ភ្ជាប់​ទៅ​គេហទំព័រ​ទាក់ទង

កង​ទ័ព​ថៃ​នឹង​កម្ពុជា​បាន​ប៉ះ​ទង្គិច​គ្នា​មួយ​ឈុត​ខ្លី​តាម​ព្រំដែន​នៅ​ថ្ងៃ​នេះ​ តែ​ពុំ​មាន​ការ​រង​គ្រោះ​ថ្នាក់​ទេ


កង​ទ័ព​ថៃ​នឹង​កង​ទ័ព​កម្ពុជា​ បាន​ប៉ះ​ទង្គិច​គ្នា​មួយ​ឈុត​ខ្លី​ នៅ​ថ្ងៃ​នេះ​ នៅ​តាម​បណ្ដោយ​ព្រំដែន​ ខេត្ត​ឧត្តរ​មាន​ជ័យ។​ មូលហេតុ​ជា​ផ្លូវការ​ គឺ​ដោយ​សារ​ការ​យល់​ច្រឡំ​នឹង​គ្នា។

លោក​ គង់ សុឋានរិទ្ធ​ រាយការណ៍ជូនពីទីក្រុង ភ្នំពេញ ដូចតទៅ៖

កង​ទ័ព​កម្ពុជា​នឹង​កង​ទ័ព​នៃ​ប្រទេសថៃ​ ដែល​កំពុង​ប្រឈម​មុខ​ដាក់​គ្នា​ដោយ​ជម្លោះ​ព្រំដែន​ បាន​ពើប​ប្រយុទ្ធ​គ្នា​ មួយ​ឈុត​នៅ​ព្រឹក​ថ្ងៃ​អង្គារ​នេះ​ នៅ​ចំណុច​ព្រំ​ដែន​ តាម​ជួរ​ភ្នំ​ដង​រែក​ ដែល​ជា​ព្រំ​ដែន​រួម​រវាង​ខេត្ត​ឧត្តរ​មាន​ជ័យ​ នឹង​ខេត្ត​ស៊ីសាកេត​ របស់​ប្រទេស​ថៃ។​ ការ​ប៉ះ​ទង្គិច​ បាន​កើត​ឡើង​ ចម្ងាយ​ប្រមាណ​ជា​ ៤០​ គម​ ខាង​លិច​ប្រាសាទ​ព្រះ​វិហារ។​ ក៏​ប៉ុន្ដែ​ពុំ​មាន​ពល​ទាហាន​ណា​ម្នាក់​រង​គ្រោះ​ថ្នាក់​នោះ​ទេ។

លោក​ឧត្ដមសេនីយ​ឯក​ ឈុំ សុជាតិ​ អនុ​រដ្ឋ​លេខាធិការ​ នឹង​ជា​អ្នក​នាំ​ពាក្យ​ក្រសួង​ការពារ​ជាតិ​ មាន​ប្រសាសន៍​ថា​ ការ​ប្រយុទ្ធ​គ្នា​បាន​កើត​ឡើង​នៅ​ពេល​ដែល​កងទ័ព​ នៃ​ប្រទេស​ទាំង​ពីរ​បាន​ដើរ​ល្បាត​ប៉ះ​គ្នា​ហើយ​មាន​ការ​យល់​ច្រឡំ​ ដោយ​ខាង​ភាគី​ថៃ​ នឹក​ស្មាន​ថា​ កងទ័ព​កម្ពុជា​ជា​ក្រុមអ្នក​កាប់​ឈើ​ព្រៃ​ខុស​ច្បាប់​ លើ​តំបន់​ខ្នង​ភ្នំ​ដង​រែក​នេះ។​ នៅ​តាម​ជួរ​ភ្នំ​នេះ​ ដែល​ជា​រឿយៗ​ប្រជាពលរដ្ឋ​កម្ពុជា​បាន​ទទួល​រង​ការ​វាយ​ប្រហារ។

“ពី​ព្រឹក​មិញ​ នៅ​វេលា​ម៉ោង​ ៩ម៉​ ៤០​ នាទី​ នៅ​ចំណុច​គេ​ហៅ​ថា​ ព្រះ​លាន​ដូន​ពោធិ៏​ ភូមិ​អូស្វាយ​ ក្នុង​ស្រុក​ត្រពាំង​ប្រាសាទ ​ មាន​ការ​ផ្ទុះ​អាវុធ​រយៈ​ពេល​ប្រហែល​ជា​ ៥​ នាទី។​ គឺ​កម្លាំង​ល្បាត​របស់​ផ្នែក​សឹក​រង​ ស្រុក​ត្រពាំង​ប្រាសាទ​ បាន​ជួប​ប្រយុទ្ធ​ជា​មួយ​ទាហាន​ថៃ​ ដែល​គេ​ល្បាត​ដែរ​ហ្នឹង​ មាន​ការ​ភ័ន្ដ​ច្រឡំ​គ្នា​ ដោយ​អាកាស​ធាតុ​មិន​អំណោយ​ផល​ផង​ ហើយ​ដំបូង​យើង​ស្មាន​ពួក​កាប់​ព្រៃ​ កាប់​ឈើ" ។

លោក​ ថានី ថងផាក់ឌី​ អគ្គ​នាយក​រង​នៃ​នាយកដ្ឋាន​ពត៌មាន​របស់​ក្រសួង​ការ​បរទេស​ថៃ​ មាន​ប្រសាសន៍​តាម​ទូរស័ព្ទ​ពី​ទី​ក្រុង​ បាងកក​ មក​ថា​ លោក​នៅ​មិន​ទាន់​បាន​ដឹង​ពត៌មាន​នេះ​នៅ​ឡើយ​ទេ។​ ហើយ​លោក​នឹង​តាម​ផ្ទៀង​ផ្ទាត់​ពត៌មាន​នេះ​ជា​បន្ថែម​ទៀត។

យ៉ាង​ណា​ក៏​ដោយ​ លោក​ឧត្តមសេនីយ​ ឈុំ សុជាតិ​ បញ្ជាក់​ថា​ មេ​បញ្ជាការ​កងទ័ព​ទាំង​សងខាង​ បាន​ជជែក​សម្រុះ​សម្រួល​គ្នា​ ហើយ​បាន​យោគ​យល់​គ្នា​ឡើង​វិញ​ហើយ​ មក​ទល់​នឹង​រសៀល​ថ្ងៃ​នេះ។

ទំនាក់​ទំនង​រវាង​ប្រទេស​កម្ពុជា​នឹង​ប្រទេស​ថៃ​ បាន​ប្រែ​ទៅ​ជា​ល្អក់​កករ​ចាប់​តាំង​ពី​ខែ​កក្កដា​ ឆ្នាំ​ ២០០៨​ មក​ម្លេះ​ បន្ទាប់​ពី​ប្រាសាទ​ព្រះ​វិហារ​ចំណាស់​៩០០​ ឆ្នាំ​ របស់​ខ្មែរ​ត្រូវ​បាន​ដាក់​បញ្ចូល​ជា​សម្បត្តិ​បេតិកភណ្ឌ័​ពិភពលោក​ ដែល​ក្រុង​ បាងកក​ បាន​ជំទាស់​យ៉ាង​ខ្លាំង។

ការ​ប្រឈម​មុខ​ដោយ​យោធា​ បាន​កើត​ឡើង​ហើយ​មាន​ការ​ប្រយុទ្ធ​គ្នា​ជា​ច្រើន​លើក​កើត​ឡើង​ នៅ​តំបន់​ក្បែរ​ប្រាសាទ​ព្រះ​វិហារ​ ដែល​ធ្វើ​ឲ្យ​មាន​ការ​ស្លាប់​នឹង​របួស​ ក្នុង​ចំណោម​កង​ទ័ព​ទាំង​សងខាង។

ការ​ប្រយុទ្ធ​គ្នា​រវាង​កង​ទ័ព​ប្រទេស​កម្ពុជា​នឹង​កង​ទ័ព​ប្រទេស​ថៃ​ ជា​ចុង​ក្រោយ​បាន​កើត​ឡើង​ កាល​ពី​ពាក់​កណ្ដាល​ខែ​មេសា​ ក្នុង​រយៈ​ពេល​ខ្លី​ចំនួន​ពីរ​លើក​ជាប់ៗ​គ្នា​ នៅ​ព្រំ​ដែន​រួម​ ក្បែរ​ឃុំ​អូរ​ស្មាច់​ ខេត្ត​ឧត្តរ​មាន​ជ័យ៕

XS
SM
MD
LG