ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​បង្ហាញ​ចេតនា​​ចង់​ចូលរួម​អនុសញ្ញា​ក្រុង​ Cape Town ពីអាកាសចរណ៍


លោក​ Michael​ ​Newbill​ (កណ្តាល) ​ភារធារី​ស្ថានទូត​អាមេរិក​នៅរាជធានី​​ភ្នំពេញ ថ្លែងទៅកាន់អ្នកសារព័ត៌មាននៅក្នុងសិក្ខាសាលា​ស្តី​ពី​«អាកាស​ចរណ៍​ ​និង​អនុ​សញ្ញា​ទីក្រុង​ ​Cape​ ​Town»​ ​រាជធានី​ភ្នំពេញ ថ្ងៃទី២២ ខែកុម្ភៈ ឆ្នាំ២០១៩។ (រូបថត៖ US Embassy of Phnom Penh)

មន្ត្រី​រដ្ឋាភិបាល​កម្ពុជា​​បាន​បង្ហាញ​នូវ​ចេតនា​នៃ​ការ​ចង់​នាំ​ប្រទេស​កម្ពុជា​ចូលរួម​ជា​ប្រទេស​ហត្ថលេខី​នៃ​អនុ​សញ្ញា​ក្រុង​ ​Cape Town ​ដែល​អាច​អនុញ្ញាត​ឱ្យ​វិស័យ​អាកាសចរណ៍​កម្ពុជា​ចូលរួម​​និយាម​ការ​អន្តរជាតិ​លើ​ផ្នែក​​គុណភាព​និង​បច្ចេកទេស​លើ​គ្រឿង​បរិក្ខារ​ ​និង​ចរាចរណ៍​ផ្លូវ​អាកាស។

មន្ត្រី​ជាន់ខ្ពស់​នៃ​រដ្ឋលេខាធិការ​ដ្ឋាន​អាកាសចរណ៍​ស៊ីវិល​ ​នៅ​ថ្ងៃសុក្រ​នេះ​ ​បាន​ឲ្យ​ដឹង​ពី​ការ​ចង់​ចូលរួម​របស់​កម្ពុជា​ក្នុង​អនុ​សញ្ញា​ក្រុង​ ​Cape Town ​ដែល​អាច​បើក​ផ្លូវ​ឲ្យ​ក្រុម​ហ៊ុន​អាកាសចរណ៍​កម្ពុជា​មាន​ភាព​ងាយ​ស្រួល​ក្នុង​ការទិញ​ ​ឬ​ជួល​យន្តហោះដើម្បី​បម្រើ​ដល់​សកម្មភាព​អាកាសចរណ៍​ស៊ីវិល​នៅ​ក្នុង​ប្រទេស។

ថ្លែង​ប្រាប់​ក្រុម​អ្នក​សារ​ព័ត៌មាន​នៅ​មុន​ពេល​ចាប់ផ្តើម​សិក្ខាសាលា​ស្តី​ពី​«អាកាស​ចរណ៍​ ​និង​អនុ​សញ្ញា​ទីក្រុង​ ​Cape​ ​Town»​ រៀប​ចំ​ឡើង​ដោយ​ស្ថាន​ទូត​សហរដ្ឋ​អាមេរិក​ ក្នុង​រាជធានី​ភ្នំពេញ​ ​នៅ​រសៀល​ថ្ងៃ​សុក្រ​នេះ​ ​លោក​ ​ស៊ិន ចាន់សេរីវុត្ថា​ អ្នក​នាំ​ពាក្យ​រដ្ឋ​លេខាធិការ​ដ្ឋាន​អាកាសចរណ៍​ស៊ីវិល​ ​មាន​ប្រសាសន៍​ថា​ ​កម្ពុជា​ចង់​ចូល​រួម​អនុ​សញ្ញា​ក្រុង​ ​Cape Town​ ​ដែល​មាន​សារៈសំខាន់​ដល់​វិស័យ​អាកាសចរណ៍​ស៊ីវិល​នៅ​កម្ពុជា។​

«Cape Town convention ​[អនុញ្ញា​ក្រុង​ Cape Town] ​នេះមាន​សារៈសំខាន់​ណាស់​សម្រាប់​ប្រទេស​ជា​សមាជិក​ ជាពិសេស​គឺ​ប្រទេស​កម្ពុជា​យើង​ ដែលវិស័យ​អាកាស​ចរណ៍​ស៊ីវិល​យើង​កំពុងតែ​រីកចម្រើន។ ​បាទ​ ដូច​គាត់​មាន​ប្រសាសន៍​អ៊ីចឹង​គឺ​ Cape Town convention​ ហ្នឹង​បាន​ផ្តល់អត្ថ​ប្រយោជន៍​មក​ដល់​ប្រទេស​ជា​សមាជិក​ ដូច​ជា​ការ​ជួល​យន្តហោះ​ធូរ​ថ្លៃ​ ការ​រក​យន្ត​ហោះ​ក៏​ងាយ​ស្រួល​ ហើយ​នឹង​ការ​ទំនាក់​ទំនង​ដើម្បី​ទទួល​បាន​នូវ​យន្តហោះក៏ស្រួល​ដែរ។​ ហើយ​ម៉្យាង​ទៀត​ យើង​ធ្លាប់​មាន​បញ្ហា​ប្រឈម​ពីមុនៗ​ មក​បាទ​ ដូច​ជាការ​ជួល​យន្ត​ហោះ​មក​អ៊ីចឹង​ ដោយ​សារ​យើង​អត់​បាន​ មិន​មែន​ជា​សមាជិក​ ​យើង​មាន​ការ​លំបាក​ក្នុង​ការ​ជួល​យន្តហោះ​ ហើយថ្លៃ​ទៀត»។​

យ៉ាងណា​ក៏​ដោយ​ ​កម្ពុជា​ត្រូវ​ការ​ពេលវេលា​ក្នុង​ការ​សិក្សា​ពី​តម្រូវការ​នានា​ ​ដែល​អាច​ឲ្យ​កម្ពុជា​បាន​ចូល​ជាសមាជិក​ក្នុង​អនុសញ្ញា​នេះ។​ នេះ​បើ​តាម​ការ​បញ្ជាក់​របស់​លោក​ស៊ិន ចាន់សេរីវុត្ថា។​

កម្ពុជា​មិន​ទាន់​ជា​ប្រទេស​ហត្ថលេខី​លើ​អនុសញ្ញា​ក្រុង​ ​Cape Town ​នេះ​ទេ។ ​ការ​អនុម័ត​លើ​អនុសញ្ញា​នេះអាច​អនុញ្ញាត​ឲ្យ​ក្រុមហ៊ុន​អាកាសចរណ៍​កម្ពុជា​ជួល​ឬ​ទិញ​យន្តហោះ​ ​និង​ឧទ្ធម្ភាគចក្របានតម្លៃ​ថោក​ ​ហើយ​នេះ​គឺ​ជា​អ្វី​ដែល​អាច​ពង្រឹង​វិស័យ​នេះ​ ​ហើយ​អនុញ្ញាត​ឲ្យ​ក្រុម​ហ៊ុន​ទាំង​នោះ​ទទួល​បាន​បច្ចេកទេស​ផ្នែក​អាកាសចរណ៍​ចុង​ក្រោយ​នៅ​លើ​ទីផ្សារ។ ​នេះ​បើ​តាម​សុន្ទរកថា​របស់​លោក ​Michael​ ​Newbill​ ​ភារធារី​ស្ថានទូត​អាមេរិក​នៅរាជធានីភ្នំពេញ។​

លោក​ភារធារី​ ​Michael​ ​Newbill​ ​បាន​ផ្តល់​ការ​កត់​សម្គាល់​ថា​ ​សេដ្ឋកិច្ច​របស់​ប្រទេស​កម្ពុជាក៏​កំពុងតែ​មាន​កំណើន​យ៉ាង​ឆាប់​រហ័ស​ដែរ​ ​ហើយ​កំពុងតែ​ធ្វើ​ពាណិជ្ជ​កម្ម​ច្រើន​ឡើង​ក្នុង​ទីផ្សារ​អន្តរជាតិ​ ​ដោយ​ពាណិជ្ជ​កម្ម​ខ្លះ​ធ្វើតាម​ផ្លូវ​អាកាស។​ ពលរដ្ឋ​របស់​ខ្លួន​ទាំង​អ្នក​ធ្វើ​ទេសចរណ៍​ ​ទាំង​អ្នក​ធ្វើ​ដំណើរ​ទាក់ទង​នឹង​ជំនួញក៏​ត្រូវ​ការ​ផង​ដែរ​នូវ​សេវា​ ​និង​ហេដ្ឋា​រចនា​សម្ព័ន្ធ​អាកាស​ចរណ៍​ទំនើប​ដើម្បី​ទ្រទ្រង់​ដល់​ពាណិជ្ជ​កម្ម​ ​និង​ការ​ធ្វើ​ដំណើរ​អន្តរជាតិ​ ​ដែល​កំពុងតែ​មាន​កំណើន​នេះ។​

លោក​ភារធារីបាន​ប្រាប់​ក្រុម​អ្នក​កាសែត​ថា​ ​កំណើន​ភ្ញៀវ​ទេសចរ​មក​ទស្សនា​កម្ពុជា​អាច​ជំរុញ​ឲ្យ​ប្រទេស​នេះចូលរួម​ជាមួយ​អនុ​សញ្ញា​ក្រុង​ ​Cape Town​ ​ដែល​នឹង​អនុញ្ញាត​ឲ្យ​កម្ពុជា​ទទួល​បាន​បច្ចេក​វិទ្យា​អាកាស​ចរ​ណ៍​ទំនើបៗ​ពី​សហរដ្ឋ​អាមេរិក។​ លោក​បាន​ថ្លែង​ជា​ភាសា​អង់គ្លេស​ ដោយ​មាន​ការ​ប្រែសម្រួលជា​ភាសា​ខ្មែរ​ថា៖​

«ប្រទេស​កម្ពុជាគឺ​ថា ​មាន​កំណើន​ទេសចរ​ច្រើន​ណាស់​ ដូច្នេះ​វា​ត្រូវ​តែ​មាន​ទំនាក់​ទំនង​ជាមួយ​នឹង​អាកាស​ចរណ៍។​ ដូច្នេះ​ វារួម​ចំណែក​យ៉ាងច្រើន​ទៅ​ដល់​កំណើន​ទេសចរ​ ដូច្នេះហើយ​បាន​យើង​ស្ថាន​ទូត​អាមេរិក​មាន​ការ​ចាប់​អារម្មណ៍​ ជួយ​នៅ​ក្នុង​ការ​ពង្រីក​វិស័យ​អាកាស​ចរណ៍​នេះដើម្បី​ជួយ​ដល់​វិស័យ​ទេសចរណ៍»។​

ប្រទេស​មួយ​ចំនួន​នៅ​ក្នុង​តំបន់​អាស៊ី​អាគ្នេយ៍​ត្រូវ​បាន​គេ​ឱ្យ​ដឹង​ថា​ ​បាន​ទាញ​យក​ប្រយោជន៍​រួច​ហើយ​ពី​អនុ​សញ្ញា​ក្រុង​ ​Cape Town​ ​ដូចជា​ប្រទេស​វៀតណាម​ ​ភូមា​ ​សិង្ហ​បុរី ​និង​ឥណ្ឌូនេស៊ី។​ ហើយ​កាលពី​ថ្ងៃពុធ​កន្លង​ទៅ​នេះ​ ​សិក្ខា​សាលា​ស្តីពី​«អាកាស​ចរណ៍​ ​និង​អនុសញ្ញា​ទីក្រុង​ ​Cape Town»​ ក៏​ត្រូវ​បាន​ធ្វើ​ឡើង​នៅ​ប្រទេស​ឡាវ​ដើម្បីពិភាក្សាស្តីពី​វិធី​ជំរុញ​ទៅមុខ​ទាក់ទង​នឹង​អនុ​សញ្ញា​នេះ។​

ការ​រៀបចំ​សិក្ខា​សាលា​ស្តីពី​«អាកាសចរណ៍​ ​និង​អនុ​សញ្ញា​ទីក្រុង​ ​Cape Town»​របស់​ស្ថានទូត​សហ​រដ្ឋ​អាមេរិក​ប្រចាំ​ប្រទេស​កម្ពុជា​ ​បាន​ធ្វើ​ឡើង​ ​នៅ​ក្រោយ​ពេល​ ​រដ្ឋាភិបាល​កម្ពុជា​បាន​សម្រេច​បង្កើត​គណៈ​កម្មការ​មួយ​ដើម្បី​សិក្សា​គម្រោង​សាងសង់​អាកាសយាន​ដ្ឋាន​ថ្មី​មួយ​ក្នុង​រាជធានី​ភ្នំពេញ​ ​បន្ថែម​លើ​អាកាសយាន​ដ្ឋាន​ដែល​មាន​ស្រាប់​ក្នុង​រាជធានី៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG