ចៅក្រមជំនុំជម្រះនៃសាលាដំបូងរាជធានីភ្នំពេញ នៅថ្ងៃសុក្រនេះ បានសម្រេចផ្តន្ទាទោសលោក កឹម សុខា អតីតមេដឹកនាំគណបក្សសង្រ្គោះជាតិ ឲ្យជាប់ពន្ធនាគាររយៈពេល ២៧ ឆ្នាំ ពីបទ «ក្បត់ជាតិ»។ ក៏ប៉ុន្តែលោកមិនត្រូវបានចាប់ឃុំខ្លួនភ្លាមៗនោះទេ។ នេះបើតាមការបញ្ជាក់របស់មេធាវីការពារក្តីរបស់លោក កឹម សុខា។
លោក អាង ឧត្តម មេធាវីរបស់លោក កឹម សុខា ប្រាប់អ្នកសារព័ត៌មានថា លោក កឹម សុខា ក៏ត្រូវបានហាមឃាត់មិនឲ្យធ្វើនយោបាយ និងមិនត្រូវបានអនុញ្ញាតឲ្យជួបជនបរទេសឡើយ លើកលែងតែមានការអនុញ្ញាតពីតុលាការ។
លោក អាង ឧត្តម បានបញ្ជាក់ថា៖ «តែយ៉ាងណា គេមិនឃុំខ្លួនភ្លាមទេ។ ព្រោះជាទូទៅសាលក្រម សេចក្តីសម្រេចអាចសម្រេចភ្លាម ឃុំខ្លួនភ្លាម។ ប៉ុន្តែយើងពិចារណាដូចលក្ខណៈឃុំខ្លួនដែរ គឺការឃុំខ្លួននៅផ្ទះ»។
លោកមេធាវីបានចាត់ទុកការកាត់ទោសនេះមិនត្រឹមត្រូវ អយុត្តិធម៌ និងមានលក្ខណៈនយោបាយ។
លោក កឹម សុខា បានរងការចោទប្រកាន់ពីបទសន្ទិដ្ឋិភាពជាមួយបរទេសដែលស្មើនឹងអំពើក្បត់ជាតិ។ លោកត្រូវបានដោះលែងឲ្យនៅក្រៅឃុំបណ្តោះអាសន្ន កាលពីខែកញ្ញា ឆ្នាំ២០១៨ ក្រោយជាប់ពន្ធនាគាររយៈពេលជាងមួយឆ្នាំ។ ប៉ុន្តែលោកត្រូវបានដាក់ឲ្យស្ថិតនៅក្រោមការតាមដានរបស់តុលាការ និងរងបម្រាមមិនឲ្យធ្វើនយោបាយផងដែរ។
សំណុំរឿងរបស់លោក កឹម សុខា ត្រូវបានតំណាងទូតបរទេសមួយចំនួន នៅក្នុងប្រទេសកម្ពុជាតាមដានយ៉ាងដិតដល់។ លោក កឹម សុខា បានជួបជាមួយតំណាងអង្គទូតបរទេសនានាជាបន្តបន្ទាប់ ក្នុងពេលលោកប្រឈមនឹងការចោទប្រកាន់៕
