ទីក្រុងវ៉ាស៊ីនតោន៖ ការបោះឆ្នោតពាក់កណ្តាលអាណត្តិ បាននាំឲ្យគណបក្សសាធារណរដ្ឋនិយម មានសម្លេងភាគច្រើននៅក្នុងសភាតំណាងរាស្ត្ររបស់សហរដ្ឋអាមេរិក ព្រមទាំងការប្រឈមដ៏មានសក្តានុពលមួយ ចំពោះដំណោះស្រាយរបស់រដ្ឋបាលលោកអូបាម៉ាទៅលើគោលនយោបាយការបរទេសមួយចំនួន ដោយសារមេដឹកនាំនៃគណបក្សសាធារណរដ្ឋនិយម ផ្តោតទៅលើការកាត់បន្ថយឱនភាពថវិការបស់សហរដ្ឋអាមេរិកចំនួន ១,៣ សែនកោដិដុល្លារ។
អ្នកវិភាគនយោបាយមួយចំនួន កំពុងពិនិត្យមើលពីអ្វីដែលនឹងរំពឹងទុក នៅពេលដែលក្រុមអ្នកសាធារណរដ្ឋនិយម ឡើងកាន់ដំណែងជាប្រធានគណៈកម្មាធិការ។
មនុស្សម្នាក់ក្នុងចំណោមអ្នកទាំងនោះ គឺលោក ប្រេត សេហ្វើ (Brett D. Schaefer) ដែលជាសមាជិកនៃមជ្ឈមណ្ឌលម៉ាហ្ការ៉េត តាតឈើដើម្បីសេរីភាពរបស់មូលនិធិបេតិកភ័ណ្ឌ (Heritage Foundation)។ លោកព្យាករណ៍ពីការកាត់បន្ថយកម្មវិធីចំណាយដែលបានសម្រេចតាមចំណង់ ដែលការចំណាយមិនមានភាពចាំបាច់ ប៉ុន្តែត្រូវបានកំណត់ជារៀងរាល់ឆ្នាំដោយរដ្ឋសភា។
លោក សេហ្វើ មានប្រសាសន៍ថា ការកាត់បន្ថយភាគច្រើនដែលបានរំពឹងគិតទុក នឹងចូលទៅក្នុងថវិការបស់កម្មវិធី និងក្រុមទាំងឡាយ ដោយរាប់បញ្ចូលទាំងអង្គការសហប្រជាជាតិ និងក្រសួងការបរទេសសហរដ្ឋអាមេរិក ដែលគ្មានមណ្ឌលបោះឆ្នោតក្នុងស្រុករឹងមាំ ដើម្បីការពារកម្មវិធីនិងក្រុមទាំងនោះ។
«មានការពិភាក្សាគ្នាអំពីការកាត់បន្ថយការចំណាយឲ្យដល់កម្រិតឆ្នាំ២០០៨។ ការណ៍នោះបញ្ជាក់ពីការកាត់បន្ថយភ្លាមៗនៅគ្រប់ក្រសួងទាំងអស់ ប៉ុន្តែខ្ញុំក៏នឹងរំពឹងថា សភាតំណាងរាស្ត្រ ដែលកាន់តែអភិរក្សជាងមុន និងធ្វើការពិនិត្យពិច្ច័យខ្លាំងទៅលើមូលនិធិសម្រាប់ជំនួយបរទេស និងកម្មវិធីអន្តរជាតិជាទូទៅ ដោយសារតែជាធម្មតា ពួកគេមានការមន្ទិលសង្ស័យ និងរិះគន់ទៅលើកម្មវិធីទាំងអស់នោះ ច្រើនជាងក្រុមអ្នកប្រជាធិបតេយ្យ»។
ការកាត់បន្ថយជាយថាហេតុមួយចំនួន អាចធ្វើឡើងដោយអនុគណៈកម្មាធិការទេយ្យវត្ថុប្រតិបត្តិការបរទេស និងរដ្ឋ (State and Foreign Operations Appropriations Subcommittee) នៅក្នុងរដ្ឋសភា ដែលកំណត់មូលនិធិសម្រាប់ក្រសួងការបរទេស ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) និងកម្មវិធីដែលពាក់ព័ន្ធទៅនឹងជំនួយបរទេស និងការជួយឧបត្ថមផ្នែកមនុស្សធម៌។
អ្នកត្រូវចូលកាន់ដំណែងប្រធានអនុគណៈកម្មាការនេះ គឺលោកស្រី ខាយ ក្រេងហ្គឺ (Kay Granger) សមាជិកសភាមកពីរដ្ឋតិចសាស់។ កាសែតវ៉ាស៊ីនតោនថែមស៍ បានឲ្យដឹងថា លោកស្រី ជាអ្នកគាំទ្រយ៉ាងខ្លាំងក្លាចំពោះការធ្វើវិសោធនកម្មលើតុល្យភាពថវិកា ហើយក៏ជាអ្នករិះគន់អំពីជំនួយអភិវឌ្ឍដែលផ្តល់ទៅឲ្យប្រទេស ដែលលោកស្រីបានថ្លែងថា មិនបានធ្វើកិច្ចការគ្រប់គ្រាន់ល្មម ដើម្បីគ្រប់គ្រងលើអំពើពុករលួយ។
ជាប្រពៃណី ក្រុមអភិរក្សនិយមរបស់សហរដ្ឋអាមេរិក មិនគាំទ្រឲ្យមានការកាត់បន្ថយយ៉ាងធំធេង សម្រាប់ការចំណាយលើវិស័យការពារជាតិទេ ក៏ប៉ុន្តែសម្ពាធពីសកម្មជនចលនាធី (Tea Party) ដែលតំណាងឲ្យការគាំទ្ររបស់ពលរដ្ឋក្នុងការកាត់បន្ថយថវិកាជាតិ អាចនាំឲ្យរដ្ឋសភាពិនិត្យពិចារណាបញ្ហានេះឡើងវិញ។
សម្លេងភាគច្រើនថ្មីរបស់គណបក្សសាធារណរដ្ឋនិយម ក៏ទំនងជាអាចការទទួលខុសត្រូវខាងការត្រួតពិនិត្យ ដែលអនុញ្ញាតឲ្យពួកគេតស៊ូមតិទៅលើគោលនយោបាយរបស់រដ្ឋបាលលោកអូបាម៉ា៕
ប្រែសម្រួលដោយ លី សុខ ឃាង
