ភ្ជាប់​ទៅ​គេហទំព័រ​ទាក់ទង

អំណោយ​សៀវភៅ​សិក្សា​ជួយ​លើក​ស្ទួយ​វិស័យ​អប់រំ​នៅហ្ស៊ឹម​បាបវេ


សិស្ស​នៅ​ប្រ​ទេសហ្ស៊ឹម​បាបវេ កំពុង​អានសៀវភៅ​។

ដ្យូហានណឺសប៊ឺរហ្គ៖ នៅ​ពេល​ដែលសាលា​រៀន​នៅ​ប្រទេស​ ហ្ស៊ឹម​បាបវេ (Zimbabwe) បើក​ទ្វារ​ឡើង​វិញ​ នៅ​ថ្ងៃ​អង្គារ​ កូនសិស្ស​វ័យ​ក្មេងៗ​ នឹង​ឃើញ​ថា​ ពួក​គេ​មាន​សៀវភៅ​សិក្សា​ថ្មី ជា​លើក​ទី​មួយ​ ក្នុង​រយ:ពេល​ជា​ច្រើន​ឆ្នាំ​កន្លង​មក​នេះ។ សៀវភៅ​ចំនួន​១លាន​៣សែន​ក្បាល​ ដែល​មិន​ធ្លាប់​មាន​ពី​មុន​មក​ ត្រូវ​បាន​គេ​យក​ទៅ​ចែក​ចាយ​នៅ​សាលាបឋមសិក្សា​នានា​នៅ​ប្រ​ទេសហ្ស៊ឹម​បាបវេ ។

លោក ​ដេវិដ​ កុលតារត៍​ (David Coltart) រដ្ឋ​មន្ដ្រី​ក្រសួង​អប់រំ​ មាន​ប្រសាសន៍​ថា​ ការ​បញ្ជា​ទិញ​សៀវភៅ​សិក្សា​យ៉ាង​ច្រើន​លើស​លប់​នេះ​ ដែល​ជា​ចំនួន​មិន​ធ្លាប់​មាន​ពី​មុន​មក​ សម្រាប់​ប្រទេស​ ​ហ្ស៊ឹម​បាបវេ​ អាច​ធ្វើទៅ​បាន​ ដោយសារ​តែ​អំណោយ​ទាន​ ជា​ពិសេស​ មក​ពី​ប្រទេសនៅ​ក្នុង​តំបន់​ស្កង់ឌីណាវ​ (Scandinave) និង​ប្រទេស​អាល្លី​ម៉ង់។ កិច្ច​សន្យា​ទទួល​បោះ​ពុម្ព​ផ្សាយ​សៀវភៅ​ទាំង​នោះត្រូវ​បាន​ធ្វើ​ឡើង​នៅ​ប្រទេស​ ហ្ស៊ឹម​បាបវេ​ និង​ អាហ្វ្រិកខាង​ត្បូង​។

លោក កុលតារត៍ មាន​ប្រសាសន៍​ថា​ នៅ​ឆ្នាំ ២០១១​នេះ​ លោក​នឹង​អញ្ជើញ​ ក្រុម​អ្នក​ដេញ​ថ្លៃ​ដើម្បី​បោះ​ពុម្ព​ផ្សាយ​សៀវភៅ​សិក្សា​ មាន​មុខ​វិជ្ជា​សិក្សា​សំខាន់ៗ​ប្រាំ​ នៅ​សាលា​មធ្យមសិក្សា ។ លោក​ មាន​ប្រសាសន៍​ទៀត​ថា ​សៀវភៅ​ទាំង​នោះ​នឹង​ត្រូវ​យក​ទៅ​ចែក​ចាយ​នៅ​ក្នុង​ឆ្នាំ​២០១២​។

នៅ​ហ្ស៊ឹម​បាបវេ​ មាន​សាលា​រៀន​ជាង​៧,០០០​ ហើយ​លោក​ ​កុលតារត៍​ មាន​ប្រសាសន៍​ថា សាលា​រៀនជា​ច្រើន មាន​ហេដ្ឋា​រចនាសម្ព័ន្ធ​ទ្រុឌ​ទ្រោម​។ លោក​កោត​សរសើរ​ដល់​លោក ថិនដាយ​ប៊ីទី​ រដ្ឋ​មន្ដ្រី​ក្រសួង​ហិរញ្ញវត្ថុ​ ដែលថ្មី​ៗ​នេះ​ បាន​ផ្ដល់​ប្រាក់​៣៤ភាគរយ​ នៃ​ថវិកា​ជាតិ​ ទៅ​ឲ្យ​វិស័យ​អប់រំ​ ដែលជា​ចំនួន​ភាគ​រយ​ខ្ពស់​បំផុត។

ចាប់​តាំង​ពី​រដ្ឋាភិបាល​ចម្រុះ​ ឡើង​កាន់​តំណែង​ជិត​ពីរ​ឆ្នាំ​កន្លង​ទៅ​នេះ​ លោក​ កុលតារត៍​ មាន​ប្រសាសន៍​ថា​ ក្រសួង​អប់រំ​ បាន​ជួល​គ្រូ​បង្រៀន​ឡើង​វិញ​ចំនួន​ ១​៧.០០០នាក់​។

ប្រទេស​ ហ្ស៊ីម​បាបវេ​ ធ្លាប់​ មាន​វិស័យ​អប់រំ​ល្អ​ជាង​គេ​មួយ​ នៅ​ក្នុង​ ទ្វីប​អាហ្វ្រិក ។ កាល​ពី​ឆ្នាំ​ទៅ​ អង្គការសហប្រជាជាតិ​ឲ្យ​ដឹង​ថា​ ហ្ស៊ីម​បាបវេ​ មាន​អត្រា​អក្ខរកម្ម៩៦​ភាគរយ ដែល​ជា​ស្ថិតិ​ដែល​លោក​ កុលតារត៍​ មិន​យល់​ស្រប។ លោក​ស្រី​ ហ្វេ​យ៍​ឈុង​ (Fay Chung)​ អតីត​រដ្ឋ​មន្ដ្រី​ក្រសួង​អប់រំ​យ៉ាង​ល្បី​ឈ្មោះ​ម្នាក់​ នៃ​ប្រទេស​ ហ្ស៊ីម​បាបវេ​ មាន​ប្រសាសន៍​ថា​ អត្រា​អក្ខរកម្ម​ នឹង​អាច​ត្រូវ​បាន​វាយ​តម្លៃ ​ដោយ​ត្រឹម​ត្រូវ ​នៅ​ក្នុង​រយ:ពេលប៉ុន្មាន​ឆ្នាំខាង​មុខប៉ុណ្ណោះ និងឆ្លុះ​បញ្ចាំង​ឲ្យ​ឃើញ​នូវ​ការធ្លាក់​ចុះ​នៃ​ការ​អប់រំ​នៅ​ក្នុង​ទសវត្សរ៍​កន្លង​ទៅ​នេះ​។ លោក​ស្រី​បន្ត​ថា៖

«អក្ខរកម្ម​ជា​អ្វី​ដែល​វាយតម្លៃ ​អតីតកាល​ ពីព្រោះ​លោក​អ្នក​មើល​ទៅ​មនុស្ស​ដែល​ឈប់​រៀន​បួន​ប្រាំឆ្នាំ​កន្លង​ទៅ​នេះ​។ អក្ខរកម្ម​មិនអាច​វាយតម្លៃ​ បច្ចុប្បន្ន​កាល​ពិត​ប្រាកដ​ទេ​»។

លោក​ ​កុលតារត៍ ​កំពុង​តែ​ស្ថិត​នៅ​ក្នុង​ប្រទេស​ អង់​គ្លេសដើម្បីជួប​ជា​មួយ​ក្រុម​មន្ដ្រី ​អង់គ្លេស​សំខាន់ៗ។ លោក​មាន​ប្រសាសន៍​ថា ​អង់​គ្លេស​ ចង់​ជួយ​កុមារ​ ​ហ្ស៊ីមបាបវេ​ ក៏​ប៉ុន្ដែ​ត្រូវ​ការ​ឲ្យ​មានការ​ធានា​រ៉ាប់​រង​ ថា​មូលធន ដែល​ជា​អំណោយ​ទៅ​ឲ្យ​វិស័យ​អប់រំ​ នឹង​មិន​ត្រូវ​បង្វែរ ​ទៅឲ្យ​កង​យុវជីវពល​ ឬ​ក៏​អង្គការ​ដទៃៗ​ទៀត​ ដែល​លើក​ស្ទួយ​លទ្ធិ​ផ្ដាច់​ការ​នោះ​ទេ​៕

ប្រែ​សម្រួល​ដោយ កង ស៊ីវន

XS
SM
MD
LG