ភ្ជាប់​ទៅ​គេហទំព័រ​ទាក់ទង

រដ្ឋាភិបាល​យោធា​ភូមា​ត្រូវរំលាយ​ចោល​ជាផ្លូវការ ​ក្រោយ​រដ្ឋាភិបាល​ស៊ីវិល​ធ្វើសច្ចាប្រណិធាន​ចូលកាន់​តំណែង


ប្រធានាធិបតីលោក​ ថេន​ សេន (ស្តាំ) និង​អនុប្រធានាធិបតី​លោក ធី​ហា ធូរ៉ា ទីន អង់មីន អូ ត្រូបបានថតរូប​រួមគ្នា​នៅ​ខែកុម្ភៈ ឆ្នាំ ២០១១។

រដ្ឋាភិបាល​យោធា​របស់​ប្រទេស​ភូមា​ បាន​ត្រូវ​រំលាយ​បាត់​ទៅ​ហើយ​តាម​ផ្លូវ​ការ​ ហើយរដ្ឋាភិបាល​ស៊ីវិល ​បាន​ធ្វើសច្ចា​ប្រណិធាន​ឡើង​ជំនួស​ក្រោយ​ពី​មាន​របប​យោធា​កាន់​អំណាច​ជា​ច្រើន​ទសវត្សរ៍​។ អ្នក​ឆ្លើយ​ឆ្លង​ព័ត៌មាន​ វីអូអេ​ Daniel​ Schearf​ រាយការណ៍​ពី​រាជធានីបាងកក​ថា​ ក្រុមអ្នក​និយម​យោធា​ នៅតែ​ត្រួតត្រា​រដ្ឋាភិបាល​ថ្មី។

បណ្ដាញ​ព័ត៌មានរដ្ឋ​របស់​ប្រទេស​ភូមា​ កាលពី​ថ្ងៃពុធ ​បាន​ប្រកាស​តាម​ផ្លូវការ​ថា​ រដ្ឋាភិបាល​យោធា​ បាន​ត្រូវ​រំលាយ​តាម​ផ្លូវការ រួចអំណាច​បាន​ត្រូវ​ប្រគល់​ទៅឲ្យ​អ្វីដែល​ហៅថា​ រដ្ឋាភិបាល​ដឹកនាំ​ដោយ​ក្រុមស៊ីវិល។

អតីត​នាយក​រដ្ឋមន្ដ្រី​ លោក​ ថេន​ សេន​ បានធ្វើ​សច្ចា​ប្រណិធាន​ ជា​ប្រធានាធិបតី​ជាមួយ​នឹង​រដ្ឋបាល​ថ្មី​ ជ្រើស​តាំង​ឡើង​ ក្រោយពី​ការបោះឆ្នោត​ដ៏ចម្រូង​ចម្រាស់​កាលពី​ខែវិច្ឆិកា។

តែ​ការប្រគល់​អំណាចជា​ប្រវត្ដិសាស្រ្ដ​ ពោរពេញ​ទៅដោយ​ការព្រួយបារម្ភថារបប​យោធា​ នៅតែ​បន្ដ​ត្រួតត្រា​តាមរយៈ​ជន​ដែល​ស្មោះត្រង់​ចំពោះយោធា។

មេដឹកនាំ​លទ្ធិ​ប្រជាធិបតេយ្យ​ លោកស្រី​ អោង ​សាន​ ស៊ូជី​ បានត្រូវហាមមិនឲ្យ​ចូលរួម​ ហើយ​គណបក្ស​ សម្ពន្ធជាតិ​សំរាប់​លទ្ធិ​ប្រជាធិប​តេយ្យ​របស់លោក​ស្រី ​បាន​ត្រូវ​បំបែក​ខ្លួន ដោយសារ​តែ​ មិន​សុខចិត្ដ​ចូលរួម​ក្នុងការបោះ​ឆ្នោត។

លោក​ និយន​ វិន អ្នកនាំពាក្យ​ របស់​គណបក្ស ​NLD ​ថ្លែងថា​ គេទទួល​ស្គាល់​ថាមាន​រដ្ឋាភិបាល​ភូមា​ថ្មី​មូយ ​ហើយ ​បើក​ចំហ ​ឲ្យ​មាន​ការ​ចចារ​គ្នា​ តែ​ គេនឹង​តាមដានមើល​ដ៏​ដិតដល់​មកលើ​សញ្ញា​ដែល​បង្ហាញ​ការ​ត្រួតត្រា​របស់​យោធា។

«យើង​ចំាមើល​ព្រិត្ដការណ៍​នេះ។ យើង​មាន​ការព្រួយបារម្ភ​ អំពី​ការត្រួតត្រារបស់​យោធា​ មក​លើ​រដ្ឋាភិបាល ​ឬ ​ទេ។ ​យើង​មិនដឹង​ច្បាស់​នៅឡើយ។យើង​នឹង​រង់ចាំ​មើល»។

រដ្ឋាភិបាល​យោធា​ បាន​អួតអាង​ថា​ ការបោះឆ្នោត​នោះ​ ជា​វិធានការ​មូយទៅ​រក​លទ្ធិ​ប្រជាធិបតេយ្យ ​តែ​ បានត្រូវគេ​មើលឃើញ​ធំធេង​ ថាជាការបំភ័ន្តភ្នែក។

រដ្ឋធម្មនុញ្ញ​ដែល​តាក់តែង​ឡើង​ដោយ​យោធា ធានា​ ឲ្យមាន​អាសនៈ​ មួយភាគបួន​ នៃ​កៅអី​ទាំងអស់​នៅក្នុង​រដ្ឋសភា​ សម្រាប់​គណបក្ស​គាំទ្រ​ដោយយោធា​ ដែល​បានត្រូវ​ជាប់ឆ្នោត​ដ៏​លើសលុប​ ទោះបីជា​មានការចោទ​ប្រកាន់​ពីការកេងបន្លំ​សន្លឹកឆ្នោត​ និង​ ការកំញើញ​សំឡុត​ក៏ដោយ។

មន្ដ្រី​យោធា​ជាច្រើននាក់​ បាន​លាលែង​ចេញពី​ដំណែងយោធា​ ដើម្បី​ឈរឈ្មោះ​បោះឆ្នោត​ រាប់បញ្ចូល​ប្រធានាធិបតី​ថ្មី​ខ្លួនឯង​ ដែលជា​អតីត​ឧត្ដមសេនីយ​បានត្រូវ​ចាត់ទុកជា​អ្នកស្មោះត្រង់​នឹង​កងយោធា។

គណបក្ស​ប្រជាធិបតេយ្យ​តូចតាច​ បានត្រូវ​ជាប់ឆ្នោត​ដែរ​ តែ​បានទទួលអាសនៈ​មួយ​ចំនួនតិច។

រដ្ឋាភិបាល​យោធា​ មានឈ្មោះ​ជា​ផ្លូវការ​ ក្រុម​ប្រិក្សារដ្ឋ​សម្រាប់​សន្ដិភាព​ និង​ការអភិវឌ្ឈន៍ ​បាន​គ្រប់គ្រង​ប្រទេស​ភូមា​ ចាប់តាំងពី​ឆ្នាំ​ ១៩៨៨ ហើយ​ប្រទេស​ភូមា​ដ៏ក្រីក្រ​នោះ​ ឋិតនៅ​ក្រោម​ការ​ត្រួតត្រា​យោធា​ ជាង​កន្លះ​សតវត្សរ៌។

គណបក្ស​ NLD ​បានយក​ជ័យជំនះ​ក្នុង​ការបោះឆ្នោត​ចុងក្រោយ​បង្អស់​ នៅ​ឆ្នាំ​១៩៩០​តែ​ យោធា​ បាន​បដិសេធ​លទ្ធផល​ ហើយ​ ចាប់ឃុំ​លោកស្រី​ អោង​សាន​ ស៊ូជី​ អស់​រយៈពេល​ជាង​ពីរ​ទសវត្សរ៍។

លោកស្រី​បានត្រូវ​ដោះលែងពីការ​ឃុំឃំាង​ក្នុងគេហដ្ឋាន​ កាលពីឆ្នាំមុន​នៅក្រោយ​ការ​បោះឆ្នោត។

ប្រែ​សម្រួល​ដោយ​ អ៊ូ​ ធួក

XS
SM
MD
LG