ស្ត្រីពីររូបមកពីប្រទេសលីបេរីយ៉ានិងម្នាក់ទៀតមកពីប្រទេសយេម៉ែនត្រូវបានគេប្រគល់ជូននូវរង្វាន់ណូបែលសន្តិភាពកាលពីថ្ងៃសៅរ៍ទី១០ខែធ្នូ សម្រាប់កិច្ចប្រឹងប្រែងនានាកន្លងមករបស់ពួកគេក្នុងការនាំមកនូវការផ្លាស់ប្តូរដោយសន្តិភាពមួយដល់ប្រទេសរបស់ពួកគេ។ ប្រធានាធិបតីលីបេរីយ៉ា លោកស្រី អេឡែន ចនសុន សឺលៀហ្វ (Ellen Johnson Sirleaf) សកម្មជនលីបេរីយ៉ា អ្នកនាង លីម៉ា ហ្គបូវី (Leymah Gbowee) និង សកម្មជនយេម៉ែន អ្នកនាង តាវាក់កូ ការម៉ាន (Tawakkol Karman) បានទទួលរង្វាន់របស់ពួកគេនៅឯពិធីប្រគល់រង្វាន់មួយក្នុងទីក្រុងអូស្លូ (Oslo) នៃប្រទេសន័រវេស។
ក្រុមអ្នកផ្លុំត្រែប្រចាំរាជវាំងបានបញ្ចេញសំឡេងត្រែដើម្បីបើកពិធីប្រចាំឆ្នាំមួយនេះ នៅពេលដែលព្រះរាជវង្សានុវង្សន័រវែស និង ជ័យលាភីណូបែលឆ្នាំនេះ បាននាំគ្នាដើរចូលក្នុងសាលពិធី។ គណៈកម្មាធិការរង្វាន់ណូបែលបានជ្រើសរើសស្ត្រីទាំងបីនាក់ ដោយសារតែសកម្មភាពរបស់ពួកគេ ក្នុងបុព្វហេតុធ្វើឱ្យមានការផ្លាស់ប្តូរដោយសន្តិភាពមួយក្នុងប្រទេសរបស់ពួកគេ។ ប៉ុន្តែលោកស្រីប្រធានាធិបតី សឺលៀហ្វ បាននិយាយថា ពានរង្វាន់មួយនេះតាមពិតទៅជាកម្មសិទ្ធិរបស់ស្ត្រីជាច្រើនទៀតដែលត្រូវបានគេជិះជាន់ធ្វើបាបនៅទូទាំងពិភពលោក។
«ពានរង្វាន់នេះគឺជារបស់មនុស្សទាំងឡាយណា ដែលយើងមានបុព្វសិទ្ធិតំណាងឲ្យសេចក្តីប្រាថ្នារបស់ពួកគេ ហើយដែលសិទ្ធិនិងសេរីភាពរបស់ពួកគេនេះ យើងមានកាតព្វកិច្ចត្រូវការពារ។ ប្រវត្តិសាស្ត្រនឹងវិនិច្ឆ័យយើងមិនមែនទៅលើអ្វីដែលយើងនិយាយនាពេលនេះទេ ប៉ុន្តែអ្វីដែលយើងនឹងធ្វើបន្ទាប់ពីនេះដើម្បីលើកកម្ពស់ជីវិតរស់នៅរបស់ជនរួមជាតិយើងទាំងបុរសនិងស្ត្រី។»
ជនរួមជាតិលីបេរីយ៉ារបស់លោកស្រី គឺ អ្នកនាង ហ្គបូវី ជាអ្នកដែលបានដឹកនាំស្ត្រីពាក់អាវយឹតពណ៌សមួយក្រុម ដែលបានប្រឆាំងយ៉ាងមុះមុតចំពោះមេដឹកនាំសឹកនានា ដើម្បីជួយឱ្យមានការបញ្ឈប់ទាំងស្រុងនូវសង្គ្រាមស៊ីវិលក្នុងប្រទេសរបស់នាង ក៏បាននិយាយអំពីមនុស្សរាប់លាននាក់ផ្សេងទៀតដែរ ដែលមិនមានវត្តមាននៅលើវេទិកាក្នុងទីក្រុងអូស្លូ កាលពីថ្ងៃសៅរ៍នេះ។
«ខ្ញុំជឿជាក់ថា ពានរង្វាន់នាឆ្នាំនេះមិនត្រឹមតែទទួលស្គាល់ការពុះពាររបស់ពួកយើង ក្នុងប្រទេសលីបេរីយ៉ានិងយេម៉ែនប៉ុណ្ណោះទេ វាក៏ជាការទទួលស្គាល់ផងដែរនូវការពុះពាររបស់ស្ត្រីទាំងឡាយដែលធ្វើសកម្មភាពនៅមូលដ្ឋាន ក្នុងប្រទេសអេហ៊្សីប សាធារណរដ្ឋប្រជាធិបតេយ្យកុងហ្គោ កូតឌីវ័រ ទុយនីស៊ី បាឡេស្ទីន និងប្រទេសអ៊ីស្រាអែល និងនៅគ្រប់ទិសទីដែលមានបញ្ហាក្នុងពិភពលោក។»
អ្នកនាង ហ្គបូវី បាននិយាយថា «ជ័យជម្នះគឺវានៅឆ្ងាយតទៅទៀត...យើងគ្មានពេលវេលាដើម្បីសម្រាកទេ។»
ប្រធានគណៈកម្មាធិការរង្វាន់ណូបែល បាននិយាយថា គាត់បានឮសំឡេងរបស់សកម្មជនយេម៉ែន អ្នកនាង តាវាក់កូ ការម៉ាន ដំបូងបំផុត នៅពេលដែលអ្នកនាងកំពុងតែនិយាយចេញពីជំរំមួយនៅ តំបន់ សាណាអាស តារី ស្វ៊ែរ (Sana'a's Tahrir Square)។ ប៉ុន្មានខែក្រោយមក នាងបានក្លាយជាស្ត្រីជនជាតិអារ៉ាប់ដំបូងនិងក្មេងជាងគេបំផុត ដែលបានទទួលរង្វាន់ណូបែលសន្តិភាពពិភពលោកនេះ។
នៅលើវេទិការង្វាន់ណូបែល អ្នកនាងបាននិយាយថា រង្វាន់នេះនឹងលើកទឹកចិត្ត ហើយនឹងគាំទ្រដល់បំណងប្រាថ្នារបស់ជនជាតិអារ៉ាប់ទាំងឡាយ ដែលកំពុងតែតស៊ូពុះពារដោយសន្តិវិធីក្នុងការធ្វើឱ្យប្រសើរឡើងនូវជីវិតរស់នៅរបស់ពួកគេ។
អ្នកនាង ការម៉ាន ដែលហៀបនឹងហូរទឹកភ្នែកទៅហើយនោះ បានតាំងអារម្មណ៍របស់នាងដើម្បីថ្លែងសុន្ទរកថាដ៏រឹងប៉ឹងមួយ ដោយបាននិយាយថា បដិវត្តន៍អារ៉ាប់នានាក្នុងឆ្នាំនេះបានប្រឈមមុខនឹងមេដឹកនាំផ្តាច់ការទាំងឡាយណាដែលបានចូលជ្រៅហួសហេតុក្នុងការដកហូតសិទ្ធិនិងសេរីភាពរបស់ប្រជាជនពួកគេ។ អ្នកនាងបានអំពាវនាវដល់សហគមន៍អន្តរជាតិឱ្យធ្វើអ្វីបន្ថែមទៀត ដើម្បីបំពេញតាមសន្យានិងសេចក្តីសម្រេចនានារបស់ខ្លួន ក្នុងការទាមទារឱ្យមានសន្តិភាព សេរីភាព និងសិទ្ធិនារី។
ជ័យលាភីរង្វាន់ណូបែលទាំងបីនាក់ ម្នាក់ៗទទួលបានមេដាយមួយនិងសញ្ញាប័ត្រមួយ ហើយនឹងទទួលបានថវិការួមគ្នាចំនួន១.៥លានដុល្លារ។ រង្វាន់ណូបែលផ្នែកវេជ្ជសាស្ត្រ គីមីវិទ្យា រូបវិទ្យា និង ផ្នែកអក្សរសាស្ត្រ និងរង្វាន់ដែលទាក់ទងនឹងសេដ្ឋសាស្ត្រ ត្រូវបានគេប្រគល់ជូននៅពេលក្រោយ កាលពីថ្ងៃសៅរ៍កន្លងទៅនេះ ក្នុងទីក្រុង ស្តុកខុល (Stockholm)៕
ប្រែសម្រួលដោយ ឃួន ធារ៉ា
