នៅក្នុងដំណើរទស្សនកិច្ចមកកម្ពុជារយៈពេលមួយថ្ងៃ គឺចាប់ផ្តើមនាថ្ងៃចន្ទនេះ លោក Anwar Ibrahim នាយករដ្ឋមន្រ្តីម៉ាឡេស៊ីនិងលោកនាយករដ្ឋមន្រ្តី ហ៊ុន សែន បានជួបពិភាក្សាទ្វេភាគី ដោយបានប្តេជ្ញាបន្តលើកកម្ពស់ថែមទៀតនូវកិច្ចសហប្រតិបត្តិលើគ្រប់វិស័យ និងបង្កើនទំនុកចិត្តរវាងគ្នា។ នេះបើតាមការថ្លែងរបស់លោក ហ៊ុន សែន នៅក្នុងសន្និសីទសារព័ត៌មានរួមគ្នាជាមួយសមភាគីម៉ាឡេស៊ីរបស់លោក។
លោក ហ៊ុន សែន បញ្ជាក់ថាភាគីទាំងពីរបានប្តេជ្ញាបន្តពង្រឹងកិច្ចសហប្រតិបត្តិការលើគ្រប់វិស័យ រួមមានពាណិជ្ជកម្ម វិនិយោគ អប់រំ ទេសចរណ៍ ថាមពល ការតភ្ជាប់ និងទំនាក់ទំនងរវាងប្រជាជននិងប្រជាជន។
ទំហំពាណិជ្ជកម្មទ្វេភាគីរវាងប្រទេសទាំងពីរសម្រេចបាន៦២០លានដុល្លារអាមេរិកក្នុងឆ្នាំ២០២២ ដែលកើន២៤% ធៀបនឹងឆ្នាំ២០២១។ នេះបើតាមលោក ហ៊ុន សែន។
ភាគីទាំងពីរក៏ចង់ឃើញដំណើរទស្សនកិច្ចជាន់ខ្ពស់រវាងប្រទេសទាំងពីរកាន់តែញឹកញាប់ផងដែរ។
លោក ហ៊ុន សែន ថ្លែងថា៖ «យើងបានលើកទឹកចិត្តឲ្យភាគីទាំងពីរបន្តការផ្លាស់ប្តូរទស្សនកិច្ចជាន់ខ្ពស់ឲ្យកាន់តែញឹកញាប់ និងគ្រប់កម្រិត ដើម្បីពង្រឹងមិត្តភាពឲ្យកាន់តែជិតស្និទ្ធ បង្កើនទំនុកចិត្តឲ្យកាន់តែខ្ពស់ និងពង្រីកវិសាលភាពនៃកិច្ចសហប្រតិបត្តិការទ្វេភាគី ឲ្យកាន់តែទូលំទូលាយថែមទៀត»។
កាលពីដើមឆ្នាំ២០២២ លោកនាយករដ្ឋមន្ត្រី ហ៊ុន សែន ធ្លាប់បានបរិហាររដ្ឋមន្ត្រីការបរទេសនៃប្រទេសម៉ាឡេស៊ី លោក Saifuddin Abdullah ថា«ព្រហើន» ក្រោយប្រមុខការទូតម៉ាឡេស៊ីរូបនេះបានចេញមុខរិះគន់អភិក្រមការទូតរបស់ទីក្រុងភ្នំពេញ ក្នុងការប្រាស្រ័យទាក់ទងជាមួយរបបសឹកក្រុងណៃពិដោរ ដែលកាលនោះកម្ពុជាធ្វើជាប្រធានអាស៊ាន។
បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជាចេញផ្សាយកាលពីសប្តាហ៍មុន «ទស្សនកិច្ចរបស់នាយករដ្ឋមន្រ្តីម៉ាឡេស៊ី នឹងបង្កើតឱ្យមានសន្ទុះថ្មីដល់ទំនាក់ទំនងទ្វេភាគីដ៏រឹងមាំលើគ្រប់វិស័យ ជាមួយកម្ពុជា»។
នៅក្នុងដំណើរទស្សនកិច្ចនេះ កម្ពុជានិងម៉ាឡេស៊ីក៏បានចុះអនុស្សរណៈនៃការយោគយល់គ្នាស្តីពីការជ្រើសរើស និងការធ្វើមាតុភូមិន៍និវត្តពលករ និងជំរុញលើកកម្ពស់ការការពារសិទ្ធិពលករកម្ពុជា ដែលធ្វើការនៅក្នុងប្រទេសម៉ាឡេស៊ីផងដែរ។
នៅក្នុងសន្និសីទសារព័ត៌មានរួមគ្នា លោក Anwar Ibrahim នាយករដ្ឋមន្រ្តីម៉ាឡេស៊ី ក៏បានថ្លែងអំណរគុណដល់អាជ្ញាធរកម្ពុជាក្នុងការជួយប្រជាជនម៉ាឡេស៊ីដែលត្រូវបានជួញដូរកម្លាំងក្នុងអំពើបោកប្រាស់តាមអ៊ីនធឺណិត ដែលកើតឡើងលើទឹកដីកម្ពុជា។
បើតាមលោក ហ៊ុន សែន ភាគីទាំងពីរក៏បានពិភាក្សាលើបញ្ហាអនុតំបន់ តំបន់ និងអន្តរជាតិ ដែលជាផល ប្រយោជន៍ និងក្តីបារម្ភរួម រួមមានបញ្ហាមីយ៉ាន់ម៉ា និងសមុទ្រចិនខាងត្បូង ដែលម៉ាឡេស៊ីជាភាគីជម្លោះជាមួយប្រទេសចិន៕
