ក្រសួងពាណិជ្ជកម្មសហរដ្ឋអាមេរិកកាលពីថ្ងៃចន្ទបានស្នើហាមឃាត់សុសវែរ (software) និងហាដវែរ (hardware) សំខាន់ៗរបស់ចិនក្នុងរថយន្តដែលភ្ជាប់ទៅបណ្តាញអ៊ីនធឺណិត ដោយមិនឱ្យរថយន្តទាំងនោះបើកលើផ្លូវនៅក្នុងសហរដ្ឋអាមេរិកដោយសារការបារម្ភអំពីសន្តិសុខជាតិ។ វិធានការនេះនឹងហាមឃាត់រថយន្តចិនស្ទើរតែទាំងអស់មិនឱ្យចូលក្នុងទីផ្សារអាមេរិក។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
បទប្បញ្ញត្តិដែលគ្រោងឡើងនេះក៏នឹងបង្ខំក្រុមហ៊ុនផលិតរថយន្តរបស់អាមេរិកនិងក្រុមហ៊ុនផលិតរថយន្តធំៗរបស់ប្រទេសផ្សេងទៀតឱ្យដកចេញនូវសុសវែរនិងហាដវែរសំខាន់ៗរបស់ចិនចេញពីរថយន្តទាំងអស់នៅក្នុងសហរដ្ឋអាមេរិកក្នុងពេលប៉ុន្មានឆ្នាំខាងមុខនេះផងដែរ។
រដ្ឋបាលរបស់ប្រធានាធិបតីអាមេរិកលោក Joe Biden បានលើកឡើងអំពីក្តីបារម្ភយ៉ាងខ្លាំងចំពោះករណីដែលក្រុមហ៊ុនចិនប្រមូលទិន្នន័យរបស់អ្នកបើកបរនិងហេដ្ឋារចនាសម្ព័ន្ធអាមេរិកតាមរយៈរថយន្តដែលភ្ជាប់បណ្តាញអ៊ីនធឺណិត ក៏ដូចជាក្ដីបារម្ភអំពីលទ្ធភាពដែលបរទេសអាចប្រើប្រាស់ដោយកេងចំណេញនូវរថយន្តដែលភ្ជាប់ទៅបណ្ដាញអ៊ីនធឺណិតនិងប្រព័ន្ធបង្ហាញផ្លូវ។
បម្រាមនេះក៏បង្ការការធ្វើតេស្តសាកល្បងរបស់ក្រុមហ៊ុនផលិតរថយន្តចិនលើរថយន្តដែលបើកដោយខ្លួនឯងលើផ្លូវនានានៅក្នុងសហរដ្ឋអាមេរិក និងថែមទាំងហាមឃាត់សុសវែរនិងហាដវែររបស់រថយន្តដែលផលិតដោយបច្ចាមិត្តបរទេសរបស់អាមេរិកដូចជារុស្ស៊ីផងដែរ។
រដ្ឋមន្ត្រីក្រសួងពាណិជ្ជកម្មអាមេរិកអ្នកស្រី Gina Raimondo បានថ្លែងនៅក្នុងសន្និសីទកាសែតមួយថា៖ «ពេលបច្ចាមិត្តបរទេសបង្កើតសុសវែរដើម្បីធ្វើរថយន្ត នោះមានន័យថាវាអាចត្រូវបានប្រើសម្រាប់ឈ្លបយកការណ៍បាន ដោយអាចបញ្ជាពីចម្ងាយបាន ដែលប៉ះពាល់ដល់ឯកជនភាពនិងសុវត្ថិភាពរបស់ពលរដ្ឋអាមេរិកាំងដែលធ្វើដំណើរតាមរថយន្ត»៕
