សិហា។ នេះ​បើ​តាម​ការ​ផ្តល់​បទ​សម្ភាស​ដោយ​ផ្ទាល់​រវាងវីអូអេ សំឡេង​សហរដ្ឋ​អា​មេរិក​ និង​សន្តិសុខ និងអ្នក​រត់​កង់​បី​នៅ​ក្បែរ​ផ្ទះ​លោក​ប៉ាទ្រិក ដឺវីឡេ (Patrick Devillers)។
លោកប៉ាទ្រិក ដឺវីឡេ បាន​ចាក​ចេញ​ពី​កម្ពុជា​កាល​ពី​ខែ​កក្កដា​ដើម្បី​ទៅ​ឆ្លើយ​បំភ្លឺ​ក្នុង​នាម​ជា​សាក្សី​នៅ​ក្នុង​ប្រទេស​ចិន​ពាក់​ព័ន្ឋ​នឹង​ទំនាក់​ទំនង​របស់​លោក​ជាមួយ​និង​អ្នក​ស្រី​ ហ្គូ កាឡៃ (Gu Kailai) ភរិយា​លោក​ បូ ស៊ីឡៃ (Bo Xilai) អតីត​អ្នក​នយោ​បាយ​ដែល​មាន​កេរ្តិ៍ឈ្មោះ​មិន​ល្អ​ក្នុង​ប្រទេស​ចិន។​
អ្នក​ស្រី ហ្គូ កាឡៃ ត្រូវ​បាន​តុលាការ​ក្រុង​ប៉េ​កាំង ​ប្រទេស​ចិន​កាត់​ទោស​ប្រហារ​ជីវិត ក៏​ប៉ុន្តែ​ទោស​នេះ​នឹង​អនុវត្ត​រយៈ​ពេល​ពីរឆ្នាំ​ទៀត បន្ទាប់ពី​តុលាការ​បាន​រក​ឃើញ​ថា អ្នក​ស្រី​បាន​សម្លាប់​លោក​ ណេល ហេវូដ (Neil Heywood) ពាណិជ្ជករ​អង់​គ្លេស​ដោយ​ដាក់​ថ្នាំ​បំពុល​ក្នុង​ស្រា និង​ទឹក​តែ។​
លោក ប៉ាទ្រិក ដឺវីឡេ ក្រោយ​ពី​បាន​ទៅ​ធ្វើ​ជា​សាក្សី​នៅ​ក្នុង​ប្រទេស​ចិន​អស់​រយៈ​ពេល​ប្រមាណ​ជិត​មួយ​ខែ លោក​បាន​វិល​ត្រឡប់​មក​កាន់​កម្ពុជា​វិញ​ដើម្បី​ជួប​ជុំ​ជា​មួយ​ប្រពន្ឋ​កូន​របស់​លោក។​ លោក​មាន​ភរិយា​ជាជន​ជាតិ​ខ្មែរ និង​មាន​កូន​ចំនួន​ពីរ​នាក់​ហើយ​លោក​ ប៉ាទ្រិក ក៏​មាន​ដី​ឡូតិ៍​មួយ​កន្លែង​នៅ​ក្នុង​ទី​ក្រុង​កែប​ផង​ដែរ។ ​នេះ​បើ​តាម​ការ​បញ្ជាក់​របស់​មន្ត្រី​រដ្ឋា​ភិបាល។​
លោក​ប៉ាទ្រិក បាន​ជូល​ផ្ទះ​វិឡា​មួយ​ដែល​មាន​ទី​តាំង​នៅ​សង្កាត់​បឹង​កេង​កង​មួយ​ខណ្ឌ​ចម្ការ​មន​ ក្រុង​ភ្នំ​ពេញ។ ​ផ្ទះ​របស់​លោក​នៅ​តែ​បិទ​ទ្វារ​ចាក់​សោ​ជិតពី​ខាង​ក្នុងនិង​មាន​សម្រាម​នៅ​រាយ​ប៉ាយ​ក្នុង​បរិវេណ​ផ្ទះ​របស់​លោក​នៅ​ឡើយ​ដោយ​សារ​តែ​ស្លឹក​ឈើ​ជា​ច្រើន​ធ្លាក់​នៅ​លើ​កម្រាល​ឥដ្ឋ​ខាង​មុខ​ផ្ទះ។ គ្មាន​មនុស្ស​មក​បើក​ទ្វារ​ទេ​នៅ​ពេល​ដែល​អ្នក​យក​ព័ត៌មាន​វីអូអេ​ព្យាយាម​ចុក​កណ្តឹង​ដើម្បី​ចូល​ជូប​សម្ភាស។ ក៏​ប៉ុន្តែ​មន្ត្រី​សន្តិ​សុខ​នៅ​ក្បែរ​ផ្ទះ ​និង​អ្នក​រត់​ម៉ូ​តូ​កង់​បី​បាន​និយាយ​ថា ​ពួក​គេ​បា​ន​ឃើញ​លោក​ប៉ាទ្រិក មក​ស្នាក់​នៅ​ផ្ទះ​របស់​លោក​វិញ​ហើយ។​
សន្តិសុខ​មួយ​រូប​កំពុង​ឈរ​យាម​ឲ្យ​ក្រុមហ៊ុនឯក​ជន​មួយ​ទល់​មុខ​ផ្ទះ​របស់​លោក​ប៉ាទ្រិក ដែល​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ ថា​លោក​បាន​ឃើញ​ជន​ជាតិ​បារាំង​រូប​នេះ​បាន​ចេញ​ចូល​ផ្ទះ​របស់​លោក​ដូច​ធម្មតា​កាល​ពី​ថ្ងៃ​សៅរ៍និង​ថ្ងៃ​អាទិត្យ។​
«​ពេល​ល្ងាច​ម៉ិញ​ខ្ញុំ​ឃើញ។ ​មិន​ដឹង​ម៉ោង​ប៉ុន្នាន​ទេ ប្រហែល​ជា​ល្ងាច​ណាស់​ហើយ»។​
លោកគីម ជា អាយុ​៣៣​ឆ្នាំ​អ្នក​រត់​ម៉ូតូ​កង់​បី​នៅក្បែរ​ផ្ទះ​លោកប៉ាទ្រិក បាន​និយាយ​ថា លោក​ឃើញ​លោក​ប៉ាទ្រិក ជិះ​ក្នុង​រថ​យន្ត​ចូល​ផ្ទះ​ដូច​ធម្មតា។ លោក​បាន​និយាយ​ថា ផ្ទះ​របស់​លោក​មិន​បាន​បើក​ចំហរ​ទេ​គឺ​គ្រាន់​តែ​បើ​ក​នៅ​ពេល​ជន​ជាតិ​បារាំង​ចេញ​តែ​ប៉ុណ្ណោះ​រួច​ហើយ​បាន​បិទ​ទៅ​វិញ។​
«ទ្វា​ហ្នឹង​ទាល់​តែ​គាត់​មក​បាន​គេ​បើក។ ម្សិល​ម៉ិញ​ឃើញ​គាត់​ជិះ​ឡាន​មក​ម្នាក់​ឯង»។​
មន្ត្រី​ស្ថាន​ទូត​បារាំង​ប្រចាំ​កម្ពុជា​មិន​អាច​សុំ​សេចក្តី​បំភ្លឺ​បាន​ទេ​នៅ​ថ្ងៃ​ចន្ននេះ។
លោក​ឧត្តម​សេនីយ​ឯក ​ខៀវ សុភ័គ អ្នក​នាំ​ពាក្យ​ក្រសួង​មហា​ផ្ទៃបាន​និយាយ​ថា​លោក​ ប៉ាទ្រិក ដឺវីឡេ បាន​មក​កាន់​កម្ពុជា​កាល​ពី​ពាក់​កណ្តាល​ខែ​សីហា។ លោក​បាន​បញ្ជាក់​ថា រដ្ឋា​ភិបាល​កម្ពុជា​មិន​បាន​រក​ឃើញ​ថា លោក​បាន​ប្រព្រិត្ត​បទ​ឧក្រិដ្ឋ​នៅ​កម្ពុជា​ទេ។​
លោក​មាន​ប្រសាន៍​ថា ជន​ជាតិ​បារាំង​រូប​នេះ​អាច​រស់​នៅ​និង​ចេញ​ចូល​កម្ពុជា​តាមចិត្ត។
«លោក​ប៉ាទ្រិក​អត់​មាន​ប្រព្រិត្តិ​បទ​ល្មើស​អ្វី​ក្នុង​ស្រុក​ខ្មែរ​យើង​ទេ។ ដូច្នេះ​ពេល​ចប់​ករណី​ហ្នឹង​គាត់​ទៅ​ណា​ក៏បាន។ ធម្មតា​គាត់​ជា​ជន​អន្តោ​ប្រវេសន៍​ស្រប​ច្បាប់មក​ហ្នឹង​គាត់​ត្រូវ​គោរព​ច្បាប់​ខ្មែរ​ការ​រស់​នៅ​យ៉ាង​ណាគាត់​មាន​អាជី​វកម្ម​មាន​គ្រួសារ​នៅ​ទី​នេះនិង​មាន​គ្រួសារ»។​
តាម​សំណើ​របស់​រដ្ឋា​ភិបាល​ចិន​លោកប៉ាទ្រិក ត្រូវ​បាន​អាជ្ញាធរ​កម្ពុជា​ចាប់ខ្លួនកាល​ពី​ខែ​មិថុនារួច​ហើយ​បាន​យក​ទៅ​ឃុំ​នៅ​ឯ​នាយកដ្ឋាន​អន្តោ​ប្រវេសន៍​របស់ក្រសួង​មហា​ផ្ទៃរយៈ​ពេល​ជាច្រើន​សប្តាហ៍​ពី​បទ​សង្ស័យ​ថា ជាប់​ពាក់​ព័ន្ឋ​នឹង​លោក​ស្រី​ហ្គូ កាឡៃ៕​
XS
SM
MD
LG