ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ពលរដ្ឋខ្លះមិនបានយកចិត្តទុកដាក់ នឹងការកាត់ទោសខ្មែរក្រហមទេ


ពលរដ្ឋខ្លះមិនបានយកចិត្តទុកដាក់ នឹងការកាត់ទោសខ្មែរក្រហមទេ
ពលរដ្ឋខ្លះមិនបានយកចិត្តទុកដាក់ នឹងការកាត់ទោសខ្មែរក្រហមទេ
<!-- IMAGE -->

​ ដើម្បីស្តាប់ព័ត៌មាននេះ

ស្របពេលដែលសាលាក្ដីពិសេសសម្រាប់ការកាត់ទោសនេះត្រូវគេមើលឃើញ
ថា ត្រូវការកញ្ចប់ថវិកាដ៏ធំសម្បើមសម្រាប់បំពេញប្រតិបត្តិការណ៍របស់ខ្លូន។

នៅមិនឆ្ងាយប៉ុន្មានពីប្រាសាទបាយ័ន ដែលបាក់បែក អ្នកស្រីនាម ស៊ឹម អាយុ
៤៨ឆ្នាំកំពុងអង្គុយលក់ចំណីអាហារសម្រាប់ភ្ញៀវទេសចរណ៍។ មកពីភូមិអង្គរ
ក្រៅឃុំគោកចក ស្រុកសៀមរាប អ្នកស្រីនាម ស៊ឹម នៅចងចាំការឈឺចាប់នា
សម័យខ្មែរក្រហមនៅឡើយ នៅពេលដែលសមាជិកក្រុមគ្រួសាររបស់គាត់ជា
ច្រើនបានស្លាប់ដោយសារការសម្លាប់ និងដោយអត់អាហារ។ ក៏ប៉ុន្ដែអ្នកស្រីមិន
ដែលបានទទួលព័ត៌មានអំពីដំណើរការកាត់ទោសខ្មែរក្រហមនោះទេ ដោយសារ
អ្នកស្រីពុំបានយកចិត្តទុកដាក់ក្នុងការតាមដានការកាត់ទោសនេះ។

«ចា៎ អាឡៃតែមិនបានស្ដាប់។ ចង់ដឹងដែរ ប៉ុន្ដែខ្ញុំអាឡៃតែរកស៊ី ក៏អត់បានបើក
វិទ្យុស្ដាប់។គិតអារឿងរកស៊ីក្នុងគ្រួសារ បានរស់នៅ ហើយក៏យើងខំរកស៊ីតទៅ
ទៀតទៅ»។

អ្នកស្រីមាស សុគន្ធ អ្នកលក់របស់អនុស្សាវរីយ៍នៅមុខប្រាសាទអង្គរ បានសើច
រលាក់ នៅពេលដែលសួរអំពីសំណុំរឿងកាត់ទោសខ្មែរក្រហមនេះ។ សើចដោយសារតែអ្នកស្រីចាប់អារម្មណ៍តែលើរបរជួញដូរមួយមុខតែប៉ុណ្ណោះ។

«ខ្ញុំដូចជាមិនសូវចាប់អារម្មណ៍។ យើងអ្នករកស៊ី។ ស្ដាប់ (វិទ្យុ) រាល់ថ្ងៃស្ដាប់ពី
រឿងថៃ-ខ្មែរ ព្រោះយើងអ្នករកស៊ីចង់ដឹងថា សេដ្ឋកិច្ចវាឡើងចុះ ឬយ៉ាងណា?»

ដោយឡែកអ្នកនាំភ្ញៀវនិងប្រជាជនមួយចំនួនទៀត ដែលVOA សម្លេងសហរដ្ឋ
អាមេរិកបានជួបសម្ភាស បានអះអាងថា ពួកគេបានតាមដានតិចតួចបំផុតអំពី
ដំណើរការកាត់ទោសអតីតមេដឹកនាំខ្មែរក្រហម។

បើយោងតាមរបាយការណ៍របស់វិទ្យាស្ថានសាធារណរដ្ឋអន្ដរជាតិIRIរបស់សហ
រដ្ឋអាមេរិក កាលពីឆ្នាំ២០០៩ ហើយត្រូវបានផ្សព្វផ្សាយជាសាធារណៈកាលពី
ខែកុម្ភៈ បានបង្ហាញថា ៨២% នៃប្រជាពលរដ្ឋចំនួន១៦០០នាក់ ដែលត្រូវបាន
សម្ភាសនៅក្នុងខេត្តក្រុងចំនួន១២បានអះអាងថា ពួកគេបានដឹងអំពីដំណើរការ
កាត់ទោសខ្មែរក្រហម។

ក៏ប៉ុន្ដែ៤៣%នៃប្រជាពលរដ្ឋទាំងនោះមិនដឹងថា មានការកាត់ទោសកាំងហ្គិច
អៀវហៅឌុច ដែលជាអតីតប្រធានគុកទួលស្លែងដ៏ទារុណនោះទេ។ ឌុចបានឆ្លង
កាត់ការកាត់ទោសមុនគេ អស់រយៈពេលជាច្រើនខែ ក្នុងចំណោមជនសង្ស័យ
ចំនួន៥នាក់ដែលទទួលខុសត្រូវចំពោះការស្លាប់ប្រជាពលរដ្ឋខ្មែរជិតពីរលាន
នាក់។

លោកឡាស អលសិន មន្ដ្រីទំនាក់ទំនងផ្នែកច្បាប់របស់សាលាក្ដីខ្មែរក្រហមមាន
ប្រសាសន៍ថា សាលាក្ដីបានប្រឹងប្រែងធ្វើការផ្សព្វផ្សាយសម្រាប់ឲ្យប្រជាពលរដ្ឋ
ជាច្រើនយល់ដឹងអំពីតុលាការ ហើយអ្នកដែលមិនបានដឹងអំពីដំណើរការរបស់
តុលាការនេះមានចំនួនតិចតួចតែប៉ុណ្ណោះ។

« អ្នកដែលមិនបានយល់ដឹងអំពីតុលាការទាល់តែសោះនោះ មានចំនួនតិចតួច
មែនទែន។ ខ្ញុំអាចនិយាយបានថា យើងកំពុងធ្វើអ្វីៗទាំងអស់ដែលយើងអាចធ្វើ
ទៅបាន ដើម្បីឲ្យប្រជាពលរដ្ឋកម្ពុជាយល់ដឹងអំពីដំណើរការរបស់សាលាក្ដីខ្មែរ
ក្រហម។យើងបានបង្កើនការផ្សព្វផ្សាយអប់រំប្រជាជនគួរឲ្យកត់សម្គាល់កាលពី
ឆ្នាំទៅមិញ ហើយយើងនឹងបន្ដបង្កើនសកម្មភាពនេះបន្ថែមទៀត»។

លោកឡុង បញ្ញាវុធ មន្ដ្រីគម្រោងរបស់អង្គការគម្រោងយុត្តិធម៌នៅកម្ពុជា អធិ-
ប្បាយថា ប្រជាពលរដ្ឋ អ្នករងគ្រោះដោយរបបខ្មែរក្រហមអាចទទួលបានយុត្តិ-
ធម៌ពេញបរិបូរ ប្រសិនបើសាលាក្ដីខ្មែរក្រហមបានបំពេញតួនាទីសំខាន់ៗចំនួន
២។

«ចំណុចទី១គឺសវនាការត្រូវតែរហ័ស ត្រូវធ្វើជាសាធារណៈ ត្រូវគោរពសិទ្ធិជន
ជាប់ចោទ។ បញ្ហាទី២ដែលសំខាន់គឺថា ប្រជាពលរដ្ឋភាគច្រើនត្រូវតែយល់ដឹង
អំពីនីតិវិធី»។

យោងតាមលោកឡាស អលសិន មន្ដ្រីទំនាក់ទំនងផ្នែកច្បាប់របស់សាលាក្ដីខ្មែរ
ក្រហម បានឲ្យដឹងថា មានប្រជាជនកម្ពុជាបានមកទស្សនាការកាត់ទោសឌុច
នាពេលកន្លងទៅចំនួន៣១.០០០នាក់។ ហើយគ្រាន់តែបីខែដើមឆ្នាំនេះមានប្រ-
ជាជនជាង៤.០០០នាក់បានមកទស្សនាសាលាក្ដីខ្មែរក្រហម។

ក៏ប៉ុន្ដែលោកឡុង បញ្ញាវុធមានប្រសាសន៍ថា សាលាក្ដីខ្មែរក្រហមនៅតែស្ថិតនៅ
ឆ្ងាយពីប្រជាពលរដ្ឋកម្ពុជានៅឡើយ។

លោក ឡាស អលសិន បញ្ជាក់ថា ថវិកាថ្មីចំនួន៨៥លានដុល្លារអាមេរិក ដែល
ប្រទេសចាប់អារម្មណ៍នឹងសាលាក្ដីខ្មែរក្រហម ទើបនឹងអនុម័តសម្រាប់ដំណើរ
ការទៅមុខរយៈពេល២ឆ្នាំទៀតនោះ ក៏នឹងជួយឲ្យមានការពង្រឹងពង្រីកការផ្សព្វ
ផ្សាយអប់រំដល់ប្រជាពលរដ្ឋកម្ពុជាអំពីសាលាក្ដីខ្មែរក្រហមបន្ថែមទៀត៕

អត្ថបទ​ទាក់ទង

XS
SM
MD
LG