ប្រធានាធិបតី បារ៉ាក អូបាម៉ា បានប្រកាសអំពីការផ្លាស់ប្ដូធំធេងនៅក្នុងក្រសួងសន្ដិសុខជាតិកាលពីថ្ងៃព្រហស្បតិ៍មុន (ទី២៨ខែមេសា)។ ក្រុមអ្នកវិភាគនិយាយថា វិធានការនោះធ្វើឡើងនៅក្នុងអំឡុងពេលសំខាន់បំផុតនៅក្នុងសង្រ្គាមរបស់ស.រ.អ.ក្នុងប្រទេសអាហ្គានីស្ថាន។
ប្រធានាធិបតី បារ៉ាក អូបាម៉ា មានប្រសាសន៍ថា លោកបានតែងតាំងនាយកក្រសួងស៊ើបការសម្ងាត់ CIA លោក Leon Panetta ឲ្យឡើងកាន់ដំណែងជារដ្ឋមន្ដ្រីក្រសួងការពារប្រទេស ហើយ ឧត្ដមសេនីយ៍កងកម្លំាងជើងគោក David Petraeus ចូលកាន់ដំណែងជំនួសលោក Panetta ជានាយករបស់ក្រសួងស៊ើបការសម្ងាត់ CIA។
លោក Anthony Cordesman អ្នកវិភាគអំពីយោធា និង ការសម្ងាត់ នៅឯមជ្ឈមណ្ឌល សម្រាប់ការសិក្សាយុទ្ធសាស្រ្ដ និង អន្ដរជាតិ និយាយថា ការផ្លាស់ប្ដូរបុគ្គលិក ធ្វើឡើងក្នុងអំឡុងពេលស្មុគ្រស្មាញ ជាពិសេសនៅក្នុងរដ្ឋធានីវ៉ាស៊ីនតោន។
«នៅចំពេលនៃការប្រកាន់បក្ខពួកដ៏ជូរចត់ខ្លាំង ការដេញដោលគ្នាអំពីសង្គ្រាមនៅក្នុងប្រទេសអាហ្គានីស្ថានមានកម្រិតកាន់តែខ្ពស់ ដែលភាគីទាំងសង្ខាងឆ្លៀតឧកាសយកចំណេញនយោបាយនៅគ្រប់ស្ថានភាពនៃថវិកាសហព័ន្ធហើយនឹងមានបន្ដយ៉ាងហោចរហូតដល់ឆ្នាំ២០១២ »។
លោក Panettaដែលនឹងឡើងកាន់ដំណែងជារដ្ឋមន្ដ្រីក្រសួងការពារប្រទេសជំនួសលោក Robert Gates ដែលគេរំពឹងថានឹងចូលនិវត្ដនៅខែមិថុនា បានត្រូវគេសរសើរអំពីរបៀបចាត់ការរបស់លោកនៅក្នុងក្រសួង CIA។
លោក Rick Nelson អ្នកបើកបរឧទ្ធម្ភាគចក្រចូលនិវត្ដន៍ របស់កងកម្លាំងជើងទឹកសរអ ដែលមានការពិសោធន៍ខាងកិច្ចប្រតិបត្ដិការយោធាជាង ២០ ឆ្នាំ រាប់ទាំងទទួលកិច្ចការនៅក្នុងក្រុមប្រិក្សាសន្ដិសុខជាតិ និង មជ្ឈមណ្ឌលប្រឆាំងភេរវកម្ម។
លោកថ្លែងថា លោក Panetta ជាជំរើសល្អក្នុងការដឹកនាំក្រសួងការពារប្រទេស ដែលកំពុងប្រឈមមុខនឹងការកាត់បន្ថយថវិកា និង ផែនការដកទ័ពចេញពីប្រទេសអ៊ីរ៉ាក់ និង អាហ្គានីស្ថាន។
«ពេលនោះលោកបានចូលទៅធ្វើការក្នុងក្រសួង CIA ចំពេលលំបាក ជាអ្នកមកពីខាងក្រៅ ហើយទទួលជោគជ័យនៅទីនោះក្នុងការដឹកនាំក្រសួង CIA ឲ្យដើរលើមាគ៌ាប្រសើរឡើងវិញ។ ខ្ញុំយល់ថា កិច្ចការរបស់លោកបង្ហាញអំពីសមត្ថភាពជាមេដឹកនាំ ជាអ្នកចាត់ចែងការល្អ ជាពិសេសជាជនម្នាក់ដែលអាចចាត់ចែងការនៅក្នុងការិយាធិបតេយ្យនៃ រដ្ឋធានី វ៉ាស៊ីនតោន ឌីស៊ី។ ហេតុដូច្នេះហើយ ក្នុងការទទួលតំណែងនៅក្នុងមន្ទីរបញ្ចគោណ លោកអាចបង្ហាញទេពកោសល្យរបស់លោកច្រើនតទៅទៀត»។
ជាមួយនឹងការតែងតាំង ទំាងនៅក្រសួង CIA និង ក្រសួងការពារប្រទេស មន្ដ្រីថ្នាក់ខ្ពស់នៃរដ្ឋបាលអូបាម៉ា និយាយថាប្រធានាធិបតី ចង់ឃើញមានការបន្ដនយោបាយបច្ចុប្បន្ន។
គេមិនរំពឹងថាឧត្ដមសេនីយ៍ Petraeusនឹងចាកចេញពីតំណែងរបស់លោកជាមេបញ្ជារបស់កងកម្លាំង អូតង់ និង ជាមេបញ្ជាការរបស់កងកម្លាំង សរអ នៅក្នុងប្រទេស អាហ្គានីស្ថានទេ រហូតដល់ពេលលោកបានសម្រេចវគ្គទីមួយនៃផែនការដកកងទ័ពសន្សឹមៗរបស់ប្រធានាធិបតីអូបាម៉ា ដែលគេរំពឹងនឹងចាប់ផ្ដើមនៅខែកក្កដា។
គេរំពឹងថា ឧត្ដមសេនីយ៍ Petraeus នឹងចូលនិវត្ដន៍ពីយោធានៅពេលលោកក្លាយទៅជានាយករបស់ក្រសួង CIA។ ក្នុងតួនាទីជានាយក CIA លោក Panetta បានត្រួតពិនិត្យ មកលើការបង្កើន យុទ្ធនាការទម្លាក់គ្រាប់បែកមកលើប្រទេស បាគីស្ថាន។ មន្ដ្រីអាមេរិកាំង មិនបានទទួលស្គាល់ជាសាធារណៈ អំពីការប្រើប្រាស់យន្ដហោះគ្មានអ្នកបើក ហៅ Dronesក្នុងការទម្លាក់គ្រាប់បែកមកលើប្រទេស បាគីស្ថានតែនៅក្រៅផ្លូវការ មន្ដ្រីទាំងនោះបាននិយាយបញ្ជាក់អំពីវត្ដមានរបស់យន្ដហោះនោះប្រាប់បណ្ដាញព័ត៌មានផ្សេងៗ។
ឧត្ដមសេនីយ៍ Petraeus បានប្រើកងប្រតិបត្ដិការពិសេសក្នុងការដឹកនាំបេសកម្មសម្ងាត់នៅក្នុងប្រទេស អាហ្គានីស្ថាន។
លោកប្រធានាធិបតីបានតែងតាំង លោក Ryan Crocker អតីតឯកអគ្គរដ្ឋទូតសរអ ប្រចាំប្រទេស បាគីស្ថាន និង អ៊ីរ៉ាក់ ដើម្បីឡើងជំនួសលោក Karl Eikenberryឲ្យកាន់ដំណែងជាឯកអគ្គរដ្ឋទូត សរអ ប្រចាំប្រទេសអាហ្គានីស្ថាន។ ឧត្ដមសេនីយ៍ឯក John Allen មេបញ្ជាការរងនៃបញ្ជាមជ្ឈឹមនឹងឡើងជំនួសលោក Petraeus ជាមេបញ្ជាការរបស់កងម្លាំងស.រ.អ.និងអន្ដរជាតិ ។
ការតែងតាំងរបស់ប្រធានាធិបតី អូបាម៉ាទំាងអស់នោះ តម្រូវឲ្យមានការយល់ព្រមពីព្រឹទ្ធសភាសរអ៕
ប្រែសម្រួលដោយ អ៊ូ ធួក
