អាជ្ញាធរមានសមត្ថកិច្ចនៅក្នុងខេត្តកណ្តាលបានឱ្យដឹងនៅថ្ងៃសុក្រនេះថា ឧប្បតិ្តហេតុលិចទូកដ ក្នុងស្រុកលើកដែក កាលពីម្សិលមិញ បានសម្លាប់សិស្សសាលាយ៉ាងហោចណាស់ ១០ នាក់ ហើយសិស្សម្នាក់ទៀតកំពុងបាត់ខ្លួន។
អធិការនគរបាលស្រុកលើកដែក លោក អាំ ធូ ប្រាប់វីអូអេថា ករណីលិចទូកដនេះ បានកើតឡើងក្នុងចន្លោះភូមិអំពិលទឹក និងភូមិកោះចំរើន នៅឃុំកំពង់ភ្នំ ស្រុកលើកដែក នៅវេលាម៉ោងប្រមាណ ៧ យប់ នាថ្ងៃទី ១៣ ខែតុលាកន្លងទៅ។
បើតាមអធិការនគរបាលរូបនេះ ទូកដដែលពលរដ្ឋរស់នៅក្នុងឃុំកំពង់ភ្នំហៅថា ទូកដទទឹងនោះ បានដឹកមនុស្សចំនួន ១៥ នាក់ ក្នុងនោះមានកូនសិស្សសាលាប្រុសស្រីចំនួន ១៣ នាក់ ដែលមានអាយុចន្លោះពី ១១ ឆ្នាំ ដល់ ១៤ ឆ្នាំ ដែលទើបចេញពីរៀន និងអ្នកបើកទូក ២ នាក់។ ការលិចលង់ទូកដនោះបានកើតឡើង នៅពេលទូកមានសភាពឃ្លីងឃ្លោង ពេលបើកឆ្លងកាត់ផ្ទៃទឹកទន្លេមេគង្គក្បែរស្ពានអ្នកលឿង។
លោក អាំ ធូ ថ្លែងថា៖ «ពេលដែលទូកបើកមកហ្នឹង ទឹកវាអាចជះចូលទូក អ៊ីចឹងដោយសារទូកហ្នឹង វាមានបឹងខាងមុខ បឹងសម្រាប់ឡើងចុះទូក ហើយអ៊ីចឹងទៅ ពេលដែលទឹកចូលហ្នឹង ឱ្យអ្នកជិះដកខ្លួនទៅខាងក្រោយវិញ ពេលដែលដកខ្លួននឹងទៅ ទូកនឹងវាឃ្លោង ដល់ឃ្លោងធ្វើឱ្យទូកហ្នឹងក្រឡាប់»។
គិតត្រឹមរសៀល ថ្ងៃទី ១៤ ខែតុលានេះ លោក អាំ ធូ បានឱ្យដឹងថា ក្នុងចំណោមមនុស្សចំនួន ១៥ នាក់នោះ មនុស្ស ៤ នាក់ នៅមានជីវិត ក្នុងនោះ ២ នាក់សិស្សសាលា និង ២ នាក់ទៀតជាអ្នកបើកទូកដ ហើយសមត្ថកិច្ចកំពុងបន្តស្វែងរកសិស្សសាលាដែលបាត់ខ្លួននោះ។
ស្នងការនគរបាលខេត្តកណ្តាល បានប្រកាសឱ្យដឹងជាសាធារណៈកាលពីយប់ថ្ងៃទី១៣ ខែតុលា ថា ករណីលិចទូកដនេះ គឺបណ្ដាលមកពីម្ចាស់ទូកដាក់លើសចំណុះ ធ្វេសប្រហែស និងមិនប្រុងប្រយ័ត្ន ហើយគ្មានអាវពោងសម្រាប់ការពារ។
ដោយឡែក នៅថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានបង្ហោះសាររំលែកទុក្ខនៅលើទំព័រហ្វេសប៊ុកផ្លូវការរបស់លោក ចំពោះករណីនេះលិចទូកដ ដែលបណ្តាលឱ្យកូនសិស្សជាច្រើននាក់នោះបាត់បង់ជិវិត។
លោកក៏បានអំពាវនាវឱ្យសមត្ថកិច្ចនិងអាជ្ញាធរពាក់ព័ន្ធទាំងអស់ចូលរួមបន្តស្វែងរកអ្នករងគ្រោះ និងចូលរួមដោះស្រាយជួយដល់ក្រុមគ្រួសារនៃសពនិងជនរងគ្រោះឱ្យបានទាន់ពេលវេលាដ៏លំបាកបំផុតនេះ៕
