ប្រធានាធិបតីសហរដ្ឋអាមេរិកលោក Joe Biden បាននិយាយថា លោកបានធ្វើឱ្យ«មានជំហានវិជ្ជមាន» ក្នុងអំឡុងនៃជំនួបដ៏តឹងតែងអស់ជាច្រើនម៉ោងជាមួយប្រធានាធិបតីចិនលោក Xi Jinping កាលពីថ្ងៃពុធម្សិលមិញ។ មេដឹកនាំទាំងពីរបានព្រមព្រៀងបង្កើតទំនាក់ទំនងយោធាដែលបានជាប់គាំងឡើងវិញ ធ្វើការជាមួយគ្នាដើម្បីវាយតម្លៃការគំរាមកំហែងដោយបញ្ញាសិប្បនិម្មិតនិងធ្វើការដើម្បីប្រយុទ្ធប្រឆាំងការរីករាលដាលនៃថ្នាំញៀនហ្វេនតាណុល។
ទោះជាយ៉ាងណាក៏ដោយ អត្ថាធិប្បាយដោយគ្មានការព្រាងទុករបស់លោក Biden ថា លោកនៅតែមើលឃើញមេដឹកនាំចិនដ៏មានអំណាចថា ជា«ជនផ្តាច់ការ» បានបង្ហាញថា មេដឹកនាំទាំងពីរនៅតែស្ថិតនៅឆ្ងាយពីគ្នា។
លោក Biden បានថ្លែងនៅក្នុងការឆ្លើយតបដល់សំណួរដែលបានស្រែកសួរដោយក្រុមអ្នកកាសែតនៅកន្លែងជំនួបដែលបានគ្រោងទុកនៅក្នុងទីក្រុងSan Francisco ជាទីកន្លែងដែលប្រទេសមានសេដ្ឋកិច្ចធំចំនួន ២១ នៅតំបន់អាស៊ីប៉ាស៊ីហ្វិក កំពុងជួបប្រជុំគ្នានៅសប្តាហ៍នេះថា៖ «លោក Xi ជាជនផ្តាច់ការ»។
លោក Biden បានថ្លែងបន្តទៀតថា៖ «លោក Xi ជាជនផ្តាច់ការក្នុងស្ថានភាពដែលលោកជាអ្នកដឹកនាំប្រទេសមួយដែលជាប្រទេសកុម្មុយនីស្ត ដែលមានភាពខុសគ្នាស្រឡះពីរដ្ឋាភិបាលរបស់យើង»។
លោក Biden បាននិយាយទៀតថា លោកលើកឡើងដោយ «ឥតលាក់លាម» លើបញ្ហាលំបាកៗទាំងនោះដែលបានធ្វើឱ្យប្រទេសទាំងពីរមានការខ្វែងគំនិតគ្នា ដូចជាបានឃើញនៅក្នុងការទទួលបដិសណ្ឋារកិច្ចដ៏ចម្រុះ ដែលពលរដ្ឋនៅក្នុងទីក្រុងមានជាតិសាសន៍ចម្រុះបានផ្តល់ឱ្យមេដឹកនាំចិន ដោយមានទាំងបាតុករប្រឆាំងកុម្មុយនីស្តនិងក្រុមអ្នកស្វាគមន៍លោក Xi ដែលបានតម្រង់ជួរនៅតាមផ្លូវនានា។
កាលពីថ្ងៃពុធម្សិលមិញ ក្រុមបាតុករទាំងនោះនៅក្នុងទីកន្លែងយ៉ាងហោចណាស់ក៏ពីរដែរបានវាយប្រតប់គ្នាដូចប្រមូលចងក្រងនៅក្នុងវីដេអូ ដែលបានចុះផ្សាយនៅបណ្តាញព័ត៌មានសង្គម។
នៅក្នុងកំណត់សម្គាល់ខ្លីរបស់លោក មុនពេលមេដឹកនាំចាប់ផ្តើមជំនួបរបស់អស់លោក លោក Xi បាននិយាយថា ប្រទេសទាំងពីរមានការជាប់ទាក់ទិនគ្នាមិនអាចកាត់ផ្តាច់បាន។
លោកបាននិយាយទៀតថា៖ «សម្រាប់ប្រទេសធំៗទាំងពីរដូចជាចិននិងសហរដ្ឋអាមេរិកដែលបែរខ្នងដាក់គ្នាមិនមែនជាជម្រើសទេ»៕
