រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានជំរុញឲ្យស្ថានអគ្គកុងស៊ុលរបស់ខ្លួនប្រចាំទីក្រុងក្វាងចូវប្រទេសចិន ផ្តល់ទិដ្ឋាការជូនពលរដ្ឋខ្មែរចំនួន៧រូបដែលចាញ់បោកមេខ្យល់ឲ្យបានឆាប់ ដើម្បីឲ្យពួកគេបានត្រឡប់មកកម្ពុជាវិញ។ ការជំរុញនេះធ្វើឡើង ស្របពេលដែលក្រសួងការបរទេសកំពុងធ្វើការជាមួយអាជ្ញាធរមានសមត្ថកិច្ចដើម្បីស្វែងរកមេខ្យល់ជួញដូរមនុស្សមកផ្តន្ទាទោសតាមផ្លូវច្បាប់។
សេចក្តីប្រកាសព័ត៌មានមួយចេញដោយក្រសួងការបរទេសកម្ពុជា នៅថ្ងៃព្រហស្បតិ៍នេះឲ្យដឹងថា ពលរដ្ឋខ្មែរទាំង៧រូបនោះ មានស្រី៦រូប និងបុរស១រូប ដែលមានអាយុចន្លោះពី២៤ឆ្នាំដល់៣៥ឆ្នាំ ត្រូវបានមេខ្យល់បោកឲ្យទៅរៀបការ និងធ្វើការក្នុងប្រទេសចិន ចន្លោះឆ្នាំ២០១២ ដល់ឆ្នាំ២០១៤។
លោកស្រី ជូ ប៊ុនអេង គឺជារដ្ឋលេខាធិការនៃក្រសួងមហាផ្ទៃ និងជាអនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំង អំពើជួញដូរមនុស្សធ្លាប់បញ្ជាក់ប្រាប់ VOA ថា ពលរដ្ឋកម្ពុជាដែលមានបំណងចង់ធ្វើចំណាកស្រុក គប្បីមានភាពសកម្មស្វះស្វែងរកព័ត៌មានពាក់ព័ន្ធ ដើម្បីចៀសវាងការធ្វើចំណាកស្រុកដោយប្រថុយប្រថាន និងអាចរងគ្រោះដោយអំពើជួញដូរពីមេខ្យល់ផងដែរ៕
