ប្រទេសអូស្ត្រាលីបានចុះហត្ថលេខាកិច្ចព្រមព្រៀង២ដែលមានទឹកប្រាក់រាប់លានដុល្លារជាមួយប្រទេសណូរូនិងប៉ាពូអាស៊ីណូវ៉ែលហ្គីណេកាលពីសប្តាហ៍មុនដែលពួកអ្នកវិភាគនិយាយថានឹងជួយរដ្ឋាភិបាលអូស្ត្រាលីទប់ទល់នឹងឥទ្ធិពលកើនឡើងរបស់ចិននៅក្នុងមហាសមុទ្រប៉ាស៊ីហ្វិក។
កិច្ចព្រមព្រៀងដែលគាំទ្រការអភិវឌ្ឍនៅប្រទេសណូរូនិងការសន្យាផ្តល់ប្រាក់រាប់លានដុល្លារក្នុងរយៈពេលជាង១០ឆ្នាំនៅក្នុងស្ថាប័នរបស់ក្រុមកោះក្នុងប្រទេសប៉ាពូអាស៊ីណូវ៉ែលហ្គីណេ ក៏ផ្តល់ឱ្យអូស្ត្រាលីនូវអំណាចខ្លះដើម្បីរារាំងប្រទេសជាកោះទាំង២កុំឱ្យចុះហត្ថលេខាលើកិច្ចព្រមព្រៀងដែលទាក់ទិននឹងសន្តិសុខជាមួយចិន។
រដ្ឋាភិបាលក្រុងប៉េកាំងបានពង្រីកយ៉ាងខ្លាំងនូវកិច្ចសហប្រតិបត្តិការរបស់ខ្លួនជាមួយប្រជុំកោះនៅក្នុងមហាសមុទ្រប៉ាស៊ីហ្វិកក្នុងប៉ុន្មានឆ្នាំថ្មីៗនេះដែលធ្វើឱ្យមានការព្រួយបារម្ភដល់អូស្ត្រាលី សហរដ្ឋអាមេរិកនិងសម្ពន្ធមិត្តផ្សេងទៀតនៅក្នុងតំបន់។
នៅក្រោមកិច្ចព្រមព្រៀងដែលមានទឹកប្រាក់រាប់លានដុល្លារដែលអូស្ត្រាលីបានចុះហត្ថលេខាកាលពីថ្ងៃទី៩ ខែធ្នូជាមួយប្រទេសណូរូ រដ្ឋាភិបាលក្រុងកង់បេរ៉ានឹងផ្តល់ប្រាក់៨៩លានដុល្លារដល់ប្រទេសជាកោះនៅក្នុងមហាសមុទ្រប៉ាស៊ីហ្វិកក្នុងរយៈពេលជាង៥ឆ្នាំ ដោយផ្តល់ការគាំទ្រការអភិវឌ្ឍដ៏សំខាន់ក្នុងវិស័យធនាគារ ទូរគមនាគមន៍និងសន្តិសុខ។
ជាការដោះដូរ អូស្ត្រាលីអាចបោះឆ្នោតវ៉េតូលើការទាក់ទងណាមួយដោយប្រទេសទី៣នៅក្នុងផ្នែកសន្តិសុខនិងហេដ្ឋារចនាសម្ពន្ធដ៏សំខាន់របស់ប្រទេសជាកោះក្នុងមហាសមុទ្រប៉ាស៊ីហ្វិកនេះ៕
