ភ្ជាប់​ទៅ​គេហទំព័រ​ទាក់ទង

អ្នក​ស្រុក​អូររស្មាច់​ភ័យ​ព្រួយ​អំពី​ការ​ប្រយុទ្ធ​គ្នា​រវាង ​កង​ទ័ព​កម្ពុជា​និង​ថៃ


ប្រជា​ពល​រដ្ឋ​នៅ​ក្នុង​តំបន់​អូរ​ស្មាច់​ នៅ​ថ្ងៃ​សុក្រ​នេះ​បាន​បញ្ចេញ​នូវ​អារម្មណ៍​ភ័យ​ខ្លាច​អំពី​ ការ​ធ្លាក់​ចុះ​តម្លៃ​ប្រាក់​រៀល​ និង​លទ្ធ​ភាពនៃ​ការ​ប្រយុទ្ធ​គ្នា​ជា​ថ្មី​ ដែល​អាច​ប៉ះ​ពាល់​ដល់​មុខ​ របរ​ចិញ្ចឹម​ជីវិត​ប្រចាំ​ថ្ងៃ​និង​អាយុ​ជីវិត​របស់​ពួក​គេ។

ការ​ប្រយុទ្ធ​គ្នា​រវាង​កង​ទ័ព​កម្ពុជា​និង​កង​ទ័ព​ថៃ​បាន​កើត​ឡើង​នៅ​តំបន់​អូរ​ស្មាច់​ ខេត្ត​ឧត្តរ​មាន​ជ័យ​ កាល​ពី​ថ្ងៃ​សៅរ៍​ ទី១៧​ខែ​មេសា​ ខណៈ​ពេល​ដែល​កង​ទ័ព​ថៃ ​បាន​បាញ់​មក​លើ​កង​ទ័ព​កម្ពុជា​ ដែល​កំពុង​ដើរ​ល្បាត​តាម​បណ្តោយ​ព្រំ​ដែន។

លោក​ ចាន់​ ថា​ អាយុ​៥២​ឆ្នាំ​ ជា​អ្នក​លក់​បាយ​សម្ល​ បាន​ថ្លែង​ថា​ លោក​មាន​ការ​ព្រួយ​រម្ភ​អំពី​ តម្លៃ​ប្រាក់​រៀល​ចុះ​ថោក​ប្រមាណ​៣០%​ដែល​បាន​ប៉ះ​ពាល់​ដល់​មុខ​របរ​ប្រចាំ​ថ្ងៃ​របស់​លោក។

លោក​បាន​បន្ថែម​ថា​ លោក​បាន​យក​ប្រាក់​រៀល​ទៅ​ដូរ​យក​ប្រាក់​បាត​ដើម្បី​ទិញ​ទំនិញ​ផ្សេងៗ​ ពី​ប្រទេស​ថៃ​ ហើយ​លោក​យក​ទំនិញ​មក​លក់​នៅ​ក្នុង​ទឹក​ដី​កម្ពុជា​ជា​ប្រាក់​រៀល។

«១០០០០​ប្រាក់​រៀល​ដូរ​បាន​៧០​ប្រាក់​បាត។​វា​មាន​ន័យ​ថា​ ប្រាក់​រៀល​ធា្លក់​ចុះ​៣០%​ បន្ទាប់ ​ពី​ការ​ផ្ទុះ​អាវុធ​ ចាប់​ពី​ថ្ងៃ​នេះ​ទៅ។​ ខ្ញុំ​ក៏​អាច​ខ្វល់​ខ្វាយ​ដែរ​ ពីព្រោះ​ប្រាក់​រៀល​របស់​យើង​បាន​ចុះ​ថោក​ ហើយ​ប្រាក់​បាត​ថៃ​ បាន​ឡើង​ថ្លៃ។​ យើង​នៅ​ព្រំដែន​តែង​តែ​លំបាក»។

លោក​ ម៉ែន​ ពៅ ​អាយុ​៤២​ឆ្នាំ​ ជាង​ជួស​ជុល​ម៉ូតូ ​បាន​ថ្លែង​ថា​ លោក​មាន​ការ​ភ័យ​ខ្លាច​អំពី​ ផល​ប៉ះ​ពាល់​ដល់​មុខ​របរ​របស់​លោក​ច្រើន​ជាង​ការ​ប្រយុទ្ធ​គ្នា។

«យើង​ទៅ​ទិញ​ទំនិញ​ថៃ​ជា​ប្រាក់​បាត។​ យើង​យក​មក​លក់​ជា​ប្រាក់​រៀល។​ វា​ធ្វើ​ឱ្យ​ប៉ះ​ពាល់​ ដល់​មុខ​របរដែល​មិន​សូវ​បាន​ចំណេញ។​ បើ​យើង​តម្លើង​ថ្លៃ​ទំនិញ​របស់​យើង​ វា​មិន​កើត។​ ពី​មុន​ប្រាក់​បាត​ និង​ប្រាក់​រៀល​មាន​តម្លៃ​ប្រហាក់​ប្រហែល​ វា​ងាយ​ស្រួល​រក​ស៊ី»។

បន្ថែម​ពី​លើ​ការ​ភ័យ​ព្រួយ​អំពី​ការ​ធ្លាក់​ចុះ​តម្លៃ​ប្រាក់​រៀល​ប្រមាណ​៣០%​ បើ​ប្រៀប​ធៀប​នឹង​ ប្រាក់​បាត​ថៃ​ ក្រោយ​ការ​ប្រយុទ្ធ​គ្នា​កាល​ពី​ថ្ងៃ​សៅរ៍​ ប្រជា​ពល​រដ្ឋ​ខ្មែរ​នៅ​ក្នុង​តំបន់​អូរ​ស្មាច់​នេះ​ នៅ​តែ​មាន​ការ​ភ័យ​ខ្លាច​នឹង​ការ​ប្រយុទ្ធ​គ្នា​កើត​ឡើង​ម្តង​ទៀត​ រវាង​កង​ទ័ព​កម្ពុជា​ និង​កង​ទ័ព​ថៃ។

តំបន់​អូរស្មាច់​ គឺ​ជា​អតីត​សមរ​ភូមិ​ប្រយុទ្ធ​យ៉ាង​ក្តៅ​គគុក​រវាង​កង​ទ័ព​រដ្ឋា​ភិបាល​ទី​ក្រុង​ភ្នំពេញ​ និង​កង​ទ័ព​ខ្មែរ​ក្រហម​ នៅ​ក្នុង​ឆ្នាំ​១៩៩៤​ និង​បន្ទាប់​មក​រវាង​កង​ទ័ព​ដែល​ស្មោះ​ត្រង់​នឹង​ ព្រះ​អង្គ​ម្ចាស់​នរោត្តម​រណ​ឫទ្ធិ​ នាយក​រដ្ឋ​មន្ត្រី​ទី​១​ និង​កង​ទ័ព​ដែល​ស្មោះ​ត្រង់​នឹង​លោក​ ហ៊ុន​ សែន​ នាយក​រដ្ឋ​មន្ត្រី​ទី ​២ ​នៅ​ក្នុង​ឆ្នាំ​១៩៩៧។

ការ​ប្រយុទ្ធ​គ្នា​រវាង​កង​ទ័ព​កម្ពុជា​ និង​ថៃ​កាល​ពី​ថ្ងៃ​សៅរ៍​បាន​ធ្វើ​ឱ្យ​អ្នក​ស្រុក​អូរ​ស្មាច់​មាន​ការ​ ព្រួយ​បារម្ភ​យ៉ាង​ខ្លាំងអំពី​អនាគត​របស់​ខ្លួន។

ប្រជា​ពល​រដ្ឋ​មួយ​ចំនួន​នៅ​តំបន់​អូរ​ស្មាច់​ បាន​បញ្ជាក់​ថា​ ពួក​គេ​បាន​រៀប​ចំ​របស់​របរ​ ​រួច​ជា​ស្រេច​ ដើម្បី​ត្រៀម​ខ្លួន​គេច​ចេញ​តាម​ការ​ជូន​ដំណឹង​របស់​ក្រុម​អាជ្ញាធរ​ បើ​ការ​ប្រយុទ្ធ​គ្នា​នឹង​ កើត​មាន​ម្តង​ទៀត​នោះ។

លោក​ចាន់ ​ដែន​ អាយុ​៤៣​ឆ្នាំ​ ជា​អ្នក​រត់​ម៉ូតូ​ឌុប​ បាន​បញ្ជាក់​ថា​ លោក​មាន​ការ​ភ័យ​ព្រួយ​យ៉ាង​ខ្លាំង​អំពី​សុវត្ថិ​ភាព​ និង​អាយុ​ជីវិត​ នៅ​ពេល​ដែល​កង​ទ័ព​ថៃ​បាន​បាញ់​គ្រាប់​កាំភ្លើង​ប្រភេទ​ M79​ មក​ធ្លាក់​នៅ​ក្បែរ​ផ្ទះ​របស់​លោក។

លោក​បាន​បន្ត​ថា​ បើ​មាន​ការ​ប្រយុទ្ធ​គ្នា​ជា​ទ្រង់ទ្រាយ​ធំ ​លោក​នឹង​នាំ​ក្រុម​គ្រួសារ​រត់​ចេញ​ពី​ តំបន់​អូរ​ស្មាច់​នេះ។

«ខ្ញុំ​មាន​ការ​ជីក​ត្រង់​សេ​សម្រាប់​ការ​ពារ​កូន​ចៅ។​ បើ​មាន​ការ​ប្រទូស្ត​រាយ​គ្នា​ម្តង​ទៀត​ ខ្ញុំ​មាន​ ត្រង់​សេស​ម្រាប់​ក្រាប។​ ខ្ញុំ​បាន​ជីក​ត្រង់​សេ​ និង​បាន​ធ្វើ​គម្រប​ដាក់​ ស្តុក​អង្ករ​ អំបិល​ និង​ទឹក​ក្នុង​កាដុង​ ទុក​បង្ការ​នៅ​ក្នុង​ត្រង់​សេ​ឱ្យ​ហើយ»។

លោក​ឌី ​សោម​ អាយុ​៤០​ឆ្នាំ​ ជា​អ្នក​រត់​ម៉ូតូ​ឌុប​ បាន​និយាយ​ថា ​លោក​មិន​ភ័យ​ខ្លាច​នឹង​សង្គ្រាម​ ទេ​ ប៉ុន្តែ​លោក​ត្រូវ​រៀប​ចំ​កន្លែង​សុវត្ថិ​ភាព​សម្រាប់​ប្រពន្ធ​កូន​របស់​លោក​ មុខ​ពេល​ការ​ប្រយុទ្ធ​គ្នា​ អាច​កើត​ឡើង​ម្តង​ទៀត។

"ខ្ញុំ​បាន​រៀប​ចំ​ម្ហូប​អាហារ​ អង្ករ​ និង​អំបិល​រួច​ជា​ស្រេច​ និង​បាន​ជីក​ត្រង់សេ​ទុក​ជា​ស្រេច។​ ប៉ុន្តែ​ខ្ញុំ​មិន​រត់​ចោល​ដី​អូរ​ស្មាច់​ជា​ដាច់​ខាត។​បើ​មាន​សង្គ្រាម​រវាង​ខ្មែរ​និង​ថៃ ​ខ្ញុំ​ក៏​នាំ​ប្រពន្ធ​កូន​ចូល​នៅ​ក្នុង​ត្រង់​សេ"។

ក្រោយ​ពី​ការ​ប្រយុទ្ធ​គ្នា​ សេចក្តី​រាយ​ការណ៍​ពី​ការ​បង្កើន​កង​ទ័ព​របស់​ភាគី​ទាំង​២​ត្រូវ​បាន​អះ​ អាង​ដោយ​មន្ត្រី​មូល​ដ្ឋាន​ថា ​កង​ទ័ព​១០០​នាក់​ត្រូវ​បាន​បញ្ជូន​ទៅ​កាន់​តំបន់​ប្រយុទ្ធ​គ្នា​កាល​ពី​ ថ្ងៃ​សៅរ៍​នោះ៕

អត្ថបទ​ទាក់ទង

XS
SM
MD
LG