វិនិយោគទុនវៀតណាម កើនឡើងចុងក្រោយនេះ

លំហូរវិនិយោគទុនវៀតណាម បានកើនឡើងយ៉ាងគំហុកក្នុងរយៈពេលចុង
ក្រោយនេះ ដែលធ្វើឲ្យវៀតណាមឈរក្នុងលំដាប់ប្រទេសប្រកួតប្រជែងធំៗនៅ
ប្រទេសកម្ពុជា។ អ្នកជំនាញការសេដ្ឋកិច្ចនិយាយថា កត្តាសេដ្ឋកិច្ចនិងនយោ
បាយរបស់ខ្មែរបានញុំាងឲ្យវៀតណាមសម្រុកបោះទុនវិនិយោគនៅកម្ពុជា។

រហូតមកដល់ខែសីហាឆ្នាំ២០០៩នេះ ប្រទេសវៀតណាមបានបង្កើនគម្រោង
វិនិយោគរបស់ខ្លួនចូលមកកាន់ប្រទេសកម្ពុជារហូតដល់ទៅ៥៣៤លានដុល្លា
អាមេរិកាំង។កំណើនបណ្តាក់ទុនចុងក្រោយនេះបានធ្វើឲ្យប្រទេសវៀតណាម
ក្លាយជាដៃគូបណ្តាក់ទុនយ៉ាងសំខាន់មួយរបស់ខ្មែរនិងឈរក្នុងលំដាប់ប្រកួត
ប្រជែងជាមួយប្រទេស ដែលបោះទុនវិនិយោគច្រើនបំផុតនៅកម្ពុជាដូចជា ចិន
កូរ៉េ និង រុស្ស៊ីជាដើម ខណៈពេលបណ្តាប្រទេសធ្លាប់ជាដៃគូវិនិយោគសំខាន់ៗ
ទាំងនេះ មិនមានគម្រោងវិនិយោគធំៗនៅកម្ពុជាទេ រហូតមកដល់ពេលនេះ។
ក្រុមអ្នកវិភាគសេដ្ឋកិច្ចនិយាយថា ការសម្រុកបោះទុនយ៉ាងគំហុករបស់វិនិ-
យោគគិនវៀតណាមជាលើកដំបូងនេះ ដោយសារតែកត្តាសេដ្ឋកិច្ច និងឥទ្ធិពល
នៃទំនាក់ទំនងនយោបាយស៊ីជម្រៅរវាងប្រទេសក្បែរខាងទាំងពីរនេះ។

លោក ចាន់ សុផល ប្រធានសមាគមអ្នកសេដ្ឋកិច្ចកម្ពុជា បាននិយាយថា ការ
ជម្រុញការវិយោគមកកាន់ប្រទេសកម្ពុជារបស់ក្រុងហាណូយ ក៏ព្រោះតែប្រទេស
កម្ពុជាមានលក្ខណៈទូលាយសម្រាប់ការវិនិយោគជាងនៅប្រទេសវៀតណាម។

“ទីផ្សារគេចង្អៀត អ្នករកស៊ីច្រើន។ គេពិបាកប្រកួតប្រជែង។ គេអត់មានសល់
ដីទំនេរចោលដូចយើងទេ។ ដូច្នេះគេក្រឡេកមកឃើញថា យើងជាប្រទេសជិត
ខាង យើងមានដីទំនេរច្រើន ។ គេសម្លឹងមកឃើញសុទ្ធតែឱកាសល្អៗមកវិនិ-
យោគប្រទេសយើង”។

ម្យ៉ាងវិញទៀត លោក ចាន់ សុផលបន្ថែមថា ដោយសារប្រទេសធំៗបង្អាក់
សកម្មភាពវិនិយោគ ព្រោះតែវិបត្តិសេដ្ឋកិច្ចបានធ្វើឲ្យកម្រិតនៃប្រកួតប្រជែង
ធ្វើអាជីវកម្មមានតិចតួច ដែលផ្តល់លក្ខណៈកាន់តែងាយស្រួលសម្រាប់ប្រទេស
វៀតណាមក្នុងការបោះទុនវិនិយោគ ជាងឆ្នាំមុនៗ។

តួលេខផ្លូវការរបស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា វៀតណាមបាន
បណ្តាក់ទុនវិនិយោគនៅកម្ពុជា ក្នុងចំនួនតែ ២០លានដុល្លាប៉ុណ្ណោះកាលពីឆ្នាំ
២០០៨។ ហើយជាបន្ដបន្ទាប់ មានក្រុមហ៊ុនវៀតណាមកាន់តែច្រើនបានចាប់
អារម្មណ៍បណ្តាក់ទុនវិនិយោគនៅកម្ពុជាដែលធ្វើឲ្យគម្រោងទុនវៀតណាមបាន
កើនដល់ ៥៣៤ លានដុល្លានៅជិតដំណាច់ឆ្នាំ២០០៩នេះ។

គួរកត់សម្គាល់ថា ចាប់តាំងពីឆ្នាំ២០០៥មក វៀតណាមបានផ្តោតការវិនិយោគ
ទៅលើវិស័យជាច្រើនដូចជា អាជីវកម្មរុករករ៉ែ វារីអគ្គិសនី ទូរគមនាគមន៍ និង
ដំណាំកៅស៊ូ។ ហើយចុងក្រោយនេះ វៀតណាមបានពង្រីកការវិនិយោគទៅលើ
វិស័យធនាគារ អាកាសចរណ៍ និងកសិកម្ម ដែលជាផ្នែកមួយនៃជន្ទល់ទ្រទ្រង់
សេដ្ឋកិច្ចដ៏សំខាន់របស់កម្ពុជា។

ធនាគារធំបំផុតមួយរបស់វៀតណាមគឺធនាគារវិនិយោគនិងអភិវឌ្ឍន៍វៀតណាម
BIDV ដែលទើបបើកដំណើរការនៅស្រុកខ្មែរនាចុងខែកក្កដា ជាមួយនឹងដើម
ទុនដំបូង ១០០ លានដុល្លា នឹងផ្តោតការផ្តល់ឥណទានទៅលើគ្រប់វិស័យ ជា-
ពិសេសកសិកម្ម។ ដំណាលគ្នានោះ វៀតណាមបានចូលហ៊ុនវិនិយោគជាមួយ
រដ្ឋាភិបាលកម្ពុជាដើម្បីការបើកក្រុមហ៊ុនអាកាសចរណ៍ជាតិកម្ពុជា“កម្ពុជាអង្គរ
អ៊ែរ” ដោយមានភាគទុន៤៩លានដុល្លា។ គឺបន្ទាប់ពីការចរចាបង្កើត ក្រុមហ៊ុន
អាកាសចរណ៍រវាងរដ្ឋាភិបាលខ្មែរនិងជាមួយក្រុមហ៊ុនបរទេសមកពីឥណ្ឌូណេស៊ី
ត្រូវបរាជ័យ។

កាលពីសប្តាហ៍មុន ប្រទេសវៀតណាមបានបោះទុនវិនិយោគចំនួន៤២០លាន
ដុល្លាទៅលើគម្រោងកសិកម្មចំនួន ១៣ រួមបញ្ចូលទាំងការបើករោងចក្រសម្ងួត
និងផលិតអង្ករ សម្រាប់នាំចេញ រោងចក្រស្ករស រោងចក្រអេតាណុលរោងចក្រ
ផលិតអគ្គិសនី និងដាំកៅស៊ូជាដើម។

លោក ចាប សុថារិទ្ធ អ្នកស្រាវជ្រាវសេដ្ឋកិច្ចជាន់ខ្ពស់នៃ វិទ្យាស្ថានសហប្រតិ-
បត្តិការដើម្បីសន្តិភាពនិយាយថា ការវិនិយោគនៅស្រុកខ្មែរមិនត្រឹមតែធ្វើឲ្យ
វៀតណាមមានលទ្ធភាពពង្រីក ទីផ្សារលក់ផលិតផលប៉ុណ្ណោះទេ តែថែមទាំង
ផ្តល់ចំណេញលើថ្លៃដឹកជញ្ជូននិងពន្ធដារ ច្រើនជាងការនាំចូលផលិតផល
សម្រេចមកកម្ពុជាទៀតផង។ ដូច្នេះ ចាប់ពីពេលនេះតទៅវៀតណាមនឹងយក
កម្ពុជាជាទិសដៅវិនិយោគទី១របស់ខ្លួន។

“វៀតណាមសម្លឹងកម្ពុជាជាមុខព្រួញទី១នៃការវិនិយោគរបស់គេ អីចឹងគេត្រូវតែ
ដាក់ទុនជាគំហុក”។

ក្រៅពីអំណោយផលផ្នែកសេដ្ឋកិច្ចទាំងនេះ កត្តានយោបាយក៏ជាឥទ្ធិពលទាក់
ទាញវិនិយោគមកពីវៀតណាមដែរ។

លោកចាន់ សុផលនិយាយថា ទំនាក់ទំនងនយោបាយស៊ីជម្រៅជាប្រវត្តិសាស្ត្រ
រវាងកម្ពុជា និងវៀតណាម និងការជឿទុកចិត្តគ្នារវាងមេដឹកនាំនៃប្រទេសទំាង
ពីរ បានធ្វើឲ្យវិនិយោគគិនវៀតណាមមានទំនុកចិត្តក្នុងការបណ្តាក់ទុនវិនិយោគ
នៅកម្ពុជា។

លោក ឈាង ម៉េងហៀក សាស្ត្រាចារ្យសេដ្ឋកិច្ច និងហិរញ្ញវត្ថុនៃសាកលវិទ្យា
ល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច ក៏យល់ឃើញដូចគ្នានេះដែរ។
ហើយលោកមានប្រសាសន៍ថា វៀតណាមមានទំនុកចិត្តក្នុងការវិនិយោគនៅ
កម្ពុជា មួយផ្នែកដោយសារការពឹងផ្អែកលើទំនាក់ទំនងនយោបាយ ដែលអាច
ការពារពួកគេបាន។

“យកទំនាក់ទំនងមកធ្វើជាទុនការពារផលប្រយោជន៍” ។

លោកLee Bien Cuongទីប្រឹក្សាពាណិជ្ជកម្មនៃស្ថានទូតវៀតណាមប្រចាំកម្ពុជា
បានទទួលស្គាល់ថា សម្ព័ន្ធនយោបាយដ៏ជិតដិតនិងយូរអង្វែងរវាងកម្ពុជា និង
វៀតណាមពិតជាបានជម្រុញឲ្យវិនិយោគគិនវៀតណាមកាន់តែច្រើន ហ៊ានបោះ
ទុនវិនិយោគនៅកម្ពុជាប្រាកដមែន។

គួរបញ្ជាក់ថា ទំនាក់ទំនងជិតស្និទ្ធរវាងប្រទេសកម្ពុជានិងវៀតណាម បានកើត
មានឡើងបន្ទាប់ពីថ្ងៃរំដោះប្រទេសកម្ពុជាពីរបបខ្មែរក្រហម។ទំនាក់ទំនាក់រវាង
ប្រទេសទាំងពីរ ត្រូវអ្នកសេដ្ឋកិច្ចមើលឃើញថា កាន់តែស្និទ្ធស្នាលខ្លាំងឡើង
ស្របពេលដែលទំនាក់ទំនងរវាងកម្ពុជា និង ថៃ រងភាពរង្គោះរង្គើ។ ប្រទេស
វៀតណាមនិងកម្ពុជា កាលពីពេលថ្មីៗនេះ បានបើកច្រកព្រំដែន៦ ទៀតបន្ថែម
ពីលើច្រកបាវិត ខេត្តស្វាយរៀងដើម្បីពង្រីកទំនាក់ទំនងពាណិជ្ជកម្មទ្វេភាគី។
វៀតណាមគ្រោងបង្កើនលំហូរប្រាក់ពាណិជ្ជកម្មជាមួយកម្ពុជា ពីជាង៦៣០លាន
ដុល្លានៅពាក់កណ្តាលឆ្នាំ២០០៩នេះ រហូតដល់ ២ពាន់លានដុល្លានៅដំណាច់
ឆ្នាំ ២០១០។

លោកយឹម សុវណ្ណ តំណាងរាស្ត្រមកពីគណបក្សសម រង្ស៊ីបានបង្ហាញក្តីកង្វល់
ថា ដោយសារឥទ្ធិពលនយោបាយ វិនិយោគគិនវៀតណាមប្រហែលជាទទួល
បានការអនុគ្រោះក្នុងការបោះទុនវិនិយោគ ហើយវានឹងនាំមកនូវការខាតបង់
ផ្នែកសេដ្ឋកិច្ច។

“កាលណាមានឥទ្ធិពលនយោបាយគ្របដណ្តប់ពីលើសេដ្ឋកិច្ច ប្រាកដជាខាត
បង់ហើយ ព្រោះយើងមិនមានការប្រណាំងប្រជែង ។ យើងប្រគល់ផ្តាច់មុខ
ដោយគ្មានការប្រណាំងប្រជែង។ អាហ្នឹងជាការមួយខាតបង់”។

ក៏ប៉ុន្តែ លោក សុខ ចិន្តា អគ្គលេខាធិការនៃក្រុមប្រឹក្សាអភិវឌ្ឍន៍កម្ពុជាបានអះ
អាងថា គ្រប់វិនិយោគទាំងអស់គឺធ្វើឡើងទៅតាមច្បាប់ ដោយមិនមានប្រទេស
ណាមួយទទួលការអនុគ្រោះជាពិសេសនោះទេ ។ ពោលគឺគ្រប់ប្រទេសដែល
ចង់មកវិនិយោគនៅកម្ពុជា នឹងទទួលបានការលើកទឹកចិត្តស្មើៗគ្នា។

ជាមួយគ្នានេះដែរ លោក ផៃ ស៊ីផាន រដ្ឋលេខាធិការទីស្តីការគណៈរដ្ឋមន្ត្រីមាន
ប្រសាសន៍ថា រដ្ឋាភិបាលបានបង្កើតឲ្យមានបរិយាកាសវិនិយោគល្អនិងបង្កើត
ឲ្យមានតុល្យភាពផ្នែកនយោបាយសម្រាប់វិនិយោគគិន។

“គឺយើងធ្វើឲ្យមានតុល្យភាពទាំងខាងលិច ទាំងខាងកើត ទាំងប្រទេសដែលនៅ
តែប្រកាន់របបសង្គមនិយម ក៏ដូចជាប្រទេសកុម្មុយនិស្ត មិនមែនតែប្រទេស
វៀតណាមទេ សូម្បីតែចិនក៏នៅក្នុងហ្នឹង សូម្បីតែបាំរាំងក៏មានសូម្បីសហរដ្ឋ
អាមេរិកក៏មាន”។

យ៉ាងណាក៏ដោយ ក្រុមអ្នកសេដ្ឋកិច្ចទាំងអស់ខាងលើបានយល់ស្របគ្នាថាការ
វិនិយោគពីប្រទេសណាក៏ដោយ ឲ្យតែត្រឹមត្រូវតាមច្បាប់នឹងផ្តល់ផលចំណេញ
ដល់សេដ្ឋកិច្ច តាមរយៈការបង្កើតការងារ និងការបង់ពន្ធចូលរដ្ឋជាដើម៕ ចប់