ភ្ជាប់​ទៅ​គេហទំព័រ​ទាក់ទង

ធនាគារ​ADB​ព្រមាន​អំពី​គ្រោះ​ថ្នាក់​នៃ​ប្រាក់​ដើម​ទុន​បរទេស​ទៅ​លើ​ការ​លូត​លាស់​សេដ្ឋកិច្ច​របស់​អាស៊ី​


លោក​លី​ ចុងវ៉ា​ (Lee​ Jong-wha)​ ប្រធាន​សេដ្ឋវិទូ​របស់​​ធនាគារ​​អភិវឌ្ឍន៍​​អាស៊ី​ (Asian​ Development​ Bank)​។

ទី​ក្រុង​ហុង​កុង៖​ ធនាគារ​អភិវឌ្ឍន៍​អាស៊ី​ (Asian​ Development​ Bank)​ ឬ​ហៅ​កាត់​ថា​ADB​ បាន​ដំឡើង​ការ​ទោះ​ទាយ​របស់ខ្លួន​ពី​ភាព​រីក​លូត​លាស់​សេដ្ឋកិច្ចសម្រាប់​ប្រទេសកំពុង​អភិវឌ្ឍនៅទ្វីប​អាស៊ី​នៅ​ក្នុង​ឆ្នាំ​នេះ​ ដោយ​សារ​តែការ​នាំ​ចេញ​ និង​ការ​ប្រើ​ប្រាស់​មាន​សភាព​ខ្លាំង​ក្លា។​ ការ​ពង្រីកសេដ្ឋកិច្ច​យ៉ាង​ខ្លាំង​ក្លានៅ​ប្រទេស​ចិន​ និង​ឥណ្ឌា​ នឹង​បង្កើនការ​លូត​លាស់សេដ្ឋកិច្ច​ជា​មធ្យម​នៅ​ទី្វប​អាស៊ី​ដែល​កំពុង​អភិវឌ្ឍ​ ទៅ​ដល់​៨.២​ភាគ​រយ ​នៅក្នុង​ឆ្នាំ​នេះ។​ ធនាគារ ADB​ កាល​ពី​ពេល​មុន​ បាន​ប៉ាន់​ស្មាន​កំណើន​តែ៧.៥​ភាគ​រយ​តែ​ប៉ុណ្ណោះ។

តែ​ទោះ​យ៉ាង​ណា​ កំណើន​នេះ​ត្រូវ​រំពឹង​ថា​នឹង​ធ្លាក់​ចុះ​នៅ​ត្រឹម​៧.៣​ភាគ​រយ​វិញ​ នៅ​ឆ្នាំ​ក្រោយ​ ដោយ​សារ​តែ​មាន​គ្រោះ​ថ្នាក់​នៃ​ការ​ធ្លាក់​ចុះ​ ក្នុង​ចំណោមប្រទេសសេដ្ឋកិច្ច​ឧស្សាហកម្ម​ធំៗ​ ដែល​ជា​ទិសដៅ​សំខាន់សម្រាប់​ទំនិញ​នាំ​ចេញ​របស់​តំបន់​នេះ។

សេដ្ឋកិច្ច​របស់​ចិនត្រូវ​បាន​រំពឹង​ថា​នឹង​កើន​ឡើង​ដល់៩.៦​ភាគ​រយ​នៅ​ឆ្នាំ​នេះ​ ប៉ុន្តែអាច​ថយ​ចុះមកនៅ​ត្រឹម​៩.១​ភាគ​រយ​វិញ​នៅ​ឆ្នាំ​ក្រោយ។​ ប៉ុន្តែ​ កំណើន​សេដ្ឋកិច្ច​របស់​ឥណ្ឌាត្រូវបាន​រំពឹងទុកថា​នឹង​កើន​ឡើង​ដល់​៨.៧​ភាគ​រយ​នៅ​ឆ្នាំ​ក្រោយ​ ដោយ​ឡើង​ពី​៨​.​៥​ភាគ​រយ​ក្នុង​ឆ្នាំ​នេះ។

លោក​លី​ ចុងវ៉ា​ (Lee​ Jong-wha)​ ប្រធាន​សេដ្ឋវិទូ​របស់​ធនាគារ​នេះ​ បាន​ថ្លែង​ថា​ មូលធន​បរទេសនឹង​បន្ត​ហូរ​ចូល​ទៅ​ក្នុងបណ្តា​ប្រទេស​មាន​សេដ្ឋកិច្ច​លូត​លាស់ក្នុងទី្វប​អាស៊ី។​ ប៉ុន្តែ​ លោក​ព្រមានថា​ លំហូរ​នេះក៏​នាំ​មក​ជា​មួយ​នូវភាព​ប្រថុយ​ប្រថាន​មួយ​ចំនួន​ដែរ។

«លំហូរ​ដ៏​ច្រើន​សន្ធឹក​សន្ធាប់​ និង​លទ្ធភាព​នៃ​ការ​ដក​ប្រាក់ចេញ​យ៉ាង​ឆាប់​រហ័ស​ ពិត​ជា​បាន​ដើរ​តួ​នាទីដ៏មាន​សក្តានុពលក្នុង​ការ​បន្ទុច​បង្អាក់​ទីផ្សារ​ហិរញ្ញវត្ថុ​របស់​អាស៊ី ​និង​បង្ក​ឲ្យ​មាន​សម្ពាធទៅ​លើអត្រាប្តូរ​ប្រាក់»។

កាល​ពី​ឆ្នាំ​មុន​ ទឹក​ប្រាក់​ប្រហែល២០០​ពាន់​លាន​ដុល្លារ​សម្រាប់​ការ​វិនិយោគបាន​ហូរ​ចូល​ទៅក្នុងតំបន់​ ហើយ​ស្ថិត​នៅ​ទី​នោះ​តែ​ម្តង។​ ទឹក​ប្រាក់​នេះបាន​រួម​ចំណែក​ដល់​ការ​កើន​ឡើងនូវទុនបម្រុង​របស់ទីផ្សារ​ប្តូរ​ប្រាក់បរទេស​ (foreign​ exchange​ reserves)​ និង​រូបិយប័ណ្ណរឹង​ម៉ាំជាង​មុន​ ដែល​ជា​ការ​ព្រួយ​បារម្ភ​ខ្លាំង​ឡើង​សម្រាប់​សេដ្ឋកិច្ចដែល​ពឹង​ផ្អែកលើ​ការ​នាំ​ចេញរបស់តំបន់​នេះ។​ ឧទាហរណ៍​ដូច​ជា​ ធនាគារ​កណ្តាល​របស់​ជប៉ុន​បាន​ធ្វើ​អន្តរាគមន៍ទៅ​លើ​ទីផ្សារ​ប្តូរ​ប្រាក់​បរទេស​ ដើម្បី​ធ្វើ​ឲ្យ​ចុះ​ខ្សោយប្រាក់​យ៉េន​ (yen)​ ដើម្បី​ការ​ពារទំនិញ​នាំ​ចេញ​របស់​ជប៉ុន។

មាន​ការ​ព្រួយ​បារម្ភ​នៅ​ជុំវិញ​ពិភពលោក​ ដែល​ថា​លំហូរមូល​ធន​អាច​បង្កឲ្យ​មាន​សង្រ្គាមរូបិយប័ណ្ណ​ ដែល​ធនាគារ​កណ្តាលទម្លាក់រូបិយប័ណ្ណ​របស់​ខ្លួន​ ដើម្បី​ធ្វើ​ឲ្យ​រូបិយប័ណ្ណនោះចុះថ្លៃ។​ លោក​លីថ្លែង​ថា​ ប្រសិន​បើ​ពួក​គេ​ធ្វើដូច្នេះ​ ពួក​គេ​នឹង​ប្រឈមទៅ​នឹង​បញ្ហា​មួយផ្សេង​ទៀត។

«ទ្រព្យ​សម្បត្តិសម្រាប់ដោះ​ដូរ​យក​រូបិយប័ណ្ណ​ដ៏​ច្រើន​សន្ធឹក​សន្ធាប់​ ហូរ​ចូល​ទៅ​ក្នុង​ទីផ្សារហិរញ្ញវត្ថុក្នុង​ស្រុក​ ដែល​នឹង​បង្កើតសម្ពាធ​មួយ​ទៀតទៅ​លើ​វិស័យ​អតិផរណា»។

ធនាគារ​ ADB​ ដែល​ជា​ធនាគារ​ឲ្យ​ខ្ចី​ប្រាក់សម្រាប់ការ​អភិវឌ្ឍដោយ​មិន​រក​ប្រាក់​ចំណេញ​ បាន​ព្យាករណ៍ទុក​ថា ប្រទេស​មាន​សេដ្ឋកិច្ច​ជឿន​លឿននៅ​អាស៊ី​អគ្នេយ៍នឹង​រីក​លូត​លាស់​ក្នុង​កម្រិត​មធ្យមចំនួន​៧.៤​ភាគ​រយ​ក្នុង​ឆ្នាំ​នេះ។​ ប្រទេសសឹង្ហ​បូរីនឹង​មាន​សេដ្ឋ​កិច្ចរីក​លូត​លាស់​ខ្លាំង​ជាង​គេ​បង្អស់​ ក្នុង​កម្រិត​១៤​ភាគរយ​ នៅ​អាស៊ី​អគ្នេយ៍​ក្នុង​ឆ្នាំ​នេះ​ ដែល​បន្ទាប់​មក​គឺ​ប្រទេស​ថៃក្នុង​កម្រិត​៧​ភាគ​រយ។​ ប៉ុន្តែ​ នៅ​ក្នុង​អនុ​តំបន់​វិញ​ កំណើននេះ​នឹង​ធ្លាក់​មក​នៅ​ត្រឹម​តែ​ ៥.៤​ភាគ​រយ​នៅ​ឆ្នាំក្រោយ​ ដោយ​សារ​តែ​ការបញ្ជា​ទិញ​លើ​ការ​នាំ​ចេញ​មាន​ភាព​ចុះ​ថយ។

នៅ​អាស៊ី​កណ្តាល​វិញ​ កំណើន​ក្នុង​ឆ្នាំ​នេះត្រូវ​បានរំពឹង​ទុក​ថា​នឹង​មាន​ចំនួន​៥.១​ភាគ​រយ​ ដែល​លើសបន្តិច​ពី​ការ​ព្យាករណ៍​ទុក​ពី​ខាង​ដើមរបស់ធនាគារ​ ADB។​ នៅ​ឆ្នាំ​ក្រោយ​ សេដ្ឋកិច្ចរបស់​តំបន់​នេះ​ទំនង​ជា​នឹង​រីក​ចម្រើនបាន​ប្រហែល​ ៥.៧​ភាគរយ។​ ព័ត៌មានចុង​ក្រោយ​សម្រាប់​ឆ្នាំ​២០១០ របស់​ធនាគារ​ ADB​ បាន​ឲ្យ​ដឹង​ថា​ ការ​នាំ​ចេញ​រ៉ែ​ ប្រេង​ និង​ឧស្ម័ន​ធម្មជាតិកំពុង​ជួយដល់​ការ​រីក​ចម្រើននៅ​ក្នុង​តំបន់​នេះ៕

ប្រែ​សម្រួល​ដោយ​លី​ សុខ​ឃាង

XS
SM
MD
LG