ដោយ Ron Corben
ប្រទេសថៃបានប្រកាសថា ខ្លួននឹងធ្វើការចរចាសន្តិភាពជាមួយក្រុមសំខាន់មួយនៅប្រទេសម៉ាឡេស៊ី ដែលមានជាប់ពាក់ព័ន្ធជាមួយក្រុមបះបោរ ដែលដឹកនាំដោយក្រុមអ៊ីស្លាមនៅភាគខាងត្បូងប្រទេសថៃ ដែលបានសម្លាប់មនុស្សជាង៤ពាន់នាក់ ចាប់តាំងពីការបះបោរនេះបានផ្ទុះឡើងជិតមួយទសវត្សរ៍កន្លងទៅ។ ពីទីក្រុងបាងកក Ron Corben រាយការណ៍ថា គំនិតផ្តួចផ្តើមចរចាសន្តិភាព ខណៈពេលទទួលបានការស្វាគមន៍ បានលើកឡើងនូវការព្រួយបារម្ភអំពីថាតើជំហាននេះនឹងមានភាពគ្រប់គ្រាន់ ដើម្បីបញ្ចប់ការបង្ហូរឈាមនិងបញ្ចប់ការអំពាវនាវរបស់ក្រុមបះបោរ ដែលសុំឲ្យមានស្វ័យភាពធំធេងជាងមុន នៅតាមបណ្តាខេត្តភាគខាងត្បូង ដែលសម្បូរទៅដោយប្រជាពលរដ្ឋកាន់សាសនាអ៊ីស្លាមភាគច្រើន។
ការចរចា ដែលគ្រោងនឹងចាប់ផ្តើមនៅថ្ងៃទី២៨ខែមីនានេះ ត្រូវបានយល់ព្រមធ្វើឡើងនៅក្នុងទីក្រុង កូឡាឡាំពួរ (Kuala Lumpur) រវាងអគ្គលេខាធិការនៃក្រុមប្រឹក្សាសន្តិសុខជាតិថៃ (Thai National Security Council) លោក បារ៉ាដុន ប៉ាតាណាថាប៊ុត (Paradon Pattanathabutr) និងលោក ហាសាន តាអ៊ីប (Hassan Taib) ដែលជាតំណាងជាន់ខ្ពស់របស់រណសិរ្សបដិវត្តន៍ជាតិម៉ាឡេស៊ី ដែលត្រូវបានស្គាល់ជាអក្សរកាត់ជាភាសាថៃថា BRN។
រណសិរ្ស BRN គឺជាក្រុមមួយក្នុងចំណោមក្រុមជាច្រើនទៀត ដែលធ្វើប្រតិបត្តិការនៅភាគខាងត្បូងនៃប្រទេសថៃ ដែលបានព្យាយាមបង្កើតរដ្ឋស្វ័យភាពមួយ។
លោកអគ្គលេខា ប៉ារ៉ាដុន បានប្រាប់គណៈកម្មាធិការសភាថៃថា ក្រុមបះបោរដទៃទៀតនឹងត្រូវបានអញ្ជើញឲ្យចូលរួមក្នុងការចរចានោះដែរ។
លោក អង់ខាណា នីឡាប៉ៃជីត (Angkhana Neelapaijit) ដែលជាប្រធានអង្គការក្រៅរដ្ឋាភិបាលមួយ ដែលមានឈ្មោះថា ក្រុមការងារស្តីពីយុត្តិធម៌សម្រាប់សន្តិភាព នៅភាគខាងត្បូង ថ្លែងថា រដ្ឋាភិបាលថៃត្រូវតែកសាងការជឿទុកចិត្តធំធេងជាងមុននៅតាមបណ្តាសហគមន៍មូលដ្ឋាន ដើម្បីឲ្យការចរចាទទួលបានជោគជ័យ។
«ខ្ញុំគិតថា វាជាការឆាប់រហ័សពេកសម្រាប់ការចរចាណាមួយ ពីព្រោះខ្ញុំគិតថា យើងមានក្រុមបះបោរជាច្រើនក្រុមដែលគិតខុសៗគ្នា។ យើងត្រូវតែប្រុងប្រយ័ត្ន និងត្រូវតែចរចាជាមួយក្រុមអ្នកពាក់ព័ន្ធទាំងអស់នោះ។
ក្រុមមន្ត្រីថៃនិងក្រុមអ្នកវិភាគផ្នែកសិទ្ធិមនុស្សថ្លែងថា ការចរចានៅក្នុងប្រទេសម៉ាឡេស៊ី ត្រូវបានធ្វើឡើង បន្ទាប់ពីការបញ្ចុះបញ្ចូលពីសំណាក់អតីតមេដឹកនាំមួយរូប លោក ថាក់ស៊ីន ស៊ីណាវ៉ាត្រា (Thaksin Shinawatra) ដែលបានភៀសខ្លួនចេញពីប្រទេសថៃកាលពីឆ្នាំ២០០៨ ដើម្បីគេចពីការជាប់ពន្ធនាគាររយៈពេលពីរឆ្នាំពីបទពុករលួយ ប៉ុន្តែបន្តនៅជាអ្នកធ្វើសេចក្តីសម្រេចចិត្តដ៏សំខាន់មួយរូប ពីខាងក្រោយរដ្ឋាភិបាល។
លោក ស៊ូណៃ ប៉ាស៊ុក (Sunai Pasuk) នៃអង្គការឃ្លាំមើលសិទ្ធិមនុស្ស(Human Rights Watch) និយាយថា លោក ថាក់ស៊ីន បានប្រើប្រាស់ទំនាក់ទំនងយ៉ាងជិតស្និទ្ធិរបស់លោក ជាមួយរដ្ឋាភិបាលម៉ាឡេស៊ី ដើម្បីជំរុញឲ្យមានការចាប់ផ្តើមការចរចានេះ។
«ការព្រមព្រៀងគ្នាដើម្បីចូលទៅក្នុងការចរចាសន្តិភាពរវាងរដ្ឋាភិបាលថៃ និងក្រុមរណសិរ្ស BRN ត្រូវបានជំរុញដោយសារមិត្តភាពដ៏ជិតស្និទ្ធរបស់លោក ថាក់ស៊ីន ជាមួយរដ្ឋាភិបាលម៉ាឡេស៊ី ជាមួយលោកនាយករដ្ឋមន្ត្រី ណាជីប រ៉ាហ្សាក់ (Najib Razak) និងទំនាក់ទំនងមិត្តភាពផ្ទាល់ខ្លួន ដែលត្រូវបានប្រមូលផ្តុំ ដើម្បីធ្វើឲ្យក្រុមប៉ូលីសពិសេសរបស់ម៉ាឡេស៊ី ដាក់សម្ពាធទៅលើថ្នាក់ដឹកនាំរបស់ក្រុមបះបោរមកពីរណសិរ្ស BRN ដើម្បីវិលមករកតុចរចា»។
លោក ស៊ូណៃ ថ្លែងថា លក្ខខណ្ឌ ដែលអំពាវនាវសុំឲ្យក្រុមបះបោរបោះបង់ចោលការតស៊ូប្រដាប់អាវុធ ដើម្បីបង្កើតរដ្ឋប៉ាតានី (Pattani) ឯករាជ្យមួយ ត្រូវបានបូកបញ្ចូល តាមការទទូចសុំរបស់ម៉ាឡេស៊ី និងលោក ថាក់ស៊ីន។
នៅក្នុងទីក្រុង បេតុង (Betong) ដែលជាទីក្រុងសំខាន់របស់ខេត្ត យ៉ាឡា (Yala) លោក ប៊ុនចុង វ៉ុង (Bunchong Wong) អ្នកគ្រប់គ្រងទូទៅរបស់សណ្ឋាគារនិយាយថា សេដ្ឋកិច្ចក្នុងតំបន់ ជាពិសេសវិស័យទេសចរណ៍ នឹងទទួលផលប្រយោជន៍ពីកិច្ចព្រមព្រៀងនេះ ដែលនាំទៅដល់ការកាត់បន្ថយអំពើហិង្សា។
«ជាជំហានដំបូង វាជារឿងដ៏ល្អ ប៉ុន្តែមេបញ្ជាការ និងអាជ្ញាធរ គួរតែចរចារជាមួយក្រុមដទៃទៀត ពីព្រោះមាន៤ក្រុម ឬ៥ក្រុម ឬ៦ក្រុមទៀត។ ប្រសិនបើប្រជាពលរដ្ឋទទួលបានសុវត្ថិភាពនិងសន្តិសុខ វាជាការល្អ។ ហើយជាការពិតណាស់ មុខជំនួញរបស់ខ្ញុំនឹងប្រសើរឡើងជាងឆ្នាំមុន»។
ក្រុមអ្នកវិភាគថ្លែងថា ភាពជោគជ័យនៅក្នុងការចរចានេះស្ថិតនៅលើការដោះស្រាយការឈឺចាប់ចម្បងៗ នៅតាមបណ្តាខេត្តតាមព្រំដែនភាគខាងត្បូង ដោយរាប់បញ្ចូលទាំងការបញ្ចប់ការរើសអើងប្រឆាំងនឹងសហគមន៍អ្នកកាន់សាសនាអ៊ីស្លាមផង៕
ប្រែសម្រួលដោយ លី សុខឃាង
