មន្ត្រីរដ្ឋាភិបាលបានឲ្យដឹងនៅថ្ងៃចន្ទនេះថា កម្ពុជាកំពុងតែពិចារណានីតិវិធីជាច្រើន ដើម្បីឆ្លើយតបនឹងការទាមទាររបស់ចិនឲ្យបញ្ជូនជនសង្ស័យសញ្ញាតិបារាំងទៅឲ្យខ្លួននោះ។
លោក ប៉ាទ្រិក ដឺវីល្ល័រស៍ (Patrick Devillers) ត្រូវបានចាប់ខ្លួនដោយអាជ្ញាធរកម្ពុជាកាលពីថ្ងៃទី១៣ ខែមិថុនា ក្រោមការស្នើសុំរបស់ចិន ដោយសង្ស័យថាវិស្វករសញ្ញាតិបារាំរូបនេះ ជាប់ទាក់ទងនឹងសំណុំរឿងអាស្រូវរបស់អ្នកនយោបាយជាន់ខ្ពស់ចិនលោក បូ ស៊ីឡៃ (Bo Xilai)។
ភរិយារបស់មន្ត្រីជាន់ខ្ពស់របស់គណបក្សកុម្មុយនីស្តចិនរូបនេះ កំពុងស្ថិតនៅក្រោមការចោទប្រកាន់ពីបទថា បានធ្វើឃាតអ្នកជំនួញសញ្ញាតិអង់គ្លេសម្នាក់លោក ណេល ហេវូដ (Neil Heywood)។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រីមានប្រសាសន៍ថារដ្ឋាភិបាលកម្ពុជាកំពុងតែពិចារណានីតិវិធីស្តីពីបញ្ហានេះ។
«នៅក្នុងករណីនេះ រដ្ឋាភិបាលលើកថ្លឹងថ្លែងរវាងច្បាប់របស់កម្ពុជា ក៏ដូចជាច្បាប់អន្តរជាតិនេះដែរ ដែលពាក់ព័ន្ធដល់ដីធ្លី។ ទី១ គឺភាគីកម្ពុជា ប្រទេសទី២ គឺប្រទេសចិន ដែលជាប្រទេសមួយទាមទារឲ្យបញ្ជូនទៅវិញ។ ប្រទេសទី៣ គឺប្រទេសបារាំង ដែលជាជនជាតិគេ ដែលជាប្រជាពលរដ្ឋគេ។ ប្រទេសទី៤នោះ គឺពាក់ព័ន្ធទៅនឹងប្រទេសអង់គ្លេស ដែលគេចាត់ទុកថាពាក់ព័ន្ធទៅនឹងអំពើឧក្រិដ្ឋកម្ម ដែលមានការបាត់បង់ជីវិតដល់ជនជាតិអង់គ្លេស»។
កាលពីសប្តាហ៍មុន លោកហោ ណាំហុង ប្រមុខការទូតកម្ពុជា បានប្រកាសថាកម្ពុជានឹងមិនបញ្ជូនលោក ប៉ាទ្រិក ដឺវីល្ល័រស៍ឲ្យទៅប្រទេសចិន ឬក៏បញ្ជូនទៅកាន់ប្រទេសបារាំងនោះទេ លើកលែងតែមានភស្តុងតាងរឹងមាំ។
កម្ពុជាបានស្នើសុំឲ្យរដ្ឋាភិបាលចិនផ្តល់ភស្តុតាងបន្ថែមទៀត ពាក់ព័ន្ធនឹងការស្នើសុំឲ្យចាប់ខ្លួនស្ថាបត្យករបារាំងនេះ។ រហូតមកទល់ថ្ងៃនេះ ពុំមានមន្ត្រីរដ្ឋាភិបាលណាម្នាក់ផ្តល់ព័ត៌មានអំពីដំណើរការផ្តល់ភស្តុងតាងបន្ថែមពីសំណាក់ប្រទេសចិននោះទេ។
លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ឡើងវិញនៅថ្ងៃនេះថា កម្ពុជានឹងមិនបញ្ជូនលោក ប៉ាទ្រិក ដឺវីល្ល័រស៍ ទៅឲ្យក្រុងប៉េកាំងនោះទេ។ ក៏ប៉ុន្តែលោកមិនបានដឹងថាតើលោកនឹងត្រូវកាត់ទោសដោយតុលាការកម្ពុជា ឬក៏យ៉ាងណា?
«នៅឯនាយកដ្ឋានអន្តរប្រវេសន៍ហ្នឹង រង់ការឃុំគ្រង»។
ចិនគឺជាប្រទេសដែលនាំមុខគេនៅក្នុងការផ្តល់ការវិនិយោគនៅកម្ពុជា ហើយក្រុមអ្នកវិភាគមួយចំនួន បានសំឡឹងឃើញថាកម្ពុជាមានផលវិបាកនៅក្នុងការធ្វើការសម្រេចចិត្តរបស់ខ្លួនទល់នឹងប្រទេសបារាំងដែលតំណាងឲ្យប្រទេសម្ចាស់ជំនួយដ៏សំខាន់មកពីសហភាពអ៊ឺរ៉ុបដល់កម្ពុជា។
លោកផៃ ស៊ីផាន មានប្រសាសន៍ថាកម្ពុជាមានរយៈពេល៦០ថ្ងៃ សម្រាប់ការធ្វើការសន្និដ្ឋានលើសំណុំរឿងលោក ប៉ាទ្រិក ដឺវីល្ល័រស៍។ បើយោងទៅតាមបត្យាប័ន ប្រសិនបើការចោទប្រកាន់លោកប៉ាទ្រិក ដឺវីល្ល័រស៍ ជាប់ពាក់ព័ន្ធនឹងបញ្ហានយោបាយ លោកនឹងមិនត្រូវបញ្ជូនខ្លួនទៅកាន់ប្រទេសម្ចាស់សំណើនោះទេ។ លោកផៃ ស៊ីផាន បញ្ជាក់ថាតុលាការកម្ពុជានឹងជួយទៅដល់ការធ្វើការវាយតម្លៃបញ្ហានេះ។
លោកស្រី ឡូរ៉ិនស៍ បិណាឌី (Laurence Benardi) អ្នកនាំពាក្យស្ថានទូតបារាំង មិនឆ្លើយតបទៅនឹងសំណួររបស់វីអូអេសំឡេងសហរដ្ឋអាមេរិកទេ នៅថ្ងៃនេះ៕
