សាលាឧទ្ធរណ៍នាថ្ងៃពុធនេះ បានសម្រេចតម្កល់ការចោទប្រកាន់ លោក វ៉ែន វ៉ន ពីបទ «ប្រមូលផល អនុផលព្រៃឈើ ដោយគ្មានលិខិតអនុញ្ញាត» ដែលបានធ្វើឡើងដោយតុលាការខេត្តកោះកុង កាលពីខែមិនាកន្លងទៅ។ នេះបើតាមការបញ្ជាក់ពីមេធាវីការពារក្ដីឲ្យលោក វ៉ែន វ៉ន និងមន្ត្រីតុលាការសាលាឧទ្ធរណ៍។
តុលាការខេត្តកោះកុង កាលពីខែមិនា បានកាត់ទោសលោក វ៉ែន វ៉ន ដែលជាតំណាងជនជាតិដើមភាគតិចជង និងជាអ្នកការពារបរិស្ថានក្នុងតំបន់អារ៉ែង ឲ្យជាប់ពន្ធនាគាររយៈពេលមួយឆ្នាំ ក្នុងសំណុំរឿងព្រៃឈើនេះ តែទោសនោះត្រូវព្យួរ គឺមិនអនុវត្ត ដោយលោកបានជាប់ពន្ធនាគារជិតពាក់កណ្ដាលនៃទោសនេះរួចទៅហើយ។
ការសម្រេចចោទប្រកាន់នេះ ធ្វើឡើងដោយគ្មានការចូលរួមពី លោកវ៉ែន វ៉ន និងមេធាវីការពារក្តីរបស់លោកទេ។
លោក ចាន់ សុជាតិ មេធាវីការពារលោក វ៉ែន វ៉ន ប្រាប់ VOA កាលពីព្រឹកថ្ងៃពុធនេះថា ចៅក្រមសាលាឧទ្ធរណ៍ បានសម្រេចតម្កល់ការចោទប្រកាន់របស់តុលាការខេត្តកោះកុង ដោយសំអាងថា លោក វ៉ែន វ៉ន គឺជាអ្នកដែលបានបញ្ជាឲ្យមានការកាប់ឈើ។
«ហ្នឹងហើយគេយល់ថា គាត់បញ្ជាឲ្យគេកាប់ បែបគេយល់អញ្ចឹង បានគេនៅតម្កល់ការចោទប្រកាន់ហ្នឹង»។
VOA មិនទាន់អាចទាក់ទងលោក វ៉ែន វ៉ន ដែលជាសមាជិកក្រុមប្រឹក្សាឃុំមកពីគណបក្សប្រជាជនកម្ពុជា ក្នុងឃុំ ជំនាប់ ស្រុកថ្មបាំង ខេត្តកោះកុង បានទេ នាថ្ងៃពុធនេះ។
លោក វ៉ែន វ៉ន រងការប្ដឹងផ្ដល់តាមផ្លូវច្បាប់ពីអាជ្ញាធរស្រុកថ្មបាំង និងមន្ត្រីរដ្ឋបាលព្រៃឈើមួយចំនួនក្នុងខេត្តកោះកុង ក្រោយពីលោកមានភាពសកម្មក្នុងការការពារផលប្រយោជន៍សហគមន៍ជនជាតិ ដើមភាគតិចជង និងចូលរួមការពារបរិស្ថានតំបន់អារ៉ែង ជាមួយស្ថាបនិក និងជានាយកអង្គការ«មាតាធម្មជាតិ» លោក Alejandro Gonzalez-Davdison ដែលត្រូវបានអាជ្ញាធរកម្ពុជាបណ្ដេញចេញពីប្រទេសកម្ពុជាកាលពីខែកុម្ភៈឆ្នាំ២០១៥ ក្រោមហេតុផលថា លោកស្នាក់នៅក្នុងប្រទេសហួសទិដ្ឋាការកំណត់។
នេះបើយោងតាមការបញ្ជាក់ពីលោក អ៊ិន គង់ជិត អ្នកសម្របសម្រួលសិទ្ធិមនុស្សនៃអង្គការការពារសិទ្ធិមនុស្សលីកាដូប្រចាំខេត្តកោះកុង។
លោក អ៊ិន គង់ជិត ប្រាប់ VOA បន្ថែមថា សាលាឧទ្ធរណ៍ មិនបានផ្ដល់យុត្តិធម៌ដល់លោក វ៉ែន វ៉ន តាមការតម្កល់សាលក្រមកាត់ទោសដែលធ្វើឡើងដោយតុលាការខេត្តកោះកុងនោះឡើយ។
«យើងយល់ថា វាផ្ដល់ភាពអយុត្តិធម៌ ដល់ជនរងគ្រោះ លោកវ៉ែន វ៉ន ដែលជាតំណាងសហគមន៍ជនជាតិដើមភាគតិចជង នៅក្នុងតំបន់អារ៉ែងដែលគាត់ មិនមានកំហុស ហើយគាត់ធ្វើការងារដើម្បីការពារផលប្រយោជន៍សហគមន៍របស់គាត់សោះ ហើយបែរជាមាន ទោសទណ្ឌទៅវិញ»។
មេធាវីរបស់លោក វ៉ែន វ៉ន ថ្លែងថា លោកនឹងពិភាក្សាជាមួយកូនក្តីលោកថា នឹងឡើងទៅសាលាកំពូលទៀត ឬយ៉ាងណា ដើម្បីប្ដឹងច្រានចោលការចោទប្រកាន់របស់តុលាការខេត្តកោះកុង៕
