ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Biden នឹង​ចូលរួម​ក្នុង​ពិធី​សាសនា Mass ជាមួយ​ថ្នាក់​ដឹកនាំ​សភា មុន​ស្បថ​ចូល​កាន់​តំណែង


ប្រធានាធិបតីជាប់ឆ្នោតលោក Joe Biden ថ្លែងសុន្ទរកថានៅអាកាសយានដ្ឋាន New Castle County ក្នុងក្រុង New Castle រដ្ឋ Delaware ថ្ងៃទី១៩ ខែមករា ឆ្នាំ២០២១ មុនពេលលោកធ្វើដំណើរមកកាន់រដ្ឋធានីវ៉ាស៊ីនតោន។
ប្រធានាធិបតីជាប់ឆ្នោតលោក Joe Biden ថ្លែងសុន្ទរកថានៅអាកាសយានដ្ឋាន New Castle County ក្នុងក្រុង New Castle រដ្ឋ Delaware ថ្ងៃទី១៩ ខែមករា ឆ្នាំ២០២១ មុនពេលលោកធ្វើដំណើរមកកាន់រដ្ឋធានីវ៉ាស៊ីនតោន។

លោក Joe Biden នឹង​បង្កើត​ឲ្យ​មាន​រូបភាព​នៃ​ការ​ឯកភាព​គ្នា​មួយ មុន​ពេល​ពិធី​ស្បថ​ចូល​កាន់​តំណែង​របស់​លោក​ជា​ប្រធានាធិបតី​ថ្មី​របស់​សហរដ្ឋ​អាមេរិក​ចូល​មក​ដល់​នៅ​ថ្ងៃ​ពុធ​នេះ ដោយ​លោក​នឹង​ចូលរួម​ក្នុង​កម្មវិធី​គោរព​សាសនា​មួយ​ ជាមួយ​ថ្នាក់​ដឹកនាំ​ជាន់​ខ្ពស់​នៃ​រដ្ឋសភា​និង​ព្រឹទ្ធសភា​ចំនួន ៤ រូប ទាំង​ខាង​គណបក្ស​សាធារណរដ្ឋ​និង​ទាំងគណបក្ស​ប្រជាធិបតេយ្យ។

កន្លង​មក លោក Biden បាន​និយាយ​នៅ​ក្នុង​យុទ្ធនាការ​ឃោសនា​បោះឆ្នោត​របស់​លោក និង​នៅ​ក្រោយ​ការ​បោះឆ្នោត អំពី​គោល​បំណង​របស់​លោក​នៅ​ក្នុង​ការ​បង្រួបបង្រួម​ជាតិ​ ដែល​កំពុងតែ​មាន​ការ​បែកបាក់​យ៉ាង​ខ្លាំង​នេះ។

លោក Ron Klain ដែល​ជា​នាយ​ខុទ្ទកាល័យ​របស់​លោក Biden បាន​បង្ហោះ​សារ​បន្ត​នៅ​លើ Twitter កាល​ពី​ថ្ងៃ​អង្គារ​ថា លោក Biden បាន​ធ្វើ​ការ​អញ្ជើញ​ដោយ​ស្ងៀមស្ងាត់​នូវ​មេដឹកនាំ​សភា​ខាង​គណបក្ស​ប្រជាធិបតេយ្យ​អ្នកស្រី Nancy Pelosi និង​លោក Chuck Schumer ក៏​ដូចជា​មេដឹកនាំ​សភា​ខាង​គណបក្ស​សាធារណរដ្ឋ​លោក Mitch McConnell និង​លោក Kevin McCarthy ផងដែរ ឲ្យ​ចូលរួម​ជាមួយ​លោក​នៅ​ក្នុង​កម្មវិធី​សាសានា Mass នៅ​ព្រះវិហារ​គ្រិស្ដ​សាសនា St. Matthew's Cathedral។

អ្នក​នាំ​ពាក្យ​របស់​ថ្នាក់​ដឹកនាំ​សភា​ទាំង ៤ រូប បាន​បញ្ជាក់​ថា ថ្នាក់​ដឹកនាំ​សភា​ដែល​ត្រូវ​បាន​អញ្ជើញ​នោះ​នឹង​ចូលរួម​ជាមួយ​លោក Biden នៅ​ក្នុង​កម្មវិធី​គ្រិស្ដ​សាសានា​នេះ។

សមាជិក​ព្រឹទ្ធសភា​លោក Chris Coons ខាង​គណបក្ស​ប្រជាធិបតេយ្យ បាន​បា្រប់​ទូរទស្សន៍ CNN ថា កម្មវិធី​គោរព​សាសនា​ក្នុង​ព្រះវិហារ​គ្រិស្ដ​សាសនា​នេះ «គឺជា​ផ្នែក​ដ៏​សំខាន់​មួយ​នៅ​ក្នុង​ការ​គោរព​នូវ​ប្រពៃណី​ទំនៀមទម្លាប់»។

លោក Coons បាន​បន្ថែម​ថា ពិធី​សាសនា​នេះ «គឺជា​ការ​រំឮក​អំពី​ថា​តើ​លោក Joe Biden ជា​នរណា និង​អំពី​ថា​តើ​យើង​ទាំង​អស់​គ្នា​ជា​នរណា​ក្នុង​នាម​ជា​ប្រជាជាតិ​មួយ​ដែល​មាន​ក្តី​សង្ឃឹម​និង​សុទិដ្ឋិនិយម»៕

XS
SM
MD
LG