ក្រុមសកម្មប្រយុទ្ធ al-Shabab នៅប្រទេស Somali បានប្រកាសទទួលខុសត្រូវការសម្លាប់មនុស្ស៣៦នាក់នៅថ្ងៃអង្គារ៍នេះ នៅភាគឦសានប្រទេស Kenya។ ការវាយប្រហារនោះបានកើតមានឡើងនៅជិតទីក្រុង Mandera ទីដែលសាក្សីនិយាយថា ជនប្រដាប់អាវុធបានធ្វើការវាយប្រហារនៅពេលកម្មករកំពុងដេកនៅក្នុងជំរំ។
សេចក្តីថ្លែងការណ៍របស់ក្រុម al-Shabab និយាយថា ក្រុមប្រយុទ្ធរបស់ខ្លួនបានសម្លាប់អ្នកដែលក្រុមនេះហៅថា សកម្មជន Kenya ហើយថាគេដាក់ទណ្ឌកម្មប្រទេស Kenya សម្រាប់ការដែលប្រទេសនេះបញ្ជូនទ័ពទៅប្រទេស Somalia។
កងកម្លាំងរបស់ប្រទេស Kenya បានទៅប្រទេស Somalia ក្នុងឆ្នាំ២០១១ ជាផ្នែកមួយនៃកងកម្លាំងពហុជាតិអាហ្វ្រិក ដែលជួយរុញច្រានក្រុម al-Shabab ចេញពីទីក្រុងនានារបស់ប្រទេស Somalia។
ក្រុមសកម្មប្រយុទ្ធនេះបានធ្វើការវាយប្រហារនៅប្រទេស Kenyaដោយព្រមានរដ្ឋាភិបាល Kenyaថា នឹងធ្វើការវាយប្រហារច្រើនទៀត បើរដ្ឋាភិបាល Kenya មិនដកទ័ពចេញវិញទេនោះ។ កាលពីខែមុនក្រុម al-Shabab បានសម្លាប់មនុស្ស២៨នាក់ក្នុងតំបន់នេះ៕
