ប្រទេសអូស្ត្រាលីចាត់ទុកខ្លួនឯងថាជាអ្នកការពារផ្នែកសេដ្ឋកិច្ចនិងសន្តិសុខសម្រាប់តំបន់ប៉ាស៊ីហ្វិក។
ប៉ុន្តែ ប្រទេសចិនកំពុងមានមហិច្ឆតាកាន់តែខ្លាំងឡើងនៅក្នុងការបន្តចំណាប់អារម្មណ៍របស់ខ្លួននៅក្នុងតំបន់នេះ។
កាលពីពេលថ្មីៗនេះ លោក Pat Conroy ដែលជារដ្ឋមន្ត្រីផ្នែកអភិវឌ្ឍន៍អន្តរជាតិនិងប៉ាស៊ីហ្វិកនៃក្រសួងការពារជាតិអូស្ត្រាលី និងដែលជារដ្ឋមន្ត្រីផ្នែកឧស្សាហកម្មការពារជាតិផងដែរនោះ បានបំពេញទស្សនកិច្ចទៅកាន់ប្រទេសទីម័រខាងកើតនិងប្រទេសណូរូ។
លោកបានលើកឡើងនៅក្នុងសេចក្ដីថ្លែងការណ៍មួយថា ដំណើរទស្សនកិច្ចនេះធ្វើឡើងដើម្បី «ពង្រឹងភាពជាដៃគូដ៏ជ្រាលជ្រៅនិងយូរអង្វែងជាមួយដៃគូដ៏ជិតស្និទ្ធទាំងពីរក្នុងចំណោមដៃគូដ៏ជិតស្និទ្ធផ្សេងទៀតរបស់អូស្ត្រាលី»។
កាលពីចុងខែមករាកន្លងទៅនេះ លោក Conroy បានសន្យាផ្ដល់ជំនួយ ២៣ លានដុល្លារដើម្បីជួយពង្រឹងផ្នែកអនុវត្តច្បាប់នៅទីម័រខាងកើតដែលធ្លាប់ជាផ្នែកមួយនៃប្រទេសឥណ្ឌូណេស៊ីមុនពេលប្រទេសនេះបានក្លាយជាប្រទេសឯករាជ្យ។ ជំនួយនេះនឹងជួយដល់ប៉ូលិសក្នុងប្រទេសនេះឆ្លើយតបទៅនឹងគ្រោះធម្មជាតិនិងប្រយុទ្ធប្រឆាំងនឹងក្រុមឧក្រិដ្ឋជន។
កាលពីថ្ងៃទី ៣១ ខែមករា លោក Conroy បានចូលរួមនៅក្នុងការប្រារព្ធទិវាឯករាជ្យជាតិនៃប្រទេសណូរូឆ្នាំ ២០២៤ និងបានកោតសរសើរជាថ្មីដល់ទំនាក់ទំនងដ៏ «ជ្រាលជ្រៅ» រវាងប្រទេសអូស្ត្រាលីនិងណូរូ។
លោក Dirk van der Kley ដែលជាអ្នកស្រាវជ្រាវជាន់ខ្ពស់នៅមហាវិទ្យាល័យសន្តិសុខជាតិនៃសាកលវិទ្យាល័យជាតិអូស្ត្រាលី (Australian National Univesity) បានប្រាប់ VOA ថា អូស្ត្រាលីមានចំណាប់អារម្មណ៍ក្នុងការរក្សាឥទ្ធិពលរបស់ខ្លួននៅក្នុងតំបន់ប៉ាស៊ីហ្វិក។
លោកថ្លែងដូច្នេះថា៖ «អូស្ត្រាលីធ្លាប់ជាប្រទេសមហាអំណាចនាំមុខផ្នែកសេដ្ឋកិច្ចនិងសន្តិសុខនៅក្នុងតំបន់ប៉ាស៊ីហ្វិក ហើយឥឡូវនេះក៏អាចនៅតែដូច្នេះដដែល។ ប៉ុន្តែ ប្រទេសចិនដែលជាមហាអំណាចមួយទៀតកំពុងចូលមកក្នុងតំបន់នេះដែរ ដែលជារឿយៗមានចំណាប់អារម្មណ៍ផ្សេងពីចំណាប់អារម្មណ៍របស់អូស្ត្រាលីនៅក្នុងតំបន់នេះ។ ដូច្នេះ វាគ្មានអ្វីចម្លែកទេដែលអូស្ត្រាលីបារម្ភអំពីបញ្ហានេះ ជាពិសេសនៅពេលនិយាយអំពីកិច្ចព្រមព្រៀងនានាពាក់ព័ន្ធនឹងសន្តិសុខ»។
កាលពីដើមខែមករា កោះណូរូ ដែលជាសាធារណរដ្ឋតូចមួយនៅក្នុងតំបន់ប៉ាស៊ីហ្វិក បានចាប់ផ្ដើមបង្កើតទំនាក់ទំនងការទូតផ្លូវការឡើងវិញជាមួយចិន បន្ទាប់ពីបានកាត់ផ្ដាច់ទំនាក់ទំនងជាមួយកោះតៃវ៉ាន់មក។
ប្រទេសប៉ាពូអាស៊ីនូវែលហ្គីណេ ដែលជាប្រទេសស្ថិតនៅជិតប្រទេសអូស្ត្រាលីជាងគេ បានបញ្ជាក់ថា ខ្លួនកំពុងពិភាក្សាជាមួយចិនអំពីកិច្ចព្រមព្រៀងផ្នែកសន្តិសុខនិងការអនុវត្តច្បាប់។ កាលពីឆ្នាំ ២០២១ ប្រទេសចិនបានចុះហត្ថលេខាលើកិច្ចព្រមព្រៀងមួយជាមួយប្រទេស Solomon Islands ដែលជាប្រទេសប្រជុំកោះមានទីតាំងជាយុទ្ធសាស្ត្រនៅភាគឦសាននៃប្រទេសអូស្ត្រាលី។
លោក Van der Kley បាននិយាយថា ចិនមានមហិច្ឆកាកាន់តែខ្លាំងឡើងនៅក្នុងតំបន់ប៉ាស៊ីហ្វិក។
លោកបានលើកឡើងដូច្នេះថា៖ «យើងកំពុងនិយាយអំពីប្រទេសមួយចំនួនតូចដែលនៅរាយប៉ាយពីគ្នា ដែលមានចំនួនប្រជាជនតិចនិងជាប្រទេសក្រីក្រ។ ចិនកំពុងព្យាយាមបង្កើនឥទ្ធិពលរបស់ខ្លួននៅក្នុងតំបន់នេះដើម្បីបង្កើតនូវរបៀបរៀបរយពិភពលោក ហើយប្រហែលជាមានរឿង ៣ ពាក់ព័ន្ធនឹងករណីនេះ។ ទីមួយគឺពាក់ព័ន្ធនឹងតៃវ៉ាន់។ នៅពេលយើងនិយាយអំពីតំបន់ តំបន់ប៉ាស៊ីហ្វិកគឺជាតំបន់មួយក្នុងចំណោមតំបន់ពីរបីនៅលើពិភពលោកដែលនៅមានប្រទេសខ្លះទទួលស្គាល់តៃវ៉ាន់ជាជាងចិននៅអង្គការសហប្រជាជាតិនិងអង្គការអន្តរជាតិនានា»។
លោក Van der Kley បានបន្ថែមថា ប្រទេសដីកោះនានានៅតំបន់ប៉ាស៊ីហ្វិកក៏អាចគាំទ្រចិននៅក្នុងវេទិកាអន្តរជាតិផ្សេងៗ រួមទាំងនៅអង្គការសហប្រជាជាតិ ក៏ដូចជាគាំទ្រចិននៅក្នុងការប្រកួតប្រជែងជាមួយសហរដ្ឋអាមេរិកដើម្បីជះឥទ្ធិពលនៅលើពិភពលោកផងដែរ។
អូស្ត្រាលីបានស្វែងរកវិធីដើម្បីធ្វើឱ្យមានប្រសិទ្ធភាពនូវទំនាក់ទំនងជាមួយចិន ដែលជាដៃគូពាណិជ្ជកម្មដ៏ធំបំផុតរបស់ខ្លួន បន្ទាប់ពីរដ្ឋាភិបាលអូស្ត្រាលីដែលមានទំនោរឆ្វេងនិយមបានឡើងកាន់អំណាចនៅក្រោយការបោះឆ្នោតកាលពីខែឧសភា ឆ្នាំ ២០២២ មក។
ទំនាក់ទំនងរវាងអូស្ត្រាលីនិងចិនបានធ្លាក់ចុះដោយសារជម្លោះទាក់ទិននឹងប្រភពដើមនៃជំងឺកូវីដ១៩ ជម្លោះភូមិសាស្ត្រនយោបាយ និងជម្លោះពាណិជ្ជកម្ម។
ទោះជាយ៉ាងណាក៏ដោយ នាយករដ្ឋមន្ត្រីអូស្ត្រាលីលោក Anthony Albanese បានសង្ក់តធ្ងន់ថា ប្រទេសទាំងពីរនឹងនៅតែមិនចុះសម្រុងជាមួយគ្នាលើបញ្ហាជាក់លាក់មួយចំនួន។
អ្នកវិភាគនានាបានព្យាករថា ការប្រកួតប្រជែងដើម្បីឥទ្ធិពលនៅក្នុងតំបន់ប៉ាស៊ីហ្វិករវាងចិននិងអូស្ត្រាលីនឹងកាន់តែខ្លាំងជាងមុន៕
ប្រែសម្រួលដោយលោក នៀម ឆេង
អូស្ត្រាលីប្រុងប្រយ័ត្នចំពោះមហិច្ឆតាផ្នែកសន្តិសុខរបស់ចិននៅតំបន់ប៉ាស៊ីហ្វិក
- Phil Mercer
ទីក្រុង Sydney ប្រទេសអូស្ត្រាលី —
វេទិកាបញ្ចេញមតិ