ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សមាជិក​សភា​​អាស៊ាន​ស្នើ​ឱ្យ​ដោះលែង​សមាជិក​បក្ស​ប្រឆាំង​ ​ដែល​ត្រូវ​ឃុំ​ឃាំង​រឿង​ពន្ធ​អង្ករ​ដោយ​សហភាព​អឺរ៉ុប


រូបឯកសារ៖ លោក Charles Santiago ​ប្រធាន​​ក្រុម​សមាជិក​សភា​អាស៊ានដើម្បី​សិទ្ធិមនុស្ស។ (រូបថត​ដក​ស្រង់​ចេញ​ពី​ហេ្វសប៊ុក Charles Santiago)

អាជ្ញាធរ​កម្ពុជា​បាន​បង្កើន​ការ​បង្រ្កាប​លើ​ការ​ពិភាក្សា​នានា​ពាក់​ព័ន្ធ​នឹង​ប្រព័ន្ធ​អនុ​គ្រោះ​ពន្ធ​របស់​សហភាព​អឺរ៉ុប។ ​សមាជិក​គណបក្ស​ប្រឆាំង​មួយ​រូប​ត្រូវ​បាន​ចាប់​ខ្លួន​ភ្លាមៗ​ បន្ទាប់ពី​​លោក​បាន​បង្ហោះ​សារ​រិះគន់​លើ​គណនី​ហ្វេសប៊ុក។​ ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​បាន​ស្នើ​ឲ្យ​អាជ្ញាធរ​ខ្មែរ​ដោះ​លែង​សមាជិក​បក្ស​ប្រឆាំង​នេះ​ជា​បន្ទាន់​ ព្រោះ​អត្ថាធិប្បាយ​នោះ​មិន​បាន​បង្ក​ចលាចល​ដល់​សង្គម​កម្ពុជា​នោះ​ទេ។

ក្រុម​តំណាង​រាស្ត្រ​ដែល​គាំទ្រ​លទ្ធិប្រជា​ធិបតេយ្យ​ ហើយ​ប្រឆាំង​នឹង​ការ​រំលោភ​សិទ្ធិ​មនុស្ស​ក្នុង​សមាគម​ប្រជា​ជាតិ​អាស៊ី​អាគ្នេយ៍​ហៅ​កាត់​ថា ASEAN បាន​អំពាវនាវ​ឲ្យអាជ្ញាធរ​កម្ពុជាទម្លាក់​ចោលការ​ចោទប្រកាន់​ទាំង​ឡាយ​ប្រឆាំង​នឹង​សកម្មជន​គណ​បក្ស​ប្រឆាំង​មួយ​រូប​ ​ដែល​ត្រូវ​បាន​តុលាការ​កម្ពុជា​សម្រេច​ឃុំ​ខ្លួន​ក្រោម​«បទ​ញុះញង់​ និង​ជេរ​ប្រមាថ​ជា​សាធារណៈ និង​ពិន័យ​ជា​ប្រាក់​ចំ​នួន​ជាង​៣០០០​ដុល្លារ​អាមេរិក។​ ​នេះ​បើ​យោង​តាម​សេចក្តី​ប្រ​កាស​របស់​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ (APHR)​ ​ដែល​ VOA ​ទទួល​បាននៅ​ថ្ងៃ​ចន្ទ។​

សេចក្តី​ប្រកាស​របស់​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ចុះ​នៅថ្ងៃ​ទី​២២​ ខែ​មករា ឆ្នាំ​២០១៩​នេះ បញ្ជាក់​ឲ្យ​ដឹង​ថា​ លោក ​គង់ ម៉ាស់​ សមាជិក​គណបក្ស​សង្គ្រោះ​ជាតិ​ ដែល​ត្រូវ​បាន​ហាម​ឃាត់​មិន​ឲ្យ​ធ្វើនយោបាយ​នោះ​ ត្រូវ​បាន​ចាប់​ខ្លួន​កាលពី​សប្តាហ៍​មុន​ ក្នុង​ទីក្រុង​ភ្នំពេញ។​ ​ ការ​ចាប់​ខ្លួន​សមាជិកគណបក្ស​ប្រឆាំង​រូប​នេះធ្វើ​ឡើង​ បន្ទាប់​ពីលោក​បានបង្ហោះ​សារ​មួយ​នៅ​លើ​បណ្តាញ​សង្គម​ហ្វេសប៊ុកនិយាយ​អំពី​ការ​យក​ពន្ធ​ដោយ​សហភាព​អឺរ៉ុប​លើ​អង្ករ​កម្ពុជា។​

លោក​ Charles Santiago​ ប្រធាន​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ និង​ជា​តំណាង​រាស្ត្រ​មួយរូប​របស់​សភា​ប្រទេស​ម៉ាឡេស៊ី​ ត្រូវ​បានស្រង់​សម្តី​ក្នុង​ន័យ​ដើម​ថា៖​

«ការ​ឃុំខ្លួនលោក​ គង់​ ម៉ាស់ គឺ​ជា​សកម្មភាព​មួយ​ផ្សេង​ទៀត​នៃ​ការ​គាប​សង្កត់​ខាង​នយោបាយ​ដោយ​រដ្ឋាភិបាល​កម្ពុជា។ វា​គួរ​ឲ្យ​តក់​ស្លុត​ណាស់នៅ​ពេល​គិត​ដល់មនុស្ស​ម្នាក់​ដែល​អាច​ប្រឈម​មុខ​ការ​ជាប់​ពន្ធនាគារ​ជា​ច្រើន​ឆ្នាំ​ចំពោះ​រឿង​ដែល​គ្មាន​បាន​ការ​សោះ តែ​ជា​ការ​បង្ហោះ​មួយ​លើ​បណ្តាញ​សង្គម​ហ្វេសប៊ុក​ដែល​មិន​បង្ក​បញ្ហា​អ្វី​សោះ​នោះ»។​

លោក Charles Santiago​ ​បាន​បន្ថែម​ទៀត​ថា​ លោក​គង់ ម៉ាស់​ត្រូវតែ​ទទួល​បាន​សេរីភាព​មក​វិញជា​បន្ទាន់​ ​ហើយ​រាល់​ការ​ចោទ​ប្រកាន់​ប្រឆាំង​នឹង​លោក​ត្រូវ​ទម្លាក់​ចោល។​

ទំព័រ​ហ្វេស​ប៊ុក​ ដែល​គេជឿ​ថាជា​គណនី​របស់​លោក​គង់ ម៉ាស់​ ​សរសេរ​ថា​ ​ទឹក​ទីមួយ!​សហ​ភាព​អ៊ឺរ៉ុប​បាន​សម្រេច​ជំហ៊ាន​ដំបូង​ដាក់​ទណ្ឌកម្ម​ដោយ​ការ​យក​ពន្ធ​ជិត​២០០​ដុល្លារ​សម្រាប់​ការ​នាំអង្ករ​កម្ពុជា​មួយ​តោន​ចូល​ទៅ​ផ្សារ​អឺរ៉ុប។​

លោក​គង់​ ម៉ាស់​ អតីត​មន្ត្រី​គណបក្ស​ប្រឆាំង​នៅ​ខេត្ត​ស្វាយ​រៀង ​ត្រូវ​អាជ្ញាធរ​ចាប់​ខ្លួន​កាល​ពី​ថ្ងៃ​ពុធ​ ​ដោយ​ចោទ​ថា​ ព្យាយាម​ផ្តួល​រំលំ​រដ្ឋា​ភិបាល។

អាជ្ញាធរ​កម្ពុជា​បាន​ព្យាយាម​បង្កើន​ការ​ហាម​ឃាត់​មិន​ឲ្យ​មាន​ការ​ពិភាក្សា​អំពី​គោល​នយោបាយ​ពាណិជ្ជ​កម្ម​របស់​សហភាព​អឺរ៉ុប តាំងពី​ខែ​តុលា​ឆ្នាំ​មុន​ ​នៅ​ពេល​សហភាព​អឺរ៉ុប​បាន​ប្រកាស​ថា​ ខ្លួន​នឹង​ចាប់​ផ្តើម​ដំណើរ​ការ​ដក​ប្រព័ន្ធ​អនុគ្រោះ​ពាណិជ្ជ​កម្ម​ឈ្មោះ«អនុគ្រោះ​ពន្ធ​លើ​គ្រប់មុខ​ទំនិញ​ទាំង​អស់​លើក​លែង​តែ​សព្វាវុធ»​ ឬ​ EBA​ ដោយ​សំដៅ​ទៅ​លើ​កំណត់​ត្រា​មិន​ល្អ​នៃការ​គោរព​សិទ្ធិ​មនុស្ស​នៅ​កម្ពុជា។​ ​នេះ​បើ​យោង​តាម​សេចក្តី​ប្រកាស​របស់​ក្រុម​សមាជិក​សភាអាស៊ាន​ដើម្បី​សិទ្ធិ​មនុស្ស។​

ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​បាន​បញ្ជាក់​ឲ្យ​ដឹង​ទៀត​ថា ​កាលពី​ថ្ងៃ​ទី​១៧​ខែ​មករា​កន្លង​ទៅ​ គឺ​មួយ​ថ្ងៃ​ក្រោយ​ការ​ចាប់​ខ្លួន​លោក​គង់ ម៉ាស់​នោះ​ ​រដ្ឋាភិបាល​កម្ពុជា​បាន​ព្រមាន​សាធារណ​ជន​មិន​ឲ្យ​ចែក​ចាយ​ព័ត៌មាន​«ក្លែងក្លាយ»ទាក់ទង​នឹង​កិច្ចព្រម​ព្រៀង​ពាណិជ្ជ​កម្ម EBA​ ​នោះ​ទេ។​

លោក​ Charles Santiago​ ​ប្រធាន​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ ត្រូវ​បាន​ស្រង់​សម្តី​ក្នុង​ន័យ​ដើម​ថា៖​

«ការ​ចាប់​ខ្លួន​នេះ​បាន​បង្ហាញ​យ៉ាង​ច្បាស់​ថា ស្ថានភាព​សិទ្ធិ​មនុស្ស​នៅ​កម្ពុជា​នៅ​មាន​បញ្ហា​ធ្ងន់​ធ្ងរ​នៅឡើយ​ ហើយ​ដោយ​ហេតុនោះ​ ​ពិភព​លោក​មិន​ត្រូវ​បាន​ធ្វើ​ឲ្យចាញ់​ការ​បោក​បញ្ឆោត​ ដោយ​សម្បទាន​ណា​មួយ ដែល​ផ្តល់​ដោយ​លោកហ៊ុន សែន ចាប់​តាំង​ពី​ការ​បោះឆ្នោត​មក​នោះ​ទេ»។​

លោក​បាន​បន្ថែម​ថា៖​

«អាជ្ញាធរ​កម្ពុជា​នឹង​ធ្វើកិច្ចការ​ឲ្យ​បាន​ប្រសើរ​ជាង​នេះ​ ដើម្បី​ឆ្លើយ​តប​ទៅ​នឹង​ការ​ព្រួយ​បារម្ភ​យ៉ាង​ធ្ងន់​ធ្ងរ​នៃ​ការ​រំលោភ​សិទ្ធិ​មនុស្ស​ ដែល​បាន​លើក​ឡើង​សហភាព​អឺរ៉ុប​ពីដើមទីមក​ ជាជាង​ព្យាយាម​បំបិទ​មិន​ឲ្យមាន​ការពិភាក្សា​អំពី​បញ្ហា EBA​នេះ»។​

VOA ​មិន​ទាន់​អាច​ទាក់​ទង​លោក​ខៀវ សុភ័គ​ ​អ្នក​នាំពាក្យ​ក្រសួង​មហាផ្ទៃ​ បាន​ទេ​នៅថ្ងៃ​អង្គារ​នេះ។​

យ៉ាងណាក្តី​ លោក​លី សុផាណា​ អ្នក​នាំពាក្យ​សាលាដំបូង​រាជធានី​ភ្នំពេញ​ ​បាន​បញ្ជាក់​ប្រាប់​ VOA ​ឲ្យ​ដឹង​នៅ​រសៀល​ថ្ងៃ​អង្គារនេះ​ថា​ គ្មាន​ស្ថាប័ន​ណា​មួយអាច​ជ្រៀតជ្រែក​សេចក្តី​សម្រេច​ដោយ​ឯករាជ្យ​របស់​តុលាការ​បាន​ទេ។​

លោក​បាន​ប្រាប់​ ​VOA​ ​តាម​សារទូរសព្ទ​ក្នុង​ន័យ​ដើមថា៖​

«តុលាការ​ពិនិត្យ​ និង​ចាត់​ការ​រឿង​ក្តី​ដោយ​ឯករាជ្យ​ ហើយ​សម្រេច​សេចក្តី​ដោយ​ឆន្ទានុសិទ្ធិ​ ដោយ​មិន​ចំណុះ​ភាគីរឿង​ក្តី​នោះ​ឡើយ​ ហើយ​ក៏​មិន​សម្រេច​តាម​ការ​អន្តរាគមន៍​ពី​បុគ្គល​ណា​មួយ​ឡើយ»។​

លោក​បាន​បន្ថែម​ថា៖​

«សូម​លោក​ជ្រាប​ ​និង​យល់​ឲ្យ​បាន​ច្បាស់​អំពី​ឯករាជ្យ​ភាព​ និង​អំណាច​សម្រេច​សេចក្តី​របស់​តុលាការ​ចៀសវាង​នូវ​សំណួរ​ដែល​អាច​ធ្វើ​ឲ្យ​ប៉ះពាល់​ដល់​សេចក្តី​សម្រេច​របស់​តុលាការ»។​

លោក​អំ សំអាត​ ​ប្រធាន​ការិយាល័យ​ស៊ើប​អង្កេត​របស់​អង្គការ​សិទ្ធិ​មនុស្ស​លីកាដូ​ ​(Licadho)​ មាន​ប្រសាសន៍​ថា​ ​តុលាការ​គួរ​ពិចារណាបែង​ចែក​រវាងបញ្ហា​សេរីភាព​នៃ​ការ​បញ្ចេញ​មតិ​ និង​ការ​ប្រព្រឹត្ត​បទ​ល្មើស​ ​មុន​ពេល​តុលាការ​សម្រេច​ឃុំ​ខ្លួន​បុគ្គល​ណាមួយ​ ​ដោយ​គ្រាន់​តែ​ការ​បង្ហោះ​សារ​បញ្ចេញ​យោបល់​លើ​បណ្តាញ​សង្គម​ហ្វេសប៊ុក។​

«ករណីនេះ​ តុលាការ​លោក​គួរតែ​ពិនិត្យ​ ពិចារណា​ឲ្យបាន​ច្បាស់​លាស់ទាក់​ទង​នឹង​សេរីភាព​ក្នុង​ការ​បញ្ចេញ​មតិ​ និង​បទ​ល្មើស​ដើម្បី​ធ្វើ​យ៉ាង​ណា​ឲ្យ​មានការ​ស្របទៅ​តាម​ការ​ធានា​នូវ​រដ្ឋ​ធម្មនុញ្ញនៅ​ប្រទេស​យើង​ ដោយ​បទដ្ឋាន​អន្តរជាតិ​ ជាពិសេស​កតិកា​សញ្ញា​ស្តីពី​ពលរដ្ឋ​ និង​សិទ្ធិ​នយោបាយ​ ហើយ​បើ​មិន​អ៊ីចឹង​ទេ​ នៅតែ​ទទួល​នូវ​ការ​រិះគន់​ ហើយ​ប​ញ្ហា​ទាំង​អស់​នេះ​ គេ​នឹង​ ​សហគមន៍​អន្តរជាតិ​ គេអាច​នឹង​លើក​បន្ត​ទៅ​ទៀតអំពី​ការឹតត្បិត​សិទ្ធិ​សេរីភាពក្នុង​ការ​បញ្ចេញ​មតិ​ នៅ​ក្នុង​ប្រទេស​កម្ពុជា​ ដែល​ប្រទេស​យើង​ ជា​ប្រទេស​ប្រកាន់​លទ្ធិ​ប្រជា​ធិបតេយ្យ​នោះ»។​

សេចក្តី​ប្រកាសរបស់​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​បាន​បញ្ជាក់​ឲ្យ​ដឹង​ទៀត​ថា​ កាលពី​ថ្ងៃសៅរ៍ទី​១៩ខែ​មករាឆ្នាំ​២០១៩​ សាលា​ដំបូង​រាជធានី​ភ្នំពេញបាន​បញ្ជូន​លោក​គង់ ម៉ាស់ទៅ​ឃុំ​ ​មុន​ការកាត់​ទោស។​ ប៉ូលិស​បាន​ចោទ​គាត់​ពី​បទ​ជេរប្រមាថ​ជា​សាធារណៈ​ តាម​មាត្រា​៣០៧​នៃ​ក្រម​ព្រហ្មទណ្ឌ​ ​និង​បទញុះញង់​ឲ្យ​ប្រព្រឹត្ត​បទ​ឧក្រិដ្ឋ​ តាម​មាត្រា​៤៩៥ ​ជា​បទ​ចោទ​ទូទៅ​ដែល​ជាញឹកញាប់​ត្រូវ​បាន​ប្រើ​ដើម្បី​បង្ក្រាប​សកម្ម​ជន​ទាំង​ឡាយ​ណា​ដែល​ប្រឆាំង​នឹង​រដ្ឋាភិបាល​នៅ​ប្រទេស​កម្ពុជា។ ​ លោក​អាច​ជាប់​ពន្ធនាគារ​ដល់​ទៅ​ពីរ​ឆ្នាំ។​

ការ​ចាប់​ខ្លួន​លោកគង់​ ម៉ាស់​ត្រូវបាន​ធ្វើ​ឡើង​តែ​ប៉ុន្មាន​ថ្ងៃ​ប៉ុណ្ណោះ​ បន្ទាប់​ពីលោក​នាយក​រដ្ឋ​មន្ត្រី​ហ៊ុន សែន​បាន​ប្រកាស​សម្លាប់គណបក្ស​ប្រឆាំង​ ប្រសិន​បើ​សហភាព​អឺរ៉ុប​ដាក់​ទណ្ឌ​កម្ម​សេដ្ឋកិច្ច​លើ​កម្ពុជា​ ដោយ​ការ​កាត់​ផ្តាច់​ប្រព័ន្ធ​អនុគ្រោះ​ពន្ធ​មក​លើ​ការ​នាំ​ចូលទំនិញ​កម្ពុជា​ទៅ​ក្នុង​ទី​ផ្សារ​សហគមន៍​អឺរ៉ុប។​

ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​បាន​បញ្ជាក់​ឲ្យ​ដឹង​ទៀត​ថា ស្ថានភាព​សិទ្ធិ​មនុស្ស​នៅ​ប្រទេស​កម្ពុជាកាន់​តែ​អាក្រក់​ទៅ​ ក្នុង​រយៈ​ពេល​ពីរឆ្នាំ​ចុងក្រោយ​នេះ។ ​គណបក្ស​សង្គ្រោះ​ជាតិ​ត្រូវ​បានហាម​ឃាត់​តាម​តែ​អំពើចិត្ត​ដោយ​សេចក្តី​សម្រេច​របស់តុលាការ​កំពូល​កាលពី​ខែ​វិច្ឆិកាឆ្នាំ​២០១៧ ​ដោយ​បើក​ឲ្យ​លោក​នាយករដ្ឋ​មន្ត្រី​ហ៊ុនសែន​ និង​គណបក្ស​ប្រជាជន​កម្ពុជា​របស់​លោក​ឈ្នះ​ភ្លូកទឹក​ភ្លូកដី​ក្នុង​ការ​បោះឆ្នោត​កាលពី​ខែ​កក្កដាឆ្នាំ​២០១៨។ ​ការ​បោះឆ្នោត​នោះត្រូវ​បាន​សហគមន៍​អន្តរជាតិចាត់​ទុក​ជាទូទៅថា​ ​ជា​ការ​បោះ​ឆ្នោត​«ក្លែងក្លាយ»៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG