ក្រសួងសុខាភិបាលបានរកឃើញអ្នកផ្ទុកវីរុសកូរ៉ូណាចំនួន ៤នាក់ថែមទៀត កាលពីថ្ងៃពុធ ដោយបានធ្វើឲ្យតួលេខសរុបក្នុងប្រទេសកម្ពុជាកើនដល់ ៣៧នាក់។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។
នៅក្នុងសេចក្តីប្រកាសដដែលបានបញ្ជាក់ថា ការរកឃើញថ្មីរបស់វិទ្យាស្ថានប៉ាស្ទ័រកម្ពុជាចំនួន២ករណី គឺជាបុរសជនជាតិខ្មែរ ដែលវិលត្រឡប់មកពីចូលរួមពិធីសាសនានៅប្រទេសម៉ាឡេស៊ី និងចំនួន២ ករណីទៀត គឺរកឃើញលើខ្លួនបុរសជនជាតិម៉ាឡេស៊ី។
«សរុបករណីវិជ្ជមានវីរុសកូវីដ១៩ នៅទូទាំងប្រទេស ត្រឹមថ្ងៃទី១៨ ខែមីនា ឆ្នាំ២០២០ ករណីវិជ្ជមានវីរុសកូវីដ១៩ សរុបទាំងអស់មានចំនួន៣៧នាក់ ស្រី២ នាក់ និង ប្រុស ៣៥នាក់ ដែលក្នុងនោះមានជនជាតិចិនម្នាក់ នៅខេត្តព្រះស៊ីហនុបានជាសះស្បើយ អង់គ្លេស៣នាក់ កាណាដា ១នាក់ ប៊ែលហ្ស៊ិក ១នាក់ បារាំង ២នាក់ ក្នុងនោះមានកូនប្រុសបង្កើតអាយុ ៤ខែ ម៉ាឡេស៊ី ៥នាក់ ខ្មែរ ២៤នាក់ ក្នុងនោះមានអ្នកដែលវិលត្រឡប់មកពី(ចូលរួម)ពិធីសាសនានៅប្រទេសម៉ាឡេស៊ី ២១នាក់»។
ករណីទាំង ៤ចុងក្រោយ គឺចំនួន ២នាក់រកឃើញនៅក្នុងខេត្តកំពត ជាពលរដ្ឋម៉ាឡេស៊ី និង ត្បូងឃ្មុំ ២នាក់ជាជនជាតិខ្មែរ។ ជនទាំង ៤នេះ កំពុងសម្រាកព្យាបាលក្នុងមន្ទីរពេទ្យខេត្តទាំងពីរ ដោយត្រូវគេដាក់ឲ្យនៅដាច់ដោយឡែក។ ជនជាតិខ្មែរទាំងពីរនេះ គឺជាមនុស្សពីរនាក់ដែលស្ថិតក្នុងចំណោមមនុស្ស ៧៩ នាក់ ដែលបានវិលត្រឡប់មកពីចូលរួមក្នុងពិធីសាសនា ក្នុងប្រទេសម៉ាឡេស៊ី ហើយទើបបានរកឃើញចុងក្រោយថាវិជ្ជមាននៅម៉ោង ៨យប់ ថ្ងៃទី១៨ មីនា។
ប្រទេសកម្ពុជា បានសម្រេចបង្កើតគណ:កម្មាការថ្នាក់ជាតិមួយ ដែលមានលោកនាយករដ្ឋមន្ត្រី ហ៊ុន សែនជាប្រធានដើម្បីទប់ស្កាត់វីរុសកូរ៉ូណា បន្ទាប់ពីបានដាក់ចេញវិធានការជាច្រើន ដូចជាហាមឃាត់មិនឲ្យមន្ត្រីធ្វើដំណើរទៅក្រៅប្រទេស ធ្វើតេស្តជនសង្ស័យ ធ្វើបច្ចុប្បន្នភាពតួលេខឆ្លងកូរ៉ូណា បិទ KTV ក្លឹបកំសាន្ត សាលារៀន សារមន្ទីរទូទាំងប្រទេស ផ្តល់ការណែនាំផ្សេងៗអំពីវិធីបង្ការនិងការពារ មិនផ្តល់ទិដ្ឋការដល់ជនបរទេសមកពីប្រទេសចំនួន៥ ដែលកំពុងមានការរាលដាលវីរុសកូវីដ១៩ ខ្លាំងជាងគេលើពិភពលោក មិនចូលក្នុងប្រទេសកម្ពុជា។ ក្នុងនោះមានដូចជា បារាំង អ៊ីតាលី អេស្ប៉ាញ អាល្លឺម៉ង់ និងសហរដ្ឋអាមេរិក។
អង្គការសុខភាពពិភពលោក WHO បានប្រកាសថា វីរុសកូរ៉ូណាជាជំងឺឆ្លងរាលដាលយ៉ាងឆាប់រហ័ស និងរាតត្បាតជាសាកល ដោយទទូចដល់ប្រទេសក្នុងពិភពលោក រួមគ្នាទប់ស្កាត់ការរីករាលដាល ហើយប្រកាន់យកសកម្មភាព មិនគ្រាន់តែបង្ការទេ តែតម្រូវឲ្យធ្វើតេស្តឲ្យបានច្រើន និងដាក់ឲ្យនៅដាច់ពីគេឯង លើជនមានវីរុសកូវីដ១៩ ដើម្បីទប់ស្កាត់ការរីករាលដាល ដល់ស្ថានភាពអាក្រក់ គ្រប់គ្រងលែងបាន។
ចំនួនមនុស្សស្លាប់ក្នុងពិភពលោកមានប្រមាណ ៨ពាន់នាក់ និងឆ្លងប្រមាណ២សែននាក់ ហើយរហូតមកទល់ពេលនេះ៕
