ជនជាតិសូវៀតបានធ្វើសង្គ្រាមលើអ្នកកាន់ព្រះពុទ្ធសាសនាអស់រយះបួនជំនាន់មកហើយ ជួនកាលលាបពណ៌អ្នកកាន់សាសនាព្រះពុទ្ធថាជា “អ្នកស៊ើបការណ៍សម្ងាត់ជប៉ុន”។ ឥឡូវនេះ ២០ឆ្នាំក្រោយពីការរលំរបបកុម្មុយនីស្ត ព្រះពុទ្ធសាសនាកំពុងរីកចំរើនឡើងវិញយ៉ាងខ្លាំងនៅក្នុងតំបន់ប្រវត្តិសាស្ត្ររបស់ខ្លួន។ ទីក្រុង Ulan Ude ជាទីក្រុងអាស៊ី ឋិតនៅតាមផ្លូវរថភ្លើងដ៏វែងជាងគេបំផុតនៃពិភពលោកហៅ Trans-Siberian Railway ដែលភ្ជាប់ទីក្រុងមូស្គូទៅសមុទ្រជប៉ុន។
សម្លេងស្គ ជួង និងសម្លេងសូត្រធម៌ជាសម្លេងពិរោះរណ្តំរបស់ប្រទេសអាស៊ី។ ប៉ុន្តែភាសានិយាយរវាងព្រះសង្ឃនៅទីនេះ នៅក្បែរឆ្នេរនៃបឹង Lake Baikal គឺភាសារុស្ស៊ី។
Ulzutuev Yondon បង្រៀនទស្សនវិជ្ជានៅវត្ត Ivolginsky datsan ដែលជាវត្តព្រះពុទ្ធសាសនាធំរបស់ប្រទេសរុស្ស៊ី។
លោកនិយាយថា នៅពេលលោកបានសិក្សាអំពីព្រះពុទ្ធសាសនានៅក្នុងប្រទេសឥណ្ឌា អ្នកស្រុកមិនជឿថាលោកជាជនជាតិរុស្ស៊ីទេ។
បុរសអាយុ២៥ឆ្នាំជាមនុស្សម្នាក់ នៃមនុស្សជាងមួយលាននាក់ នៅក្នុងប្រទេសរុស្ស៊ីក្រោយសហភាពសូវៀតរលំ ដែលបានកាន់យកជំនឿលើព្រះពុទ្ធសាសនាពីបុព្វជនរបស់ខ្លួន។
អ្នកត្សារនិយមនៃប្រទេសរុស្ស៊ី រួមរស់ជាមួយជំនឿព្រះពុទ្ធសានាទីបេតិ៍ នៃប្រជាពលរដ្ឋម៉ុងហ្គោលី ដែលរុស្ស៊ីបានត្រួតត្រា នៅក្នុងតំបន់អាស៊ីកណ្តាល។
ប៉ុន្តែពួកសូវៀតបានធ្វើសង្គ្រាមលើព្រះពុទ្ធសាសនា។ ពួកសូវៀតកំទេចព្រះវិហារនិងវត្តអារាម យកសាស្ត្រាស្លឹករឹតទៅមូរបារីជក់ បាញ់សម្លាប់បព្វជិតច្រើនរយនាក់ និងបញ្ជូនបុព្វជិតដែលនៅសេសសល់ទៅកាន់ជំរុំធ្វើការងារជាទម្ងន់របស់សូវៀតហៅ Gulag ។
ដូនជី Tenzin Choidrin និយាយអំពីការបំផ្លាញព្រះពុទ្ធសាសនារបស់ពួកកុម្មុយនីសទៅលើវប្បធម៌ និងអារ្យធម៌ព្រះពុទ្ធសាសនានៅទីនេះ។
«ដូនជីមានប្រសាសន៍ថា ដោយសារការគាបសង្កត់របស់ពួកកុម្មុយនីស្ត ប្រព័ន្ធព្រះពុទ្ធសាសនាត្រូវបានបំផ្លាញស្ទើរតែទាំងអស់។ ទស្សនៈពិភពលោកនៃអ្នកកាន់ព្រះពុទ្ធសាសនា មូលដ្ឋាននៃជីវិតរស់នៅតាមរបៀបប្រពៃណីត្រូវបានបំផ្លាញ ទ្រឹស្តីប្រពៃណីមានតម្លៃត្រូវបានបំផ្លាញអស់»។
ពួកសូវៀតបង្ខំព្រះពុទ្ធសាសនាឲ្យស្ថិតនៅក្នុងសភាពលួចលាក់។ ប៉ុន្តែពួកគេបានបរាជ័យក្នុងការបំបាត់ជំនឿពីតំបន់រឹងមាំជាប្រវត្តិសាស្ត្ររបស់ខ្លួន នៅ សាធារណរដ្ឋ Kalmykia, Tuva, និង Buryatia ដែលនៅជិតខាង។
ថ្វីត្បិតតែសព្វថ្ងៃនេះមានជនជាតិរុស្ស៊ីកាន់សាសនាព្រះពុទ្ធច្រើនជាងមុនពេលបដិវត្តន៍ក៏ដោយ ក៏វិមានក្រឹមឡាំងច្រានចោលការទាមទារយ៉ាងសំខាន់បំផុតរបស់ពួកគេដែរ។
ពួកគេចង់ឲ្យមេដឹកនាំសាសនាជាន់ខ្ពស់របស់ពួកគេ គឺសម្តេច Dalai Lama នៃទីបេត៍ និមន្តមកប្រទេសរុស្ស៊ីនិងដើម្បីឧទ្ទិសព្រះវិហារនិងវត្តថ្មីចំពោះព្រះអង្គ ប៉ុន្តែរដ្ឋាភិបាលក្រុងមូស្គូបានបដិសេធផ្តល់ទិដ្ឋការប្រគេនដល់សម្តេច Dalai Lama ចាប់តាំងពីទស្សនកិច្ចចុងក្រោយបង្អស់របស់ព្រះអង្គ នៅក្នុងឆ្នាំ២០០៤។
ប៉ុន្តែដូនជី Choidrin មានប្រសាសន៍ថា ទស្សនកិច្ចមួយដោយ សម្តេច Dalai Lama ត្រូវការជាចាំបាច់។
ដូនជីមានប្រសាសន៍ថា មិនអាចកាត់ថ្លៃលើមុខនាទីរបស់សម្តេច Dalai Lamaក្នុងការធ្វើឲ្យព្រះពុទ្ធសាសនាចាប់កំណើតនៅប្រទេសរុស្ស៊ីឡើងវិញនោះបានទេ។ ដូនជីថ្លែងថា ទស្សនកិច្ចរបស់ព្រះអង្គ អាចដូចជាទឹកដែលផ្សើមដីបែកក្រហែងដោយកំដៅព្រះអាទិត្យ។
ដូនជី Choidrin ថ្លែងថាឥឡូវនេះ សម្តេច Dalai Lama បានបោះបង់មុខនាទីនយោបាយក្នុងឋានៈជាអ្នកដឹកនាំនៃជននិរទេសខ្លួនទីបេត៍ហើយ ប្រទេសរុស្ស៊ីគួរផ្តល់ទិដ្ឋាការដល់ព្រះអង្គ។
ប៉ុន្តែប្រទេសចិនឥឡូវនេះជាដៃគូពាណិជ្ជកម្មដ៏ធំបង្អស់តែមួយគត់របស់ប្រទេសរុស្ស៊ី។ ក្រុមមន្ត្រីផ្លូវការចិនបានព្រមានថា រដ្ឋាភិបាលក្រឹមឡាំងមានជម្រើសច្បាស់លាស់មួយថាៈ តើយកអ្នកដើរតាមសម្តេច Dalai Lama មួយលានបីសែននាក់ ឬក៏យកចិន មួយពាន់បីរយលាននាក់។
នៅឯវត្តជិតខាងមួយ នាង Irina ដែលជាពុទ្ធសាសនិកជន បានមកបួងសួងឲ្យទារកនៅក្នុងពោះនាង។
ក្រោយពីបង្វិលកង់សម្រាប់បួងសួងរួចហើយ នាងនិយាយថា នាងមកទីវត្តនេះដើម្បីបួងសួងសុំឲ្យដំណើរមានគភ៌របស់នាង និងកំណើតរបស់ទារក បានប្រកបដោយសេចក្តីសុខ។
ហើយដោយវិនិច្ឆ័យលើចំនួនដ៏ច្រើននៃស្ត្រីមានផ្ទៃពោះមកទីវត្ត ធ្វើការបួងសួងនិងទទួលព្រះពរនោះ ឱកាសដូចជាលំអៀងទៅខាងព្រះពុទ្ធសាសនា នៅទីនេះ នៅក្នុងមូលដ្ឋាននៃជនជាតិអាស៊ីរបស់ប្រទេសរុស្ស៊ី។
ប្រែសម្រួលដោយ នុច សារីតា