ថ្នាក់ដឹកនាំគណបក្សសង្គ្រោះជាតិបានប្រកាសនៅថ្ងៃសុក្រនេះពីការរក្សាគម្រោងវិលត្រឡប់ទៅប្រទេសកម្ពុជាវិញ តាមផែនការដើម គឺថ្ងៃទី៩ ខែវិច្ឆិកា បើទោះបីជាមានបញ្ហាកើតឡើងចំពោះលោកសម រង្ស៊ី ដោយមិនអាចឡើងជិះយន្តហោះឆ្ពោះទៅប្រទេសថៃ កាលពីថ្ងៃព្រហស្បតិ៍ក៏ដោយ។
រីឯអ្នកគាំទ្រគណបក្សសង្គ្រោះជាតិនៅសហរដ្ឋអាមេរិកបានធ្វើដំណើរទៅដល់ប្រទេសថៃរួចជាស្រេចហើយ។
មានមន្ត្រីបក្សនិងអ្នកគាំទ្រចំនួនជិត២០០នាក់បានសម្រេចធ្វើដំណើរទៅកម្ពុជាតបតាមការអំពាវនាវរបស់លោកសម រង្ស៊ី ប្រធានស្តីទីគណបក្សសង្គ្រោះជាតិ ក្នុងពេលកន្លងមក។ នេះបើតាមការបញ្ជាក់របស់មន្ត្រីគណបក្សដោយផ្អែកលើបញ្ជីឈ្មោះផ្លូវការ។
លោកអ៊ុង រិទ្ធី ប្រធានគណបក្សសង្គ្រោះជាតិអាមេរិកាំង បានបញ្ជាក់ថា ក្រុមមន្ត្រីបក្សមានការត្រៀមលក្ខណៈប្រឈមនឹងបញ្ហា ដែលអាចនឹងកើតមានឡើង នៅពេលដែលពួកគេទៅដល់ប្រទេសកម្ពុជា ដោយសារតែអាជ្ញាធរកម្ពុជាបានគំរាមចាប់ខ្លួនអ្នកដែលចូលរួមហែរហមដំណើរនិវត្តន៍របស់លោកសម រង្ស៊ី។
«រឿងការបារម្ភយើងតែងតែមានគ្រប់ៗគ្នា ព្រោះអ្វីដែលយើងធ្វើសព្វថ្ងៃ គឺយើងលះបង់។ យើងដាច់ខាតធ្វើការងាររហូតដល់លទ្ធិប្រជាធិបតេយ្យបានដល់ទិសដៅពិតៗរបស់យើង។ អីចឹងយើងត្រៀមរួចស្រេចនូវអ្វីៗដែលអាចកើតមានឡើង ហើយក៏មិនអាចកើតមានឡើងផងដែរ»។
លោកអ៊ុង រិទ្ធី បានបញ្ជាក់ប្រាប់វីអូអេ នៅមុនពេលចាកចេញពីសហរដ្ឋអាមេរិកកាលពីថ្ងៃពុធថា លោកមិនអាចបញ្ជាក់ច្បាស់ថានឹងបន្តស្នាក់នៅប្រទេសកម្ពុជារយៈពេលប៉ុន្មាននោះទេ។
«យើងពឹងផ្អែកទៅលើសភាពការណ៍ជាក់ស្តែង។ នេះគឺជាគម្រោងការដែលយើងត្រៀម ហើយគ្រប់ថ្នាក់ដឹកនាំម្នាក់ៗចាត់ចែងភារកិច្ចរៀងៗខ្លួន ហើយដំណាក់កាលយូរឆាប់ វាអាស្រ័យលើសភាពការណ៍ជាក់ស្តែងកើតឡើងពេលដែលយើងទៅដល់ប្រទេសកម្ពុជារបស់យើង»។
លោកជា គឹមលី អនុប្រធានគណបក្សសង្គ្រោះជាតិអាមេរិក បានបញ្ជាក់ប្រាប់វីអូអេដែរថា៖
«គម្រោងការយើង យើងបានសម្រេចរួចហើយទោះបីជាក្នុងល្គឹកណាក៏ដោយ យើងនឹងនាំគ្នាទៅកាន់មាតុភូមិយើងវិញ ព្រោះជាផ្ទះរបស់យើង។ យើងមានសិទ្ធិហើយយើងត្រូវតែចូលវិញ»។
លោកសម រង្ស៊ី ប្រធានស្តីទីគណបក្សសង្គ្រោះជាតិ បានប្រកាសពន្យារដំណើរមាតុភូមិនិវត្តន៍ក្រោយពីក្រុមហ៊ុនអាកាសចរណ៍ថៃ (Thai Airways) បានទទួលបញ្ជាពីថ្នាក់លើមិនឱ្យលោកឡើងយន្តហោះ ដើម្បីធ្វើដំណើរទៅប្រទេសកម្ពុជាតាមច្រកប្រទេសថៃ។ ប៉ុន្តែលោកបានបញ្ជាក់ប្រាប់វីអូអេថា លោកមិនផ្លាស់ប្តូរគម្រោងវិលត្រឡប់ទៅកម្ពុជាវិញ នៅថ្ងៃទី៩ ខែវិច្ឆិកាទេ ដោយលោកត្រូវទិញសំបុត្រយន្តហោះថ្មីដើម្បីទៅប្រទេសជិតខាងមួយថ្មីសម្រាប់ធ្វើមាតុភូមិនិវត្តន៍ឱ្យបាន។ ប៉ុន្តែលោកមិនបញ្ជាក់ថាប្រទេសមួយណានោះទេ។
«ខ្ញុំបានសម្រេចជាមួយថ្នាក់ដឹកនាំគណបក្សសង្គ្រោះជាតិ សហការីរបស់ខ្ញុំ គឺយើងអត់មានការប្រែប្រួលទេគឺយើងឆ្ពោះទៅ គោលដៅរបស់យើងដូចយើងបានគ្រោងទុកជាមុនគ្រាន់តែយើងប្តូរផ្លូវ តែផ្លូវហ្នុងយើងមិនទាន់ប្រាប់មុនទេ ចាំទៅគឺទៅដល់ហ្មង បើប្រាប់មុនវាខូចការណ៍»។
នៅក្នុងសារតាមឃ្លីបវីដេអូជូនជនរួមជាតិ ដែលបង្ហោះតាមហ្វេសប៊ុកផ្ទាល់ខ្លួនលោកសម រង្ស៊ី បានប្រកាសថា៖
«ដូច្នេះសូមបងប្អូនជនរួមជាតិកុំតក់ស្លុត។ សូមបងប្អូនជនរួមជាតិរក្សាកម្លាំងចិត្តឱ្យនៅរឹងមំា។ អ្វីដែលយើងបានធ្វើមកទល់សព្វថ្ងៃ គឺយើងបានទទួលជោគជ័យ៧០ភាគរយហើយ»។
លោកសម រង្ស៊ី បានប្រកាសថា នឹងទៅចាប់លោកនាយករដ្ឋមន្ត្រីហ៊ុន សែន យកទៅកាត់ទោសដោយសារតែការដឹកនាំក្នុងរយៈពេលជាង៣០ឆ្នាំមកនេះ បានធ្វើឱ្យប្រទេសកម្ពុជាខូចខាតធនធានធម្មជាតិ បាត់បង់អធិបតេយ្យភាពនិងពុករលួយបក្សពួកនិយម។
អាជ្ញាធរកម្ពុជាបានចាត់វិធានការត្រៀមទប់ស្កាត់នៅតាមច្រកព្រំដែននានា ដោយមានដាក់ពង្រាយកម្លាំងប្រដាប់អាវុធបំពាក់ដោយអាវុធទំនើបៗ។ ទន្ទឹមនឹងនោះអាជ្ញាធារកម្ពុជាក៏បានធ្វើសកម្មភាពការទូត ដើម្បីរារាំងដំណើរនិវត្តន៍នេះផងដែរ។ រដ្ឋាភិបាលកម្ពុជាបានអះអាងថា វត្តមានរបស់លោកសម រង្ស៊ី នៅក្នុងប្រទេសកម្ពុជានឹងបង្កអស្ថិភាពដល់សន្តិភាពនិងការអភិវឌ្ឍ។
លោកសម រង្ស៊ី បានបញ្ជាក់បន្ថែមថា លោក«ហួសចិត្ត» ចំពោះវិធានការទប់ស្កាត់នេះព្រោះអាជ្ញាធរបានប្រកាសតាមចាប់ខ្លួនលោកនិងថ្នាក់ដឹកនាំព្រមទាំងសកម្មជន២០នាក់ទៀត។
«ថ្ងៃនេះ គេបានបង្ហាញថា គេខ្លាចសម រង្ស៊ីមែនទែន។ ខ្លាចសម រង្ស៊ីខ្លាចវត្តមានសម រង្ស៊ី។ ខ្លាចថ្នាក់ដឹកនាំគណបក្សសង្គ្រោះជាតិ។ ខ្លាចកម្លាំងប្រជារាស្ត្រដឹកនាំដោយគណបក្សសង្គ្រោះជាតិ។ នេះហើយជាជ័យជម្នះរបស់យើង»។
លោកស្រីមូរ សុខហួរ អនុប្រធានគណបក្សសង្គ្រោះជាតិ កំពុងតែស្ថិតនៅក្នុងទីក្រុងគូឡាឡំពួរ ប្រទេសម៉ាឡេស៊ី បន្ទាប់ពីជួបបញ្ហាខ្លះៗ ដោយសារត្រូវបានប៉ូលិសអន្តោប្រវេសន៍ម៉ាឡេស៊ីឃាត់ខ្លួនរយៈពេលជិត២០ម៉ោង មុនពេលត្រូវបានអនុញ្ញាតឱ្យចូលទៅក្នុងប្រទេស។
លោកស្រី មូរ សុខហួរ បានបញ្ជាក់ប្រាប់វីអូអេថា ក្រុមអ្នកគាំទ្រនិងថ្នាក់ដឹកនាំគណបក្ស នឹងចូលទៅប្រទេសកម្ពុជាតាមច្រកប៉ោយប៉ែតនៅព្រំដែនខ្មែរ-ថៃ ដូចផែនការលើកមុនដដែល។
«ខ្ញុំសូមយកឱកាសនេះ ជម្រាបបងប្អូនប្រជាពលរដ្ឋទាំងអស់ជាពិសេសពលករចំណាកស្រុកនៅតាមព្រំប្រទល់ខ្មែរថៃនេះ ផែនការរបស់យើងដែលយើងដាក់កំណត់ថាធ្វើមាតុភូមិនិវត្តន៍ថ្ងៃទី៩ វិច្ឆិកា គឺនៅដដែល ហើយចូលតាមផ្លូវព្រំប្រទល់ខ្មែរថៃនៅតែដដែល»។
សម្រាប់អ្នកគាំទ្រគណបក្សសង្គ្រោះជាតិដែលនៅសហរដ្ឋអាមេរិកក៏នឹងមិនដកថយដែរ។ នេះបើតាមការអះអាងរបស់មន្ត្រីគណបក្ស។
អ្នកដឹកនាំមួយចំនួននឹងទៅជួបមន្ត្រីក្រសួងការបរទេសសហរដ្ឋអាមេរិក នៅថ្ងៃសុក្រនេះ និងក៏មានគម្រោងជួបជុំគ្នាតវ៉ានៅរដ្ឋសភាសហរដ្ឋអាមេរិក ដើម្បីលើកទឹកចិត្តពលរដ្ឋកម្ពុជាឱ្យចេញមកស្វាគមន៍លោកសម រង្ស៊ីនិងថ្នាក់ដឹកនាំផងដែរ។
លោកស្រី ធិត គឹមហ៊ុន ប្រធានចលនាស្រ្តីនៃគណបក្សសង្គ្រោះជាតិអាមេរិកាំងបានបញ្ជាក់ប្រាប់វីអូអេថា៖
«យើងដឹងហើយថាពេលនេះជាពេលដែលក្តៅគគុកដែលព្រឹត្តិការណ៍នៅពេលឥឡូវនេះនៅតាមកន្លែងនានា គឺយើងមានសម្ពាធ ប៉ុន្តែទោះបីជាយើងមានការហត់នឿយយ៉ាងណា ក៏យើងត្រូវខំប្រឹងធ្វើ ជាពិសេសនៅខាងសហរដ្ឋអាមេរិកនៅខាងសភាអាមេរិកាំង ក៏ដូចជាព្រឹទ្ធសភាអាមេរិកាំងបានឃើញថា យើងពិតជាចង់ឃើញនូវការផ្លាស់ប្តូរនៅថ្ងៃទី៩ វិច្ឆិកានេះ ហើយឱ្យមានការដាក់សម្ពាធទៅលើរដ្ឋាភិបាលផ្តាច់ការ ដែលប្រើរូបភាពសម្លុតនិងសម្លាប់ប្រជាពលរាស្ត្រខ្មែរ»។
មន្ត្រីស្ថានទូតសហរដ្ឋអាមេរិកប្រចាំប្រទេសកម្ពុជា និងមន្ត្រីក្រសួងការបរទេសសហរដ្ឋអាមេរិកនៅមិនទាន់ឆ្លើយតបតាមការសាកសួររបស់វីអូអេនៅឡើយទេ នៅថ្ងៃព្រហស្បតិ៍នេះ៕
