ប្រជាពលរដ្ឋរស់នៅតំបន់នានាក្នុងទីក្រុងភ្នំពេញភាគច្រើនបានសម្តែងការសាទរនឹងសេចក្តីសម្រេចរបស់អង្គជំនុំជម្រះសាលាដំបូងនៃសាលាក្តីខ្មែរក្រហមដែលបានផ្តន្ទាទោសនួន ជា និងខៀវ សំផន ឲ្យជាប់ពន្ធនាគារអស់មួយជីវិតនៅព្រឹកថ្ងៃព្រហស្បត៍នេះ។
នេះជាសាលក្រមសម្រាប់ការកាត់ទោសជនជាប់ចោទទាំងពីរដំណាក់កាលទី១ក្នុងសំណុំរឿង០០២។
កំពុងអង្គុយតាមដានការផ្សាយបន្តផ្ទាល់តាមកញ្ចក់ទូរទស្សន៍អំពីការប្រកាសសាលក្រមដែលអានដោយលោកចៅក្រមនិល ណុន ប្រធានអង្គជំនុំជម្រះសាលាដំបូង លោកឈឹម វុត្ថា គឺជាប្រជាពលរដ្ឋរស់នៅសង្កាត់ទឹកថ្លា។ បុរសអាយុ ៤៦រូបនេះនិយាយថាលោកពេញចិត្តនឹងការសម្រេចរបស់តុលាការនេះ។
«ទង្វើរបស់អ្នកទាំងពីរដែលបានធ្វើកន្លងមកគឺសក្តិសមនឹងឲ្យតុលាការសម្រេចដូច្នេះហើយ។ អ្នកណាក៏ដឹងដែរថាគាត់ទាំងពីរហ្នឹងសុទ្ធតែមានបាតដៃប្រឡាក់ឈាមដែរ»។
ក្នុងហាងកាហ្វេមួយស្ថិតក្នុងម្តុំផ្សារអូរឬស្សីដែលមានចាក់ផ្សាយបន្តផ្ទាល់ពីការប្រកាសសាលក្រមនេះដែរ លោក ទី សុវ៉ាវ៉ាត់គឺប្រជាពលរដ្ឋរស់នៅក្នុងសង្កាត់ទន្លេបាសាក់។ ក្នុងវ័យ៥២ឆ្នាំលោកថ្លែងថាសាលក្រមនេះមិនមានជាការភ្ញាក់ផ្អើលនោះទេ។
«អ្វីដែលសំខាន់គឺមេរៀនសម្រាប់មនុស្សជំនាន់ក្រោយតើ មិនមែនសំខាន់រឿងជាប់គុកមួយជីវិតទេប៉ុណ្ណឹងទេពីព្រោះប្រជាជនខ្មែរអ្នកណាក៏ដឹងដែរ។ខ្ញុំមើលទៅខៀវ សំផនគាត់អាយុ៨៤ហើយហ្នឹងហើយអាយុប៉ុណ្ណឹងជាភ័ព្វវាសនារបស់គាត់ទៅហើយ។ អ្នកខ្លះគាត់រស់មិនដល់ប៉ុណ្ណឹងផង»។
រីឯលោកស៊ុន សុខាប្រជាពលរដ្ឋរស់នៅក្នុងសង្កាត់បឹងកេងកងវិញមានប្រសាសន៍ស្រដៀងគ្នានេះដែរ។
«ការកាត់ក្តីរបស់តុលាការនេះសម្រាប់ពូគឺថាវាមានយុត្តិធម៌ហើយទោសកំហុសរបស់គាត់ទាំងពីរហ្នឹងវាធំខ្លាំងណាស់ការដឹកនាំឲ្យមានការកាប់សម្លាប់ប្រជាពលរដ្ឋឯងអស់ដល់ជិត ២លាននាក់ហ្នឹង»។
កញ្ញាលី យូអ៊ីប្រជាពលរដ្ឋរស់នៅក្នុងសង្កាត់ផ្សារដេប៉ូ២វិញនិយាយថា កញ្ញា និងក្រុមគ្រួសាររបស់កញ្ញាគាំទ្រទៅនឹងការសម្រេចរបស់តុលាការនេះដែរ។
«ចំពោះឪពុកម្តាយរបស់ខ្ញុំដែរ ខ្ញុំឮគាត់និយាយដែរថាគាត់មិនបានបង្ហាញការអាក់អន់ស្រពន់ចិត្តអ្វីទេ។ ខ្ញុំយល់ថាវាបានផ្តល់យុត្តិធម៌ ចំពោះខ្ញុំខ្លួនឯងខ្ញុំប្រហែលអត់ដឹងថាវាលំបាកយ៉ាងម៉េចទេប៉ុន្តែនៅពេលមើលឃើញអ្នកនៅទីនោះផ្ទាល់គាត់បានទះដៃគាត់សប្បាយចិត្តនឹងលទ្ធផលមើលទៅគាត់ទទួលបានយុត្តិធម៌ហើយ»។
សម្រាប់អ្នករត់ម៉ូតូកង់បីអាយុ ៧០ឆ្នាំនៅខណ្ឌសែនសុខ លោក កាវ យ៉ិល វិញសម្តែងការគាំទ្រសាលក្រមរបស់តុលាការ ក៏ប៉ុន្តែមិនបានទម្លាក់កំហុសទាំងស្រុងលើលោកនួន ជា និងខៀវ សំផននោះទេ។
«ខ្ញុំយល់ថាវាសមរម្យហើយគ្នាវាជិតអស់ជីវិតឥឡូវហើយ ធ្វើតាមគេដូចតែគ្នាអាហ្នឹងនៅក្រោយគេចឹងធ្វើតាមគេនៅពេលបញ្ជាមកហើយ គ្នាត្រូវតែប្រឹងធ្វើហើយ។គ្មានអាណាខូចជាងអាណានោះទេដូចៗតែគ្នាទេ។ការសម្លាប់មនុស្សរបស់វាហ្នឹងក៏មិនមែនជាបំណងរបស់វាដែរ ដូចថាបន្តៗគ្នាមក»។
ដំណាលគ្នានឹងប្រជាពលរដ្ឋក្រុងភ្នំពេញបានអបអរសាទរការផ្តន្ទាទោសនួន ជា និងខៀវ សំផនក្រុមមេធាវីការពារក្តីជនជាប់ចោទទាំងពីរបានប្រកាសប្តឹងសារទុក្ខក្នុងពេលខាងមុខនេះ៕
