ហ៊ុយ ឃី គឺជានិស្សិតកម្ពុជាដែលត្រូវបានប្រគល់រង្វាន់ Trailblazer Award ដោយសាកលវិទ្យាល័យ American University សហរដ្ឋអាមេរិក កាលពីថ្ងៃទី១៥ ខែមេសា ឆ្នាំ២០១០។ រង្វាន់ Trailblazer Award គឺជារង្វាន់ដែលត្រូវបានប្រគល់ឲ្យនិស្សិត ដែលមានលក្ខណៈពិសេសខុសធម្មតា ដែលអាចជាគំរូសម្រាប់ជំរុញទឹកចិត្តក្នុងការតស៊ូព្យាយាមដើម្បីជោគជ័យក្នុងការសិក្សាដើម្បីការរីកចម្រើនរបស់ខ្លួន និងការងារអាជីព។
និស្សិតហ៊ុយ ឃី មកសិក្សាបរិញ្ញាប័ត្រជាន់ខ្ពស់ផ្នែកច្បាប់នៅសាកលវិទ្យាល័យ American University នារដ្ឋធានីវ៉ាស៊ីនតោន សហរដ្ឋអាមេរិកតាមរយៈអាហារូបករណ៍ហ្វ៊ុលប្រៃត៍ (Fulbright) ហើយទទួលអាហារូបករណ៍មួយទៀតឈ្មោះ Alumni Fund Scholarship ដែលហៅកាត់ថា ILSP។ ទោះបីជាមានបញ្ហាភ្នែកមើលមិនសូវឃើញ និស្សិតហ៊ុយ ឃី មានការប្រឹងប្រែងជំនះរាល់ការលំបាកតស៊ូសិក្សាមុខវិជ្ជាច្បាប់ដ៏លំបាករហូតទទួលបានលទ្ធផលគួរឲ្យកត់សម្គាល់។
លោកស្រីខាធី ស្កិនឃ័រ (Cathy Schenker) ដែលជាទីប្រឹក្សាការសិក្សារបស់និស្សិតហ៊ុយ ឃី និងជាអ្នកឧទ្ទេសនាមនិស្សិតហ៊ុយ ឃី ឲ្យទទួលរង្វាន់ Trailblazer Award មានប្រសាសន៍នៅឯពិធីប្រគល់រង្វាន់នោះថា ពេលលោកស្រីជួបនិស្សិតហ៊ុយ ឃី ដំបូង ឃើញនិស្សិតម្នាក់នេះលើកក្រដាស់អានដោយដាក់នៅជាប់នឹងច្រមុះ ជិតភ្នែក លោកស្រីមានកង្វល់ក្នុងចិត្តថា និស្សិតហ៊ុយ ឃី នឹងមានការលំបាកក្នុងការសិក្សានៅសាលាច្បាប់សហរដ្ឋអាមេរិក ដោយត្រូវអានរាប់រយរាប់ពាន់ទំព័រជារៀងរាល់សប្តាហ៍។ ប៉ុន្តែនៅពេលនិស្សិត ហ៊ុយ ឃី ប្រគល់កិច្ចការសរសេរទីមួយរបស់គេ ទើបលោកស្រីដឹងយ៉ាងច្បាស់ថា លោកស្រីគ្មានហេតុផលណានឹងត្រូវពិបាកចិត្តដែលថា និស្សិតម្នាក់នេះ សិក្សាមិនកើតទៀតនោះទេ។ លោកស្រីមានប្រសាសន៍ថា៖
«ការសរសេររបស់ឃី ប្រហែលជាល្អជាងនិស្សិតផ្នែកច្បាប់ភាគច្រើននៅសាលាច្បាប់ផង។ ការសរសេរមានសំនួនវោហារល្អ មានការរៀបចំបានល្អ និងប្រកបដោយការវិភាគ។ ដូច្នេះយើងគិតថា គាត់នឹងអាចសិក្សាបាន ហើយគាត់ពិតជាអាចធ្វើបាន។ពិន្ទុរបស់គាត់ខ្លាំងនៅក្នុងកម្មវិធីបរិញ្ញាប័ត្រជាន់ខ្ពស់ច្បាប់ ហើយគាត់ពិតជាជំនះខ្លួនឯង ដោយមិនត្រឹមតែសិក្សាផ្នែកសិទ្ធិមនុស្សទេ គឺទៅសិក្សានៅថ្នាក់ផ្សេងៗដែលសម្រាប់តែនិស្សិតច្បាប់ប៉ុណ្ណោះ។ គាត់បានសិក្សាសិទ្ធិជនពិការសម្រាប់គាត់ត្រឡប់ទៅប្រទេសកម្ពុជាវិញ គាត់អាចជួយជនពិការនៅទីនោះ»។
ចេញពីប្រភពជាកូនពៅរបស់គ្រួសារដែលមានបងប្អូន៣នាក់របស់លោកលិបតិ និងអ្នកស្រីហង្ស ហ្លួង អាជីវករ ខេត្តកំពង់ឆ្នាំង ប្រទេសកម្ពុជា និងមានបញ្ហាភ្នែកពីកំណើត និស្សិតហ៊ុយ ឃី បានធ្វើឲ្យមានការភ្ញាក់ផ្អើលក្នុងចំណោមបុគ្គលិកសិក្សា និងជំរុញទឹកចិត្តមិត្តរួមថ្នាក់នៅសាលាច្បាប់នៃសាកលវិទ្យាល័យ American University។
នាងណាប៉ារ៉ាតា ក្រានរតនាស្វ៊ីត (Naparata Kranrattanasuit) និស្សិតមកពីប្រទេសថៃ និងជាមិត្តរួមថ្នាក់របស់និស្សិតហ៊ុយ ឃី បានប្រាប់វីអូអេសំឡេងសហរដ្ឋអាមេរិកផ្នែកខេមរភាសា នៅឯពិធីប្រគល់រង្វាន់ថា និស្សិតហ៊ុយ ឃី ពិតជាសក្តិសមនឹងទទួលរង្វាន់ Trailblazer Award នេះ ហើយការខិត្តខំប្រឹងប្រែងរបស់និស្សិតហ៊ុយ ឃី ពិតជាកម្លាំងជំរុញដ៏ខ្លាំងមួយសម្រាប់រូបនាង និងនិស្សិតដទៃទៀត។ នាងណាប៉ារ៉ាតា ថ្លែងថា៖
«ក្នុងនាមជាមិត្តភក្តិម្នាក់ ខ្ញុំអាចនិយាយបានថា ការខិតខំប្រឹងប្រែងរបស់គាត់ពិតជាជំរុញទឹកចិត្តខ្ញុំ។ គាត់ជំរុញទឹកចិត្តខ្ញុំឲ្យខិតខំប្រឹងធ្វើកិច្ចការឲ្យបានល្អជាងនេះ។ គាត់ធ្វើឲ្យខ្ញុំគិតថា អ្វីសុទ្ធតែអាចធ្វើទៅបានទាំងអស់គា្រន់តែត្រូវការអំណត់ និងដាក់ខ្លួន ។ តាមពិតទៅគាត់ពូកែ មិនគួរដាក់ខ្លួនពេកទេ។ ខ្ញុំមានមោទនភាពចំពោះគាត់ ហើយទន្ទឹងរង់ចាំមើលជោគជ័យរបស់គាត់នៅក្នុងការងារអាជីពរបស់គាត់ហើយខ្ញុំជឿជាក់ថា គាត់នឹងធ្វើកិច្ចដ៏អស្ចារ្យបានច្រើនសម្រាប់កម្ពុជា»។
ចំណែកលោកស្រីគ្រិស្ទីន ហ្គែតធីងស៍ (Christine Gettings)នាយិកាជំនួយនៃមជ្ឈមណ្ឌលជីវិតស្មារតី KAY (KAY Spiritual Life Center) និងជាសមាជិកគណៈកម្មការជ្រើសរើសរង្វាន់មានប្រសាសន៍ថា គណៈកម្មការមើលឃើញលក្ខណៈសម្បតិ្តដ៏ប្រពៃរបស់និស្សិតហ៊ុយ ឃី ទាំងការតាំងចិត្ត ការខិតខំប្រឹងប្រែង និងលទ្ធផលនៃការសិក្សា ។ លោកស្រីបន្តទៀតថា៖
«យើងមានការស្ញើចសរសើរចំពោះឃី ពីព្រោះមកពីប្រទេសកម្ពុជា ដែលមានធនធានតិចតួចសម្រាប់ភាពពិការរបស់គាត់ ប៉ុន្តែគាត់នៅតែអាចរៀនច្បាប់បានពូកែ ហើយអាចចូលរៀនក្នុងកម្មវិធីរបស់សាកលវិទ្យាល័យ American University ប្រកបដោយការប្រកួតប្រជែង ហើយគាត់ធ្វើបានយ៉ាងល្អប្រសើរ ដែលមិនគួរឲ្យជឿ។ យើងពិតជាស្ញើចសសើរចំពោះការខិតខំប្រឹងប្រែងនេះ ។ យើងពិតជាស្ញើចសសើរចំពោះការតាំងចិត្តរបស់គាត់ក្នុងការវិលត្រឡប់ទៅប្រទេសកម្ពុជាវិញ ដើម្បីបង្រៀនអ្នកដទៃ និងធ្វើឲ្យមនុស្សគ្រប់គា្នយល់ដឹងអំពីសិទ្ធិរបស់ជនពិការនៅក្នុងប្រទេសកម្ពុជា» ។
និស្សិតហ៊ុយ ឃីបានប្រាប់វីអូអេសំឡេងសហរដ្ឋអាមេរិកផ្នែកខេមរភាសាថា ខុសពីនិស្សិតដែលមានកាយសម្បទាធម្មតា ខ្លួនមានការលំបាកបំផុតចំពោះការអានសៀវភៅ និងឯកសារផ្សេងៗ ។ តែទោះបីជាយ៉ាងណាក៏និស្សិតហ៊ុយ ឃីជំនះរាល់ការប្រឈមមុខនេះ ។ និស្សិតហ៊ុយ ឃីថ្លែងថា៖
“ចំពោះការអានសៀវភៅគឺមានការពិបាក ដោយសារថា ខ្ញុំទាល់តែដាក់សៀវភៅជិតទើបអាចមើលឃើញ ហើយសៀវភៅច្បាប់ភាគច្រើនគឺមានពុម្ពអក្សរតូចៗ ។ អញ្ចឹងគឺជាការពិបាកមួយសម្រាប់ខ្ញុំ ។ ហើយជួនកាលខ្ញុំប្រើកែវពង្រីកដាក់នៅលើសៀវភៅហ្នឹងមើល ។ ដូច្នេះ គឺជាការពិបាកមួយបើប្រៀបធៀបជាមួយហ្នឹងកូនសិស្សដទៃដែលគេមានលក្ខណៈធម្មតាគឺថា ការអានរបស់គេគឺបានលឿនជាងខ្ញុំច្រើន” ។
និស្សិតហ៊ុយ ឃីបន្តទៀតថា រង្វាន់នេះ គឺជាកម្លាំជំរុញ និងជាការលើកទឹកចិត្តមួយដ៏សំខាន់សម្រាប់កិច្ចខិតខំប្រឹងប្រែងបន្តទៀតនាពេលអនាគត ហើយរីករាយ ការដែលកិច្ចខិតខំប្រឹងប្រែងរបស់ខ្លួនទទួលបានផ្លែផ្កាបែបនេះ ។ និស្សិតហ៊ុយ ឃីបន្តទៀតថា៖
“រង្វាន់នេះមានសារសំខាន់សម្រាប់ខ្ញុំ គឺជាការលើកទឹកចិត្តមួយសម្រាប់រូបខ្ញុំផ្ទាល់ ។ ខ្ញុំគិតថា រង្វាន់នេះគេឲ្យខ្ញុំគឺដោយសារ លក្ខណៈទីមួយគឺថា ផ្តោតទៅលើការខិតខំប្រឹងប្រែងរៀនសូត្ររបស់ខ្ញុំ គឺបានពិន្ទុរល្អ ។ មួយទៀតគឺគេឲ្យទៅលើនិស្សិតខិតខំប្រឹងប្រែងរៀនសូត្រ គឺថាជាគំរូទៅដល់និស្សិតដទៃ ដោយសារថា ទោះបីជានិស្សិតហ្នឹងមានការលំបាកខាងផ្នែករាងកាយដូចជាមើលមិនសូវឃើញមែន ប៉ុន្តែនៅតែព្យាយាមរៀនសូត្រឲ្យបានល្អអញ្ចឹង” ។
និស្សិតហ៊ុយ ឃីក៏សូមផ្តាំផ្ញើដល់និស្សិកម្ពុជាដទៃទៀតថា ការតាំងចិត្ត និងគោលដៅច្បាស់ឺជាកត្តាគន្លឹះក្នុងការទទួលជោគជ័យ ។ និស្សិតហ៊ុយ ឃីផ្តាំថា៖
“ខ្ញុំសូមផ្តាំផ្ញើដល់និស្សិតខ្មែរយើងទាំងអស់គ្នានៅប្រទេសកម្ពុជាថា ថ្វីត្បិតតែប្រទេសកម្ពុជាយើងជាប្រទេសកំពុងអភិវឌ្ឍ ហើយប្រព័ន្ធអប់រំយើងនៅមានកម្រិតខ្សោយ ហើយយើងមិនអាចប្រកួតជាមួយបរទេសនោះ។ កុំគិតអញ្ចឹង។ បញ្ហាសំខាន់គឺថា ខ្លួនយើងហ្នឹងមានការតាំងចិត្តថា យើងអាចធ្វើបាន។ អ្វីដែលគេអាចធ្វើបានគឺយើងអាចធ្វើបាន ហើយយើងត្រូវមានគោលដៅខ្លួនយើងច្បាស់លាស់ មានភាពតស៊ូអត់ធ្មត់ គឺយើងអាចទទួលបានជោគជ័យ»។
និស្សិតហ៊ុយ ឃីបានបញ្ចប់បរិញ្ញាប័ត្រច្បាប់ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចនៅឆ្នាំ២០០៣ និងបរិញ្ញាប័ត្រភាសាអង់គ្លេស ជំនាញខាងបកប្រែពីវិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញនៅឆ្នាំ២០០៧ ហើយនៅឆ្នាំ២០០៩ទទួលបានអាហារូបករណ៍ Fulbright មករៀនយកបរិញ្ញាប័ត្រជាន់ខ្ពស់ផ្នែកច្បាប់ ជំនាញខាងច្បាប់សិទ្ធិមនុស្សអន្តរជាតិ នៅសាកលវិទ្យាល័យ American University នារដ្ឋធានីវ៉ាស៊ីនតោនសហរដ្ឋអាមេរិក៕