របាយការណ៍ថ្មីមួយរបស់ក្រុមប្រឹក្សាជនភៀសខ្លួននៃប្រទេសណរវែស (Norwegian Refugee Council) បានបង្ហាញថា មនុស្សចំនួន២៦.៤លានត្រូវបាត់បង់ទីជម្រកនៅក្នុងប្រទេសដោយសារជម្លោះជុំវិញពិភពលោក កាលពីឆ្នាំមុន។ របាយការណ៍នេះ បញ្ជាក់ថា ការងើបបះបោរនៅក្នុងបដិវត្តន៍អារ៉ាប់ គឺជាកត្តាសំខាន់មួយ ចំពោះការកើនឡើងយ៉ាងខ្លាំងសម្រាប់ប្រជាពលរដ្ឋដែលបានបណ្តេញពីផ្ទះសម្បែងរបស់ពួកគេ នៅក្នុងឆ្នាំ២០១១។
របាយការណ៍នេះ បង្ហាញថា ប្រជាពលរដ្ឋចំនួន៣.៥លាន ត្រូវបាត់បង់ទីជម្រក នៅឆ្នាំ២០១១។ តួលេខនេះ មានចំនួន២០ភាគរយលើសពីឆ្នាំ២០១០។ នៅក្នុងតួលេខទាំងនេះ របាយការណ៍នេះ ក៏បានបញ្ជាក់ថា ប្រជាពលរដ្ឋចំនួន៨សែន ៣ម៉ឺននាក់ បានគេចចេញពីផលប៉ះពាល់នៃបដិវត្តន៍អារ៉ាប់។
អ្នកស្រី ខេត ហាហ្វ (Kate Halff) អ្នកសរសេររបាយការណ៍នេះ មានប្រសាសន៍ថា ជនជាតិស៊ីរីចំនួន២សែន៣ម៉ឺននាក់ ត្រូវបានបង្ខំឲ្យចាកចេញពីលំនៅដ្ឋាន នៅក្នុងប្រទេសរបស់ខ្លួន ចាប់ពីពេលកើតឡើងនូវវិបត្តិនាពេលសព្វថ្ងៃនេះ កាលពីឆ្នាំមុន។ អ្នកស្រី ថ្លែងទៀតថា មជ្ឈមណ្ឌលវាយតម្លៃការបាត់បង់ទីលំនៅក្នុងប្រទេស (Internal Displacement Monitoring Center) ដែលត្រូវបានបង្កើតឡើងដោយក្រុមប្រឹក្សាជនភៀសខ្លួននៃប្រទេសណ័រវែស នៅឆ្នាំ១៩៩៨ បានតាមដានស្ថានភាពនៃការបាត់ទីលំនៅ នៅស៊ីរី អស់រយៈពេលជាច្រើនឆ្នាំមកហើយ។
«ការបាត់បង់ទីលំនៅកាលពីពេលថ្មីៗនេះ បានបន្ថែមពីលើការបាត់បង់ទីលំនៅដែលមានជាយូរមកហើយ នៅក្នុងប្រទេស។ មុនពេលមានការងើបបះបោរនៅឆ្នាំ២០១១ ប្រជាពលរដ្ឋជាង៤សែននាក់ បានរស់នៅជាជនភៀសខ្លួនក្នុងប្រទេស នៅប្រទេសស៊ីរី ហើយពលរដ្ឋខ្លះបាត់បង់ទីលំនៅអស់រយៈពេលជាង៤០ឆ្នាំមកហើយ។ ប្រសិនជាអ្នកបូកបន្ថែមតួលេខនៃជនបាត់បង់ទីលំនៅ កាលពីជាង១២ខែមុន ប្រទេសស៊ីរី បានក្លាយទៅជាតំបន់ដែលមានស្ថានភាពបាត់បង់ទីលំនៅច្រើនជាងគេបង្អស់នៅក្នុងពិភពលោក។»
របាយការណ៍នេះ ដកស្រង់អំពីការបាត់បង់លំនៅដ្ឋានទ្រង់ទ្រាយធំដទៃទៀត នៅក្នុងឆ្នាំ២០១១ ក្រៅពីការបាត់បង់លំនៅដ្ឋានដែលបណ្តាលមកពីបដិវត្តន៍អារ៉ាប់។ របាយការណ៍នេះបង្ហាញថា តួលេខនៃការបាត់បង់លំនៅដ្ឋាននៅក្នុងប្រទេសអាហ្វហ្គានីស្ថាន(Afghanistan) មានចំនួន៨០ភាគរយច្រើន ខ្ពស់ជាងឆ្នាំមុន នៅពេលដែលការវាយប្រហារបានរាលដាលចូលក្នុងតំបន់ថ្មី របស់ប្រទេសនេះ។
របាយការណ៍នេះ បានឲ្យដឹងថា ប្រជាពលរដ្ឋរហូតដល់មួយលាននាក់នៅប្រទេស កូតឌីវ័រ (Ivory Coast) ត្រូវបានធ្វើឲ្យបាត់បង់ទីលំនៅនៅក្នុងប្រទេស នៅដើមឆ្នាំមុន បន្ទាប់ពីអំពើហិង្សា ដែលបង្កឡើងដោយការបោះឆ្នោតតំណែងប្រធានាធិបតីប្រកបជម្លោះ។ ទោះបីជាស្ថិរភាពរបស់ប្រទេស បានត្រឡប់ទៅរកប្រទេសនេះវិញក៏ដោយ របាយការណ៍នេះបានបង្ហាញថា ការបាត់បង់ទីជម្រកបន្តកើតមានដោយសារតែវិបត្តិក្នុងស្រុក នៅភាគភាគកណ្តាលនិងភាគខាងលិចនៃប្រទេសកូតឌីវ័រ។
របាយការណ៍នេះ បញ្ជាក់ដែរថា ប្រជាពលរដ្ឋរាប់សែននាក់ ត្រូវបង្ខំឲ្យចាកចេញពីប្រទេសស៊ូដង់ និងស៊ូដង់ខាងត្បូងដែលទើបតែទទួលបានឯករាជ្យ ដោយសារតែកងកម្លាំងប្រដាប់អាវុធ ដែលប្រយុទ្ធប្រឆាំងនឹងក្រុមឧទ្ទាម។
ការបាត់បង់ទីជម្រកទ្រង់ទ្រាយធំនៅក្នុងប្រទេស ក៏បានកើតឡើងនៅក្នុងសាធារណរដ្ឋប្រជាធិបតេយ្យកុងហ្គោ (Democratic Republic of Congo) និងប្រទេសសូម៉ាលី(Somalia) ដែលប្រជាពលរដ្ឋបានស្លាប់ដោយសារភាពអត់ឃ្លានដែលបណ្តាលមកពីគ្រោះរំាងស្ងួតនិងទុរភិក្សនៅក្នុងតំបន់៕
ប្រែសម្រួលដោយ សៀក អេង
