ភ្ជាប់​ទៅ​គេហទំព័រ​ទាក់ទង

កិច្ច​ខិត​ខំ​ប្រឹង​ប្រែង​រក​ដំណោះស្រាយ​ជម្លោះ​នៅ​ប្រទេស អាយវ៉ូរី ខូស្ត​នៅ​បន្ត


អតីត​រដ្ឋមន្រ្តី​​ការបរទេស​បារាំង​​លោក រ៉ូឡង់ ឌូម៉ាស​ (Roland Dumas) (ឆ្វេង) ចរចា​​ជាមួយ​​មេដឹកនាំ​ប្រទេស​​អាយវ៉ូរី ខូស្ត​​ លោក​​ឡូរ៉ង់ បាហ្កបូ​ (Laurent Gbagbo) នៅឯ​វិមាន​ប្រធានាធិបតី​ក្នុង​ទីក្រុង​អាចាប់ប៊ីចាន​ (Abidjan) នៅ​ថ្ងៃ​ទី៣០​ ខែធ្នូ​ ឆ្នាំ ២០១

ដាការ ប្រទេស​សេណេហ្កា៖ មេ​ដឹក​នាំ​ប្រទេស​នៃ​ទ្វីប​អាហ្វ្រ៊ិក​បន្ដ​កិច្ច​ខិត​ខំ​ប្រឹង​ប្រែង​ក្នុង​ការ ​ដោះស្រាយ​វិបត្ដិ​នយោបាយ​របស់ប្រទេស អាយវ៉ូរី ខូស្ត ​ខណៈ​ដែល​កង​កម្លាំងការ​ពារ​សន្ដិភាព​របស់អង្គការ​សហ​ប្រជា​ជាតិព្យាយាម​ស៊ើប​អង្កេត​អំពី​ការ​សង្ស័យ​ថា មាន​បទ​រំលោភ​សិទ្ឋិ​មនុស្ស​នៅ​ពេល​ក្រោយ​ពី​មាន​ជម្លោះ​ក្នុងការ​បោះ​ឆ្នោត។

នាយក​រដ្ឋមន្ដ្រី​នៃ​ប្រទេស​កេនយ៉ា លោក រ៉េឡា អូឌីងហ្កា (Raila ​Odinga) ធ្វើ​ការ​ជាមួយ​ប្រធានាធិបតី​នៃ​ប្រទេស​ បេនីន (Benin) សេរ៉ា ឡេអូន (Sierra ​Leone) ​និង​ ប្រទេស ខេប វ័ដ (Cape Verde) កាល​ពី​ថ្ងៃ​ច័ន្ន ​នៅ​ក្នុង​កិច្ច​ប្រជុំ​មួយ​ជា​មូយ​ប្រធានាធិបតី​កាន់​ដំណែង​លោក ឡរ៉ិន បាហ្កបូ (Laurent Gbagbo)។

លោក អូឌីងហ្កា ជា​អ្នក​សម្រុះ​សម្រួល​របស់​សហភាព​អាហ្វ្រ៊ិក​ នៅ​ក្នុង​វិបត្ដិ​នយោបាយ​នៃ​ប្រទេសហើយ​លោក​ចូល​រួម​ជា​មួយ​កិច្ច​ប្រឹងប្រែងរបស់​សហគមន៍​សេដ្ឋកិច្ច​នៃ​តំបន់​អាហ្វ្រ៊ិក​ខាង​លិច ដែល​ហៅ​កាត់​ថា ECOWAS ក្រោយ​ពី​មានកិច្ច ចរចា​នៅក្នុង​ទីក្រុង អាប៊ូដ្យា (Abuja) កាល​ពី​ថ្ងៃអាទិត្យ​ជា​មួយ​នឹងនាយក​បច្ចុប្បន្ន​របស់​សម្ព័ន្ឋភាព​តំបន់​ គឺ លោក ហ្គោឡាក់ ចណាថាន (Goodluck Jonathan) ដែល​ជា​ប្រធានាធិបតី​នៃ​ប្រទេស​នីហ្ស៊េរីយ៉ា។

ប្រធានាធិបតី​ ចណាថាន ថ្លែង​ថា ​សម្ព័ន្ឋភាព​ ECOWAS សម្រេចនឹងចាត់​វិធានការ​ត​ទៅ​ទៀត​នៅ​ថ្ងៃ​អង្គារ​ ក្រោយ​ពី​បាន​ស្ដាប់​សេចក្ដីរាយការណ៍​ពី​កិច្ច​ប្រជុំ​លើក​ទីពីរ ​ជាមួយ​លោក បាហ្កបូ​មក។

សម័្ពន្ធភាព Ecowas ​បាន​ពិចារណា​អំពី​ការ​ប្រើប្រាស់​កង​កម្លាំង​យោធា​ ដើម្បី​ដក​លោក​ បាហ្កបូ​ចេញ​ពីអំណាច​ដែលលោក​បាន​ទាមទារ​ ​ដំណែង​ប្រធានាធិបតី​ យោង​ទៅ​តាម​ក្រុម​ប្រឹក្សា​ធម្មនុញ្ញ​ដែល​បាន​លប់​ចោល​សន្លឹក​ឆ្នោត​ ក្លែងក្លាយ​ជិត​ទៅដ​ប់​ភាគ​រយ។ ​ អង្គការ​សហប្រជា​ជាតិ​បាន​បញ្ជាក់​លទ្ឋផល​នៃ​ការ​បោះឆ្នោត​ដោយ​បង្ហាញ​ថា អតីត​នាយក​រដ្ឋ​មន្ដ្រី លោក ​អាឡាសាន វ៉ាតារ៉ា (Alassane ​Ouattara) បាន​យក​ជ័យ​ជំនះ​ក្នុង​ការបោះ​ឆ្នោត​នោះ។

សម្ព័ន្ឋភាព​ Ecowas សហភាព​អាហ្វ្រ៊ិក ​អង្គការ​សហប្រជាជាតិ​ និង​សហគមន៍​អន្ដរជាតិ​ភាគ​ច្រើន​គាំ​ទ្រ​ការ​ទាម​ទារ​របស់​លោក វ៉ាតារ៉ា ឡើង​កាន់​ដំណែង​ជា​ប្រធានាធិបតី។

អ្នក​នាំ​ពាក្យ​របស់ អង្គការ​សហប្រជាជាតិ លោក ម៉ាទីន ណេសៀរគី (Martin ​Nesirky) ថ្លែង​ថា លោក បាន ​គី​ មូន អគ្គ​លេខា​ធិការអង្គការ​សហប្រជាជាតិ បាន​ទូរស័ព្ទ និយាយ​ជា​មួយ​លោក វ៉ាតារ៉ា ដើម្បី​បញ្ជាក់​អំពី​ការគាំទ្រ​មិន​ប្រែប្រួលរបស់​អង្គការ​សហប្រជាជាតិ និង​អំពី​ការប្ដេជ្ញា​ចិត្ដ​របស់​កង​កម្លាំង​រក្សា​សន្ដិភាពអង្គការ​សហប្រជាជាតិ នឹង​ចូល​ទៅ​ពិនិត្យ​មើល​ទី​កន្លែង​កប់​ខ្មោចរួម​មួយ​ចំនួន។

លោក វ៉ាតារ៉ា ​ថ្លែង​ថា ជន​សកម្ម​ប្រយុទ្ឋ​របស់​លោក​បាហ្កបូ ​បាន​សម្លាប់​អ្នកគាំ​ទ្រ​របស់​លោក​ ហើយ​លោក​ចង់​ឃើញ​តុលាការ​ឧក្រិដ្ឋកម្ម​អន្ដរជាតិ​បើក​ការ​ស៊ើបអង្កេត។ អង្គការ​សហ​ប្រជា​ជាតិ​ប៉ាន់​ស្មាន​ថា មនុស្ស​ជាង​១៧០​ នាក់បាន​ត្រូវ​គេ​សម្លាប់​ក្នុង​អំពើ​ឃោរឃៅ​នៅ​ពេល​ក្រោយ​ការ​បោះឆ្នោត។

លោក ចេរីមី សារឃីន (Jeremy Sarkin) គឺ​ជា​ប្រធាន​ក្រុម​ការងារ ​អង្គការ​សហប្រជាជាតិ​ ខាង​កិច្ចការ​មនុស្ស​បាត់​ខ្លួន​ដោយ​បង្ខំ។ លោក​ថ្លែង​ថា៖

«នៅ​ពេល​មាន​អស្ថេរភាព​នយោបាយ​នៅ​ក្នុង​ប្រទេស​មូយ ឧក្រិដ្ឋកម្ម​ដូច្នោះ មាន​លទ្ធភាព​ច្រើន​នឹង​កើត​មាន​ឡើង។ ពេល​ដែល​មាន​សេចក្ដី​រាយការណ៍​អំពី​ព្រឹត្ដការណ៍​ពិសេស​នោះ ​យើង​មាន​ការ​ព្រួយ​បារម្ភ ជាពិសេស​អំពី​អ្វី​នឹង​កើត​មាន​ឡើង​ទៅ​ថ្ងៃ​ក្រោយ»។

លោក​បាហ្កបូ ថ្លែង​ថា​ កង​កម្លាំង​ការ​ពារ​សន្ដិភាពរ​បស់​អង្គការ​សហ​ប្រជា​ជាតិ​ទេ ​ដែល​បើក​ការ​វាយ​ប្រហារ​មក​លើ​ជន​ស៊ីវិល អាវ៉ូរី ខូស្ត ហើយ​លោ​ក​ចង់​ឃើញ​ទាហាន​ទាំង​នោះចាក​ចេញ​ពី​ប្រទេស។ ​នៅក្នុងសេច​ក្ដី​សម្ភាសន៍​តាម​ទូរទស្សន៍​រដ្ឋ​ លោក​បាហ្កបូ ថ្លែង​ថា ទាហាន​អង្គការ​សហប្រជាជាតិ ​បាន​បាញ់​មក​លើ​ជន​ស៊ីវិល កាល​ពី​ថ្ងៃ​ពុធ ​ក្នុង​ទី​ក្រុង​អាប៊ីដ្យាន (Abidjan) បណ្ដាល​ឲ្យ​មនុស្ស​ពីរ​នាក់​រង​របួស។ ​លោក​ថ្លែង​ទៀត​ថា​ តួនាទី​របស់​កង​កម្លាំង​ការពារ​សន្ដិភាព​មិន​មែន​ដើម្បី​បាញ់​សម្លាប់​ឬប្រយុទ្ឋ​ក្នុង​សង្រ្គាម​ទេ។ កិច្ចការរ​បស់​កង​កម្លាំង​នោះ​ គឺធានា​សុវត្ថិភាព​ប្រជា​ពលរដ្ឋ តែ ​លោក បាហ្កបូ និយាយ​ថា​ គេ​មិន​បាន​ធ្វើ​ដូច្នោះទេ ហើយគួរ​តែ​ចាក​ចេញ​។

កង​កម្លាំងរក្សា​សន្ដិភាព​ត្រូវ​តែ​ចាក​ចេញ​ពីប្រទេសតាម​សេច​ក្ដី​ស្នើ​របស់​ប្រមុខ​រដ្ឋ ​ដូច​បាន​ធ្វើ​កាល​ពី​ឆ្នាំ​មុន​ នៅ​ក្នុង​ប្រទេសឆាដ (​Chad)។ តែ​ អង្គការ​សហ​ប្រជា​ជាតិ​ឈប់​ទ​ទួល​ស្គាល់​ដំណែង​របស់​លោក​បាហ្កបូ ហើយៗ​បាន​ប្រគល់​កៅអី​ឲ្យ​ឯក​អគ្គ​រដ្ឋ​ទូតថ្មី​របស់​ប្រទេស​អាយវ៉ូរី ខូស្ត​នៅ​ក្នុង​ទី​ក្រុង ញូយ៉ក ដែ​ល​ត្រូវបាន​តែង​តាំង​ឡើង​ដោយ​លោក វ៉ាតារ៉ា ។

ប្រែ​សម្រួល​ដោយ លោក អ៊ូ ធួក។

XS
SM
MD
LG