ភ្ជាប់​ទៅ​គេហទំព័រ​ទាក់ទង

អតីត​ប្រធានាធិបតី​មូបារ៉ាក់​នៃ​ប្រទេស​អេហ្ស៊ីប​នៅ​ក្នុង​ទ្រុង​នៅ​ពេល​ដែល​ការ​កាត់ទោស​ចាប់ផ្តើម


អតីត​ប្រធានាធិបតី​អេហ្ស៊ីប Hosni Mubarak នៅ​ក្នុង​បន្ទប់​តុលាការ​​ក្នុង​អំឡុង​សវនាការ​របស់​លោក​ នា​ទី​​ក្រុង​គែរ​ប្រទេស​អេហ្ស៊ីប​ កាល​ពី​ថ្ងៃ​ទី​៣​ខែ​សីហា​ឆ្នាំ​២០១១។

អតីត​ប្រធានាធិបតី​ ហ៊ូស្នី មូបារ៉ាក់ (Hosni ​Mubarak)​ នៃ​ប្រទេស​អេហ្ស៊ីប​បាន​បង្ហាញ​ខ្លួន​ក្នុង​ទ្រុង​ក្នុង​តុលាការ​កាលពីថ្ងៃ​ពុធសប្តាហ៍​មុន​លើ​បទចោទ​ប្រកាន់​ពី​ការសម្លាប់​បាតុករ​ប្រឆាំង​រដ្ឋាភិបាល​និង​អំពើ​ពុករលួយ។ លោក​មូបារ៉ាក់​បាន​ត្រូវ​គេ​រុញ​នៅលើ​គ្រែ​ពេទ្យ​ចូលក្នុង​បន្ទប់​តុលាការ​បណ្តោះ​អាសន្ន​ ដោយ​ដាក់​ឲ្យ​នៅ​ជាប់​កូនប្រុស​របស់​គាត់​ពីរ​នាក់​គឺ​ហ្កាម៉ាល់ (Gamal) ​និង​ អាឡា (Alaa)​ លោក ហាប៊ីត អាល់ អាដលី (Habit ​al-Adly) អតីត​រដ្ឋមន្រ្តី​ក្រសួង​មហាផ្ទៃ​និង​អតីត​មន្រ្តី​សន្តិសុខ​៦​នាក់​ទៀត។

នៅពេល​ដែល​ការកាត់ទោស​បន្ត​ធ្វើឡើង​ ចៅក្រម​បាន​សួរ​លោក​មូបារ៉ាក់​ថា​តើ​លោក​បាន​ឮ​ការចោទប្រកាន់​ប្រឆាំង​រូបលោក ​ដែល​រួមមាន​ការបញ្ជារ​ឲ្យ​សម្លាប់​ពួកបាតុករ​ក្នុង​អំឡុងពេល​នៃ​ការបះបោរ​រយៈពេល​១៨​ថ្ងៃ​នៅដើមឆ្នាំ​នេះ។ អតីត​មេដឹកនាំ​និយាយ​ថា​លោក​បាន​ដឹង​ លោក​និយាយ​បន្ថែម​ទៀត​ថា​លោក​បដិសេធ​ដាច់អហង្កា។ រួមជាមួយ​កូនប្រុស​របស់​លោក​ លោក​ត្រូវ​រង​ការចោទ​ប្រកាន់​ពី​អំពើ​ពុករលួយ។ កូនប្រុស​របស់​លោក​មូបារ៉ាក់​ ក៏បាន​ច្រានចោល​ការ​ចោទ​ប្រកាន់​នេះ​ដែរ។

ប្រសិនបើ​រកឃើញ​កំហុស​ ជន​ចុងចោទ​ទាំងនោះ​ អាច​ប្រឈមមុខ​ការ​ប្រហារ​ជីវិត។ លោក​មូបារ៉ាក់​មាន​អាការៈ​ភ្ញាក់ផ្អើល​នៅពេល​ដែល​លោក​ដេក​នៅ​លើ​គ្រែ​ពេទ្យ​ហើយ​មាន​លក្ខណៈ​ហត់នឿយ​ជាង​កាលពី​ពេល​ឃើញ​លោក​នៅ​ក្នុង​ឱកាស​ថ្លែង​សុន្ទរកថា​សាធារណៈ​កាលពី​ខែ​កុម្ភៈ។ បុរស​អាយុ​៨៣​ឆ្នាំ​រូប​នេះ ​បាន​ត្រូវ​គេ​ដឹក​តាម​យន្តហោះ​ពី​ទីក្រុង ​ស្សាម អែល ស្ហេក (Sharm ​el- ​Sheikh) ​មកកាន់​រដ្ឋធានី ​កាលពី​ថ្ងៃ​ពុធ​ ដែល​ជា​ទីកន្លែង​ដែល​អ្នក​ជំនួយការ​របស់​លោក​និយាយ​ថា​លោក​មាន​សុខភាព​មិន​ល្អ​ចាប់តាំង​ពី​លោក​ចុះចេញ​ពី​តំណែង​ក្នុងពេល​ប្រឈមមុខ​ការប្រឆាំង​តវ៉ា​មក។

មនុស្ស​ជាង​៨០០នាក់​បាន​ត្រូវ​សម្លាប់​ក្នុង​អំឡុងពេល​នៃ​ការ​ងើប​បះបោរ​នោះ។ នៅ​ខាងក្រៅ​តុលាការ ​ដែល​មាន​ផ្ទាំង​ទូរទស្សន៍​យ៉ាងធំ​មួយ​បាន​បញ្ចាំង​រូបភាព​ពួក​ជន​ចុងចោទ​នៅ​ក្នុង​ទ្រុង​ ម្តាយ​របស់ ​មូហាម៉េដ សូលីម៉ាន ថាវហ្វិក ​(Mohamed​ Soliman​ Tawfik) ​និស្សិត​សាកលវិទ្យាល័យ​ម្នាក់​ដែល​ត្រូវ​គេ​សម្លាប់​ក្នុងពេល​បាតុកម្ម​ និយាយ​ថា​អ្នកស្រី​មាន​ការ​ធូរស្រាល​ក្នុង​ចិត្ត។

«អ្នកស្រី​និយាយ​ថា​កូន​របស់​អ្នកស្រី​ជា​ក្មេង​ប្រុស​ល្អ ​ចិញ្ចឹម​បីបាច់​ត្រឹមត្រូវ ​មិន​ដូច​ជា​កូន​ប្រុស​របស់​ ហូស្នី មូបារ៉ាក់​ទេ។ ដោយ​កាន់​រូបថត​កូនប្រុស​ស្លាប់​របស់​អ្នកស្រី​ អ្នកស្រី​និយាយ​ថា​វា​ជា​ការល្មម​គ្រប់គ្រាប់​សម្រាប់​អ្នកស្រី​ដែល​បាន​ឃើញ​អតីត​ប្រធានាធិបតី​នៅ​ក្នុង​ទ្រុង។ នៅជិត​នោះ ​ប៉ូលីស​ប្រឆាំង​កុប្បកម្ម​ ដែលបាន​ប៉ះទង្គិច​មួយ​សន្ទុះ​ជាមួយ​ពួក​អ្នក​គាំទ្រ​លោក មូបារ៉ាក់​កាលពី​ពេល​ព្រឹក​ថ្ងៃ​នោះ​ ហាក់ដូច​ជា​មាន​បំណង​មើល​រូបភាព​របស់​អតីត​ប្រធា​នាធិបតី​របស់​ខ្លួន​ស្ថិត​នៅក្នុង​ទ្រុង​នៅពេល​ដែល​ពួក​គេ​ស្ថិត​ក្នុង​ហ្វូង​មនុស្ស»។

ក្នុង​ចំណោម​អ្នក​ទាំងនោះ​ដែល​នៅ​ខាងក្រៅ​តុលាការ​ នៅ​ឯ​កន្លែង​កិច្ចការ​បណ្តោះ​អាសន្ន​ក្នុង​បណ្ឌិត​សភា​នយោបាយ​ដែលកាល​ពីពេល​មុន​មាន​ដាក់​ឈ្មោះ​លោក​មូបារ៉ាក់​គឺ​លោកស្រី​រ៉ាន់ណា អែល ម៉ាល់គី (Raina ​el ​Malky)​ បណ្ណាធិការ​កាសែត។ លោកស្រី​និយាយ​ថា​បើ​មាន​នរណាម្នាក់​បាន​ទស្សន៍ទាយ​ថា​នឹងមាន​រឿង​ដូច​នេះ​កាលពី​ឆ្នាំទៅ​ លោក​ស្រីនឹង​គិត​ថា​ពួកគេជា​មនុស្ស​ភ្លីភ្លើ។

«ខ្ញុំនឹង​និយាយ​ថា​ពួកគេ​រស់​នៅ​ផ្កាយ​ព្រះអង្គារ​ឬ​ ភព​ Neptune​ ឬ​នៅ​ខាងក្រៅ​ផែនដី​ពីព្រោះ​ការណ៍​នេះ​មិន​ដែល​បាន​គិត​ទេ។ ខ្ញុំ​គិត​ថា​អ្វី​ដែល​បាន​កើតឡើង​ចាប់តាំង​ពី​ថ្ងៃ​ទីមួយ​ ចាប់តាំង​ពី​ថ្ងៃទី​២៥​ ខែ​មករា​ ជា​អព្ភូតហេតុមួយ»។

លោក​មូបារ៉ាក់ ​ជា​មេដឹកនាំ​អារ៉ាប់​ទី​២​ដែល​ត្រូវ​បាន​បង្ខំ​ឲ្យ​ចុះចេញ​ពី​អំណាច​ក្នុង​អំឡុងពេល​នៃ​ការងើប​បះបោរ​មួយ​ដ៏​មាន​ប្រជាប្រីយ៍​ប្រឆាំង​រដ្ឋាភិបាលដែល​បាន​ធ្វើ​ឲ្យរង្គើ​តំបន់​អាហ្វ្រិក​ខាងជើង​និង​តំបន់​មជ្ឈិម​បូព៌ា​នៅ​ឆ្នាំ​នេះ​ហើយ​ជា​មេដឹកនាំ​ទី​១​ដែល​ត្រូវ​យកមក​កាត់ទោស។ មនុស្ស​ដែល​គាំ​ទ្រ​បុរស​ម្នាក់​ដែលបាន​គ្រប់គ្រង​ប្រទេស​អេហ្ស៊ីប​ជិត​៣០​ឆ្នាំ​បាន​និយាយ​ការពារ​លោក​ដោយ​មាន​បុរស​ម្នាក់​បាន​ស្តីបន្ទោសបណ្តាញ​ផ្សាយព័ត៌មាន​និង​ប្រទេស​ក្រៅ​ រួមមាន​សហរដ្ឋ​អាមេរិក​និង​អ៊ីស្រាអែល​ ចំពោះ​អ្វី​ដែល​បាន​កើត​ឡើង។

«ជានិច្ចកាល​ ខ្ញុំ​គាំទ្រ​លោក​ ហើយ​ប្រជាពលរដ្ឋ​អេហ្ស៊ីប​រាប់​លាន​នាក់​ទៀត​គាំទ្រលោក​ មូបារ៉ាក់។ ខ្ញុំ​ជឿជាក់​ថា​នេះ​ជា​ការរួមគំនិត​ឃុបឃិត​លើ​បញ្ហា​ប្រទេស​អេហ្ស៊ីប​ ការរួមគំនិត​ឃុបឃិត​ដែល​ធ្វើ​បាន​យ៉ាង​ល្អ ​ប៉ុន្តែ ​ទៅតាម​ឆន្ទៈ​របស់​ព្រះ​ យើង​នឹង​ឈ្នះ​ការឃុបឃិត​នៅ​ពេល​នេះ»។

ប៉ុន្តែ​មនុស្ស​បែបនោះ​ហាក់ដូច​ជា​មាន​សំឡេង​ភាគតិច។ នៅ​ពាសពេញ​រដ្ឋធានី​ ប្រជា​ពលរដ្ឋ​អេហ្ស៊ីប ​បាន​អង្គុយ​ជា​ក្រុម​នៅ​ជុំវិញ​ទូរទស្សន៍​នៅ​ហាង​កាហ្វេ​និង​កន្លែង​ចេញ​ចូល​ មើល​ការកាត់ទោស​ជា​ប្រវត្តិសាស្រ្ត​នេះ។ រឿង​ក្តី​ប្រឆាំង​ លោក​ មូបារ៉ាក់​និង​កូនប្រុស​របស់​លោក​មាន​កំណត់ពេល​បន្ត​នៅ​ថ្ងៃ​ទី​១៥​ ខែ​សីហា។ មនុស្ស​ផ្សេង​ៗ​ទៀត​ មាន​កំណត់ពេល​បង្ហាញ​ខ្លួន​ក្នុង​តុលាការ​ម្តង​ទៀត​នៅ​ថ្ងៃ​ព្រហស្បតិ៍៕

ប្រែ​សម្រួល​ដោយ ​ជឹង​ ប៉ូជីន

XS
SM
MD
LG