លោកអ៊ូ ធួក សូមជូនសេចក្ដីប្រែសម្រួល៖
នាយករដ្ឋមន្ដ្រីនៃប្រទេសថៃ លោក អភិសិទ វិចាជិវា ឋឹតនៅក្រោមសម្ពាធកាន់តែធ្ងន់ដើម្បីជំរុញលោកឲ្យចុះចេញពីតំណែង ហើយរៀបចំការបោះឆ្នោតថ្មីនៅពេលក្រោយពីមានការប៉ះទង្គិចដែលបណ្ដាលឲ្យមនុស្សស្លាប់ រវាងទាហាន និងក្រុមបាតុករប្រឆាំងរដ្ឋាភិបាល។
ក្រុមបាតុករនៅតែបន្ដកាន់កាប់ទីកន្លែងសំខាន់ៗនៅក្នុងរាជធានីបឹងកក ទោះបីជាមានការប៉ះទង្គិច ជាមួយកងកម្លាំងសន្ដិសុខកាលពីថ្ងៃសៅរ៍ក៏ដោយ ដែលបានសម្លាប់មនុស្សជាង២១នាក់ ហើយ១៦ នាក់ជាបាតុករ។
ខណៈដែលភាគីទាំងសងខាងកាន់ទុក្ខជនរងគ្រោះរៀងៗខ្លួន ហើយរៀបចំផែនការសម្រាប់វិធានការណ៍ទៅមុខអ្នកវិភាគនយោបាយ នៅទីនេះនិយាយថា អ្នករងគ្រោះថ្នាក់លើកក្រោយប្រហែលជា រដ្ឋាភិបាលរបស់នាយករដ្ឋមន្ដ្រី អាភិសិត វិចាជិវា។
ក្រុមអ្នកតវ៉ាមានឈ្មោះថា ក្រុមអាវក្រហមចង់ឃើញលោក អាភិសិទរៀបចំឲ្យមានការបោះឆ្នោតថ្មី នៅពេលឆាប់ៗនេះ ហើយបដិសេធសេចក្ដីស្នើរបស់លោកឲ្យមានការបោះឆ្នោត ក្នុងរយៈពេល៦ខែ។
ក្រុមទាំងនោះបានធ្វើការតវ៉ាអស់រយៈពេលជាងមួយខែមកហើយ។
លោក William Case នាយកមជ្ឈមណ្ឌលស្រាវជ្រាវអាស៊ីអាគ្នេយ៍ ឬ Southeast Asia Research Centerនៃសាកលវិទ្យាល័យទីក្រុងហុងកុង។
«បាទ លោកអ្នកដឹងហើយ។ លោកបានសាកល្បងមធ្យោបាយតឹងរឹង ហើយលោកបានសាកល្បងធម្យោបាយធូរស្រាល។ តែលោកគ្មានបានជោគជ័យអ្វីសោះ។ លោក បានធ្វើឲ្យក្រុមអាវក្រហមខឹងផ្ដាច់ខ្លួន ហើយរឹតតែលើកកម្លាំងក្រុមនោះ ។ ជាលទ្ឋផល នៅពេលនោះ លោកបានបាត់បង់ប្រជាប្រិយភាពជាច្រើន និងកិត្យានុភាព។ នៅពេលនេះ លោកហាក់ដូចជាអស់មានជម្រើសទៀតទេ»។
រដ្ឋាភិបាលបានដកចេញកងកម្លាំងសន្ដិសុខ ហើយបានសំដែងការសោកស្ដាយចំពោះមរណភាព។ តែមន្ដ្រីផ្លូវការនិយាយថា ទាហានកំពុងរៀបចំខ្លួនសម្រាប់ធ្វើសកម្មភាពតទៅទៀត ប្រឆាំងក្រុមបាតុករ។
យ៉ាងណាក្ដីនៅក្នុងសញ្ញាមួយបង្ហាញការបែកបាក់គ្នារវាងរដ្ឋាភិបាល និងយោធាមេបញ្ជាការយោធា ឧត្ដមសេនីយ៍ អនុពុង បាវចិន្ដា ថ្លែងថា លោកប្រឆាំងការប្រើប្រាស់កម្លាំងទ័ព។ ផ្ទុយទៅវិញ លោក និយាយថា រដ្ឋាភិបាលគួរនឹងផ្ដោតទៅលើការចចារគ្នាអំពីពេលវេលារៀបចំការបោះឆ្នោតថ្មី។
លោក Case និយាយថា សេចក្ដីសម្រេចរបស់លោក អភិសិទដើម្បី ប្រើកម្លាំងយោធាប្រឆាំងបាតុករ បាននាំឲ្យលោកបាត់បង់ការគាំទ្រ។
«គេឃើញមានការជជែកដេញដោលគ្នាអំពីការបង្ខំលោកឲ្យចេញពីតំណែង។ លោកឈប់មានមានប្រយោជន៍ដល់ឥស្សរជនប្រពៃណីតទៅទៀតហើយ។ ហេតុដូច្នេះហើយ គេត្រូវរកមាគ៌ាផ្សេងមូយទៀត ហើយប្រហែលជាដកលោកចេញ»។
បន្ថែមមកលើសម្ពាធនេះ គណៈកម្មការរៀបចំការបោះឆ្នោត និយាយថាគណបក្សប្រជាធិបតេយ្យរបស់លោកអភិសិទមានកំហុស ដោយទទួលវិភាគទានសម្រាប់ការឃោសនាខុសច្បាប់ ហើយត្រូវតែរំលាយចេញ។
សេចក្ដីសម្រេចចុងក្រោយបង្អស់នឹងធ្វើឡើង ដោយតុលាការធម្មនុញ្ញដែលគេរំពឹងថា នឹងប្រើពេលច្រើនថ្ងៃឬច្រើនសប្ដាហ៍។
លោក សោមចៃ ផាថារដ្ឋា ណានុន្ឋ អ្នកធ្វើបាឋកថាអំពីនយោបាយថៃនៅសាកលវិទ្យាល័យ មហាសារាខាម ប្រទេសថៃភាគកណ្ដាល និយាយថា គណៈកម្មការរៀបចំការបោះឆ្នោត ឬតុលាការធម្មនុញ្ញ ទទួលការជ្រៀតជ្រែកនយោបាយ។
«សេចក្ដីសម្រេចពិតប្រាកដធ្វើឡើងដោយអាថ៌កំបាំង។ ខ្ញុំយល់ថា បើគេសម្រុះសម្រួលគ្នានៅក្រោយឆាក ហើយទទួលយកការដោះស្រាយរួច ក្រោយមកគេនឹងចេញសេចក្ដីប្រកាស»។
ទោះបីជាមានការតស៊ូនយោបាយក៏ដោយ សេចក្ដីសម្រចរបស់គណៈកម្មការរៀបចំការបោះឆ្នោត បានដាក់ទម្ងន់មកលើសេចក្ដីអំពាវនាវឲ្យមានការបោះឆ្នោតមុនពេលវេលា។
តែអ្នកវិភាគនិយាយថា ការបោះឆ្នោតថ្មី ដោយមានបេក្ខជន គាំទ្រពីក្រុមអាវក្រហមប្រហែលជាយកជ័យជំនះ នៅតែមិនអាចធ្វើអ្វីបានច្រើនទេ ដើម្បីកាត់បន្ថយភាពតានតឹងនៅក្នុងប្រទេស។
លោក សុរាត ហោរា ចៃគល់ សាស្រ្ដាចារ្យនយោបាយរបស់សាកលវិទ្យាល័យ ជូលាលង់គន ក្នុងទីក្រុងបាងកក។
« បើប្រសិនជាមានរដ្ឋាភិបាលថ្មីមួយកើតឡើង យើងដឹងថា នឹងមានក្រុមដទៃនិយាយថា ខ្ញុំមិនសប្បាយចិត្ដទេជាមួយរដ្ឋាភិបាលនេះ។ ខ្ញុំចង់បានពណ៌នេះ។ ខ្ញុំចង់បានរដ្ឋាភិបាលពណ៌ខៀវពណ៌លឿង ពណ៌ក្រហមស។ល។ តែនេះមិនមែនអំពីលទ្ធិប្រជាធិបតេយ្យទេ ពីព្រោះថា ប្រជាធិបតេយ្យ គឺ ការរស់នៅជាមួយអ្វីដែលយើងមិនចូលចិត្ដដែរ»។
បាតុករជាច្រើនជាអ្នកគាំទ្រអតីតនាយករដ្ឋមន្ដ្រីថាក់សិន សិនាវាត់ដែលបានត្រូវយោធាបណ្ដេញចេញពីអំណាចកាលពីឆ្នាំ២០០៦ ហើយពេលនេះកំពុងរស់នៅនិរទេសខ្លួនដើម្បីចៀសវាងការកាត់ទោសជាប់គុកតាមបទប្រព្រឹត្ដអំពើពុករលួយ។
លោកសុរាត និយាយថា គេចង់លាងសម្អាតការចោទប្រកាន់ទាំងអស់ប្រឆាំងលោក ថាក់សិន ហើយនាំលោកមកឲ្យកាន់អំណាចឡើងវិញ ដែលនឹងនាំក្រុមបាតុករ អាវលឿងឲ្យវិលមកធ្វើការតវ៉ា នៅលើផ្លូវឡើងវិញម្ដងទៀត។
នៅឆ្នាំ២០០៨ ក្រុមអាវលឿងបាននាំគ្នាឡោមព័ទ្ធអាគាររដ្ឋាភិបាលហើយ ក្នុងមួយសប្ដាហ៍បានដណ្ដើមកាន់កាប់អាកាសយានដ្ឋានបាងកក ក្នុងគោលបំណងនឹងបញ្ចប់រដ្ឋាភិបាលជិតដិតជាមួយ លោកថាក់សិន។ ជាយថាហេតុ សេចក្ដីសម្រេចតុលាការអំពីអំពើខុសច្បាប់ពេលឃោសនារកសម្លេងឆ្នោតបានបង្ខំរដ្ឋាភិបាលពីរដែលស្និទ្ឋស្នាលជាមួយលោកថាក់សិនឲ្យចេញពីតំណែង។
ឥស្សរជនទីក្រុងនៃប្រទេសថៃនិងមនុស្សវណ្ណៈមធ្យមបានចាត់ទុកលោកថាក់សិន ជាមន្ដ្រីពុករលួយ ហើយកាន់អំណាចផ្ដាច់ការ។ ចំណែកក្រុមអាវក្រហមវិញ ភាគច្រើន ជាអ្នកមកពីតំបន់ជនបទ។ ក្រុមនោះនិយាយថា រដ្ឋាភិបាលបច្ចុប្បន្នដឹកនាំដោយឥស្សរជនរបស់ទីក្រុងបាងកក គាំទ្រដោយយោធា ដែលមិនខ្វល់អំពីវាសនារបស់ក្រុមគេទេ។
នាយករដ្ឋមន្ដ្រី អភិសិត មានប្រសាសន៍ថា លោកមានចិត្ដប្រាថ្នាចង់ចរចាជាមួយមេដឹកនាំក្រុមបាតុករ ដែលបដិសេធ មិនព្រមជួបប្រជុំគ្នា តទៅទៀត៕
