ភ្ជាប់​ទៅ​គេហទំព័រ​ទាក់ទង

ការ​បង្រៀន​អំពី​ប្រវត្តិសាស្ត្រ​សម័យ​ខ្មែរ​ក្រហម​មិន​ងាយ​ស្រួល​ទេ


ការ​បង្រៀន​អំពី​ប្រវត្តិសាស្ត្រ​សម័យ​ខ្មែរ​ក្រហម​មិន​ងាយ​ស្រួល​ទេ

លោក ឌី​ ខាំបូលី ជា​អ្នក​ស្រាវ​ជ្រាវ​ជាន់​ខ្ពស់​នៅ​មជ្ឈមណ្ឌល​ឯកសារ​កម្ពុជា និងជា​អ្នក​និពន្ធ​សៀវភៅ​«ប្រវត្តិសាស្ត្រ​កម្ពុជា​ប្រជាធិបតេយ្យ ១៩៧៥ - ១៩៧៩»​ ដែល​បាន​ត្រូវ​បោះ​ពុម្ព​នៅ​ឆ្នាំ​ ២០០៧ ហើយ​ដែល​ទើប​នឹង​ត្រូវ​យក​ទៅ​ប្រើ​ក្នុង​គម្រោង​អប់រំ​ថ្នាក់​ជាតិ​អំពី​អំពើ​ប្រល័យ​ពូជសាសន៍។

លោក​ឌី ខាំបូលី​និយាយ​ថា ដើម្បី​ឲ្យ​គម្រោង​នេះ​ទទួល​បាន​ជោគ​ជ័យ និង​មាន​ប្រសិទ្ធិភាព ទាមទារ​ឲ្យ​មាន​កត្តា​ច្រើន​ណាស់​មិន​ត្រឹម​តែ​កត្តា​សៀវភៅ​បង្រៀន​ល្អ និង​កម្មវិធី​អប់រំ​ដែល​បាន​រៀប​រៀង​ទុក​ល្អ​ប៉ុណ្ណោះ​ទេ។

«ខ្ញុំសង្ឃឹម​ថា លោក​គ្រូ​អ្នក​គ្រូ ក៏​ដូច​ជា​សិស្សានុសិស្ស និង​ឪពុក​ម្តាយ​សិស្ស​ក្តី​ដែល​ជា​ជន​រង​គ្រោះ​ឬ​ជា​អ្នក​ដែល​នៅ​រស់​រាន​មាន​ជីវិត​ពី​សម័យ​ខ្មែរ​ក្រហម​នោះ នឹង​ចូល​រួម​ទាំង​អស់​គ្នា​ ព្រោះ​ថា​ការ​អប់រំអំពី​អំពើ​ប្រល័យ​ពូជ​សាសន៍ ពី​ប្រវត្តិសាស្ត្រ​កម្ពុជា​ប្រជាធិបតេយ្យ​នេះ មិន​មែន​បុគ្គល​ណា​ម្នាក់ ឬ ស្ថាប័ន​ណា​មួយ​អាច​ធ្វើ​ទៅ​បាន​ដោយ​ឯក​ឯង​នោះ​ទេ គឺ​ថា​ត្រូវ​តែ​មាន​ការ​ចូល​រួម​ទាំង​អស់​គ្នា​ការ​ចូល​រួម​ទាំង​រដ្ឋាភិបាល ​ការ​ចូល​រួម​ទាំង​សង្គម​ស៊ីវិល ដូច​ជា​មជ្ឈមណ្ឌល​ឯកសារ​កម្ពុជា​ការ​ចូល​រួម​ទាំង​លោក​គ្រូ​អ្នក​គ្រូ និង​សិស្សានុសិស្ស​ទាំង​អស់​ ក៏ដូច​ជា​ការ​ចូល​រួម​ពី​ឪពុក​ម្តាយ ជា​ពិសេស​អ្នក​ដែល​នៅ​រស់​រាន​មាន​ជីវិត​ពី​របប​ខ្មែរ​ក្រហម​ហ្នឹង»។

ថ្វី​បើ​ដំណើរ​ការ​ទាក់​ទង​នឹង​ការ​ជំនុំ​ជម្រះ​ក្តី​អតីត​មេដឹក​នាំ​ខ្មែរ​ក្រហម​បាន​ប្រព្រឹត្ត​ទៅ​អស់​រយៈ​ពេល​ជា​ច្រើន​ឆ្នាំ​ក្តី ក៏​ការ​បង្រៀន និង​ការ​ពិភាក្សា​ជា​លក្ខណៈ​ទូលំ​ទូលាយ​អំពី​សម័យ​ខ្មែរ​ក្រហម នៅ​តែ​ជា​ចំណុច​រសើប​ផ្នែក​នយោបាយ និង​ផ្នែក​សង្គម។ ទើប​តែ​ថ្មីៗ​នេះ​ទេ ដែល​រាជ​រដ្ឋាភិបាល​កម្ពុជា ដោយ​មាន​ជំនួយ​ពី​មជ្ឈមណ្ឌល​ឯកសារ​កម្ពុជា​បាន​ទទួល​យក​គំនិត​ឲ្យ​មាន​ការ​អប់រំ​ទូលំ​ទូលាយ​ជាង​មុន អំពី​អំពើ​ប្រល័យ​ពូជសាសន៍​សម័យ​ខ្មែរ​ក្រហម។

មជ្ឈមណ្ឌល​ឯកសារ​កម្ពុជា​បាន​ចាប់​ផ្តើម​គម្រោង​រយៈ​ពេល​វែង ទាក់​ទង​នឹង​ការ​អប់រំ​អំពី​អំពើ​ប្រល័យ​ពូជសាសន៍​ដែល​ក្នុង​គម្រោង​នេះ រួម​មាន​ការ​រៀប​រៀង​សៀវភៅ​សិក្សា ការ​បោះ​ពុម្ព​ផ្សាយ ការ​បណ្តុះ​បណ្តាល​គ្រូ​បង្រៀន ការ​បង្រៀន និង​ការ​វាយ​តម្លៃ​ការ​បង្រៀន​នេះ។

បើ​តាម​ប្រសាសន៍​លោក​ឌី ខាំបូលី មជ្ឈមណ្ឌល​ឯកសារ​កម្ពុជា​នឹង​មាន​គម្រោង​បោះពុម្ព​បន្ថែម​សៀវភៅ​ប្រវត្តិសាស្ត្រ​កម្ពុជា​ប្រជាធិបតេយ្យ​នេះ ចំនួន​៧សែន​ក្បាល​ទៀត ដើម្បី​ឲ្យ​មាន​ចំនួន​គ្រប់​គ្រាន់​សម្រាប់​សិស្សានុសិស្ស​ចំនួន​ប្រហែល​ ១ លាន​នាក់ ដែល​នឹង​ត្រូវ​ទទួល​ការ​អប់រំ​ក្នុង​គម្រោង​នេះ។ ម្យ៉ាង​ទៀត​ការ​បណ្តុះ​បណ្តាល​គ្រូ​បង្រៀន​នៅ​ក្នុង​គម្រោង​នេះ​ជិត​ឈាន​ដល់​ទី​បញ្ចប់​ហើយ។ ពិធី​បើក​វគ្គ​បណ្តុះ​បណ្តាល​គ្រូ​ដំណាក់​កាល​ចុង​ក្រោយ​នឹង​ប្រព្រឹត្ត​ទៅ​នៅ​ខេត្ត​សៀមរាប​ នៅ​ថ្ងៃ​ទី​ ២៧​ខែមិនា​ខាង​មុខ​នេះ។ មាន​គ្រូ​បង្គោល​ថ្នាក់​ជាតិ​និង​ថ្នាក់​ខេត្ត​ សរុប​ចំនួន​២៣០​នាក់​នឹង​ចូល​រួម​វគ្គ​បណ្តុះ​បណ្តាល​គ្រូ​ប្រវត្តិសាស្ត្រ​ថ្នាក់​មូលដ្ឋាន​ចំនួន ១.៦២៧​នាក់​នៅ​ទូទាំង​ប្រទេស។

ព្រម​ជាមួយ​នឹង​សៀវភៅ​ប្រវត្តិសាស្ត្រ​កម្ពុជា​ប្រជាធិបតេយ្យ​នេះ លោក​គ្រូ​អ្នក​គ្រូ​នឹង​ប្រើ​ប្រាស់​សៀវភៅ​ណែនាំ​សម្រាប់​គ្រូ​បង្រៀន​ និង​សៀវភៅ​លំហាត់​សម្រាប់​សិស្ស ដែល​ត្រូវ​បាន​បោះ​ពុម្ព​រួម​គ្នា​នា​ពេល​ថ្មីៗ​នេះ រវាង​មជ្ឈមណ្ឌល​ឯកសារ​កម្ពុជា​និង​ក្រសួង​អប់រំ ​យុវជន​និង​កីឡា។

នាង​ ជា ផល្លា ជា​ពលរដ្ឋ​អាមេរិកាំង​កំណើត​ខ្មែរ​នៅ​ក្រុង Lowell រដ្ឋ Massachusetts​ ហើយ​ជា​អ្នក​និពន្ធ​ម្នាក់​ក្នុង​ចំណោម​អ្នក​និពន្ធ​ពីរ​រូប​របស់​សៀវភៅ​ណែនាំ​គ្រូ​នេះ ។ នាង​និយាយ​ថា សៀវភៅ​នេះ​បាន​ទទួល​ការ​ត្រួត​ពិនិត្យ​ល្អិត​ល្អន់​ណាស់​ពី​ព្រោះ​វិធីសាស្ត្រ​បង្រៀន​សម​ស្រប​ជា​ការ​ចាំ​បាច់​នៅ​ក្នុង​ការ​អប់រំ​អំពី​អំពើ​ប្រល័យ​ពូជ​សាសន៍។

«វា​ជា​ប្រធាន​បទ​ដ៏​លំបាក​មួយ ហើយ​យើង​ត្រូវ​គិត​គូរ​ណាស់​ពី​អារម្មណ៍​សិស្ស​និង​ក្រុម​គ្រួសារ​របស់​ពួក​គេ​ក្នុង​ពេល​យើង​បង្រៀន។ យើង​បាន​ព្យាយាម​រក​វិធីសាស្ត្រ​នានា​ ដើម្បី​បង្រៀន​អំពី​ប្រធានបទ​នេះ​ដោយ​មិន​ធ្វើ​ឲ្យ​រន្ធត់​ ឬ បាក់​ស្បាត​ក្នុង​អារម្មណ៍​របស់​អ្នក​ស្តាប់​និង​សិស្ស​របស់​យើង​។ បង្រៀន​ក្នុង​របៀប​មួយ​ដែល​ធ្វើ​ឲ្យ​សិស្ស​មាន​ចំណាប់​អារម្មណ៍​រៀន​អំពី​ប្រធានបទ​ប្រល័យ​ពូជសាសន៍​នេះ ហើយ​ផ្តល់​ជា​កន្លែង​មាន​សុវត្ថិភាព​និង​ឱកាស​ក្នុង​ការ​ពិភាក្សា​អំពី​ប្រធានបទ​និង​បញ្ហា​ផ្សេងៗ​ទៀត ទាក់​ទង​នឹង​អំពើ​ប្រល័យ​ពូជសាសន៍»។

លោក​ឌី ខាំបូលី និយាយ​ថា ចំណុច​រសើប​ផ្នែក​អារម្មណ៍​របស់​ប្រធានបទ​នេះ​ក៏​អាច​ជា​បញ្ហា​សម្រាប់​គ្រូ​ផង​ដែរ។

«ពី​ព្រោះ​គ្រូ​មួយ​ចំនួន​គាត់​ជា​ជន​រង​គ្រោះ អញ្ចឹង​គាត់​អាច​ថា​បង្រៀន​ចេញ​ពី​ចិត្ត​របស់​គាត់​ជា​ជាង​បង្រៀន​ចេញ​ពី​លក្ខណៈ​ជា​អាជីព។ អញ្ចឹងហើយការ​បណ្តុះ​បណ្តាល​នេះ គឺ​ធ្វើ​យ៉ាង​ណា​ឲ្យ​គ្រូ​បង្រៀន​ជា​លក្ខណៈ​វិទ្យាសាស្ត្រ ជា​លក្ខណៈ​អាជីព​មិន​មែន​តាម​ចិត្ត​ខឹង​តាម​ចិត្ត​នឹក​ឃើញ​នោះ​ទេ»។

ថ្វី​បើ​មាន​ការ​លំបាក​យ៉ាង​នេះ​ក្តី នាងជា​ផល្លា​និយាយ​ថា អ្នក​ដែល​នឹង​បាន​រៀន​សូត្រ​អំពី​ប្រវត្តិសាស្ត្រ​ខ្មែរ​ក្រហម​នេះ​មិន​មាន​ត្រឹម​តែ​សិស្សានុសិស្ស​ប៉ុណ្ណោះទេ គឺ​រួម​មាន​លោក​គ្រូ​អ្នក​គ្រូ​ផង​ដែរ ដែល​ភាគ​ច្រើន​បាន​កើត​នៅ​ក្រោយ​សម័យ​ខ្មែរ​ក្រហម​ព្រម​ទាំង​ឪពុក​ម្តាយ​សិស្ស និង​អ្នក​នៅ​រស់​រាន​ពី​របប​ខ្មែរ​ក្រហម​ដទៃ​ទៀត​ដែល​ពួក​គាត់​មិន​យល់​អំពី​ព្រឹត្តិការណ៍​ទាំង​មូល​ដែល​បាន​កើត​ឡើង​ចំពោះ​ពួក​គាត់​ទេ។ ការ​នេះ​ក៏​ជួន​ពេល​នឹង​មាន​ដំណើរការ​តុលាការ​ខ្មែរ​ក្រហម​ ដែល​អាច​ជួយ​ឲ្យ​គេ​កាន់​តែ​មាន​ឆន្ទៈ​ចង់​និយាយ​អំពី​រឿងរ៉ាវ​ទាំង​នេះ​ជា​ចំហរ​ក្នុង​គ្រួសារ និង​ក្នុង​សង្គម។

លោក​ ឌី ខាំបូលី យល់​ស្រប​នឹង​ទស្សនៈ​នេះ ហើយ​លោក​គិត​ថា​គម្រោង​អប់រំ​នេះ​នឹង​បម្រើ​ដល់​គោលដៅ​សង្គម​យូរ​អង្វែង​មួយ។

«គោលដៅ​ដែល​យើង​ចង់​បាន​គឺ​ថា ធ្វើ​យ៉ាង​ណា​ឲ្យ​សិស្ស​ចេះ​ស្វែង​យល់ ចេះ​ពិចារណា​អំពី​ព្រឹត្តិការណ៍​ដែល​បាន​កើត​ឡើង​នៅ​ក្នុង​សម័យ​ខ្មែរ​ក្រហម ហើយ​យក​ព្រឹត្តិការណ៍​នេះ​ធ្វើ​ជា​ដើម​ទុន នៅ​ក្នុង​ការ​អនុវត្ត​ការ​រស់​នៅ​របស់​ខ្លួន​ក្តី​នៅ​ក្នុង​ការ​កសាង​ជាតិ​នៅ​ក្នុង​ការ​ទប់​ស្កាត់​កុំ​ឲ្យ​មាន​អំពើ​ប្រល័យ​ពូជសាសន៍​កើត​មាន​ឡើង​ជា​ថ្មី​ម្តង​ទៀត​នៅ​ក្នុង​ការ​ជួយ​ឪពុក​ម្តាយ​របស់​ខ្លួន​នៅ​ក្នុង​ការ​ផ្សះ​ផ្សារ​ជា​ដើម។ គឺ​យើង​ធ្វើ​យ៉ាង​ណា​មិន​ឲ្យ​មាន​គំនិត​គុំ​គួន​ការ​ចង​គំនុំ ឬ ក៏​ការ​សង​សឹក​នៅ​ក្នុង​គំនិត​របស់​កូន​ខ្មែរ​ជំនាន់​ក្រោយ​ទេ»។

លោក ឌី ខាំបូលី និយាយ​ថា​ពលរដ្ឋ​កម្ពុជា​ត្រូវ​រៀន​ពី​កំហុស​នៅ​ក្នុង​អតីតកាល​ដើម្បី​កសាង​ប្រទេស​របស់​ពួក​គេ​ឡើង​វិញ​និង​កសាង​អនាគត​ដែល​ប្រសើរ​ជាង​មុន៕

XS
SM
MD
LG