ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការធាត់​ដុះ​ក្បាលពោះ​ អាច​មាន​គ្រោះថ្នាក់​ខ្លាំង​ដល់​សុខភាព


ការស្រាវជ្រាវ​ថ្មី​ឲ្យ​ដឹងថា មនុស្ស​ធាត់​ដែល​មាន​ក្បាលពោះ​ធំ​ជាង​​ត្រគាក​​ ទំនង​មាន​គ្រោះ​ថ្នាក់​ស្លាប់។
ការស្រាវជ្រាវ​ថ្មី​ឲ្យ​ដឹងថា មនុស្ស​ធាត់​ដែល​មាន​ក្បាលពោះ​ធំ​ជាង​​ត្រគាក​​ ទំនង​មាន​គ្រោះ​ថ្នាក់​ស្លាប់។

ការសិក្សា​ថ្មី​ដែល​មាន​ភស្តុតាង​គួរ​ឲ្យ​កត់​សំគាល់​ឲ្យ​ដឹង​ថា​ ការធាត់​ដុះ​ក្បាលពោះ​ អាច​មាន​គ្រោះថ្នាក់​ខ្លាំង​ដល់​សុខភាព​របស់​លោកអ្នក​ ប្រសិនបើ​លោកអ្នក​ធ្លាប់​មាន​ជម្ងឺ​គាំង​បេះដូង។​ លទ្ធផល​របស់​ការសិក្សា​នោះ​ប្រៀបធៀប​ការកើន​គ្រោះថ្នាក់​នៃ​ការស្លាប់​ ទៅ​នឹង​ការជក់​បារី​មួយ​កញ្ចប់​ក្នុង​មួយ​ថ្ងៃ​ ឬ​ការមាន​សារធាតុ​ខ្លាញ់​ក្នុងឈាម​ខ្ពស់​ខ្លាំង។

នៅ​ក្នុង​ការសិក្សា​ដ៏ធំ​បង្អស់​មួយ​នៃ​ការសិក្សា​ជំពូក​នេះ​ ក្រុម​អ្នកស្រាវជ្រាវ​នៅ​ឯ​មន្ទីរ​ព្យាបាល​និង​ស្រាវជ្រាវ​ Mayo Clinic​ នៅ​ក្នុង​ទីក្រុង​ Rochester​, រដ្ឋ Minnesota​ បាន​រកឃើញ​ថា​មនុស្ស​មាន​ជម្ងឺ​បេះដូង​ ដែល​មាន​ដុះ​ក្បាលពោះ​សូម្បី​តែ​បន្តិច​ មាន​គ្រោះថ្នាក់​ពីរ​ដង​នៃ​ការស្លាប់​ ដូច​ជា​មនុស្ស​ដែល​មាន​សារធាតុ​ខ្លាញ់​ពាសពេញ​រាងកាយ​ដែរ។

ក្រុម​អ្នកស្រាវជ្រាវ​ដែល​ដឹកនាំ​ដោយ​លោក​ Francisco Lopez-Jimenez​ បាន​វិភាគ​ទិន្នន័យ​ដែលប្រមូល​ពី​ការសិក្សា​៥​ ស្តី​អំពី​ក្រុម​អ្នកនៅរស់​ពី​ជម្ងឺ​គាំងបេះដូង​ជិត​១៦ពាន់​នាក់​នៅ​ជុំវិញ​ពិភពលោក។

លោក​ Lopez-Jimenez​ និយាយ​ថា​ ក្រុម​អ្នកស្រាវជ្រាវ​ចង់​សាកល្បង​ប្រមើល​ មើល​ថាតើ​អ្នក​ជម្ងឺ​ទាំងនេះ​អាច​មាន​សុខភាព​ល្អ​ប៉ុណ្ណា​ទៅអនាគត​ ដោយ​អាស្រ័យ​ទៅលើ​ផ្នែក​នៃ​រាងកាយ​ដែល​ធាត់​មាន​ដុះ​ខ្លាញ់។ លោក Lopez-Jimenez និយាយថា ៖

«យើង​បាន​រកឃើញថា​មនុស្ស​ធាត់​ដែល​មាន​ក្បាលពោះ​ធំជាង​ត្រគាក​ ឬធាត់​តែ​កន្លែង​ក្បាលពោះ​នោះ​ មនុស្ស​ទាំងនោះ​ទំនង​ដូចជា​មាន​គ្រោះថ្នាក់​ស្លាប់​ ពី២៥​ទៅ​៧០ភាគរយ ​បើ​ប្រៀបធៀប​ទៅ​មនុស្ស​ធាត់ធម្មតា»។

គ្រាដែល​ការ​ធាត់​ដុះពោះ​បាន​ទាក់ទង​ជាយូរ​មកហើយ​ទៅនឹង​ជម្ងឺ​សរសៃឈាម​បេះដូង​នោះ​ លោក​ Lopez-Jimenez​ ដែលជា​អ្នកនាំមុខ​កម្មវិធី​ព្យបាល​ជម្ងឺ​បេះដូង​ដោយ​ការពិនិត្យ​ម្ហូប​អាហារ​និង​ការហាត់ប្រាណ​នៅ​មន្ទីរព្យាបាល​ Mayo​ មាន​ប្រសាសន៍​ថា​ ការសិក្សា​នោះ​មិនមែន​ជា​ការ​ប្រមើល​មើល​ល្អជាងគេ​បំផុត​អំពី​អ្នកដែល​រស់យូរ​ទេ។​ ភាពធាត់​លើស​ទម្ងន់​ឬ​ធាត់​ដុះពោះ​ ត្រូវបាន​វាស់​តាម​ធម្មតា​ដោយ​ថ្លឹង​ទម្ងន់ខ្លួន​និង​វាស់​កំពស់​មនុស្ស​ ហើយ​ផ្ទៀងផ្ទាត់​ទៅនឹង​ទម្ងន់​និង​កំពស់​របស់​មនុស្ស​ ហៅ​កាត់​ថា BMI។ ប៉ុន្តែ​នៅ​ក្នុង​ការសិក្សា​នោះ​និយាយថា​ មនុស្ស​ដែល​មាន​ BMI​ខ្ពស់​ មាន​ខ្លាញ់​ក្នុងរាង​កាយ​ច្រើន​ ជាធម្មតា​មាន​អាយុ​វែងជាង​មនុស្ស​ដែល​មាន​ BMI​ទាប។

លោក​ Lopez-Jimenez​ និយាយថា​ ការ​បែងចែក​នៃ​ទម្ងន់​ធាត់​ ជា​សញ្ញា​នៃ​ការទាយ​ប្រសើរ​មួយ។

ក្រុម​អ្នកស្រាវជ្រាវ​មិន​ដឹងថា​ហេតុ​ដូចម្តេច​បានជា​ការដុះ​ក្បាលពោះ​បង្កើន​គ្រោះថ្នាក់​ស្លាប់​ ប្រៀប​ទៅនឹង​ការធាត់​ស្មើពេញ​រាងកាយ​ ឬធាត់​កន្លែង​ផ្សេងៗ​ទៀត​ដូចជា​ជើង​និង​គូថ។

លោក​ Lopez-Jimenez​ និយាយថា​ ការស្រាវជ្រាវ​បង្ហាញថា​ ការធាត់​ត្រង់ពោះ ​ជា​ហេតុ​នាំ​ឲ្យ​ជាតិ​ខ្លាញ់​ក្នុង​ឈាម​និង​សម្ពាធ​ឈាម​ឡើង​ខ្ពស់។

«ទាំងអស់​នេះ​ជា​កត្តា​ដែល​បណ្តាល​ឲ្យកើត​ជម្ងឺ​បេះដូង។​ ដូច្នេះ​ចំពោះ​មនុស្ស​ដែល​មាន​ជម្ងឺ​បេះដូង​ យើង​ជឿថា​កត្តា​ទាំងនេះ​នឹង​មិនធ្វើ​ឲ្យ​អ្នកទាំងនោះ​មាន​សុខភាព​ប្រសើរ​បាន​ឡើយ»។

សំណាងល្អ​ ក្រុម​អ្នកជំនាញ​និយាយថា​ ខ្លាញ់ធាត់​នៅនឹង​ក្បាលពោះ​ជាខ្លាញ់​ដែល​ងាយ​ធ្វើ​ឲ្យ​ស្រក​ជាទី​បំផុត។​ មនុស្ស​ភាគច្រើន​អាច​សម្រក​ខ្លាញ់​ដែល​គ្មាន​ប្រយោជន៍​សំរាប់​រាងកាយ​ដោយ​ទទួលទានអាហារ​មាន​កាឡូរី​តិច​ និង​ធ្វើ​ការហាត់ប្រាណ​ទៀងទាត់​រាល់​ថ្ងៃ។

អត្ថបទ​ពិពណ៌នា​អំពី​គ្រោះថ្នាក់​នៃ​ការធាត់​ដុះពោះ​នៅក្នុង​ចំណោម​មនុស្ស​មាន​ជម្ងឺ​បេះដូង​បាន​ចេញ​ផ្សាយ​នៅក្នុង​ទស្សនាវដ្តី​ the Journal​ of the​ American​ College​ of Cardiology។

ប្រែសម្រួល​ដោយ នុច សារីតា

XS
SM
MD
LG