ជិត៨០ម៉ោង ក្រោយពីអតីតនាយករដ្ឋមន្ត្រីអ្នកស្រី Sheikh Hasina បានភៀសខ្លួនចេញពីបង់ក្លាដែសក្នុងអំឡុងបាតុកម្មដ៏ហិង្សា ដែលបានបណ្តាលឱ្យមនុស្សជាង៣០០នាក់ស្លាប់មក ជ័យលាភីរង្វាន់ណូបែល លោក Muhammad Yunus បានស្បថចូលកាន់តំណែង ដឹកនាំរដ្ឋាភិបាលបណ្តោះអាសន្នរបស់ប្រទេសនេះ។
ក្នុងវ័យ៨៤ឆ្នាំ លោក Yunus បានធ្វើសច្ចាប្រណិធាន ក្នុងពិធីមួយរៀបចំកាលពីយប់ថ្ងៃព្រហស្បតិ៍នៅវិមានប្រធានាធិបតីក្នុងក្រុងដាកា។ ព្រឹតិ្តការណ៍នេះ មានការចូលរួមពីសំណាក់មេដឹកនាំនយោបាយ សង្គមស៊ីវិល ឧត្តមសេនីយ៍យោធានិងអ្នកការទូត ហើយធ្វើឡើងក្នុងពេលភាពចលាចលនៅបន្តក្នុងប្រទេសនៅឡើយ។ អ្នកវិភាគថាលោក Yunusប្រឈមនឹងផ្លូវដ៏លំបាក ពេលប្រទេសនេះអាចធ្លាក់ចូលក្នងវិបត្តិនយោ បាយកាន់តែជ្រៅ។
គណៈរដ្ឋមន្ត្រីដែលមានសមាជិក១៧នាក់ដែលគេហៅថា«ទីប្រឹក្សា»រួមមានអ្នកសម្រប សម្រួលសំខាន់ពីរនាក់មកពីចលនាដឹកនាំដោយនិស្សិត គឺលោក Nahid Islam និងលោក Asif Mahmud ព្រមទាំងអ្នកការពារសិទ្ធិមនុស្សដ៏លេចធ្លោគឺ លោក Adilur Rahman Khan ដែលធ្លាប់ជាប់គុកក្រោមរដ្ឋាភិបាលរបស់អ្នកស្រី Hasina ដោយសារតែការប្រមូលចងក្រងករណីរំលោភបំពានសិទ្ធិមនុស្ស។
គណៈរដ្ឋមន្ត្រីថ្មីនេះ ក៏រួមបញ្ចូលសេដ្ឋវិទូ សកម្មជនអង្គការក្រៅរដ្ឋាភិបាល អ្នកសិក្សាស្រាវជ្រាវនិងមន្ត្រីយោធាចូលនិវត្តន៍ម្នាក់ដែរ។ តែគេនៅមិនទាន់ប្រកាសថាតើរដ្ឋាភិ បាលបណ្តោះអាសន្ននេះ នឹងកាន់តំណែងរហូតដល់ពេលណាទេ។
នៅថ្ងៃព្រហស្បតិ៍ ពេលមកដល់ព្រលានយន្តហោះអន្តរជាតិ Hazrat Shahjalal លោក Yunus ដែលជាអ្នកត្រួសត្រាយផ្លូវផ្នែកមីក្រុហិរញ្ញវត្ថុមុនគេបង្អស់ ក៏បានថ្លែងសុន្ទរក ថាដ៏រំជួលចិត្តទៅកាន់ក្រុមអ្នកយកព័ត៌មាន ពេលលោកត្រៀមទទួលយកកាតព្វកិច្ចថ្មីរបស់លោក។ លោក Yunus បានសម្តែងក្តីសង្ឃឹមដើម្បីស្តារសន្តិភាពនិងកសាងបង់ ក្លាដែសឡើងវិញ ក្រោយពីការងើបឡើងបះបោរដែលបានបញ្ចប់ការដឹកនាំប្រទេសបែបអត្តាធិប្បាយកាន់តែខ្លាំងឡើងអស់ពេល១៥ឆ្នាំរបស់អ្នកស្រី Hasina៕
