ភ្ជាប់​ទៅ​គេហទំព័រ​ទាក់ទង

ការ​រីក​ចម្រើន​ផ្នែក​វេជ្ជសាស្ត្រ​ត្រូវ​បាន​ទទួល​ស្គាល់


អ្នកជំងឺម្នាក់​នៅតំបន់​​អាហ្វ្រិក​​ទទួលថ្នាំ​នៅ​គ្លីនិក​មួយ។

វ៉ាស៊ីនតោន៖ ស្ថានភាព​វេជ្ជសាស្ត្រ​កាល​ពី​១០០ ឆ្នាំកន្លង​ទៅនេះ ត្រូវ​បាន​ចុះ​ផ្សាយ​នៅ​ក្នុង​លេខ​ដំបូង​នៃ​ទស្សនាវដ្តី​ពេទ្យ​អង់គ្លេស​ឈ្មោះ ដឺ លែនសិត (The Lancet) ក្នុង​ឆ្នាំ​២០១១។

និពន្ធ​នាយក​ជា​ច្រើន​នៃ​ទស្សនាវដ្តីដឺ លែនសិត បាន​ប្រារព្ធ​ពិធី​អបអរ​ចំពោះ​ការ​រីក​ចម្រើន​ក្នុង​ការ​ប្រឆាំង​នឹង​ជំងឺ​ឆ្កួត​ដោយ​សត្វ​ខាំ​ រោគ​ខាន់​ស្លាក់​ និង​ជំងឺ​ប៉េស្ត។​ ក្រុម​អ្នក​និពន្ធ​នាយក​ទាំង​នោះក៏បាន​ត្អូញ​ត្អែរ​ផង​ដែរ​អំពី​ការ​ជឿន​លឿន​ដ៏​យឺតៗ​នៅ​ក្នុង​ការ​គ្រប់គ្រង​ការ​រាល​ដាល​ជំងឺ​របេង​ ដែល​នៅពេល​នោះ​ជា​ជំងឺ​ដ៏​មរណៈមួយ។ យោង​តាម​អង្គការ​សុខភាព​ពិភពលោក​ ជំងឺ​របេង​នៅ​តែ​ជា​បញ្ហា​ សុខភាព​សាធារណៈដ៏​ចំបង​ក្នុង​ឆ្នាំ​២០១១​ ដោយ​មាន​មនុស្ស​មួយភាគបីក្នុង​ពិភពលោក​បានឆ្លង​មេរោគ​នេះ។​ មនុស្ស​១​លាន​៧​សែន​នាក់ស្លាប់​ដោយ​រោគ​របេង​នៅ​ក្នុង​ឆ្នាំ​២០០៩​ ហើយ​ភាព​ស៊ាំថ្នាំ​កំពុង​លេច​ឡើង។​ លោក​ ប៊ីល សាមមរស្គីល (Bill Summerskill​) ​និពន្ធ​នាយក​ប្រតិបត្តិ​របស់​ទស្សនាវដ្តី​ ដឺ លែនសិត មាន​សុទិដ្ឋិនិយម​ដោយ​ប្រុង​ប្រយ័ត្ន​ អំពី​ការ​អភិវឌ្ឍ​នៃ​ឧបករណ៍​ថ្មី​មួយ​សម្រាប់​ធ្វើ​រោគ​វិនិច្ឆ័យ​រោគ​របេង។ លោក ​សាមមរស្គីល មាន​ប្រសាសន៍ថា៖

«ចំពោះ​ខ្ញុំ​ រឿង​សំខាន់​មួយ​ដែល​ត្រូវ​ផ្តោត​ការ​យក​ចិត្ត​ទុក​ដាក់​នៅ​ឆ្នាំ​២០១០​ គឺ​ការ​ទទួល​បាន​នូវ​ការ​ពិសោធន៍​ធ្វើ​រោគវិនិច្ឆ័យ​លឿន​ជាង​មុន​មួយ​ ពីព្រោះ​ការ​ធ្វើ​រោគវិនិច្ឆ័យ​បាន​ប្រើ​ពេល​យូរ​ ហើយ​ជា​បណ្តាញ​ដ៏​ខ្សោយ​មួយ​នៅ​ក្នុង​ការ​រក​មនុស្ស​មាន​គ្រោះថ្នាក់​ និង​ចាប់​ផ្តើម​ធ្វើ​ការព្យាបាល​ពួក​គេ​ដោយ​សមរម្យ»។

លោក សាមមរស្គីល មាន​ប្រសាសន៍​ថា​ នេះ​មាន​ន័យ​ថា​ ដូច​ជា​មនុស្ស​ដែល​មាន​មេរោគ​នៃ​ជំងឺ​អេដស៍​ដែរ​ មនុស្ស​មាន​គ្រោះ​ថ្នាក់​ខ្លាំង​នឹង​ជំងឺ​របេង​ អាច​ត្រូវ​បាន​ធ្វើ​តេស្ត ​និង​ព្យាបាល​បាន​ដោយឆាប់​រហ័ស​ និង​អាច​ជួយ​កំចាត់​ការ​ឆ្លង​ប្រកប​ដោយ​គ្រោះថ្នាក់ជា​បន្ត​បន្ទាប់។ សុវត្ថិភាព​ម្ហូប​អាហារ​ ជា​ប្រធានបទ​ដ៏​សំខាន់​មួយ​ទៀត​នៅ​ក្នុង​ទស្សនាវដ្តី​ ដឺ លែនសិត ​កាល​ពី​១០០​ឆ្នាំ​មុន​ ដោយ​មាន​រឿង​មួយ​ស្តី​ពី​យុទ្ធនាការ​នៃ​សុខភាព​សាធារណៈ​ នៅ​ក្នុង​ទី​ក្រុង​ ញួយ៉ក ប្រឆាំង​នឹង​ក្រុម​អ្នក​លក់​ពង​មាន់​ខូច​គុណភាព។​ លោក​សាមមរស្គីល បន្ត​ថា៖

«នៅ​ពេល​លោក​អ្នក​អាន​ទស្សនាវដ្តី​នោះ​ លោក​អ្នក​មិន​អាច​មិន​គិត​អំពី​ច្បាប់​ចុង​ក្រោយ​បង្អស់​ដែល​សភា​ទើប​បាន​អនុម័ត​ ហើយ​ដែល​លោក​ប្រធានាធិបតី​ អូបាម៉ា​ ទើប​បាន​ចុះ​ហត្ថាលេខា​នៅ​ថ្ងៃ​ទី​៤​ខែ​មករា​ អំពី​សុវត្ថិភាព​ម្ហូប​អាហារ​ និង​អំពី​ហេតុ​ម្តេច​បាន​ជា​ប្រធានបទមួយ​នេះ​ចេះ​តែ​ចេញ​មក​ម្តង​ហើយ​ម្តង​ទៀត​នោះ​ទេ»។

លោកសាមមរស្គីល រំឭក​យើង​ថា​ ច្បាប់​សរអា​ថ្មី ​គឺ​ជា​ចំណែក​មួយ​នៃ​ការ​ឆ្លើយ​តបទៅ​នឹង​ករណី​ដែល​ពលរដ្ឋ​អាមេរិក ១៥០០​នាក់​ធ្លាក់​ខ្លួន​ឈឺ​កាល​ពី​ខែ​សីហា​ឆ្នាំ​មុន​ដោយ​សារ​ពង​មាន់ខូច​ មាន​មេរោគ​ សាលម៉ូណិឡា (salmonella​) ដែល​គេ​រក​ឃើញ​មាន​នៅ​ក្នុង​ពង​មាន់​៥៥០​លាន​ពង​ ហើយ​ត្រូវ​បាន​ដក​ចេញ​ឈប់​ឲ្យដាក់​លក់នៅ​ទី​ផ្សារ។

អត្ថបទ​ផ្សេងៗ​ទៀត​នៅ​ក្នុង​ការ​បោះពុម្ភ​ផ្សាយ​របស់​ទស្សនាវដ្តី​ ដឺ លែនសិត នៅ​ឆ្នាំ​១៩១១​ បាន​ផ្តោត​ទៅ​លើ​រោគ​ស្វាយ​ កាមរោគ​ និង​ជំងឺ​មហារីក។

ការ​ព្យាបាល​រោគស្វាយ និង​កាមរោគ​ផ្សេងៗ​ទៀត​ធ្វើ​បាន​យ៉ាងប្រសើរ​នៅ​ក្នុង​សតវត្សរ៍​កន្លង​ទៅ​នេះ​ ប៉ុន្តែ​ជំងឺ​មហារីក​បាន​បង្ហាញ​ថា ជា​ជំងឺ​មួយ​ពិបាក​ព្យាបាល​ជា​ខ្លាំង។​ សព្វ​ថ្ងៃ​នេះ​ ជំងឺ​មហារីក​ជា​ជំងឺ​នាំ​មុខ​គេ​ក្នុង​ការ​សម្លាប់​មនុស្ស​ពាស​ពេញ​ពិភពលោក។​ ប៉ុន្តែ​ អត្រា​នៃ​អ្នក​នៅ​រស់​ពី​ការ​កើត​ជំងឺ​មហារីក​នៅ​តែ​កើន​ឡើង​ ហើយ​ពិធី​ព្យបាល​ថ្មី​ត្រូវ​បាន​ផ្សាយ​ជា​ទូទៅ​នៅ​ក្នុង​ព័ត៌មាន។​ ឧទាហរណ៍​ អត្ថបទ​មួយ​នៅ​ក្នុង​ទស្សនាវដ្តី​ ដឺ លែនសិត​ ចេញ​ផ្សាយ​ថ្មីៗ​នេះ​ និយាយអំពី​ថ្នាំ​ អាស្ពីរីន (Aspirin)​ ថា ជា​ថ្នាំ​មួយ​ជួយ​អន្តរាគមន៍​កាត់​បន្ថយ​គ្រោះថ្នាក់​ជំងឺ​មហារីក​ពោះវៀនធំ​ និង​ជំងឺ​មហារីក​ផ្សេង​ទៀត​ ប្រសិន​បើ​គេ​ទទួល​ថ្នាំអាស្ពីរីន (Aspirin) កម្រិត​ទាប​មួយ​ថ្ងៃ​ម្តង​ ក្នុង​រយៈ​ពេល​យូរ។

«ថ្នាំ​Aspirin​ ក្នុង​ពេល​នេះ​អាច​ក្លាយ​ជា​វិភាគទាន​ដល់​សុខភាព​សាធារណៈ​ដ៏​អស្ចារ្យ​មួយ។»

លោក​ សាមមរស្គីល និពន្ធ​នាយក​ប្រតិបត្តិ​របស់​ទស្សនាវដ្តី​ ដឺ លែនសិត មាន​ប្រសាសន៍​ថា​ ដោយ​សម្លឹង​មើល​ទៅ​កាលវិភាគ​នៃ​សតវត្សរ៍​មុន​ បង្ហាញ​ថា​ ហេតុ​ដូចម្តេច​បាន​ជា​ក្រុម​អ្នក​វិទ្យាសាស្ត្រ​បាន​ធ្វើការ​យឺតយ៉ាវ​ តឹងតែង និង​ប្រកប​ដោយ​ជោគជ័យ​ក្នុង​ការ​បង្កើត​ការ​ព្យាបាល​ថ្មីៗ​ និង​ឱសថ​ទាំងឡាយ​សម្រាប់​ប្រយុទ្ធ​ទល់​នឹង​ជំងឺ​មហារីក​ច្រើន​ប្រភេទ​ និង​ការ​ឆ្លង​មេរោគ​ប្រកប​ដោយ​គ្រោះថ្នាក់​នោះ។

វិចារណកថា​ឆ្នាំ​ថ្មី​របស់​ទស្សនាវដ្តី​ ដឺ លែនសិត បាន​ធ្វើ​សេចក្តី​សន្និដ្ឋាន​ថា «ចន្លោះ​ឆ្នាំ​១៩១១ និង​ឆ្នាំ២០១១​ មាន​ឱសថ​យ៉ាង​ច្រើន​ដែល​ទទួល​បាន​ការ​សរសើរ ហើយ​ក៏​នៅ​ខ្សត់​ខ្សោយ​ដែរ។​ ឆ្នាំ​ថ្មីៗ​ទៅ​មុខ​ទៀត​នាំ​មក​នូវ​ការ​សង្ឃឹម​ថ្មី និង​ឱកាស​ល្អ​ថ្មី​ ប៉ុន្តែ​នៅ​តែ​មាន​ឧបទ្រព​ចង្រៃ​ខ្លះៗ​បន្សល់​ទុក​ពី​មុន​ដែរ៕

ប្រែសម្រួលដោយ នុច សារីតា

XS
SM
MD
LG