អង្គការកាកបាទក្រហមបាននិយាយថា ខ្លួនបានដាក់ពង្រាយអង្គភាពសង្គ្រោះបន្ទាន់ចំនួនពីរទៅកាន់ទីក្រុង Beira ដែលជាទីក្រុងកំពង់ផែនៅប្រទេសម៉ូសំប៊ិក ដើម្បីជួយមនុស្សរាប់ពាន់នាក់ដែលរងផលប៉ះពាល់ដោយព្យុះ Cyclone Idai កាលពីសប្តាហ៍មុន។ ព្យុះនេះបានបង្កការបំផ្លិចបំផ្លាញខ្លាំងបំផុតនៅអាហ្វ្រិកខាងត្បូង ប៉ុន្មានទសវត្សរ៍កន្លងមកនេះ។
អង្គភាពមួយត្រូវបានគេរំពឹងថា នឹងផ្តល់នូវសម្ភារៈអនាម័យសំខាន់ៗសម្រាប់មនុស្សដល់ទៅ ២ម៉ឺន នាក់ រីឯអង្គភាពមួយទៀតត្រូវបានគេរំពឹងថា នឹងផលិតទឹកបរិសុទ្ធ២២ម៉ឺន ៥ពាន់ លីត្រ ជារៀងរាល់ថ្ងៃ ដើម្បីជួយមនុស្សចំនួន ១ម៉ឺន ៥ពាន់ នាក់ ដែលកំពុងខំត្រដរស់បន្ទាប់ពីមានទឹកជំនន់ដ៏ធំបណ្តាលមកពីព្យុះ។
ក្រុមមន្រ្តីជំនួយនិយាយថា អ្នកនៅរស់រានមានជីវិតដែលគេមិនដឹងថា មានចំនួនប៉ុន្មាននោះ កំពុងតោងដើមឈើ ឬជាប់នៅលើដំបូលផ្ទះដែលទឹកជំនន់ឡើងមិនទាន់ដល់។
ចំនួនអ្នកស្លាប់សរុបទាំងនៅប្រទេសម៉ូសំប៊ិក ស៊ីមបាវ៉េ និង ម៉ាឡាវី បានកើនឡើងយ៉ាងហោចណាស់ដល់៤៣៧នាក់។
អង្គការសហប្រជាជាតិបាននិយាយថា ចំនួនអ្នកស្លាប់ជាផ្លូវការចេញដោយរដ្ឋាភិបាលគឺនៅប្រទេសម៉ូសំប៊ិកមានចំនួន ២៤២នាក់ នៅប្រទេសស៊ីមប៉ាវេ មានចំនួន ១៣៩នាក់ និងនៅប្រទេសម៉ាឡាវី មានចំនួន ៥៦នាក់៕
