ប្រជាពលរដ្ឋអាហ្វហ្គានីស្ថានចំនួន១៥នាក់ បានមកដល់កម្ពុជា កាលពីថ្ងៃពុធ ស្របពេលរដ្ឋាភិបាលកម្ពុជា បានសម្រេចទទួលជនជាតិអាហ្វហ្គានីស្ថានឲ្យមកស្នាក់នៅបណ្តោះអាសន្ន មុននឹងចាកចេញទៅប្រទេសទីបី។ នេះ បើតាមមន្រ្តីរដ្ឋាភិបាលទទួលបន្ទុកកិច្ចការនេះ។
លោក ជុង រ៉ាវុធ អ្នកនាំពាក្យក្រុមការងាររបស់រដ្ឋាភិបាលទទួលបន្ទុកកិច្ចការនេះ ប្រាប់វីអូអេកាលពីព្រឹកថ្ងៃព្រហស្បតិ៍ថា ពលរដ្ឋអាហ្វហ្គានីស្ថាន១៥នាក់ បានមកដល់ប្រទេសកម្ពុជា ជាលក្ខណៈគ្រួសារ ដោយកម្ពុជាទទួលឲ្យស្នាក់នៅជាបណ្តោះអាសន្ន ទម្រាំមានប្រទេសទីបីទទួលយកបន្ត។ លោកមិនអាចបញ្ជាក់ព័ត៌មានលម្អិតទាក់ទងនឹងជនជាតិអាហ្វហ្គានីស្ថានទាំងនោះទេ។ លោក ក៏មិនទាន់ដឹងចំនួនពិតប្រាកដនៃជនជាតិអាហ្គានីស្ថានបន្ថែមទៀត ដែលនឹងមកកម្ពុជានាពេលខាងមុខដែរ។
លោកថ្លែងថា៖ «យើងទទួលគាត់ក្នុងនាមមនុស្សធម៌ មកស្នាក់នៅក្នុងនាមមនុស្សធម៌ហ្នឹង តាមការស្នើសុំ។ យើងពិនិត្យជាក់ស្តែង ដូច្នេះចំនួនអត់ទាន់ដឹងពិតប្រាកដទេ»។
បើតាមមន្រ្តីរូបនោះ អាជ្ញាធរកម្ពុជា គ្រាន់តែទទួលជនជាតិអាហ្វហ្គានីស្ថានឲ្យស្នាក់នៅបណ្តោះអាសន្នតែប៉ុណ្ណោះ។
ចំណែកការចំណាយផ្សេងៗ ដូចជាម្ហូបអាហារជាដើម គឺជាបន្ទុករបស់ប្រជាពលរដ្ឋអាហ្វហ្គានីស្ថានទាំងនោះ។
កាលពីខែសីហា ឆ្នាំ២០២១ លោកនាយករដ្ឋមន្ត្រី ហ៊ុន សែន បានថ្លែងថា កម្ពុជាយល់ព្រមទទួលយកជនភៀសខ្លួនអាហ្វហ្គានីស្ថានចំនួន៣០០នាក់ មកស្នាក់នៅបណ្តោះអាសន្ន តាមសំណើរបស់អង្គការមូលនិធិអាស៊ីប្រចាំកម្ពុជា។
រដ្ឋាភិបាលកម្ពុជា ក៏បានសម្រេចបង្កើតក្រុមការងារទទួលបន្ទុកផ្នែកសម្របសម្រួល និងទទួលជនជាតិអាហ្វហ្គានីស្ថានមកស្នាក់នៅបណ្តោះអាសន្ន។ ក្រុមការងារនោះនឹងសម្របសម្រួលជាមួយក្រុមហ៊ុនអាកាសចរណ៍ដើម្បីបង្កលក្ខណៈដល់ការដឹកជញ្ជូនពីអាកាសយានដ្ឋានទៅកន្លែងស្នាក់នៅ និងនៅពេលចាកចេញពីកម្ពុជា។
គួរបញ្ជាក់ថា សហរដ្ឋអាមេរិក បានសម្រេចដកកងទ័ពចេញពីប្រទេសអាហ្វហ្គានីស្ថាន កាលពីខែសីហា ឆ្នាំ២០២១ ក្រោយការឈ្លានពានរបស់ទាហានអាមេរិកអស់រយៈពេល២០ឆ្នាំ ដោយសារការវាយប្រហារដោយយន្តហោះបុកអគារពាណិជ្ជកម្មពិភពលោករបស់អាមេរិក កាលពីឆ្នាំ២០០១។ ការដកកងទ័ពនេះ នាំឲ្យក្រុមបះបោរតាលីបង់ បានវាយចូលកាន់កាប់ប្រទេសមួយនេះ។ ការណ៍នេះ នាំឲ្យប្រជាជនអាហ្វហ្គានីស្ថានមួយចំនួន ចាប់ផ្តើមចាកចេញពីប្រទេសរបស់ខ្លួន៕
