រថយន្តអគ្គិសនីរបស់ចិនម៉ាកBYD បានប្រកាសពីការចាប់ដៃគូថ្មីក្នុងសប្តាហ៍នេះជាមួយ ក្រុមហ៊ុន Uber ដែលមានបំណងនាំយករថយន្តអគ្គិសនីថ្មីចំនួន១០ម៉ឺនគ្រឿងទៅប្រើប្រាស់ក្នុងកម្មវិធីApp របស់ក្រុមហ៊ុននៅទូទាំងពិភពលោក។
កិច្ចសហការអន្តរជាតិ ដែលចាប់ផ្តើមនៅអឺរ៉ុប និងអាមេរិកឡាទីន នឹងពង្រីកទៅមជ្ឈិមបូព៌ា កាណាដា អូស្ត្រាលី និងនូវែលសេឡង់ ដោយផ្តល់ជូននូវតម្លៃថោកដែលអាចស្រួលទិញប្រើប្រាស់និងហិរញ្ញប្បទានសម្រាប់ទិញរថយន្តអគ្គិសនីរបស់ក្រុមហ៊ុន BYD តាមកម្មវិធីApp របស់ក្រុមហ៊ុនUber ។
ក្រុមអ្នកវិភាគនិយាយថា កិច្ចព្រមព្រៀងនេះគ្រាន់តែជាឧទាហរណ៍មួយនៃរបៀបដែលទីក្រុងប៉េកាំងនៅតែស្វែងរកវិធីដើម្បីជ្រៀតចូលទីផ្សារអន្តរជាតិដើម្បីបន្តពង្រីកការនាំមុខជាសកលរបស់ខ្លួននៅក្នុងវិស័យរថយន្តអគ្គិសនីទោះបីជាពន្ធគយកើនឡើង និងការកើនឡើងនៃការព្រួយបារម្ភអំពីវត្តមានរថយន្តអគ្គិសនីរបស់ចិនគ្របដណ្តប់លើទីផ្សារក៏ដោយ។
ប្រទេសគួរឱ្យកត់សម្គាល់មួយដែលមិនចូលក្នុងកិច្ចព្រមព្រៀងរបស់ក្រុមហ៊ុន BYD និង Uber គឺសហរដ្ឋអាមេរិក ដែលត្រូវបានគេរំពឹងថានឹងចាប់ផ្តើមអនុវត្តអត្រាពន្ធ១០០ ភាគរយលើរថយន្តអគ្គិសនី របស់ចិននៅចុងខែនេះ៕
