បេក្ខជននាំមុខនៅក្នុងការបោះឆ្នោតប្រធានាធិបតីកូរ៉េខាងត្បូងបានរិះគន់ដល់ការប្រញាប់ប្រញាល់ដាក់តាំងប្រព័ន្ធប្រឆាំងនឹងកាំជ្រួចមីស៊ីល THAAD របស់ស.រ.អា.ក្នុងពេលតិចជាងពីរសប្តាហ៍មុនការបោះឆ្នោតក្នុងប្រទេសពួកគេ។
កាលពីព្រឹកថ្ងៃពុធ ក្បួនយោធាមួយមានឡាន២០គ្រឿងដឹកផ្នែកជាច្រើននៃប្រព័ន្ធការពារ THAAD ប្រឆាំងនឹងកាំជ្រួចមីស៊ីលទៅកាន់កន្លែងដាក់ពង្រាយនៅឯកន្លែងលេងកីឡាកូនហ្គោលមួយរបស់ក្រុមហ៊ុន Lotte ក្នុងតំបន់ជនបទមួយក្នុងស្រុក Seongju នាផ្នែកអាគ្នេយ៍ប្រទេសកូរ៉េខាងត្បូង។រួមបញ្ចូលក្នុងប្រព័ន្ធនេះមានផ្នែកសំខាន់ៗដែលគេត្រូវការសម្រាប់ឱ្យប្រព័ន្ធ THAAD មានដំណើរការបានគឺមានប្រដាប់បាញ់ចល័ត កាំជ្រួចមីស៊ីលសម្រាប់បាញ់ស្ទាក់ប្រដាប់ដោយបច្ចេកទេសស្វែងរកប្រកបដោយប្រសិទ្ធិភាពដោយមានប្រើកាំរស្មី និងប្រព័ន្ធរ៉ាដាខ្លាំងមួយដើម្បីយកកាំជ្រួចមីស៊ីលសត្រូវជាទីដៅនៃការវាយប្រហារ។
នៅថ្ងៃព្រហស្បតិ៍នេះ ក្រសួងការពារប្រទេសនៃប្រទេសកូរ៉េខាងត្បូងបាននិយាយថាប្រព័ន្ធ THAAD បានត្រូវដាក់ពង្រាយមុនពេលកំណត់ដើម្បីទប់ទល់នឹងកំណើនការគំរាមកំហែងដោយបរមាណូ និងដោយកាំជ្រួចមីស៊ីលផ្លោងរបស់ប្រទេសកូរ៉េខាងជើង។
លោក Moon Sang-kyun អ្នកនាំពាក្យក្រសួងការពារប្រទេសកូរ៉េខាងត្បូងបាននិយាយថា «ដោយផ្អែកលើការយល់ដូចគ្នារវាងប្រទេសកូរ៉េខាងត្បូង និងស.រ.អា. និងដោយសារមានស្ថានការណ៍ធ្ងន់ធ្ងរនៅលើឧបទ្វីបកូរ៉េ សេចក្តីត្រូវការឱ្យមានកិច្ចប្រតិបត្តិការជាបន្ទាន់ប្រកបដោយប្រសិទ្ធិភាពនៃប្រព័ន្ធ THAAD បានត្រូវពន្លឿន»។
លោកឧត្តមនាវី Harry Harris មេបញ្ជាការនៃបញ្ជាការដ្ឋានស.រ.អា.ក្នុងមហាសមុទ្រប៉ាស៊ីហ្វិកហៅកាត់ថា PACOM បានមានប្រសាសន៍ប្រាប់សវនកម្មមួយនៅក្នុងសភាស.រ.អា.ក្នុងរដ្ឋធានីវ៉ាស៊ីនតោន កាលពីថ្ងៃពុធថាប្រព័ន្ធ THAAD នឹងអាចធ្វើប្រតិបត្តិការបានក្នុងពេលប៉ុន្មានថ្ងៃខាងមុខនេះ៕
