ក្រុមសកម្មជននិងអង្គការក្រៅរដ្ឋាភិបាលខ្មែរអាមេរិកក្នុងតំបន់ជុំវិញរដ្ឋធានីវ៉ាស៊ីនតោន គ្រោងនឹងរៀបចំពិធីជួបជុំពិភាក្សាគ្នាមួយនៅឯបណ្ណាល័យសាធារណៈ Cleveland Park Library ក្នុងរដ្ឋធានីវ៉ាស៊ីនតោននៅថ្ងៃអាទិត្យ ទី៩ ខែធ្នូ ឆ្នាំ២០១៨នេះ ដោយអំពាវនាវឱ្យរដ្ឋាភិបាលកម្ពុជា បំពេញកាតព្វកិច្ចរបស់ខ្លួនទៅតាមសេចក្ដីប្រកាសជាសកលស្ដីពីសិទ្ធិមនុស្ស។
គម្រោងជួបជុំគ្នានេះធ្វើឡើងតែមួយថ្ងៃ មុនពេលដែលកម្ពុជានិងបណ្ដាប្រទេសនានាទូទាំងពិភពលោក នឹងប្រារព្ធខួបលើកទី៧០ឆ្នាំនៃការប្រកាសឯកសារសន្ធិសញ្ញាសិទ្ធិមនុស្សអន្តរជាតិដ៏សំខាន់របស់អង្គការសហប្រជាជាតិមួយនេះនៅថ្ងៃទី១០ ធ្នូ។
លោក នាថបណ្ឌិត តាកែវ ឫទ្ធិពល ប្រធានសមាគមសង្គហប្រយោជន៍ជាតិយើង និងជាប្រធានអង្គការមហាសន្និបាតកំពូលខ្មែរឯនាយសមុទ្រ បានមានប្រសាសន៍ក្នុងបទសម្ភាសន៍តាមទូរស័ព្ទជាមួយវីអូអេកាលពីថ្ងៃព្រហស្បតិ៍ថា កម្ពុជា នៅមិនទាន់បានបំពេញកាតព្វកិច្ចរបស់ខ្លួនឱ្យបានពេញលេញទៅតាមការចែងនៅក្នុងសេចក្ដីប្រកាសជាសកលស្ដីពីសិទ្ធិមនុស្សនេះទេ។
«ប្រទេសកម្ពុជាយើង ជាពិសេសក្នុងកាលៈទេសៈបច្ចុប្បន្ននេះ មានការខ្វះខាតជាច្រើនចំណុច ច្រើនមាត្រាណាស់ ដូចជាការធានាឱ្យមានសិទ្ធិក្នុងការរស់នៅជាមនុស្សហើយនិងសិទ្ធិមនុស្សជាពលរដ្ឋក្នុងការអនុវត្តគំនិតនយោបាយនិងទស្សនៈនយោបាយជាដើម»។
សេចក្ដីប្រកាសជាសកលស្ដីពីសិទ្ធិមនុស្ស ត្រូវបានមហាសន្និបាតអង្គការសហប្រជាជាតិអនុម័តនាទីក្រុងប៉ារីស កាលពីថ្ងៃទី១០ ខែធ្នូ ឆ្នាំ១៩៤៨ គឺបីឆ្នាំក្រោយពីការបញ្ចប់ទៅនៃសង្គ្រាមលោកលើកទី២។
សេចក្តីប្រកាសជាសកលស្ដីពីសិទ្ធិមនុស្សនេះ មាន៣០មាត្រា ដែលមានគោលបំណងការពារសិទ្ធិរបស់មនុស្សគ្រប់គ្នា នៅគ្រប់ទីកន្លែង និងបង្ការការរំលោភបំពានសិទ្ធិនានា។
ប្រទេសកម្ពុជា បានប្រកាសនៅក្នុងរដ្ឋធម្មនុញ្ញរបស់ខ្លួនដោយទទួលស្គាល់ថា ខ្លួននឹងគោរពសិទ្ធិមនុស្សដូចមានចែងក្នុងសេចក្ដីប្រកាសជាសកលស្ដីពីសិទ្ធិមនុស្សនេះ។
ប៉ុន្តែ លោក ទូច វិបុល ប្រធានអង្គការសម្ព័ន្ធមិត្តខ្មែរអាមេរិកាំង ក្នុងសហរដ្ឋអាមេរិកនេះ បានមានប្រសាសន៍ថា រដ្ឋាភិបាលកម្ពុជា មិនបានបំពេញកាតព្វកិច្ចរបស់ខ្លួនឱ្យបានពេញលេញតាមការប្រកាសនេះទេ។
«គឺមាននៅលើក្រដាស ប៉ុន្តែការអនុវត្តភាពជាក់ស្ដែង យើងឃើញទាំងអស់គ្នាហើយគឺរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជាសព្វថ្ងៃនេះ គឺបានបរាជ័យហើយ បរាជ័យទៀតក្នុងការអនុវត្តឱ្យបានពេញលេញក្នុងការ គោរពសិទ្ធិមនុស្សនៅកម្ពុជា ឱ្យបានល្អប្រសើរជាងមុនៗ គឺថាយើងឃើញទាំងអស់គ្នាហើយ នៅមានកម្រិតនៅឡើយ»។
អស់រយៈពេលជាងមួយឆ្នាំកន្លងមកហើយ រដ្ឋាភិបាលកម្ពុជា បានរងការរិះគន់យ៉ាងច្រើនពីក្រុមអង្គការសង្គមស៊ីវិលជាតិនិងអន្តរជាតិ អំពីការរំលោភបំពានសិទ្ធិមនុស្សក្នុងប្រទេសកម្ពុជា រួមទាំងការគាបសង្កត់និងរឹតត្បិតសេរីភាពប្រព័ន្ធផ្សព្វផ្សាយព័ត៌មានឯករាជ្យ ក្រុមអង្គការសង្គមស៊ីវិល និងការបំបិទសិទ្ធិនយោបាយបក្សប្រឆាំងជាដើម។
ប៉ុន្តែ រដ្ឋាភិបាលកម្ពុជា កាលពីថ្ងៃចន្ទទី៣ ខែធ្នូនេះ បានចេញសេចក្ដីថ្លែងការណ៍មួយដោយបង្ហាញគោលជំហររបស់ខ្លួនក្នុងការអនុញ្ញាតឱ្យបុគ្គលដែលត្រូវបានហាមប្រាមសិទ្ធិធ្វើនយោបាយកន្លងមក ឱ្យមានសិទ្ធិអាចចាប់ផ្ដើមសកម្មភាពនយោបាយរបស់ពួកគេឡើងវិញបាន។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានមានប្រសាសន៍ប្រាប់វីអូអេក្នុងបទសម្ភាសន៍មួយតាមទូរស័ព្ទកាលពីថ្ងៃពុធថា រដ្ឋាភិបាលបានព្យាយាមបំពេញកាតព្វកិច្ចរបស់ខ្លួនទៅតាមរដ្ឋធម្មនុញ្ញកន្លងមក រួមទាំងការធ្វើវិសោធនកម្មចុងក្រោយទៅលើច្បាប់ស្ដីពីគណបក្សនយោបាយ ដើម្បីផ្ដល់សិទ្ធិនិងអំណាចដល់នាយករដ្ឋមន្ត្រី ដូចមានចែងក្នុងរដ្ឋធម្មនុញ្ញ។
«រឿងដែលសម្រេចកាលពីពេលថ្មីៗនេះ តាមរយៈការបញ្ជាក់ប្រាប់ពីគោលជំហរក្នុងកិច្ចការធ្វើវិសោធនកម្មច្បាប់មួយចំនួន គឺមានទិសដៅ ដើម្បីផ្ដល់បុព្វសិទ្ធិនិងអំណាចដល់នាយករដ្ឋមន្ត្រី ក្នុងការអនុវត្តទៅតាមរដ្ឋធម្មនុញ្ញដែលបានចែងថា នាយករដ្ឋមន្ត្រីមានបុព្វសិទ្ធិក្នុងការស្នើសុំដល់ព្រះមហាក្សត្រក្នុងការបន្ធូរបន្ថយឬលើកលែងទោសដល់ទណ្ឌិតណាមួយ»។
អ្នកស្រី មីសែល បាសែឡែត ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានមានប្រសាសន៍ក្នុងសេចក្ដីថ្លែងការណ៍របស់អ្នកស្រី ពីទីក្រុងហ្សឺណែវកាលពីថ្ងៃព្រហស្បតិ៍ថា «អ្វីដែលសេចក្ដីប្រកាសជាសកលស្ដីពីសិទ្ធិមនុស្ស ចង់បានគឺពិភពលោកមួយ ដែលទុក្ខវេទនាត្រូវបានកាត់បន្ថយ ហើយគ្មាននរណាម្នាក់ជាអ្នកមានទ្រព្យសម្បត្តិស្តុកស្តម្ភ ឬមានអំណាចពេក រហូតដល់ថ្នាក់អាចគេចវះពីយុត្តិធម៌បានឡើយ»៕
