ភ្ជាប់​ទៅ​គេហទំព័រ​ទាក់ទង

លោក​ស្រី​អោងសានស៊ូជី​មេដឹកនាំ​លទ្ធិ​ប្រជាធិបតេយ្យ​នៃ​ប្រទេស​ភូមា​​ជួប​មន្ត្រី​នៃ​រដ្ឋាភិបាល​ថ្មី​


លោក​អោងជី​រដ្ឋមន្ត្រី​ក្រសួង​ការងារ​និងសុខុមាលភាពសង្គម​នៃ​ប្រទេស​ភូមា​ហើយនឹង​លោកស្រី​អោង​សាន​ស៊ូ​ជីអានសេចក្ដី​ថ្លែងការណ៍​ជូន​បណ្ដញ​ព័ត៌មាន​ក្រោយ​ពី​ការ​ប្រជុំ​នៅ​គេហស្ថាន​រដ្ឋាភិបាល​ Seinlekhanthar នៅ​ទី​ក្រុង​យ៉ានគូន​នៅ​ថ្ងៃ​ទី​២៥​ខែ​កក្កដា​ឆ្នាំ​២០១១។​

លោក​ស្រី​អោងសានស៊ូជី​ មេដឹកនាំ​លទ្ធិ​ប្រជាធិបតេយ្យ​នៃ​ប្រទេស​ភូមា​បាន​ជួប​ជាមួយ​មន្ត្រី​ម្នាក់​នៃ​រដ្ឋាភិបាល​ថ្មី​ ដែល​ជា​ជំនួប​បែប​នេះ​លើក​ទី​មួយ​ចាប់​តាំង​ពី​ការ​ដោះលែង​លោកស្រី​ចេញ​ពី​ការ​ឃុំឃាំង​នៅក្នុងផ្ទះ។ការ​ជួបគ្នា​នេះ​បាន​បង្កើន​សេចក្តី​សង្ឃឹម​សម្រាប់​ការ​សន្ទនា​គ្នា​ជា​ទៀងទាត់​រវាង​លោកស្រី​និង​រដ្ឋាភិបាល​ដែល​គ្របសង្កត់​ដោយ​ពួក​យោធា។ក៏ប៉ុន្តែមាន​ការសង្ស័យ​ថា​កិច្ច​ពិភាក្សា​គ្នា​នេះ​នឹង​មិន​នាំ​ទៅកាន់​ការ​កែទម្រង់​ពិតប្រាកដ​ទេ។

លោក​អោង ជី​ រដ្ឋមន្ត្រី​ក្រសួង​ការងារ​និងសុខុមាលភាពសង្គម​នៃ​ប្រទេស​ភូមា​និយាយថា​លោក​និង​លោកស្រី​អោង​សានស៊ូជី ​មេ​ដឹកនាំ​ក្រុម​ប្រឆាំង​បាន​និយាយគ្នា​អំពី​វិធាន​នៃច្បាប់​និង​កិច្ច​សហប្រតិបត្តិការ​ក្នុង​ផលប្រយោជន៍​របស់​ប្រទេស​និង​ប្រជារាស្ត្រ។​ដោយ​មើល​សេចក្តី​ថ្លែងការណ៍​មួយ​ប្រាប់​ពួក​អ្នកកាសែត​នៅ​ក្រោយ​ការ​ជួប​គ្នា​របស់​អស់លោក​កាល​ពី​ថ្ងៃ​ចន្ទ​ លោក​បាន​និយាយថា​លោក​និង​លោកស្រី​បាន​យល់ឃើញ​ថា​ការ​ពិភាក្សាគ្នា​មាន​ភាព​វិជ្ជមាន​ហើយ​ថា​លោក​និង​លោកស្រី​នឹង​ជួប​គ្នា​ទៀត។នេះ​ជា​លើក​ទីមួយ​ហើយ​ដែល​មន្ត្រី​ម្នាក់​របស់​រដ្ឋាភិបាល​បាន​ជួប​ជាមួយ​លោកស្រី​អោង​សានស៊ូជី​ចាប់ តាំង​ពី​លោកស្រី​បាន​ត្រូវ​ដោះលែង​ពី​ការ​ឃុំឃាំង​ក្នុង​ផ្ទះ​នៅ​ក្រោយ​ការ​បោះ​ឆ្នោតកាល​ពី​ឆ្នាំ​ទៅមិញ។

លោកស្រី​បាន​ស្វះស្វែង​ឱ្យ​មាន​ការ​សន្ទនា​គ្នា​ជាមួយ​រដ្ឋាភិបាល​អំពី​ការ​កែលម្អ​ប្រវត្តិ​សិទ្ធិមនុស្ស​ដែល​មិនល្អ​របស់​ប្រទេស​និង​កិច្ច​ខិតខំ​ប្រឹងប្រែង​ធ្វើឱ្យ​មាន​លិទ្ធិ​ប្រជាធិបតេយ្យ​ក្នុង​ប្រទេស​ភូមា។

លោក​ Zin Linn ​ដែល​ជា​អ្នកនាំពាក្យ​របស់​រដ្ឋាភិបាល​ភូមា​និរទេស​ខ្លួន​នៅ​ក្នុង​ប្រទេស​ថៃ​ និយាយថា​មាន​ការព្រួយ​បារម្ភ​ថា​ការ​ជួបគ្នា​នេះ​ ដូចជា​ជំនួប​គ្នា​កាល​ពី​ពេល​មុនៗដែរ​ គឺ​គ្រាន់តែ​ជា​ឆាកល្ខោន​មួយ។លោក​បាន​ចង្អុល​បង្ហាញ​ថា​លោកស្រី​អោង​សានស៊ូជី​និង​លោក​អោងជី​បាន​ជួបគ្នា​៩​ដង​នៅ​ពេល​លោកស្រី​ជាប់​ឃុំឃាំង​ក្នុង​ផ្ទះ​ ដោយ​បាន​លទ្ធផល​បន្តិចបន្តួច។

«ប្រសិន​បើ​រដ្ឋាភិបាល​នេះ​ប្រាកដ​ជា​ដើរ​លើ​មាគ៌ានៃ​លិទ្ធិប្រជាធិបតេយ្យ​មែន​ ពួក​គេ​គួរ​ដោះលែង​ក្រុម​អ្នកទោស​នយោបាយ​...ដូច្នេះ​ពួកគេ​គួរ​ដោះលែង​ពួក​អ្នកទោសនយោបាយ​ទាំងនេះ​ហើយ​ឈប់​ប្រយុទ្ធ​ប្រឆាំង​នឹង​ពួក​ជន​អម្បូរ​ភាគ​តិច។ ហើយ​ ជា​ដំបូង​ពួកគេ​គួរ​ធ្វើ​ការ​កែទម្រង់​ប្រព័ន្ធ​ច្បាប់​និង​របៀប​រៀបរយ​របស់​ពួកគេ។គ្មាន​ច្បាប់​សោះទ្បើយ​នៅ​ក្នុង​ប្រទេស​ភូមា»។

ការ​ជួបគ្នា​នេះ​បាន​កើត​មានទ្បើង​តែ​ប៉ុន្មាន​ថ្ងៃ​ក្រោយ​ពី​លោកស្រី​ Hillary Clinton​រដ្ឋមន្ត្រីក្រសួង​ការ​បរទេស​ស.រ.អ.​បាន​អំពាវនាវ​ឱ្យ​មាន​ការ​សន្ទនាគ្នា​រវាង​ភាគី​ទាំងពីរ​នៅ​ក្នុង​ការ​ប្រជុំ​មួយ​នៃ​សមាគម​ប្រជាជាតិ​អាស៊ី​អាគ្នេយ៍​នៅ​ក្នុង​ប្រទេស​ឥណ្ឌូនេស៊ី។

ប្រែ​សម្រួល​ដោយ ឈឹម សុមេធ

XS
SM
MD
LG