ភ្ជាប់​ទៅ​គេហទំព័រ​ទាក់ទង

ស្ថាន​ទូត​កម្ពុជា​ប្រចាំ​អង់គ្លេស​មិន​ធ្វើ​ការ​តស៊ូ​មតិត​ទល់ជាមួយ​អង្គការ​ក្លូបល​វិតណេស​ទេ


អង្គការ​ក្លូបលវិតណេស ​(Global ​Witness) ​កាល​ពី​ថ្ងៃ​ទី១៩​ ខែឧសភា ​ឆ្នាំ២០១០​កន្លង​ទៅ​នេះ ​បាន​ចេញលិខិតមួយច្បាប់ឆ្លើយតបទៅ​នឹងការអញ្ជើញរបស់ស្ថាន​ទូត​កម្ពុជាប្រចាំ​ចក្រ​ភព​អង់គ្លសដែល​ស្នើ​សុំ​ឲ្យ​មានការជជែក​តទល់​មតិស្តី​អំពីនិស្សរណ​កម្មធន​ធានធម្មជាតិ​កម្ពុជា។

ស្ថាន​ទូត​កម្ពុជា​ប្រចាំចក្រភព​អង់គ្លេសបានចេញសេចក្តីប្រកាសព័ត៌មាន​ជា​ភាសាអង់​គ្លេសមួយកាលពីថ្ងៃ​ទី៣០​ ខែ​មេសា​ ឆ្នាំ​២០១០​ ដែល​ស្រង់សម្តីរបស់ឯក​អគ្គ​រាជ​ទូតកម្ពុជា​ លោក​ ហោ ណាំបូរ៉ា ​ថា ​“អង្គការ​ក្លូបល​វិតណេស​កំពុង​តែ​ស្ថិត​នៅ​ក្នុង​គ្រោះ​ថ្នាក់​នៃការបាត់បង់​កិត្តិយស​ និង​ភាពគួរឲ្យទុក​ចិត្តដោយសារ​តែការបន្តយុទ្ធនាការ​ដែល​មានលក្ខណៈនយោបាយដ៏​កំណាច​ប្រឆាំង​នឹង​រដ្ឋា​ភិបាល​កម្ពុជា”។

នៅក្នុងសេចក្តី​ប្រកាស​ព័ត៌មានដដែល​នោះ ​លោកឯក​អគ្គ​រដ្ឋ​ទូតសង្កត់​ធ្ងន់ថា​ “ដល់​ពេល​ដែល​អង្គការក្លូបលវិតណេសត្រូវ​បញ្ឈប់​តាម​ដាន​ និងត្រូវ​បង្ខំឲ្យពន្យល់​អំពី​យុទ្ធនាការ​បង្ខូចឈ្មោះ ​និង​ស្អប់រាជ​រដ្ឋាភិបាល​ និងប្រជាពលរដ្ឋកម្ពុជា​ហើយ” ​ ហើយ​ក្នុង​នោះ​ដែរ​ ក៏​បាន​អញ្ជើញ​អង្គការ​ក្លបលវិតណេស​ ធ្វើ​ការជជែកតទល់​មតិនៅ​ទីក្រុងឡុងដ៍ ​ឬ​កន្លែង​ណា​មួយ។ក្រោយ​ពី​ការឆ្លើយ​តប​របស់អង្គការ​ក្លបលវិតណេសយល់​ព្រម​ធ្វើ​ការជជែកត​ទល់​មតិដោយ​មានកំណត់កាល​បរិច្ឆេទ​នៅថ្ងៃ​ទី១៧ ​ខែ​មិថុនា ​ឆ្នាំ​២០១០​មក ​ ស្ថាន​ទូត​កម្ពុជា​ប្រចាំចក្រ​ភព​អង់គ្លេស​ បានចេញ​លិខិត​មួយ​ច្បាប់ចុះ​ថ្ងៃ​ទី​២១​ ខែមេសា​ ឆ្នាំ​២០១០ ​បដិសេធ​ការជជែកត​ទល់មតិជា​សាធារណ​វិញ ​ដោយ​សង្កត់​ធ្ងន់​ថា ​អង្គការ​ក្លបលវិតណេសមានចរិត​នយោបាយ​ និងមានរបៀប​វារៈលាក់​បាំងដើម្បីបំផ្លាញកិត្តិ​យស​រដ្ឋា​ភិបាល​ស្រប​ច្បាប់របស់លោក​នាយក​រដ្ឋ​មន្រ្តី​ហ៊ុន សែន​ ហើយអង្គការ​នេះ​កំពុងបាត់បង់កិត្តិយស​ និងជាឧបករណ៍​នយោបាយ​ក្រោមបញ្ជារបស់​គណបក្ស​ប្រឆាំង​នៅ​ក្នុង​ប្រទេស​កម្ពុជា។​ ក្នុង​លិខិតនោះ​ក៏​ឲ្យ​ដឹង​ទៀត​ថា​ ដោយសារ​តែ​មេដឹក​នាំ ​និង​អ្នក​យុទ្ធនាការ​អង្គការ​ក្លូបលវិតណេស​មាន​ជម្ងឺ​ឆ្កួតជ្រូក​ និង​សរសៃ​ប្រសាទ​ ជាការល្អ​ដែល​មន្រ្តី​ និង​តំណាង​កម្ពុជា​មិន​ចូល​រួមក្នុង​ការ​ជជែក​ត​ទល់​មតិ​នេះ។

អង្គការ​ក្លូបល​វិតណេស​គឺ​ជា​អង្គការ​ការពារ​បរិស្ថាន​នៅ​ក្នុង​ពិភព​លោក​ដែល​ផ្តោត​ការ​ងារ​របស់​ខ្លួន​នៅក្នុង​ប្រទេស​ជាច្រើន​ ដែល​អ្នក​សិក្សា​ស្រាវជ្រាវ​ជាច្រើន​នៅ​ក្នុង​ពិភព​លោក​ចាត់​ទុក​ថា​ ជា​អង្គការ​ដែល​យល់​ដឹង​យ៉ាង​ទូលំទូលាយ​អំពី​បរិស្ថាន​ និង​ដឹង​យ៉ាង​ច្បាស់​នូវ​អ្វី​ដែល​គេ​កំពុង​ធ្វើ។​ មិន​មែន​តែ​រដ្ឋាភិបាល​កម្ពុជាទេ​ដែល​អង្គការ​នេះរិះគន់​ តែ​រដ្ឋា​ភិបាល​ និង​សាជីវកម្ម​នានា​ក្នុង​ពិភព​លោក​ដែល​ធ្វើ​ឲ្យ​ប៉ះ​ពាល់ដល់​បរិស្ថាន​ក៏​ត្រូវ​បាន​រិះ​គន់​ដោយអង្គការ​នេះ​ដែរ។ ​ជា​អាទិ៍កាល​ពីថ្ងៃទី​២០​ ខែ​ឧសភា​នេះ​ អង្គការ​ក្លូបលវិតណេសបាន​ចេញ​របាយ​ការណ៍​មួយ​លាត​ត្រដាង​ថា ​ធនាគារ ​Goldman ​Sachs​ នៅ​ពី​ក្រោយ​ការធ្វើ​អាជីវ​កម្ម​ប្រេង​នៅ​ប្រទេស​អង់ហ្គោឡា​ដោយ​ក្នុងហ៊ុនសហ​រដ្ឋ​អាមេរិក​ឈ្មោះ​ Cobalt ​International ​Energy ​ទោះ​បី​ដឹង​ថា​ ដៃ​គួ​ជំនួញ​របស់​ខ្លួន​នៅ​មូលដ្ឋាន​អាច​នឹង​ធ្វើ​ឲ្យ​ក្រុម​ហ៊ុន​ Cobalt ​ប្រឈម​នឹង​ការ​ចោទ​ប្រកាន់​នៅសហរដ្ឋ​អាមេរិក​ពី​បទ​ពុក​រលួយ​ក៏​ដោយ។

លោក​មម ​សម្បត្តិ ​គឺ​ប្រធាន​គណៈ​កម្មការ​ភិបាល​នៃ​អង្គការ​សម្ព័ន្ធ​ភាព​តម្លាភាព​ចំណូល​ធន​ធាន​ដែល​កំពុង​ធ្វើ​ដំណើររ​មក​កាន់​សហ​រដ្ឋអាមេរិកដើម្បី​ចូល​រួម​ប្រជុំ​ប្រចាំ​ឆ្នាំ​របស់​ក្រុមហ៊ុន​ Chevron ដែល​ជា​ក្រុមហ៊ុន​ថាម​ពល​ធំ​ជាង​គេ​ទីពីរ​នៅ​សហ​រដ្ឋ អាមេរិក។ ​លោក​មាន​ការ​គាំទ្រ​យ៉ាង​ខ្លាំង​ចំពោះ​ការ​ផ្តួច​ផ្តើម​ឲ្យ​មាន​ការ​ជជែក​ត​ទល់​មតិ​ជាសាធារណៈ​ណា​មួយ​ស្តី​អំពីនិស្សរណកម្ម​ធនធាន​ធម្មជាតិ​កម្ពុជា​ ពីព្រោះ​ថា​ ការ​តស៊ូ​មតិ​នេះ​អាច​ជួយ​ដល់​តម្លាភាព​នៃការ​គ្រប់គ្រង​ធនធាន​ធម្មជាតិ​របស់​ជាតិ ។ ​តែ​គួរ​ឲ្យ​សោកស្តាយ​ដែល​ការ​ជជែក​ត​ទល់​មតិ​នេះ​ត្រូវ​បានអាក់​ខាន​ទៅវិញ ។ ​លោក​បន្តថា​៖

“Debate​នេះ ​ខ្ញុំយល់​ថា ​ប្រសិន​បើ​កើត​ឡើង​ គឺ​ល្អ​មែន​ទែន ​ដោយ​វា​បង្ហាញ​ព័ត៌មាន​ដែល​យើង​មិនទាន់​បាន​ទទួល​ បាន​បើក​ទូលាយ​ដល់​សាធារណជន​ ហើយ​បើយើង​មើល​នៅ​ក្នុង​ព័ត៌មាន​ផ្សព្វផ្សាយ​អ៊ីធ័រណិត​ស្តី​អំពី​ចំណូល​ធនធាន​ពី​ប្រេង​ ឧស្ម័ន​ រ៉ែ ​សម្រាប់​ក្រសួង​សេដ្ឋកិច្ច​ និង​ហិរញ្ញវត្ថុ ​គឺ​មិន​មាន​ប្រភព​ចំណូល​ណា​មួយ​ថា​ ​បាន​មក​ពី​ខ្សាច់​ទេ​ ក៏​ប៉ុន្តែ​មាន​ការ​ធ្វើ​អាជីវកម្ម​ខ្សាច់រួចទៅ​ហើយ​នៅ​ក្នុង​ខេត្ត​កោះ​កុង​នាំ​ចេញ​នៅ​សាំង​ហ្កាពួរ​នោះ។​ ដូច្នេះ​ប្រសិន​បើ​មាន​ការ​ធ្វើ​អាជីវកម្ម​រ៉ែ​បែប​នេះ​ គឺ​គួរ​តែ​រាជ​រដ្ឋាភិបាល​បាន​ទទួល​ចំណូល​ពី​ការ​រុករក​ខ្សាច់​នៅ​ក្នុង​ខេត្ត​កោះ​កុង​ហ្នឹង ​ហើយ​ធ្វើ​របាយ​ការ​ដាក់​ក្នុង​អ៊ីធ័រណិត​របស់​ក្រសួង​សេដ្ឋកិច្ច​ និង​ហិរញ្ញ​វត្ថុ”។

កាល​ពី​ដើម​ខែ​ឧសភា​នេះ ​អង្គការ​ក្លបលវិតណេស​បាន​ចេញ​ផ្សាយ​របាយការ​មួយ​ស្តី​អំពី​ការ​ដឹក​ជញ្ជូន​ខ្សាច់រាប់​លាន​តោន​ពី​ខេត្ត​កោះ​កុង ទៅលក់​នៅប្រទេស​សាំងហ្កាពួរ​នាំ​ឲ្យ​មាន​ប៉ះពាល់​យ៉ាង​ធ្ងន់​ធ្ងរ​ដល់​បរិស្ថាន។ ​អង្គការ​ក្លបលវិតណេស​ឲ្យ​ដឹង​ថា​ ស្រប​ពេល​ជាមួយ​នឹង​សេចក្តី​ប្រកាសរបស់​រាជ​រដ្ឋាភិបាល​កម្ពុជាហាម​បា្រម​ការ​នាំ​ខ្សាច់​ចេញ​ទៅ​លក់​នៅ​បរទេស​ អ្នក​ជំនួញ​ដែល​ស្និទ្ធ​នឹង​រដ្ឋាភិបាល​កម្ពុជា​ទទួល​បាន​អាជ្ញា​ប័ណ្ណ​នាំ​ខ្សាច់​ចេញ​ទៅ​ប្រទេស​សាំងហ្កាពួរ។ ​អង្គការ​នេះ​បាន​ប៉ាន់​ប្រមាណ​ថា ​គា្រន់​តែ​អាជីវកម្ម​ខ្សាច់​ពីខេត្ត​កោះកុង​មួយ​ប៉ុណ្ណោះ​ មាន​តម្លៃ​ដល់​ទៅ​ប្រមាណ​២៤៨​លាន​ដុល្លារ​សហ​រដ្ឋ​អាមេរិក​ក្នុង​មួយ​ឆ្នាំៗ ​បើ​គិត​តម្លៃ​នៅ​ប្រទេស​សាំងហ្កាពួរ។​ ប៉ុន្តែ​ស្ថានទូត​កម្ពុជា​ប្រចាំ​ចក្រភព​អង់គ្លេស​តំណាង​ឲ្យ​រដ្ឋាភិបាល​កម្ពុជា​បដិសេធ​ភ្លាមៗ​ដោយ​ហៅ​របាយការ​នោះ​ថា​ ជា​របាយការ​សម្រាម​ ថោកទាប​ គ្មាន​ការណ៍​ពិត​ និង​មាន​គោល​បំណង​បង្ខូច​កិត្តិយស​រដ្ឋាភិបាល៕

XS
SM
MD
LG